Wapenrusting van GodSample

Lees: 2 Tessalonisense 3:1–5

SOAP: 2 Tessalonisense 3:3

"Die Here is getrou; Hy sal julle versterk en julle van die Bose bewaar."

Oordenking

Daar is 'n verskil tussen waaksaam wees en in vrees leef. Ons word geroep om bewus te leef van die geestelike stryd wat oral om ons woed en ons in ons fisiese wêreld beïnvloed. Maar ons moenie daarvoor bang wees nie.

Ja, ons het 'n vyand, en sy doel is ons vernietiging. Maar ons leef nie in vrees vir hom of wat hy aan ons kan doen nie, want ons weet dat Jesus, die Een wat in ons woon, groter is as ons vyand (Sien Johannes 16:33).

God het geen gelyke nie. God is onbeperk. Satan en sy demone is beperk. Om 'n akkurate siening van God te hê is krities vir ons geloof. As ons God as swak of beperk beskou, sal ons gewilligheid om Hom te vertrou en te glo dat Hy getrou is, ook swak en beperk wees. As ons God nie as almagtig beskou nie, sal dit moeilik wees om geloof in sy krag en beskerming te hê.

Ons geloof moet gegrond wees in die werklikheid, die waarheid van God en wat Hy in die Bybel gesê en gedoen het. Wanneer ons dit vertrou, sal ons in ons kennis van en geloof in God kan groei. Soos ons siening van God groei, groei ons geloof ook.

Al leef ons in 'n wêreld vol versoekings en gevaar, kan ons verseker wees dat God altyd daar is om ons te beskerm en te versterk.

Wanneer ons ons skild van geloof opneem en ons vertroue in die Here stel, weet ons sonder twyfel dat God met ons is en Hy ons nooit sal begewe of verlaat nie. God is getrou en waaragtig, en Hy sal altyd daar wees om ons te lei en te beskerm teen die Bose. Met die Here aan ons kant kan ons enige uitdaging of beproewing wat oor ons pad kom, die hoof bied.

Gebed

Liewe Jesus, dankie dat ek nie my lewe in vrees hoef te leef nie. Dankie vir u beskerming oor my en my gesin. Verdiep asseblief my begrip en siening van U. Dankie vir u getrouheid aan my vandag en vir altyd. Amen.