Colosenses 2
2
1Ja ke'n wax k'ana oj a na'ex, ke jel wax k'ujolanex yuj ja we'nlex mojaljel jumasa b'a chonab' Laodicea, sok ja ma'tik mi sna'we jb'aj satilajel ab'ali. 2Sok wax le'a jastal wax tsatsal k'ujolanex a petsanilex, b'a jach' tsoman oj ajyanik sok ja syajal sk'ujol ja Kajwaltik Jesusi, b'a jach' oj ja na'ex lek, sok oj ja k'u'ukex spetsanil ja jas nak'an chapan yuj ajyi ja Dyos sok ja Kajwaltik Jesusi. 3Spetsanil ja slekil ja jas wax na'xi, sok ja jas neb'xita ti wax ilxi satilajel ab'al ja Kajwaltik Jesusi. 4Wax kala wabyex ja iti, b'a mok ma slo'layex sok ja jas jel tsamal oj yal'e' y mi meranuk. 5A'nima mi tey kon a mokexa, kada k'ak'u ti' wax na'awexa, sok jel gusto wax kab' ja toj ayexi, mok a wa'wex kan sk'u'ajel ja jas wax yala ja Kajwaltik Jesusi.
Ja yajk'achil bida wax ya'a ja Kajwaltik Jesusi
6Ja we'nlexi, a k'u'anexta ja Kajwaltik Jesús sb'ajexa ye'na sok ye'nxa a wajwalex. Ja'yuj jel t'ilan jach' oj ajyanik jastal wa sk'ana ja ye'n. 7Jach'ni jastal sje' a wi'exi, cho k'u'anik lek ja jas wax yala, b'a jach' kada k'ak'u oj a na'ex, oj cho ja wawex yi lek ts'akatal ja Dyosi.
8Talna a b'ajik. Mok a maklayex ja jas wax yalawe ja ma'tik lajan sok jel wa sna'awe'i, sok ja ma'tik jel tsamal ja jas wax yalawe'i, oj xta a wal ke yuj jel wa sna'awe, ja jas wa sje'awe'i, ye'n ita wax ya el b'a s'olome. Ja kristyano jumasa jawi, wa sk'u'ane ja yip ja ma' ik' ason ay ek' b'a lu'um iti, ja' wax ya'we kan pilan ja Kajwaltik Jesusi.
9Ja Kajwaltik Jesusi, lajan sok ja Dyosi, 10sok Ye'n yib' k'ab'al ay yuj spetsanil ja ma ik' ason ay ek' it jel ja yipe sok jel niwan ja ya'tele wax yabye'i. Ja we'nlexi, mi jas meyuk a wujilex, yujni ti'ni ayex sok ja Kajwaltik Jesusi.
11Ja judio jumasa ma' wax yi'aj senya ja b'a sk'unile'i ti oj na'xuk yuj ti'xa aye sok ja yuntikil ja Dyosi. Jaxa we'nlexi, ye'n ja Dyos ya ochani yuntikil ja yajni wa'a ta'a b'ajex sok ja Kajwaltik Jesusi, jach' ya eluk a wi'ex jastal jaw, ja jastal jel gusto waxa le'a ja wa mulex ajyi. Ja jaw, ja wa senya'ex it ya'wi'ex ja Dyos ja we'nlexi. 12Ja yajni a wi'ajex ja' ja we'nlexi, ja ti wajyex mukan lajan sok ja Kajwaltik Jesusi. Cho sak'wiyex ja yajni sak'wi ja Ye'n, yuj ja a wa' sniwanil a k'ujolex ja yip ja Dyosi. 13Ja we'nlex ja b'ajtani, lajan sok chamelni ayexa, yuja ja wajel a k'ujolex sle'jel ja wa mulexi, cho mini kwenta ayukex sok ja yuntikil ja Dyosi. Jaxa ya'n, Dyos ya'ata ja wa sak'anilex sok ja Kajwaltik Jesusi, cho sch'aya spetsanil ja wa mulex jumasa. 14Ja ab'al it ts'ijb'anub'ali, mini lek xyilawotik ajyi'a, jaxa Dyosi, ya k'ot timan ja ab'al jaw yuj ja ti cham b'a Cruz, ja Kajwaltik Jesusi. 15Ja Dyosi, ya elyi ja yipe ja ma' ik' ason aye ek' jel ja yip wax yabye'i, yuj ja Kajwaltik Jesusi, jel ch'in iljiye b'a sti' sat spetsanil ja kristyano jumasa, ja yajni choljiye, a'ji paxyalanuke jastal ma lutan, ja'ni ti oj ilxuk ta oj b'ob' yujile'a.
16Mok a wa'a b'ajex ma oj ya'ex yochel yuj ja jas waxa wabyex sok ja jas waxa wu'ajexi, ma yuj ja mi waxa k'u'lanex jun k'ini, ma yuj mi waxa kisawex ja yajni wax kajpuji ja nan ixawi, ma sk'ak'ujil jijlel. 17Spetsanil ja jastal jawi, kechan ita jastal jun axub' wa'n lo'lanel yuj ja jas ti jakumi. Jas tojolil sok ja smeranili, ja'ni ja Kajwaltik Jesusi. 18Ja'yuj mok a wa'a b'ajex ke ay ma oj st'en'ex, mitoni sok ja ma'tik wa sk'u'ane ja anjel jumasa, it ma' wa sje'a sb'aje jel leke'i. Wax yalawe ke ay jas wa snaj satine, kechan wa'ne le'uj ab'al. Kechan ja wane pensar jastal oj stoy sb'aje, toj malo ja jas wajel sk'ujol'ei. 19Ja jaw jumasa mini ti ayuke sok ja Kajwaltik Jesús ja ma Ye'n wa stalna ja moj aljeltik jumasa, sok ja ma ye'n wax ya'yi yipi. Ja Kajwaltik Jesusi, wax ya'yi ja jmoj aljeltik jumasa spetsanil ja jas wa sk'ana, wax cho stsomo spetsanil jastalni yaloj ja Dyosi.
Jach oj ajyukotik jastal wa sk'ana ja Dyosi
20Ja we'nlexi, ti'xani ayex sok lajan ja Kajwaltik Jesusi yuj ja ti cham b'a Cruz ja ye'n, cho mixa ti ayukex sok ja tantik ma' ik' ason aye ek' wa sk'elawe jastal ay ja lu'um iti. Ta yuj k'a jachuki, ¿Jasyuj ja lajanto waxa ta a b'ajex soke b'a? ¿Jas lom waxa k'u'anex ja ma wax yala wabyex 21—Mok a yam'exa iti, mok a wabyexa jawi, mok a wabyex yajb'al ja jaw jumasa? 22Ja yab'al jumasa jawi ye'n ita wa sk'u'lane b'a s'olome, yajnix ek' ja k'ak'u takal takal wax och ch'akuk. 23Mi oj b'ob' kaltik yuj lekuk, ja' wax yalawe jastal jas relijyone'i, jastal ch'in oj ka' jb'ajtik sok jastal oj k'oktik ja kwerpotiki. Ja smeranili, mini t'un wax yalawe kab'tik jastal oj ka'tikan jun lado ja jas jel xk'ank'uni oj k'u'luktik ja b'a kwerpotiki.
Iliyochaguliwa sasa
Colosenses 2: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021