2 Kur. 13
13
1Ju̱ja̱i̱ menaintiú iistajrum tusan winiajai. Ashí iwiaratin ana nu, jimiará tura menaintiú shuara chichame̱ja̱i̱ iwiarnartatui.Muis. 19:15 2Wi atumji̱a̱i̱ pujachiatnak, atumji̱a̱i̱ pujá núnisnak áatjarme. Yaunchu tunáa túrimiarmena nuna tura ashí shuartirmin wi nuik tímiajrumna nuna ataksha tájarme, wi atak tana tunaarum iwiareachkurminkia iniaisashtatjarme. 3Nuiṉkia wi Kristu kakarmari̱ji̱a̱i̱ chichaajna nu nekaattarme. Nu nekaataj tusarum wakeratsrumek. Tura Krístuka kakarmachuchuiti. Antsu atumí enentái̱n kakaram takaawai. 4Kristu nekas kakarmachua nútiksaṉ krúsnum máamuitiat Yusa kakarmari̱ji̱a̱i̱ iwiaakuiti. Aya̱shnium Kristu kakarmachu nekapmia núnisrik iikia kakarmachuitji. Túrasha Yusa kakarmari̱ji̱a̱i̱ Ni takatri̱ takaaji. Nuja̱i̱ atumíin iniakmastatji.
5“Nekas Yusan umirniuashitiaj” tusarum nekamatarum. Íimiastarum. Ántar Yus shuarchaitkiurmeka Jesukrístu atumí enentái̱n pujurtama nu nekaattarme. 6Tura iikia ántar Yus shuarchaitji nu nekaatarum tusan wakerajai. 7Tura átum tunáa túrawa̱i̱rum tusar Yus seaji. Aents iin péṉker enentáimtikramprat tusar tátsuji. “Ántar áiniawai” túramprini̱ṉ, átum péṉker wekasatarum tusar wakeraji. 8Warí, Yusa nekas chichame̱ emesratin tujintiaji. Antsu ii túrajnia nu Yusa nekas chichame̱ja̱i̱ túraji. 9Tuma asamtai átum kakarmaitkiurminkia iikia kakarmachuitiatar shiir enentáimji. Atumsha nekas kakaram ajasúk tusar Yus tuke seaji. 10Atumín emesratin Yuska winia akuptatsui. Antsu Yus akuptúkuiti atumín ikiaká̱rtinian. Tuma asamtai wi atumíin jeaknaka kakaram chicharka̱i̱jrum tusan winitsuk ju̱ papin áatjarme.
Papru amikmamu
11Wats yatsurtiram, shiir pujustarum. Krístunam tuke kakaram ajastarum. Yus shiir enentáimtikramprarti. Chikichík enentaik enentáimsatarum. Shiir awajnáisarum pujustarum. Tura Yus anenmarmena nu shiir enentáimtikramna nu atumji̱a̱i̱ pujurtamsattarme. 12Yusai̱ shiir enentáimtunaisrum amikmánaitiarum. 13Ashí Yus shuar ainia nu amikmátmarme. 14Uunt Jesukrístu waitnenkartutairi̱, Yusa aneṉkrattairi̱sha atumíin pujurtamsati. Tura Yusa Wakaní̱sha tuke nemartamsarti.
Nu atí.
ទើបបានជ្រើសរើសហើយ៖
2 Kur. 13: jiv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2009 Avant Ministries in cooperation with Wycliffe Bible Translators, Inc. All rights reserved.