យ៉ាកុប ពាក្យលំនាំ
ពាក្យលំនាំ
លិខិតរបស់លោកយ៉ាកុបផ្ញើជូនប្រជាជនអ៊ីស្រាអែល ដែលបែកខ្ញែកគ្នាក្នុងសកលលោកទាំងមូល (១.១) ជាពាក្យប្រៀនប្រដៅអំពីរបៀបរស់នៅក្នុងជីវិតរៀងរាល់ថ្ងៃរបស់គ្រិស្តបរិស័ទ គឺមានរបៀបទាក់ទងជាមួយអ្នកជឿ និងអ្នកមិនជឿជាដើម។
អ្នកតែង: អ្នកខ្លះយល់ថា លោកយ៉ាកុបដែលតែងលិខិតនេះ គឺលោកយ៉ាកុបដែលត្រូវជាប្អូនរបស់ព្រះអម្ចាស់ (កាឡាទី ១.១៩) អ្នកខ្លះទៀតថាជាសាវ័កយ៉ាកុប ជាកូនរបស់លោកអាល់ផាយ (ម៉ាថាយ ១០.៣) ហើយអ្នកខ្លះទៀតថាជាគ្រិស្តបរិស័ទជាតិយូដាមួយរូបឈ្មោះយ៉ាកុប។
គោលសំខាន់ៗ:
លោកយ៉ាកុបទូន្មានអ្នកជឿព្រះយេស៊ូ ឲ្យរស់នៅស្របតាមគោលជំនឿរបស់គ្រិស្តបរិស័ទ។ គ្រិស្តបរិស័ទមិនគ្រាន់តែស្ដាប់ព្រះបន្ទូលប៉ុណ្ណោះទេ គឺត្រូវប្រតិបត្តិតាមផងដែរ។ ជំនឿដែលមិនបង្កើតផល (អំពើល្អ) ជាជំនឿឥតខ្លឹមសារ។
លោកយ៉ាកុបដាស់តឿនគ្រិស្តបរិស័ទឲ្យស៊ូទ្រាំនឹងទុក្ខលំបាក ត្រូវទទួលអ្នកឯទៀតៗដោយមិនប្រកាន់វណ្ណៈ មិនរើសមុខ ត្រូវគោរពអ្នកក្រ និយាយស្ដីឲ្យចេះទប់សម្ដី។ គាត់ស្ដីបន្ទោសពួកអ្នកមានយ៉ាងខ្លាំង ព្រោះគេជិះជាន់អ្នកក្រ។ នៅចុងបញ្ចប់ លោកដាស់តឿនគ្រិស្តបរិស័ទឲ្យព្យាយាមអធិស្ឋាន និងជួយគ្នាទៅវិញទៅមក។
គម្រោងគម្ពីរយ៉ាកុបៈ
• សេចក្ដីផ្ដើម ១.១
• ជំនឿ និងប្រាជ្ញា ១.២-៨
• អ្នកក្រ និងអ្នកមាន ១.៩-១១
• ការល្បងជំនឿ និងការល្បួង ១.១២-១៨
• ការស្ដាប់ និងការប្រព្រឹត្តតាម ១.១៩-២៧
• មិនត្រូវប្រកាន់វណ្ណៈ ២.១-១៣
• ជំនឿ និងអំពើល្អ ២.១៤-២៦
• គ្រិស្តបរិស័ទ និងអណ្ដាត ៣.១-១៨
• គ្រិស្តបរិស័ទ និងលោកីយ៍ ៤.១-៥.៦
• ពាក្យទូន្មានផ្សេងៗ ៥.៧-២០
ទើបបានជ្រើសរើសហើយ៖
យ៉ាកុប ពាក្យលំនាំ: គខប
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Khmer Standard Version © 2005 United Bible Societies.