Virusi Korona Dhe KrishtiShembull

Na zgjon për ardhjen e dytë të Krishtit 

Jezu Krishti po kthehet dhe kjo është e vërtetë. “Burra galileas,” tha engjëlli, kur Jezusi po largohej, “pse qëndroni e shikoni drejt qiellit? Ky Jezus, që u është marrë në qiell nga mesi juaj, do të kthehet në të njëjtën mënyrë, me të cilën e keni parë të shkojë në qiell” (Veprat 1:11).

Kur të vijë, Ai do ta gjykojë botën:

"Dhe kur të vijë Biri i njeriut në lavdinë e Tij, bashkë me të gjithë engjëjt e shenjtë, atëherë do të ulet mbi fronin e lavdisë së vet. Dhe të gjithë kombet do të mblidhen para Tij; dhe ai do ta ndajë njërin nga tjetri ashtu si i ndan bariu delet nga cjeptë." (Mateu 25:31-32)

Jezusi tha se ardhja e Tij do të ketë shenja - si luftërat, zitë e bukës dhe tërmetet (Mateu 24:7). Këto shenja i quajti “dhimbjet e lindjes” (Mateu 24:8). Toka, këtu, ka imazhin e një gruaje që po lind, që po përpiqet të lindë botën e re, atë që Jezusi do ta sjellë në ekzistencë në ardhjen e Tij.

Jezusi dëshiron që t’i shohim dhimbjet e lindjes (përfshirë edhe virusin Korona) si kujtime dhe sinjale që Ai po vjen dhe që kemi nevojë të jemi gati. “Prandaj edhe ju jini gati, sepse Biri i njeriut do të vijë në atë orë, kur ju nuk mendoni” (Mateu 24:44).

Nuk ka pse të jesh nga ata që caktojnë data, në mënyrë që ta marrësh seriozisht atë që Jezusi thotë. Ajo që Jezusi thotë është e pagabueshme: “Tregoni kujdes, rrini zgjuar dhe lutuni, sepse nuk e dini kur do të jetë ai moment... Rrini zgjuar - pra, sepse nuk e dini kur do të vijë i zoti i shtëpisë… këtë që po ju them juve, ua them të gjithëve: Rrini zgjuar!” (Marku 13:33-37).

Mesazhi është i qartë. Rrini zgjuar. Rrini zgjuar. Rrini zgjuar. Dhimbjet e lindjes së botës natyrore janë synuar për këtë mesazh. Por, oh, sa shumë njerëz nuk janë zgjuar! Pavarësisht gjithë aktiviteteve të tyre të rrëmbyera, ata janë në një gjumë të thellë për sa i përket ardhjes së Jezu Krishtit. Rreziku është i madh. Virusi Korona është një thirrje e mëshirshme për t’u zgjuar dhe për të qenë gati.

Mund të bëhesh gati duke ardhur te Jezu Krishti, duke marrë faljen e mëkateve dhe duke ecur në dritën e Tij. Atëherë do të jesh mes atyre që:

"nuk jeni në errësirë, që ajo ditë t’ju zërë në befasi si një vjedhës. Të gjithë ju jeni bij të dritës... pra... të rrimë zgjuar dhe të jemi të esëll... sepse Perëndia nuk na ka caktuar për zemërim, por për të marrë shpëtimin me anë të Zotit tonë Jezu Krisht."(1 e Thesalonikasve 5:4-10)