2 Kur. 8
8
Yus shuarti kuit súsatin
1Yatsurtiram, Masetúnianmaya̱ Yus shuaran Yus waitnentainia nuna yamái ujaktatjarme. 2Ti itiurchatnum nekapsamu áiniawai. Túmayataṉ warainiawai. Tura ti kuítrincha áiniayataṉ ementutsuk kuítrinniua núnisaṉ suíniawai. 3Ju̱na wi paant nekaan ujajrume. Nisha wakeramuja̱i̱ súsatniun jeainia nuna suíniawai tura nú naṉkaamassha suíniawai. 4Yus shuaran kuítrinchan súsartai tusar ti wakeruiniak nu túratniun ti seatmarmaji. 5Tura ii enentáimiaj nú naṉkaamas túrawarmiayi. Emka Yusai̱ niṉki sumamawarmiayi. Tura Yusa wakeramuri̱ túrattaji tusar iincha “yaiṉtajrume” turammiaji. 6Tuma asamtai “Masetúnianam kuit júuktin naṉkamamamna nu, Kurintiunmasha amukta” tusar Titiu seamiaji. 7Atumsha ashí péṉker túratin ti nékarme. Yus enentáimtustincha, unuiniartincha, ju̱ nuṉkanmaya̱ nekaatniusha, iin aneatniusha nuka ashí nékarme. Wats, ju̱sha túratarum. Yus shuar kuítrincha ainia nu achikiárat tusarum Titiu támatai núkap susatarum.
8Kame atumí uuntri̱a núnisnak akupeatsjarme, túratniuitrume tusan. Antsu chíkich shuar ni kuítri̱n súsartaj tusa ti wakeruinia nuna atumín ujakan atumí aneṉkrattairi̱ nekaspashit tusan nekapsatajtsa pujajai. 9Ii Uuntri̱ Jesukrístu waitnenkartutairi̱ nékarme. Ashí takakuyayi tura atumín anenma asa kuítrincha núnisaṉ ajasmiayi. Ju̱ nuṉkanam kuítrincha núnis ajasmatai átum nayaimpiniam kuítriniak tusa túramiayi.
10Ju̱na enentáimjiai. Nuik uwitin “yáiṉtatji” tíchamkarum. Tura nu túratin ti wakerimiarme. 11Naṉkamamarmena nu yamaikia amuktárum. Nuik ti wakerimiarmena núnisrumek yamaisha súsatin jearmena nu susatarum. 12Iistarum. Ni kuítri̱n Yusan nekas susatajtsa wakerakuiṉkia ni jeana nuna susat tusa Yus wakerawai. “Jeana nú naṉkaamas susati” tatsui Yus.
13Chíkich ti núkap susarum atumnia táasat tusan tátsujai. 14Antsu ashí métek takusarat tusan tajai. Iis atumsha yamaikia tí nukap takakrume, nuja̱i̱ atsuma nu súsatniuitrume. Ukunam chíkich tsawantai̱ átum atsumashtarmeash. Nuiṉkia nisha atumín suramsarti. Nu túratin ákuiṉkia ashí métek takustin átatui. 15Yusa Papiri̱i̱n yaunchu áarman núnis tátsuk “Núkap takusmia nu ampirchamiayi tura ishichik takusmia nu atsumachmiayi.” Jiin. 16:18
Titiu Kurintiunam akupkámu
16Tura wi aneajrumna núnisaṉ atumín aneatniun Yus Titiun susamiayi. Tuma asamtai Yusan yumiṉsan pujajai. 17Iis, wi takui̱ wétinian wakerimiayi. Tura nú naṉkaamas atumín anenma asa ni enentái̱ji̱a̱i̱ṉ wéawai.
18Tura chíkich Yus shuar Titiuja̱i̱ akupkátajtsa pujaji. Nu shuar Yusa Chichame̱n tí peṉker etserainakui ashí Yus shuar iruntramunam nin péṉker áujmatainiawai. 19Tura nú shuarnaka ii tsaníakmari̱ atí tusar ashí Yus shuar iruntramunam nuna anaikiarmiayi. Iiji̱a̱i̱ kuítian júkiarti tusar anaikiarmiayi. Iis Yusa náari̱n ashí aents uunt najanawarat tusar tura ashí shuar atumí tsaṉkari̱n nekaawarat tusar nu takat túratsjik. 20Iis, ju̱ kuit ii jukittiajnia nu, núkap asamtai aents tsanumprutmawara̱i̱j tusar Titiuja̱i̱ tura jú̱ shuarja̱i̱sha wéaji. 21Yus íimmianumsha, aents íimmianumsha ii naka wekaajnia nuna nekaawarat tusar túraji.
22Nu jimiará shuarja̱i̱ chíkich Yus shuar akupeaji. Yusa takatrí̱n takastasa ti wakerana nu nekas nékaji. Tura átum yáiṉtin ti wakerarmena nuna nekáa nisha atumíin jeataj tusa ti wakerawai. Nuna túmak Yusa takatrí̱n takastinian wakerana nuna paant iniakmawai. 23Tura ai̱sha chíkich shuar Titiun nekaataitsar anintruiniakuisha “Titiu Papru tsaníakmari̱nti. Iincha yainmaktajtsa Pápruja̱i̱ takaawai” titiarum. Chíkich Yus shuaran nekaataitsar anintruiniakuisha “Yus shuar akupkámu áiniawai tura Kristu náari̱n shiir awajin áiniawai” titiarum. 24Tura atumí aneṉkrattairi̱ ashí Yus shuar nekaawarat tusarum nu shuar péṉker itiaatarum. Nu túrakrum atumnia ii shiir tímiaj nu nekasaiti tu iniaktustatrume.
ទើបបានជ្រើសរើសហើយ៖
2 Kur. 8: jiv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2009 Avant Ministries in cooperation with Wycliffe Bible Translators, Inc. All rights reserved.