MARKA 12
12
Grephuan Gentehna Thu
(Mat 21.33-46; Luk 20.9-19)
1Huan gentehna thu in akiang uah agen a, “Mi kuahiam in grephuan abawl a, akim huang in a-um a, grep sukna ding khuk atou a, insang alam a, loukhou mite kiang ah khohloh ding in apia a, gamdang ah apaisanta hi. 2Agah loh hun in atansik amau kiang a kipan la ding in lou khohloh mite kiang ah sikha khat asawl hi. 3Huai mi ana man ua, avua ua, khutvuak in apaisak uhi. 4Huan sikha dang akiang uah asawl nawn a; huai mi leng alu ana hihliam ua, zumhuaipi in ana bawl uhi. 5Huan sikha dang asawl nawn zel a; huai mi ana that ua, sikha dang tampi leng, khenkhat ana vua ua, khenkhat ana that uhi. 6Huan sawl ding khat, atapa deihtak kia anei lai hi; ‘Ka tapa zaw ana zahtak ding uh’ chi in amah ananungpen in akiang uah asawl hi. 7Himahleh huai lou khohloh mite'n, ‘hiai mi gouluah dingpa ahi; i that ding uh aw; huchi in agouluah ding ei a ahi mai ding,’ akichi uhi. 8Huchi in amah aman ua, that in, grephuan a pan alawnkhia uhi. 9Huaiziak in grephuan neipa'n bangchi in ahon hih dia? Lou khohloh mite ahon hihmangthang dia; grephuan midangte ape ding hi. 10Hiai Laisiangthou na sim kei ua hia?
‘Inn lam mite' suang deih louhpen,
huai mahmah aning a suang
phatuampen ahong hita hi.
11Huai Toupa hih ahi, i mitmuh un alamdang hi, chih,’ ” achi hi.
12Huan amah mat atum ua; himahleh huai gentehna thu amau dem a agen ahi chih atheih ziak un, mipite alau uhi. Huchi in amah anusia ua, apaimangta uhi.
Leiman Thu A Dotna
(Mat 22.15-22; Luk 20.20-26)
13Huan athugen a mat ahihtheihna ding in Pharisaite leh Herod pawl a mi kuate hiam akiang ah asawl uhi. 14Huchi in amau ahong tun un akiang ah, “Sinsakpa, midiktat na hi a, deihsak tuam kuamah na nei kei chih ka thei uh, kuamah khentuam nei lou in, chihtak ngial in Pathian lam thu na hilh zel hi; Kaisar kiang a leiman liau asiang hia siang lou? 15Pe ding ka hi uhia, pe lou ding?” achi uhi. Ama'n alepchiahdan uh thei in, akiang uah, “Bangziak a hon ze-et na hi ua? Makhai hon tawi un, ka en ding,” achi hi. 16Ahon tawi ua, ama'n akiang uah, “Hiai kua lim leh kua min ahia?” achi hi. 17Amau, “Kaisar a,” achi uhi. Jesu'n akiang uah, “Kaisar thilte Kaisar kiang ah pia unla, Pathian thilte Pathian kiang ah peta unla,” achi hi. Huchi in lamdang asa mahmah uhi.
Thohnawnna Thu A Dotna
(Mat 22.23-33; Luk 20.27-40)
18Huan Saddukai, thohnawnna a-om kei chite, akiang ah ahong ua, 19akiang ah, “Sinsakpa, Mosi in, kuapeuh a-unaupa'n ta nei lou in azi sihsan taleh a-unaupa'n azi luah in a-unaupa a ding in chi asuahsak ding chi in ahon gelhsak hi. 20Ahi, sal sagih a-om ua; a-upapen in zi anei a, chi suah lou in asi hi. 21Huan anihna in aluah a, chi suah lou in asi nawn zel a; athumna in huchi mah bang in. 22Huchi in sal sagihte chi suah lou in asita ua, atawpna ah numei leng asita hi. 23Thohnawn hun in akua pen zi ahi dia le? Sagihte'n zi in anei chiat ngal ua,” chi in adong uhi.
