MARKA 11
11
Jerusalem A Jesu Lutna
(Mat 21.1-11; Luk 19.28-40; Joh 12.12-19)
1Huchi in Jerusalem khua tung ding a akisak ua, Olive tang a Bethphage leh Bethani kho kiang atun un, anungzuite lak a mi nih asawl a, akiang uah, 2“Na mazawn ua khua ah va hoh unla; na lut tung un sabiltungnou kikhih, kuamah tuan ngeilouhna, na mu ding ua; phel unla, hon kai un. 3Huan kuapeuh in, huai bangziak a hih ahon chih uleh, Toupa'n adeih a ahi; hiai ah ahon koihsak nawn pah na ding, na chi ding uh,” achi hi.
4Huan ahohta ua, kongzing ah kongkhak polam a sabiltungnou kikhih ava mu ua; huai aphelta uhi. 5Huai a dingh kuate hiam in, akiang uah, “Sabiltungnou bangziak a phel?” achi uhi.
6Amau Jesu gen bangtak in akiang uah agen ua; huchi in aphalta uhi. 7Huan Jesu kiang ah sabiltungnou ahon kai ua, atung ah apuante uh aphah ua; atung ah atuangta hi. 8Mi tampi in lampi ah apuan uh aphah ua; midang in leng gam a sawlnah sat in aphah uhi. 9Amalam a paite leh anunglam a hon zuite'n:
“Hosanna! Toupa min a hong pai ahampha!
10Gam hong tung ding, i Pa
David lalgam ahampha!
Tungnungpen ah Hosanna!” chi in akikou uhi.
11Huan Jerusalem a tempul ah ava lut a; bangkim a-et velvel khit in nitaklam leng ahong hita a, apawt a, sawm-le-nihte toh Bethani ah apaita uhi.
Theipi Kung Hut
(Mat 21.18-19)
12Azing in Bethani a kipan apawt nung in agil ahong kialta hi. 13Theipi kung nah nei gamlapi ah amu a, agah ka muh khakleh chi in ava zuan hi; ava tun in anah kia lou ngal bangmah amuta kei a; theipi gah hun ahi kei him hi. 14Huchi in Jesu'n sing ahoupih a, “Tuban tangtawn in nang a pan kuamah in gah ne nawnta kei hen,” achi hi. Anungzuite'n huai aza uhi.
Jerusalem Tempul Hihsianna
(Mat 21.12-17; Luk 19.45-48; Joh 2.13-22)
15Huan Jerusalem khua atung ua, tempul ah ava lut a, tempul a zuak mite leh lei mite adelhkhia a, dangka kheng mite dohkante leh vakhu zuak mite tutphah asawnpuksak hi. 16Tempul a mite'n van alut paisuakpih uh aphalta kei hi. 17Huan amaute sinsak in akiang uah, “Ka inn nam chih a ding in thumna inn achi ding uh, chih gelh ahi kei a hia? Nou suamhatte khuk in na bawl ua,” achi hi.
18Siampu liante leh laigelhmite'n huai aza ua, amah hihmanthat theihna ding azongta uhi; mipi tengteng in athuhilh lamdang asak ziak un amah alau uhi. 19Huan nitaklam ahong hih in khopi a kipan apawtkhia uhi.
Theipi Kung A Pan Sinlai
(Mat 21.20-22)
20Huan zingsang a apai kawm un huai theipi kung azung tanpha vuai khin in amuta uhi. 21Huchi in Peter in theikhia in akiang ah, “Heutupa, en dih; theipi kung hamsiat na loh ana vuai khin vekta,” achi hi.
22Jesu'n akiang uah, “Pathian gingta un. 23Chihtaktak in ka hon hilh ahi, kuapeuh in hiai tang kiang ah, na kisuan inla, tuipi ah na kipailut in chi a, alungtang a ginglel lou a agen atung ngeingei ding chih gingta peuhmah in agen bangbang amu ding uhi. 24Huaiziak in ka hon hilh ahi, bangkim thum a na nget peuhmah uh musa in kiging unla huchi in na mu ding uh. 25Thum a na din peuhmah chiang un kua tung ah leng thubuai banghiam na neih uleh ngaidam un; na Pa uh van a om in leng na tatlekna uh ahon ngaihdam theihna ding in. 26Himahleh na ngaihdam kei uleh, na Pa uh van a om in na tatleknate uh ahon ngaidam sam kei ding,” chi in adawng hi.
Jesu Thuneihna Ginlelhna
(Mat 21.23-27; Luk 20.1-8)
27Huan Jerusalem khua atung nawn ua; tempul a avak lai in siampu liante, laigelhmite leh upate akiang ah ahong pai ua, 28akiang ah, “Kua thu in ahia hiai thilte na hih? Hiai thilte hih ding in kua'n ahia nang thu hon piak?” achi uhi.
29Jesu'n akiang uah, “Ke'n leng thu kam khat ka hon dong sam ding, hon dawng le uchin, huchi in kua thu in ahia hiai thil ka hih chih ka hon hilh ding,” achi hi. 30“Johan Baptisma van a kipan hia; mihing a kipan? Hon dawng un,” achi hi.
31Huan akingaihtuah ua, “Van a kipan chi lehang, Bang achia athu gingta lou na hi ua, ahon chi dia; 32himahleh mihing a kipan chi leng mipi akihta ua; mi tengteng in Johan zawlnei taktak in abawl chiat uhi.” 33Huchi in Jesu adawng ua, “Thei kei ung,” achi uhi. Jesu'n akiang uah, “Ke'n leng kua thu in ahia hiai thilte ka hih, ka hon hilh sam kei ding,” achi hi.
ที่ได้เลือกล่าสุด:
MARKA 11: PAITBSI
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
