MARKA 6
6
Nazaret Jesu Deihlouhna
(Mat 13.53-58; Luk 4.16-30)
1Huan huai a kipan apawt a, a-omna kholam atungta a; anungzuite'n azui uhi. 2Sabbath ni ahong hi a, sinagog ah thu ahilh a; mi tampi athu zate'n, “Hiai mi'n hiai thu koi a kipan amuh ahia? Hiai mi kiang a pilna piak bang pilna ahia? Akhut in hichi tel a thillamdang ahih bangchidan ahia?” ana chi uhi. 3“Hiai mi Mari tapa, Jakob, Joses, Judas leh Simon sanggampa, singlem bawlpa ahi kei a hia? Asanggamnute leng hiai a i kiang ua om ahi kei ua hia?” achi ua, lamdang asa mahmah uhi. Huchi in atung ah alungkim kei uhi. 4Jesu'n akiang uah, “Zawlnei zaw ama kholam ah, ama inkote lak ah, ama inn kia lou ngal ah pahtawi louh in a-om ngei kei,” achi hi.
5Huan mi damlou tawmchikte tung a khut koih a ahihdam kia lou ngal huai ah thil thupi lua ahih kei hi. 6Agintak louh uh lamdang asa mahmah hi. Huan thuhilh kawm in khuate atawn vialvial hi.
Sawltak Sawm-le-nihte Sawlkhiakna
(Mat 10.5-15; Luk 9.1-6)
7Huan sawm-le-nihte asam a, nihnih in asawlkhia a; dawi ninte tung a thuneihna leng apia hi. 8Azinna ua ding in chiangkhun kia lou ngal bangmah, tanghou leh kawlzal leng, akawnggak ua dangka tawi louh ding achi bikbek hi. 9Khedap bel but ding achi a; puanak nih silhthuah kei un, achi lai hi. 10Huan akiang uah, “Koipeuh ah leng na tunna inn uah, huai a kipan na pawt mateng uh tung kinken un. 11Huan koi khua peuh in ahon kipahpih louh ua, na thu uh angaihkhiak kei ualeh huai a kipan na pawt chiang un, amau mohpaih ding in, na khepek nuai ua leivui kai na tatkhe ding uh,” achi hi. 12Huchi in apaikhia ua, mite akisik ding uh ahi chih agen uhi 13Dawi tampi leng adelhkhia ua, damlou tampi leng thau anilh ua, ahihdam uhi.
Baptispa Johan Sihna
(Mat 14.1-12; Luk 9.7-9)
14Huan kumpipa Herod in ana za a, amin athan ziak in, “Baptispa Johan, misi lak a pan thounawn a, huaiziak a huai thilhihtheihnate'n amah a sem ahi,” achi hi.
15Midangte'n bel, “Elijah ahi, achi ua; midangte'n, ma lai zawlneite bang zawlnei khat ahi,” achi uhi.
16Himahleh Herod in ana zak in, “Alutang ka tanpa ngei, hong thounawnta ahi,” achi hi. 17Herod in a-unau Philip zi Herodias ziak in mi asawlkhia a, Johan amansak a, suangkul ah hen in ana khum khinta a; Herodias zi in ana neita ngal a. 18Johan in lah Herod kiang a, “Na unaupa zi na neihsak siang lou ahi,” ana chih khit tak ziak in.
19Huaiziak in Herodias in amah amudah a, hihlup a-ut a, himahleh ahihthei kei hi. 20Herod in, Johan midiktat leh misiangthou ahi chih atheih ziak in amah akihta a, amah a-enkhia a, athu azak in, thil tampi ahih a, kipaktak in angaikhia hi.
21Huan Herod in apian ni in amithupite, sepaih heutu liante, Galili gam a miliante a ding a zan ankuang alui lai in hun lemtang ahong omta hi. 22Herodias tanu ahong lut a, alam a, Herod leh a-ankuang umpihte akipaksakta hi. Kumpipa'n numei naupang kiang ah, “Na deihdeih hon ngen in, ka hon pe ding,” achi hi. 23“Bangpeuh na hon nget phot, hon pe ding ka hi, ka gam kimkhat nangawn leng,” chi in akiang ah akichiam hial hi.
24Amah apawt a, anu kiang ah, “Bang ka ngen dia?” ava chi hi. Anu'n, “Baptispa Johan lutang,” ana chi hi.
25Huan amah kintak in kumpipa kiang ah ava lut pah a, “Kuangpi a Baptispa Johan lutang na hon piak pah ka ut,” chi in angen hi.