24Jesu'n akiang uah, “Hiai ziak hilou hia, na theihkhelh nak uh, Laisiangthou leh Pathian thilhihtheihna na theih louh ziak un? 25Misi lak a pan athohnawn hun un zi leh pasal a kinei lou in, van angelte bang ahi zawta ding uh ahi. 26Huan misite kaihthoh a a-om ding thu lah Mosi laibu a loubukh kuang thu a Pathian in, ‘Kei Abraham' Pathian, Isak' Pathian leh Jakob' Pathian ka hi, chi a, amah ahoupihdan na sim kei ua hia?’ 27Amah misi Pathian ahi kei a, mihing Pathian ahi zaw; na theikhial tel uh,” achi hi.
Thupiak Thupipen Thu A Dotna
(Mat 22.34-40; Luk 10.25-28)
28Huan laigelhmite lak a mi khat ahong a, akisel uh ana ngaikhia a, Jesu'n amaute thutak in adawng chih athei a, akiang ah, “Thupiak tengteng ah koi ahia thupipen?” chi in adong hi.
29Jesu'n, “Athupipen hiai ahi; Israel aw, ngai dih uh, Toupa i Pathian uh Toupa khat kia ahi; 30‘Toupa na Pathian na lungtang tengteng in, na kha tengteng in, na lungsim tengteng in leh na hatna tengteng in na it ding ahi,’ chih. 31Azom hiai ahi, ‘Nangmah na ki-it bang in na vengte na it ding,’ chih. Hiaite sang a thupiak thupizaw a-om kei,” chi in adawng hi.
32Laigelhmi'n akiang ah, “Hina ngei e, Sinsakpa amah zaw khat kia ahi a, amah lou zaw kuamah dang a-om kei, 33amah lungtang tengteng, theihsiamna tengteng, hatna tengteng a it a, eimah i ki-it bang a vengte it halmang thilpiak leh kithoihna tengteng sang in ahoihzaw petmah chih, na gen dik ngei,” achi hi.
34Piltak in adawng chih Jesu'n atheih in akiang ah, “Pathian lalgam na gamlat kei hi,” achi a, huai nungsiah kuamah in thu adong ngamta kei uhi.
Messia Tanchin Dotna
(Mat 22.41-46; Luk 21.5-6)
35Huan tempul a Jesu'n thu ahilh lai in, amau ahoupih a, “Khrist David tapa ahi chih laigelhmite'n bangchidan a gen uh ahia? 36David ngei in, Kha Siangthou in, Toupa'n, ka Toupa kiang ah, ‘Na melmate na khepek ngakna a ka bawl masiah ka taklam ah tu in, achi,’ achi hi.
37“David ngei in amah Toupa, achi ngal a, koi a kipan in ahia amah atapa ahih?” achi hi. Huan mivantang in kipaktak in athu angaikhia uhi.
Laigelhmite Vauna
(Mat 23.1-36; Luk 20.45-47)
38Huan athuhilhna ah, “Laigelhmite lak ah pilvang un; amau puanaktual silh a vak a-ut ua, dawr munte ah mite chibai abuk ua, 39sinagog ah tutphah hoihpen leh ankuangluina a mun hoihpen adeihtuam nak uh; 40meithai inn anegai ua, kilimbawl in sawt pipi athum uh; huaite'n siam louh tanna lianzaw atang ding uh,” achi hi.
Meithai Thilpiak
(Luk 21.1-4)
41Huan sumkholna zawn ah atu a; sumkholna a mipi sumkhiakdan a-en a; mihau tampitak in tampipi akhia uhi. 42Meithai zawngtak ahong pai a, dal dangka muza nih akhia a, huai tuh paihsa khat hu ahi. 43Jesu'n anungzuite asam a, akiang uah, “Chihtaktak in ka hon hilh ahi, sumkholna a khe tengteng lak ah hiai meithai zawngtak in akhe tampen hi. 44Hiaite tengteng in aneihlet uh akhia ua; ama'n zaw adeihthoh laitak, aneihsun, ahinna ding tengteng akhe vek ahi,” achi hi.
ที่ได้เลือกล่าสุด:
MARKA 12: PAITBSI
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
