’n Rede om fees te vierSample

Aanvaar sy geskenk

Dink aan Oukersaand: ’n Aand waarin die wêreld om verskillende redes feesvier. Menige is bloot jolig omdat dit Krismis is, ander hou groot partytjies en vir baie van ons is dit kosbare familie-samekomste. Die kinders is rooiwang-opgewonde oor Kersvader wat vannag die geskenke in die Kerskouse gaan sit of oor die pakkies onder die Kersboom.

Die vraag is: Hoe voel jý? Is daar in jou hart nog ’n stukkie kinderlike opgewondenheid oor die groot Geskenk wat jou Vader opnuut weer vir jóú gee? Ja, liewe mens, laat toe dat die groot wonder van sy Genadegawe jou met nuwe vreugde vul. Dink weer daaraan hoe bevoorreg jy is dat Hy sy Seun spesiaal vir ons – ja, vir jóú – gestuur het. Vier dan hierdie waarheid met oorgawe in jou hart en geniét dit saam met medegelowiges.

Mag vanjaar se Oukersaand jou met soveel dankbaarheids-blydskap vul dat dit sal oorloop in lof aan jou Verlosser.

Dankie, grote God, dat U u Seun vir mý gestuur het en dat ek daarom sonde- en skuldvry voor U mag staan. Ek loof U vir u hemelse geskenk aan my.