Kurs. 3
3
1Nuikia Krístuja̱i̱ nantakin asarum nayaimpinmaya̱ írunna nu wakeruktarum. Nui̱ Kristu pujawai Yusa untsuurí̱ni̱. 2Ju̱ nuṉkanam ana nu enentáimtsuk aya nayaimpinmaya̱ ana nu enentáimtustarum. 3Atumsha Krístuja̱i̱ tsaniṉkrum jakamarme. Tuma asarum Krístuja̱i̱ tsaniṉkrum Yusja̱i̱ iwiaaku pujarme. 4Krístukete ii iwiaakmari̱. Ni nayaimpinmaya̱ wantinkiuisha atumsha Niji̱a̱i̱ métek wantinkiattarme.Apu. 19:11,14 Tura Niji̱a̱i̱ métek tí peṉker átatrume.
Yaunchu iwiaakma tura yamaram iwiaakma
5Tuma asamtai ju̱ nuṉkanmaya̱ ana nu ajakratniua áintsarum iniaisatarum. Tsanirmatniusha, tunáa wakeruktincha tura takakna nuja̱i̱ naṉkaamas wakeruktincha ántar yus tikishmátratniua áintsaṉ asamtai iniaisatarum. 6Shuar Yusan umirtsuk aya nuna túrin ásarmatai Yus nin kajerak ti asutiáttawai. 7Atumsha núnisrumek túriniuyarme. 8Tura yamaikia ju̱sha iniaisatarum, kajektincha, yajauch wakeruktincha, yajauch túratniusha, katsekmaktincha, yajauch chicham chichastincha, ashí iniaisatarum. 9Wáitrakrum mai̱ ánaṉnai ajairap. Warí átumka yaunchu aya̱shkia ni túrutairi̱ji̱a̱i̱ iniaisaitrume. 10Túrarum yapajmiámatniua núnisrum yamaram pushí entsaruitrume. Kame yamaram nekatai̱ achikrum iin najatma urukuit nuja̱i̱ métek tí peṉker ajasat tusa túramuitrume. 11Ashí írunna nuja̱i̱ naṉkaamas Kristu ashiyaiti. Níiniun pujurui. Tuma asamtai ashí ni shuari̱ enentái̱n pujá asamtai nusháa enentáimtunairchatniuiti. Kriaku aentssha tura Israer shuarsha, tsupirnakusha tura tsupirnakchasha, apachcha tura yajaya̱ shuarsha, takarin ainia nusha tura aṉkant ainia nusha, Kristu ashí ni enentái̱n pujakui nusháa enentáimtunairchatniuiti.
12Yus atumín anenmak Niniu ártí tusa achirmákmarme. Túrutma asamtai ju̱ja̱i̱ shiir iwiarmampratniua áintsarum tuke túrin atarum, waitnenkartin, shiir awajkartin, péejchach átin, émtin áchatin, tura katsuntin átin. 13Kristu atumí tunaari̱n tsaṉkuramia núnisrumek nuamtak tsaṉkurnáiratarum. Chíkich yajauch awajtámkuisha shiir katsuntram yapajniáitsuk tsaṉkurnáiratarum. 14Tura ashí naṉkaamas anenaitiarum. Túrakrumka chikichik ajasrum mash péṉker túrattarme. 15Kame chikichik aya̱shtinia áintsarum ajastarum tusa Yus ni shuari̱ ajasat tusa achirmákmarme. Tuma asamtai Yusja̱i̱ aṉkant awajsamu atumí enentái̱n pujurtamsati. Nuja̱i̱ Yus yumiṉsatarum.
16Kristu shiir Chichame̱ atumí enentái̱n piaktí. Nekas naka enentáimprarum jintinniáiyarum mai̱ ikiakánai ajatarum. Yus kanta kantamárum tuke enentáiji̱a̱i̱ Yus yumiṉsarum shiir awajsatarum. 17Tura takaakmesha, chichaakmesha kame ashí túramna nuka Jesukrístu shiir awajsataj tusam ni kakarmari̱ji̱a̱i̱ṉ túrata. Túrakum Krístuja̱i̱ Yus Apa yumiṉsata.
Yus shuar túratin
18Nuwa̱tiram, atumí aishri̱ umirkatarum Uunt Yus nuna wakera asamtai. 19Áishmaṉtiram, atumí nuwé̱ aneatarum. Atumí nuwe̱ja̱i̱ kajernaikiairap. 20Uchitiram, ame apa nukusha tuke umirkatarum. Nu túrakrum Yus shiir enentáimtiksattarme. 21Uchirtintiram, atumí uchirí̱ ti kakantrairap. Ti kakanteamka uchisha tí kuntuts pujus péṉker wekasatniun nakitchanpiash. Nu túrunawa̱i̱ṉ tusarum ántrarum atumí uchirí̱ kakantrairap. 22Takarniutiram, atumí uuntri̱ shiir umirkatarum. Ju̱ nuṉkanmaya̱ uuntri̱ ai̱ṉ aya ni iimkiui shiir enentáimturati tusarum takaschatniuitrume. Antsu Yus enentáimtakrum tuke péṉker takastiniaitrume. 23Ashí túramna nu ásump enentáiji̱a̱i̱ takakmasta. Aya aentsuk yáiṉtinia áintsachu antsu nayaimpinmaya̱ úuntrum yayá̱ áitkiasrum takastarum. 24Ame úuntrum Kristu asa nayaimpiniam ashí shiir takustinian tsaṉkatramkattawai. 25Antsu tunáa túrin ni yajauch túramuja̱i̱ métek akinkiáttawai. Yus ashí aentsun métek iyawai.
ទើបបានជ្រើសរើសហើយ៖
Kurs. 3: jiv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2009 Avant Ministries in cooperation with Wycliffe Bible Translators, Inc. All rights reserved.