1 Kur. 10
10
Najankamu yus tikishmátrashtin
1Yatsuru enentáimpratarum. Yus yaunchu ii úuntri̱n ashí métek yáiṉmiayi. Nusháa yuraṉmiji̱a̱i̱ jintian nekapruamiayi. Tura ashí ii uuntri̱ nu yuraṉmin apapékar wéarmiayi. Ashí núnisar Kapantin Nayantsan Yus akankámunam wekasar katitkiarmiayi. 2Tura Muisaisan umirkar yuraṉminiam tura nayantsanam ashí imiaimiua áintsaṉ ajasármiayi. 3Núnisaṉ ashí mash Yusai̱ya̱ yurumkan yúawarmiayi. 4Entsancha ashí mash Yus susamunak umararmiayi. Kame Yus kayanmaya̱ entsan akupkámtai ashí umararmiayi. Krístusha nú kaya áintsaṉ niji̱a̱i̱ tuke wéakui ni wakaní̱ atsumamuri̱n Krístunmaya̱ṉ takusarmiayi. 5Tuma ai̱ṉ Yus ti yáiṉmaitiat Ni wakeramun umikcharmiayi. Tura ásar ni nuṉke̱e̱n jeatsuk kampuntin atsú nuṉkanam ti untsurí jákarmiayi.
6Iisha nuja̱i̱ unuimiártiniaitji. Iikia ni wakeriarmia áintsarⁱ yajauchia nu wakerukchatniuitji. 7Nu asamtai najantkamu yus ni túrawarmia áintsarum tikishmátrairap. Iis, jiru yusri̱ shiir awajénakui Yus Papinium áarmaiti “Nu shuar namperan ti najanawar yurumá nampekarmiayi.” Jiin. 32:6 8Ni túrawarmia núnisrik iikia tsanirmashtiniaitji. Nuna túrawar paintitráis mir chikichik tsawantai̱ jákarmiayi. 9Iisha tunáa túrar “Yus asutiuáshtatui” tu enentáimprashtiniaitji. Nisha nuna túrawar napiji̱a̱i̱ esaim untsurí jákarmiayi. 10Yussha yajauch áujmatsashtiniaiti. Nuna túrawarmatai Yus ni suntari̱n akupak untsurín máwarmiayi.
11Yaunchu ii úuntri̱ji̱a̱i̱ túrunamu iin amúamu tsawantnum pujajnia nuna jintintramat tusa áarmaiti. 12Tuma asamtai shuar tunaanum iniaarchattajai tákuṉka anearti. Anearchamka iniaarminiaitme. 13Ame tunaanum útsutkamuitkiumka ju̱na wiki nekapeajai tu enentáimpraip. Ti útsutkamuitkiumnisha Yuska tuke iniaitsuk waitma asa ame katsuntrachminian tsaṉkatramkashtatui. Tuma asa nu tunaanum útsutkamunmaya̱ uwempratniun iniakturmastatui. Núja̱i̱ṉkia katsuntramin átatme.
14Nu asamtai aneamu yatsuru peṉké ishichkisha najankamu yus enentáimtusairap. 15Atumsha nékatsrumek. Wi tájana nu nekaschakait. 16Kristu jakamu enentáimtustin námper najanar Yus áujeaji Kristu numpe̱n nakumea nu shiir atí tusar. Tura métek umarar nuja̱i̱ Kristu numpé̱ métek enentáimtaji taji. Tura apatkusha púurarⁱ tura métek yuarⁱ nuja̱i̱ Kristu aya̱shí̱ iin jarutramkamu métek enentáimtaji taji. 17Apatkusha chikichkitiat púuram untsurí ajatsuk. Iisha núnisrik untsurítiatar nu apatuk métek yuarⁱ métek enentáimprar chikichik aya̱shtinia áintsar aji.
18Israer shuartisha enentáimpratai. Yús sutai namaṉken yuinia nu, métek yuáwar Yusan métek enentáimtuiniatsuk. 19-20Núnisaṉ Yus shuarcha najankamu yus sutai namaṉken suíniak nekas Yusan suíniatsui antsu yajauch wakaní̱n suíniawai. Kame najankamu yus áiniak peṉké ántar áiniawai, iwiaakuchu áiniawai. Nu namaṉsha sutai namaṉketiat péṉker namaṉkete, yajauchichuiti. Aya ju̱nak tajai. Yus shuarcha najankamu yus sutai namaṉken suíniakui amesha niji̱a̱i̱ métek yuamka yajauch wakanniasha niji̱a̱i̱ métek enentáimtajai tame. Antsu nu yajauchiti. 21Kristu numpe̱n nakumea nu úmakrum íwianch susamua nuka umarchatniuitrume. Kristu aya̱shi̱n nakumea nu yúakrumka íwianch susamua nuka yúashtiniaitrume. 22¿Warí, Yus akajkatin wakeramek. Iisha nin nupetkamniashitiajⁱ?
Aya anentratamuja̱i̱ takastiniaitji
23“Ashí túramniaitjiai” tiniu áiniawai tura mash yáintkiashtatui péṉker wekasatniun. Nekas ashí túramniaitjiai tura mash yáintkiashtatui wakaniur kakaram ajastinnium. 24Nú arantcha chíkich yáiṉtincha enentáimpratniuitji. Aya íiniukka pachischatniuitji.
25Namaṉ súmakum inintrútsuk sumakta. Tura najanamu yus susamusha yajauchichuashit tu enentáimtsuk páchitsuk yuátá. 26Ashí ju̱ nuṉkasha tura ashí írunna nusha Yúsnachuk ainia. Tuma asamtai péṉker áiniawai.YKan. 24:1; 50:12
27Yus shuarchasha yurumkan ajampramkuisha ashí mash yajauchichuashit tu enentáimtsuk páchitsuk yuámniaitme. 28Tura chíkich chichaak “Ju̱ka najankamu yus susamu namaṉkete” túramkuiṉkia nuikia yuáwaip. Yúakminkia nu shuar itiurchat enentáimprutmartatui. 29Ame páchitsuk yuámniaitkiumnisha antsu ni yúachmin asa itiurchat enentáimprattawai.
Tura amesha tíchatameash “¿Urukamtia ni tujintiakui wi yúachminiaitiaj. 30Wi Yusan yumiṉsan yúakuisha urukamtia itiurchat enentáimturainia. Yus yumiṉsachmakait?” tíchatameash. 31Ayu, yúakmesha úmakmesha ashí túramna nusha ashí shuar Yusan shiir enentáimtusarat tusam túrata. 32Tuma asamtai ii túramuja̱i̱ chíkich shuar yajauchiniam aju̱a̱shtiniaitji. Israer shuarsha Israer shuarchasha Yus shuarsha ashí yáiṉtiniaitji. 33Wisha ashí shuaran yáiṉtinian tuke enentáimjiai. Ashí shuar uwemprarti tusan wi wakeraj nuna enentáimtsuk nin yáiṉtinian tuke pujurjai.
ទើបបានជ្រើសរើសហើយ៖
1 Kur. 10: jiv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2009 Avant Ministries in cooperation with Wycliffe Bible Translators, Inc. All rights reserved.