26Huan kumpipa alungkham mahmah a; himahleh akichiamna leh a-ankuang umpihte ziak in asel nuam kei hi. 27Huan kumpipa'n amah vengte lak a sepaih khat alutang va la ding a thu pia in asawl pah hi. Amah suangkul a pai in alutang ava tankheta hi. 28Huai lutang kuang in ahon tawi a, numei naupang kiang ah apia a, huan numei naupang in anu kiang ah apeta hi. 29Huan anungzuite'n azak un, aluang la in, han ah avuita uhi.
Sawltakte Kikna Leh Mipi Sangnga Vakna
(Mat 14.13-21; Luk 9.10-17; Joh 6.1-14)
30Huan sawltakte Jesu kiang ah ahong kikhawm ua, thil bangkim, athilhih peuh uleh athuhilh peuh uh, ahong hilh uhi. 31Ama'n akiang uah, “Noumau kia in gamdai mun ah atuam in hong unla, khawl tadih un,” achi hi. Mipi atam a, akuan leh apai akiphamat ua, an nangawn leng ane man kei uhi. 32Huchi in gamdai mun ah long in apaituamta uhi.
33Mite'n apai lai uh amu ua, mi tampi in amau athei ua, kho chih a pan huai ah khe in ataikhawm ua, ana makhelhta uhi. 34Huchi in amah hong paikhiak in mipi tampitak amuta a, chingtu ding nei lou belamte bang ahih ziak un alainat mahmah a, thu tampi ahilhta hi. 35Huan ni akai mahmahta a, anungzuite akiang ah ahong ua, “Hiai gamdai mun ahi a, ni akaita mahmah hi. 36I kim a loute leh khuate a hoh a, anek ding uh banghiam bek aleitheihna ding un amaute paisakta in,” achi uhi.
37Ama'n bel akiang uah, “Noumau nek ding pia un,” chi in adawng hi. Amau akiang ah, “Makhai zanih man tanghou va lei in nek ding pe ding ka ding uam?” achi uhi.
38Ama'n akiang uah, “Tanghou phel bangzah na nei ua? Hon en dih ua,” achi a. Huan aneih zah uh atheihtak un, “Nga leh ngasa nih,” achi uhi.
39Huan ama'n, avek un loupa hing tung ah apawlpawl a tusak ding in akiang uah thu apia hi. 40Huchi in apawlpawl in, zakhat khawng, sawmnga khawng in atu uhi. 41Huan ama'n tanghou phel nga leh ngasa nih ala a, van lam en in avualzawl a, tanghou phelte abalkham a, ama ua lui ding in anungzuite kiang ah apia a; ngasa nih leng huaite tengteng lak ah ahawmzak hi. 42Avek un ane ua, akham chiat uh. 43Huan tanghou leh ngasa nente bawm sawm-le-nih adim hi. 44Tanghou phel nete pasal piching ngen sangnga ahi uh.
Tui Tung Ah Khe In Jesu Apai
(Mat 14.22-33; Joh 6.15-21)
45Huan mipi akikhensak nung in gal khat lam a Bethsaida a na pai masa ding in long ah anungzuite atuangsak pah hi. 46Amau akikhensak nung in thum ding in tang ah ahohtou hi. 47Nitaklam ahong hih in, tuipi laitak ah long a-om a, amah kia in gam ah a-om hi. 48Long kalh a mangbang in amaute amu a, huih in ahilou lam ah asep hi. Huchi in zanven lina ding kuan in tuipi tung a khe a pai in amau lam ahon zuan a, amau paisuak san atum hi. 49Himahleh amah tuipi tung a khe a pai amuh un sikha sa in, akikoukhia uhi. 50Avek un amah amu ua, alau mahmah uhi. Himahleh ama'n amau ahoupih pah a, akiang uah, “Khamuangtak in om un, keimah ka hi, lau kei un,” achi hi. 51Huan long ah akiang uah atuangtou sam a, huih adai maimah hi. Huan lamdang asa mahmah uhi. 52Alungtang uh akhauh ziak in tanghou beu thillamdang thu angaihtuah ban kei uhi.
Gennesaret A Hihdamna
(Mat 14.34-36)
53Huan gal khat lam akai un Gennesaret gam atung ua, luipiau ah long akhih uhi. 54Long a kipan apawt nung un mite'n amah ana thei pah uhi. 55Huai gam kim tengteng ah atai ua, a-om chih azakna peuh uah alupna un damloute ahon zawng hial uhi. 56Huan khoneu leh kholian ah khopi leh khota leh koipeuh ah leng alutna ah damloute, dawr mun ah alumsak ua, apuan mong bek khoihsak ding in angen ngutngut uhi. Huan amah khoih peuhmah adam uhi.
ที่ได้เลือกล่าสุด:
MARKA 6: PAITBSI
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
