2 Kur. 6
6
1-2Yusa Papiri̱i̱n Isayas áarmaiti
“Tsawant jeamtai ame seatmena nuna anturkamajme. Uwempratin tsawant jeamtaisha yáiṉmajme.” Isa. 49:8 Wats yamaikia Yus seatin jeayi. Yamái Yusai̱ uwempratin jeayi.Isa. 61:2 Tuma asamtai iikia Yusa takatrí̱n pachitkiajnia nu, Yusa aneṉkrattairi̱ péṉker achiktarum tusar seajrume. 3Tura “Papru etserkamuri̱ ántraiti” tíara̱i̱ṉ tusar chíkich yajauch enentáimtiktsuk péṉker wekaaji. 4Nekas Yusa takarniúri̱ntji nuna paant nekaawarat tusar wáitiayatrik, atsumayatrik, itiurchatnum pujayatrik shiir katsunteaji. 5Ju̱ itiurchat wainkiamji, katsumpramkarmaji, sepunam eṉketmáwarmiaji, charáa charáa awajtámiarmiaji, takatcha ti itiurchat takasmiaji, kánutsuk pujumiaji tura tsukasha ti tsukammiaji. 6Tunáa nakitrar wekaaji. Yus Chicham unuimiátraitji, shiir enentáiji̱a̱i̱ katsuntrar wekaaji. Chíkich shuar péṉker awajeaji. Yusa Wakaní̱ pujurtamkurin shuar nekas aneaji, 7nekas chicham ana nu étsereaji tura Yusa kakarmari̱sha nú paant iniakmaji. Tura ni nemasri̱n nupettuka̱i̱ṉ tusa suntar ni tantari̱n júana núnisrik iisha ii nemasri̱ íwianch nupettamka̱i̱j tusar ii Yusri̱ tuke umirkar wekaaji. 8Shuar shiir enentáimturmainiakrincha, yajauch enentáimturmainiakrincha, péṉker chichartamainiakrincha, yajauch chichartamainiakrincha tuke Yusja̱i̱ shiir wekaaji. “Wáitruiniawai” turamainiakrincha tuke nekas chichaaji. 9“Nu aents nékatsji” turamainiakrincha Yusai̱ṉkia nékanji, jákatin tsuumainnium wekayatrik tuke iwiaaku pujaji, asutiámuitiatrik mantamnatsji. Yusa takarniúri̱ntiaj nu ashí nuja̱i̱ paant nekaamniaiti. 10Kúntuts pujayatrik ii enentái̱nkia waraaji, kuítrinchaitiatrik chíkich shuar kuítrintin awajeaji, peṉké takakchiatrik ashí wainji.
11Yatsurtiram, Kurintiunam pujarmena nu, ashí paant ujakchamkajrum. Ti aneajrumna nu nékarme. 12Wikia atumín paant áujsatniun wakerajrume antsu átumka anentsuk paant áujtustin nakitrarme. 13Winia uchirua núnisnak chichaajrume. Wi tuke paant chichaarjarmena núnisrumek atumsha atumí enentái̱n ana nu paant ujatkatarum tusan seajrume.
Yusa je̱e̱ntji
14Yus shuar Yus shuarchaja̱i̱ tsaniṉtinian enentáimsashtiniaiti. Warí, ¿Yusan umirna nú shuar, iwianchin umirna nú shuarja̱i̱ métek enentáimiainiawak? ¿Tsáapnisha kiritji̱a̱i̱ mái̱mtek áminkiait? 15¿Krístuka uunt iwianchji̱a̱i̱ nawamnaikiamniakait? ¿Yus shuar Yus shuarchaja̱i̱ tsaniṉ shiir pujusminkiait? 16¿Iwiaaku Yusa je̱e̱ncha ántar yus pujustinkiait? Tura atumsha iwiaaku Yusa jé̱e̱ntrume. Yus Niṉki ni Papiri̱i̱n ju̱na tíchamka
“Niji̱a̱i̱ tsaniṉkia pujusan niji̱a̱i̱ wekasartatjai tura ni Yusri̱ átatjai tura nisha Wí aents ajasártatui.” Riw. 26:12
17Tuma asamtai ju̱nasha tímiayi
“Ni matsatainia nuyá̱ jíinkitiarum tura niiya̱ kanaktiarum, tawai Uunt Yus tura yajauch ana nu antiṉkiairap.Isa. 52:11 Túrakrumninkia awayá̱ttajrume.” 18Tura atumí Aparí̱ átatjai, átumka winia uchir átatrume. Nuna Wi imiá kakaram uunt Yus asan tajai. Tu áarmaiti.2 Sam. 7:14; Jrm. 31:1,9
ទើបបានជ្រើសរើសហើយ៖
2 Kur. 6: jiv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2009 Avant Ministries in cooperation with Wycliffe Bible Translators, Inc. All rights reserved.