Aposol 22
22
1Ba nonei e poeiena, “A man hatamana na man hatoulana, hengoiam ba lia te ranga hatarare gia i tamilimiou.” 2Tara pöata ti hengoeien te ranga uaien turu HaHibru, ba nori e kakamoto korur.
3Be Pol e poeiena, “Alia a toun Jiu ti poseia i Tasus, a taun i Silisia. Kaba alia u pan ia tara taun teka i Jerusalem na e Gamaliel nonei a tson hihatuts i tar. Alia u tsitsiloia tara man Lo hoboto turu tuburara, na lia u tagala sil koru tego kukute haniga menai lia e Sunahan, te kato has uami limiou hoboto i romana. 4Alia u kato homir u katuun ti kukute a maroro tara nihamana te kukutie gulia i romana, e noaia ti mateia a palai. Alia u kits kap raien a tsien, a pal tson na touhaliou has, na lia u hala meraien tara karabus. 5A tsunono pan turu pris na pal kapan hoboto turu Kout Pan turu Jiu e atei siler te ranga hamana uagu lia. Alia u lu u pas ti koloto menai a pal tson teka turu Jiu i Damaskus. Ba lia e la uagu i Damaskus tegona pile kap merai lia u katuun tere Iesu, bate kits ragien u tsien bate la pouts mera gumeien i Jerusalem bate hahuna ragen.”
E Pol e hatararein te palis menai e Iesu u hakats i tanen
(Aposol 9:1-19, Aposol 26:12-18)
6Be Pol e ranga lenina me poeiena, “Pöata tu la noaia lia tara kalana me sukusukun butu gia i Damaskus, ba u töa u ualesala pan e songots butu nama i Kolö tara pal söasa me piraha hahise noulia. 7Ba lia e rus uagu i puta turu tsiktsiki, me hengoegu u töa u ranga bate poeiena i tar, ‘O Sol, o Sol, aha te kato hakamits sile milö alia?’ 8Ba lia e rangatagu, ‘O tsunono, alö esi?’ Ba nonei e poeiena i tar, ‘Alia e Iesu ni Nasaret, a katuun te kato hakamitse mölö. Te kato hakamits ramia lö u katuun i tar, alö e kato hakamits hase moulia.’ 9A pal tson ti la gono meiou lia i tari u ualesala, kaba nori ima hengoi u ranga tara katuun te rangaia i tar. 10Ba lia e poeiegu, ‘O tsunono, aha te katoe goulia?’ Ba Tsunono e poeiena i tar, ‘Alö go takei balö te lam i Damaskus, balö tena hengo namou a mamanaka hoboto te hopö kap mei lö e Sunahan tegona kati lö.’ 11U ualesala teka e pan koru me kato hakiouena a matar, ba pal tson ti la gono meiou lia e pile ria i limar me las mena rilia i Damaskus.
12“A töa tson a solonen e Ananias e la uama i tar. Nonei a katuun te hatsunonei e Sunahan bate kukutiena a Lo i tarara, na u Jiu hoboto ti kaia i Damaskus i haniga korueien. 13Ba nonei e la nama memi tuoluna i rehir me poeiena, ‘O Sol, hatoulana i tar tere Kristo, alö go tara pouts!’ Ba nonei tara tsi poata puku has balia e tara poutsigu me töan tare gen. 14Ba nonei e poeiena, ‘E Sunahan ti hatsunoni u tuburara e hopö kap naiou lö tego atei sil menai lö u ngil i tanen, na tego tara menai lö a Katuun a Matskö i tanen, na tego hengo menai lö u raranga i rung nen pepeisa. 15Taraha, alö ena hatei namou e Iesu turu katuun hoboto, ba tena rarare mou a manka tu tari lö na tu hengoin lö. 16Ga lö e hahalosem aha? Alö go takei bate luem a baptais. Alö go singo uu tara solonen ba nonei te galus ba nena a man markato a man omi i tamölö.’”
E Pol e hatein a toukui te hopö kap beien e Sunahan
17Be Pol e ranga lenina me poeiena, “I murina ti la pouts malia i Jerusalem, ba tara pöata tu singo ia lia i Luman Lotu Pan balia e hatareri u töa u hiharöto. 18Alia u tarei e Iesu ba nonei e poeiena i tar, ‘Hasesei balö te laba boroboro nem i Jerusalem, taraha u katuun teka ema hengoe roui a ka te poa memi lö alia.’ 19Ba lia e poeiegu, ‘O Tsunono, nori e atei sil koruer alia u la uu tara mamana luman lotu hoboto turu Jiu bate lu regu u katuun te hamana ria i tamölö. Ba lia tena haka ragien tara karabus bate hasingata has ragen. 20Na tara pöata ti atung hamateien e Stiven, a tson te hahatein u raranga i tamölö, alia u ka has ia i rehiren. Alia u hanigein tegi kato hamate menaien, balia e tara kap negu a man hasobö turu katuun ti atung hamateien.’ 21Ba Tsunono e poeiena i tar, ‘La, alia e hala halehana menagi lö turu katuun tema Jiu ri.’”
22U katuun i hengoia tere Pol e antunaia teka, ba nori e ku hapan korur me poeier, “Atung ba naiam! Atung hamate iam! A mar katuun teka e möa koru tega tatei töatöa lel uaien!” 23Ba tara pöata ti ku hapan noaien bate hula lapo ba ner u hasobö i taren me lapo sei has ner u köahu iasa. 24Ba tsunono e ranga merena u soldia i tanen egi lu menaien iahana luman soldia. Ba nonei e ranga mera nen tegi lahus menaien tegoma hatei menai e Pol a ka te raharaha koru meraien u katuun. 25Kaba tara pöata ti kitseien a lete, be Pol e ranga mena a töa kapten te tuol ia i rehinen me poeiena, “A lo ema haniga nanei tego lahus menai lö a toun Rom tema la noa uaneien turu kout.”
26Ba tara pöata te hengoeia a kapten u ranga teka ba nonei e lauana tara tsunono turu soldia mena poeiena i tanen, “Alö e katsin katoeiem aha? A tson teka a toun Rom!”
27Ba tsunono e lana tere Pol mena poeiena i tanen, “Hatei moulia, alö a toun Rom?” Be Pol e poeiena, “Aa alia a toun Rom.”
28Ba tsunono e poeiena “Alia a toun Rom, taraha alia u holin a moni pan.” Be Pol e ranga palisina me poeiena, “Alia a toun Rom has, i posa noa gono meilia.”
29Ba pal tson ti katsin rangateien bate lahuse ren e la hatoumuri ba naren. Na tsunono e matout has tara pöata te sabe ien e Pol nonei a toun Rom, taraha nonei e kits hakapeia e Pol a tsien.
E Pol e tuol ia i matar a pal kapan
30A tsunono turu soldia e ngilin atei sil koruni a ka ti kout sil mei u Jiu e Pol. Ba turu hamahö ba nonei e hapurese nena a tsien tere Pol, ba tsunono e ranga merena u pris pan na pal kapan hoboto tegi gono hoboto uaien. Ba nonei e luena e Pol mena hatuole rien i mataren.
ទើបបានជ្រើសរើសហើយ៖
Aposol 22: HLA 2020
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active) Wycliffe Bible Translators, Inc. All rights reserved.
