God se genade op genade gee aan ons ‘n nuwe identiteit

God se genade is soos ‘n rivier wat nooit ophou vloei nie, of die golwe van die see wat aanhoudend op die strand uitspoel. Sy genade bring nie net vergifnis vir ons sondes nie, maar gee aan ons ‘n hele nuwe identiteit. Dit is die genade wat Ragab se lewe onomkeerbaar verander het.

Waar ons eens vasgevang was in die kettings van ons ou natuur – vrees, skuld en selfverwyt, maak God ons nuut deur Christus soos deur Paulus benadruk: “Daarom – iemand wat aan Christus verbind is, is ‘n nuwe skepping. Die ou dinge is verby, kyk, die nuwe is hier!” (2 Korintiërs 5:17, NLV).

Om in Christus te wees, beteken dat ons nie meer ingeperk is deur wie ons was of wat ons gedoen het nie. Ons identiteit word nie meer deur ons mislukkings of die wêreld se definisies bepaal nie, maar deur die volmaakte werk van Jesus aan die kruis. In Johannes 1:16 lees ons: “Uit sy volheid het ons almal genade op genade ontvang.”

Hierdie genade sluit in die sekerheid dat ons kinders van God is, in dat ons geliefd is en dat ons ‘n ewige erfenis in Christus het. Elke dag word ons gevorm en vernuwe deur die Heilige Gees, sodat ons meer en meer soos Jesus word. God se genade gee ons nie net ‘n nuwe identiteit nie – dit gee ons ook ‘n doel om in sy lig te leef en sy liefde met ander te deel.

Laat die waarheid van 2 Korintiërs 5:17 jou vul. Jy is nie meer vasgevang in jou verlede nie; jy is ‘n nuwe skepping in Christus. Laat God se genade jou dryfkrag wees om elke dag te leef as ‘n kind van God. Wanneer jy struikel, weet dat sy genade altyd oorvloedig is.

Gebed

Here, ek loof U vir u genade wat my nuut maak. Dankie dat U my identiteit nie deur my mislukkings of my verlede bepaal nie, maar deur u liefde en verlossing in Christus. Help my om hierdie nuwe identiteit met vrymoedigheid te aanvaar en te leef soos U wil hê. Lei my om ander te wys op u genade wat nooit ophou nie. Amen.