Colosenses 1
1
Spatulab'il k'ujolal
1-2Jmoj aljel jumasa b'a Colosa:
Ja ke'n Pablo jb'i'il, sok ja Timoteo, wax jekatikon spatulab'il a k'ujolex. Ja we'nlexi kwentaxa ayex sok ja yuntikil ja Dyos mi kwalkyera'uki, wanixa wa' lek sniwanil a k'ujolex ja Kajwaltik Jesusi. Ja k'en sjekab'anumon ja Kajwaltik Jesusi, yuj ja Dyos ja Tatal kujtiki.
Wax k'ana sok spetsanil jk'ujol ja Tatal Dyos sok ja Kajwaltik Jesús a ya'wi'ex ja syajal sk'ujoli, sok a cho ya'wex laman.
Ja Pablo ya'yi ts'akatal ja Dyosi
3Jmoj aljel jumasa, kada k'ak'u wanix k'umantikon ja Dyos yuj ja we'nlexi, wax ka'tikon yi ts'akatal ja Dyos ja stat ja Kajwaltik Jesusi, 4Yuj ja kab'tikontani yab'alil wanixa wa'wex lek sniwanil a k'ujolex ja Kajwaltik Jesús ja we'nlexa, cho jel waxa yajtayex spetsanil ja ma kwentaxa ay sok ja yuntikil ja Dyosi. 5Ja we'nlexi jach' waxa k'u'lanex, ja jastal a wabyex ja smeranil ja yab'al ja Dyosi, waxa na'awex lek ja jas snolonej a wi'ex ja Dyos b'a satk'inali. 6Ja tsamal ab'al iti, wa'n alxel b'a sutanal ja schonab'il jumasa ja Roma, sok jelni ja ma wa sk'u'ana. Jach' ek' sok ja we'nlex ja k'ak'u a wabyex yab'alil meran jel wa syajtayex ja Dyosi. 7Ja jawi ye'n ya a neb'ex ja Epafrasi, jmoj jb'ajtikon a'tel sok ja ye'n, jel toj wax ya'telta ja Kajwaltik Jesusi. 8Ye'n yi'a jan ki'tikon b'a yal kab'tikon jastal ayex, ja we'nlexi, slo'ilta kab'tikon jastal wax ya' syajta sb'aj ja kristyano, yu ja Espiritu Santo.
Ja Pablo wa sk'ana a a'juk yipe ja kermanotik jumasa b'a Colosa
9Man yajni kab'tikon spetsanil ja jastal iti, mini t'un wax ka'tikon kan sk'umajel ja Dyos yuj ja we'nlexa. Sok wanix k'anatikon yi ja Dyos a ya a na'ex ja jas wa sk'ana ja ye'n sok a ya a na'ex spetsanil ja jas t'ilan oj a na'exi, cho jach'ni ja jas oj ya a na'ex sok ja jas wax ya'a na'ex ja Espiritu Santo. 10B'a jach' oj b'ob' ajyanik jastal wa sk'ana ja Kajwaltiki, jaxa ye'n jel gusto oj ajyuk a mokex yuj ja wax ch'ak a k'u'lukex spetsanil ja jastik b'a leki, oj cho a na'ex jastal ay ja Dyosi. 11Yuj ja jel ja yip ja Dyosi, ja'yuj ja we'nlexi oj ja ta' lek a wipex, sok oj b'ob' ek' awujilex ja wokol jumasa oj jakuka b'ajexi. Ja jachuki, jel tsamal, 12oj a wa'wex yi ts'akatal ja Dyos Tatali. Yuj ja ye'nani schapunejotik b'a oj ochkotik ja b'a waj kulan b'a it xlijpixta, ja sdote sk'apunej yi ja yuntikil jumasa it stsa'uneji. 13Ye'n ya elkotik ja Dyos ja b'a yoj k'ik'inal aytik ajyi, ti yi'ajotik b'a wa kulan ja yunini, 14yuj ja ye'nani cham b'a skoltayotik ja ke'ntiki, sok sch'aya spetsanil ja jmultiki.
