Solid Joys ShqipShembull

Predikoji vetes

Pse ligështohesh, shpirti im, pse rënkon brenda meje? Shpreso në Perëndinë, sepse unë do ta kremtoj ende; ai është shpëtimi im dhe Perëndia im. (Psalmi 42:11)

Ne duhet të mësojmë si ta luftojmë dëshpërimin–frymën e ligështuar. Kjo betejë është një betejë besimi në hirin e ardhshëm, e cila luftohet duke i predikuar vetes të vërtetën për Perëndinë dhe për të ardhmen e premtuar prej Tij.

Kjo është ajo që bën psalmisti në Psalmin 42. Ai i predikon shpirtit të tij të trazuar, e qorton veten dhe debaton me veten. Argumenti i tij kryesor është hiri i ardhshëm: “Shpreso në Perëndinë! Beso në atë që Perëndia do të jetë për ty në të ardhmen. Po vjen një ditë lavdërimi. Prania e Zotit do të jetë gjithë ndihma për të cilën ke nevojë. Ai ka premtuar se do të jetë me ne përgjithmonë.”

Martyn Lloyd-Jones beson se çështja e predikimit të së vërtetës për hirin e ardhshëm të Perëndisë ndaj vetes tonë është jashtëzakonisht e rëndësishme në mposhtjen e depresionit frymëror. Në librin e tij, Depresioni frymëror, ai shkruan kështu:

A e ke vënë re se pjesa më e madhe e shqetësimit në jetë vjen për shkak të faktit se ti po e dëgjon veten, në vend që t’i flasësh asaj? Mendo për ato mendime, që të vijnë në mendje kur zgjohesh nga gjumi në mëngjes. Nuk ishe ti origjina e tyre, por ato fillojnë të të flasin, ato të sjellin në mendje problemet e djeshme etj. Dikush është duke folur... Vetja jote po të flet. Tani, mënyra se si e trajtoi ky burrë [Psalmi 42] ishte kjo: në vend që ta lejonte këtë vete që t’i fliste atij, ai filloi t’i fliste vetes së tij. “Pse ligështohesh, shpirti im?”, pyet ai. Shpirti i tij e ka futur në depresion, e ka rënduar. Prandaj ai çohet dhe thotë: “Vete, dëgjo këtu! Unë do të të flas.” (20-21)

Beteja kundër dëshpërimit është një betejë për të besuar premtimet e Perëndisë. Ai besim në hirin e ardhshëm të Perëndisë vjen duke dëgjuar fjalën. Prandaj, predikimi i fjalës së Perëndisë që i bëjmë vetes tonë, qëndron në zemër të asaj beteje.