Filipenses 4
4
Ja jmoj aljeltik jumasa
1Jmoj aljel jumasa, sok ma'tik lek wax kila jb'ajtikik, jel gusto, sok jel lek ayon amokex ja we'nlexi. —Ja smeranili jel tuk wax kab' ja mix kilawexi. Mok a wa'ex k'an sk'u'ajel ja Kajwaltik Jesusi—
2Wax k'ana yuj ja Evodia sok ja Sintique, a slaj sb'aje lek, schawanile sk'u'ane ta ja Kajwaltik Jesusi. 3Cho jach'ni ja we'n lekil moj a'tel, wax k'ana oj ja koltaye. Ja ye'nle'i, lajan jel ki'aj soke yaljel ek' ja lekil ab'ali, moj b'ajtikon sok ja Clemente sok ja tuk jmoj a'tel jumasa. Spetsanil ja sb'i'il ye'nle'i, ti'xa ts'ijb'anub'al b'a sju'unil ja sak'anil b'a mi oj ch'akuki.
4—Gusto ajyanik yuj ja a k'u'anexta ja Kajwaltik Jesusi. Kalata wabyex oj cho kala wabyex otro bwelta: —gusto ajyanik yuj ja a k'u'anexta ja Kajwaltik Jesusi. 5B'a jach' oj sna' spetsanil ja swinkil ja lu'um jastal jel lek la yajtaniyexi. Ja Kajwaltik Jesusi, jelxa mojan jakum.
6Mok jas chamka k'ujolex. Ja mas leki, kechan k'umanik ja Dyosi, k'anawik yi spetsanil ja jas mey a wi'ojexi, k'anawik yi jitsan ts'akatal. 7B'a jach' laman oj ya'ex ja Dyosi, ja jastal jawi mi sna'a jastal oj sta' ja swinkil ja lu'um iti, jaxa ma' sb'ajxa ye'n ja Kajwaltik Jesusi, oj sta' skoltajel ja yaltsili sok jel ja jas oj sna'i.
8Ja'yuj jmoj aljel jumasa, ja oja waj a k'ujolex spetsanil ja b'a smeranili, spetsanil ja b'a sb'ej oj kisxuki, spetsanil ja b'a toj sok b'a leki; ja'xa na'awex spetsanil ja b'a wax na'xi yuj stojolili sok spetsanil ja b'a oj makunuk sok b'a sb'ej oj toyxuki.
9Neb'awik spetsanil ja jastik je'ata a wi'exi, k'u'lanik spetsanil ja jas a wilawex jk'u'lan sok ja jas a maklayex kala, jaxa Dyos ma wax ya'awotik lamani, ti' oj ajyuk a mokex tola bida.
Ja Pablo sk'ana yi ts'akatal ja swinkil filipo
10Jel gusto wax kab' yuj ja jmoj aljelxa jb'ajtik b'a sb'i'il ja Kajwaltik Jesusi, cho jach'ni yuja waxa na'awonex ja ke'n. Ja ke'n wax na'a yujni me'xa ch'ayawonex a k'ujolexa, kechan me'xa ta'awex jastal oj ja koltayonex. 11Kechan mix kala wabyex ta yuj ay jas mey kuj, yuj jneb'unej ke gusto oj ajyukon sok ja janek' ki'oji. 12Wax na'a lek jastal wax ek'uj ja kwando mi jas ki'oji, cho jach'ni ja kwando ay ki'oj spetsanili, wax na' lek ja chikan jastal oj ek' kuji, a'nima jel jitsan ja jas oj kab'i, ma oj tek' wa'in; a'nima ay ki'oj, ma mi jas ki'oj. 13Ja Kajwaltik Jesús ya'oj kip b'a oj ek' kuj spetsanil ja wokol oj jak jb'aji. 14Ja slekili, jel lek waj yuja a koltayonex ja we'nlexi yuj ja a koltayonex ja b'a wokol jumasa.
15Ja sb'ajtanil yajni ke kal ja lekil ab'ali, ja yajni elyon ja b'a Masedonia, kechani we'n a koltayonex ja janek' jmoj aljelxa jb'ajtikik b'a Filipo. Me'y tuk jmoj aljeltik ma' skoltayon. 16Jaxa yajni ti ayon b'a Tesalonica, wax k'ana nike ma' oj skoltayon, cho we'n a jekawex jkoltajel otro vuelta. 17Mi wax kala yuj ay jas oj ja wawex ki, kechan wax k'ana yi ja Dyos b'a a sna'ex lek.
18Ja Epafrodito ch'ak ya'ki spetsanil ja jas a jekawex ki'i, jelni jitsan a jekawexa. Ja jastal koltaniyexi, jel lek, jach' jastal ja smajtan ja Dyos x'ajb'ani yik'il b'a wax yi'aj lek sok b'a lek wax yab'i. 19Ja'yuj, ja jastik jel tsamal yi'oj ja Dyosi, oj ya'wi'ex spetsanil ja jas mey a wi'ojex yuj ja waxa k'u'anex ja Kajwaltik Jesusi. 20—A petsanilex toyowik ja Tatal Dyos kujtik b'a spetsanil k'ak'u—. Jach'ni'a.
Ja spatulab'il k'ujolal jumasa b'a stik'anali
21Wax jeka spatulab'il sk'ujole spetsanil ja jmoj aljeltik jumasa, yuj ja Kajwaltik Jesús ochyeta yuntikilil ja Dyosi.
Ja jmoj aljeltik jumasa ma' ti' aye jmoki, wax cho sjekawe spatulab'il a k'ujolex ja ye'nle'i. 22Jach' wax cho sjekawe spatulab'il sk'ujol spetsanil ja ma' ochyeta yuntikilil ja Dyosi, cho jach'ni ja ma'tik wax a'tiji ye b'a sok ja mandaranum b'a Roma.
23—Ja' Kajwaltik Jesús ja oj ya'wi'ex ja syajal sk'ujol b'a wa sak'anilexi—. Jach'ni'a.
Iliyochaguliwa sasa
Filipenses 4: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021