Ja ya'tel ja Kajwaltik Jesusi
15Ja Kajwaltik Jesusi, jani yunin ja Dyosi, ja ye'ni ti'xani ay ja yora mitox kujlaji ja satk'inal sok ja lu'umi; ja ye'n jachuk ja jastal ja Dyos it mix kilatiki. 16Yuj ja ye'n, ja'yuj ja Dyosi, sk'u'lan spetsanil ja jas wax ilxi b'a satk'inal sok b'a lu'um k'inali, ja jas wax b'ob' ilxuki sok ja jas mix b'ob' ilxuki, cho jach'ni ja ma' ik' ason ay ek'i jel ja yipe, sok wax b'ob' yal'e ke ayni lek ya'tele'. Yuj ja Kajwaltik Jesusi, ja'yuj ch'ak sk'u'l spetsanil ja Dyosi, sok nakani sb'aj ye'n ja Kajwaltik Jesusi.
17Ja Kajwaltik Jesusi, ja mito jas ay ja b'a lu'umi, jaxa ye'n ti'xani aya. Yuj ja ye'n, ja'yuj ay lek sb'ej ja jastal ay ja kosa jumasa, 18sok ye'n wa stalna ja kermanotik jumasa, sok wax ya'yi sak'anil. Ye'n ja jel niwan ja ya'teli, jaxa yuntikili, ja'ni ja skwerpo'a.
Ja Kajwaltik Jesusi, ye'nani b'ajtan ay yuj spetsanil ja kosa jumasa'a. Ja'yuj cho ye'nani b'ajtan sak'wi'a, b'a jach' ye'n b'ajtan oj ajyuk b'a spetsanil ja kosa jumasa. 19Sok ja ye'n ti wax ta'a ja kiptik it mi tukuki.
20Yuj ja Kajwaltik Jesusi, ja'yuj ja Dyosi, ya ajyuk laman spetsanil ja swinkil ja lu'umi, ja'ni yuj ja ye'na. Jach' k'ot smeranil yuj ja ti cham b'a Cruz ja yunini.
Ja Kajwaltik Jesusi, wax ya kil b'ajtik lek sok ja Dyosi
21-22Ja ajyi ja we'nlexi, najat ayex sok ja Dyosi, sok koraja waxa wilawex, ja wajel a k'ujolex sk'ulajel sok ja waxa k'u'lanex ja jastik b'a mi lekuki. Jaxa yani, lek xa a wila b'ajex sok ja Dyos yuj ja cham, ja yunini, ja ma jak manxuk jastal ja ke'ntiki. Jach' sk'u'lan ja Dyosi, ja b'a mey a mulex oj waj a je'a b'ajex ja b'a sti sat ja ye'n. 23Ja iti jach'ni oj ajyuka, kechani ta yuj toj oj ajyanik ja jastal waxa k'u'anex ja Kajwaltik Jesusi, cho k'u'anik ja jas wa sk'apa ki'tik ja b'a tsamal yab'al ja Dyosi. Ja ab'al iti, alxita ek' b'a sutanal ja schonab'il jumasa ja Roma, cho ti'ni ajyiyon ek' yaljel ja ke'na.
Ja ya'tel ja Pablo
24Jel gusto ayon wax kab' yuj ja wokol wa'n yi'jel ja kwerpo yuj ja we'nlexi, yuj ja jachuki ja wa'non skoltajel ja skwerpo ja Kajwaltik Jesusi, yuja wokol jumasa wan yijeli, ja'ni yu ja jmoj aljeltik jumasa'a. 25B'a wa lekil we'nlex, ja Dyosi, ya' ochkon b'a oj ka'telta ja moj aljeltik jumasa, cho sjekawonta b'a oj kal ek' ja yab'ali. 26Ja ab'al iti, wax yala jastal schapunej ja Dyos man najate, mini ma wax ya sna'a, ja ya'n sna'aweta, ja yuntikil jumasa it stsa'unej xa. 27Ja Dyosi, yala oj ya sna' spetsanil ja swinkil ja niwak chonab' jumasa ja jas jel niwan sok jel tsamal chapan yuji, jach' jastal iti: Ja Dyosi, sjeka ja Kajwaltik Jesús b'a ti oj ajyuk a mokexa, sok oj ya' lek sniwanil a k'ujolex b'a oj ja wal a b'ajex ja jastal jel tsamal ja yip ja Dyosi.
28Ja ke'ntikoni, ja wa'ntikon yaljel ek' ja yab'al ja Kajwaltik Jesusi, spetsanil ja janek' wax na'atikoni, wax kalatikon, sok wax je'atikon yi'e spetsanil ja kristyano jumasa, b'a jach' oj b'ob' ajyuke toj jastal ja Kajwaltik Jesusi. 29Yuja iti, ja'yuj wa'non a'tel sok ja yip ya'ojki ja Kajwaltik Jesusi.
Iliyochaguliwa sasa
Colosenses 1: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021