Башталганы 19
19
Кудайдыҥ эки элчизи ле Лот
1Эҥирде эки ангел Содомго келген. Лот каланыҥ каалгазыныҥ јанында отурган. Лот олорды кӧрӧлӧ, ӧрӧ туруп, олорго базып келеле, јерге јетире бажырып 2айткан:
– Бийлерим! Кулыгардыҥ айлына киригер. Будыгарды јунуп, мениҥ айлыма конуп калыгар. Эртен тура оноҥ ары барарыгар.
– Јок, – деп, олор каруу јандырган. – Бис тышкары конорыс.
3Је Лоттыҥ јайнузына чыдабай, олор јӧпсингендер. Лот олорды айлына кийдирип, курсак азып, калаш быжырып азыраган. 4Олор уйуктаарга јаткалакта, каланыҥ улузы – Содомныҥ јаанду-јашту ончо эр улузы – айылды курчап ийген. 5Олор Лотко:
– Сеге конорго келген улус кайда? Олорды бери чыгар, бис олорло сооттонорыс! – деп кыйгырыжып турган.
6Лот тышкары чыгып, эжигин јабала, 7айткан:
– Карындаштар, јаман неме этпегер! 8Менде бойлу эки кызым бар, мен олорды слерге чыгарып берейин. Олорло нени эдерге турганаар, эдигер, је мениҥ айлыма келген улуска тийбегер!
9– Ары тур! – ого айткандар. – Эмди туш-тууразынаҥ кӧчӱп келген неме бисти мында јаргылаарга турган ба? Эмди бис олорго эдерге турган јаманнаҥ тыҥ јаман сеге эдерис!
Олор Лотты ийде салып, эжикти оодорго јазангылаган. 10Је Лоттыҥ айылчылары оны айылга кийдире тартып, эжикти бӧктӧп ийгендер. 11Оноҥ олор тышкары улусты: јаанын да, јажын да – ончозын сокородып ийерде, улус эжикти таап болбой тургандар.
12Айылчы эки кижи Лотко айткан:
– Бу калада сениҥ улузыҥнаҥ база улус бар ба? Кӱйӱлериҥ беди, уулдарыҥ беди, кыстарыҥ беди, калада кем де бар болзо, ончозын мынаҥ чыгарып апар: 13бис бу каланы јоголтып койорыс! Оныҥ улузыныҥ кинчеги ажынып калган, Кайракан оны јоголтсын деп, бисти ийген.
14Лот барып, кыстарыла сӧстӧжип салган уулдарга:
– Каланаҥ ылтам барыгар! Кайракан оны эмди јоголтып койор! – деп айткан.
Је олор Лотты кокурлап туру деп бодогон.
15Таҥ адып келерде, ангелдер Лотты тӱргедедип айткандар:
– Капшай, ӱйиҥди ле эки кызыҥды мынаҥ апар! Оноҥ башка бу кинчектӱ калала кожо ӧлӱп каларыҥ!
16Лот дезе меҥдебей турган. Айдарда, Кудайдыҥ элчилери оныҥ бойын, ӱйин ле эки кызын јединип, каланаҥ алып чыккандар. Нениҥ учун дезе, Кайраканга Лот карам болгон.
17– Качып, аргадан! – Кудайдыҥ элчилериниҥ бирӱзи Лотко айткан. – Кайа кӧрбӧ! Ӧзӧктӧ кайда да токтобо! Кырлар јаар кач, оноҥ башка ӧлӧриҥ!
18– Јок, мениҥ Кайраканым! – деп, Лот айткан. – 19Сен мени, кулыҥды, јакшы кӧрдиҥ. Сениҥ меге эткен килемјиҥ сӱрекей јаан: Сен мениҥ јӱрӱмимди аргададыҥ! Је мен кырга јетпезим – тӱбекке табартып, ӧлӱп каларым. 20Туку ол кала јуук, ого јетире јӱгӱрейин. Ол кичинек, оноор јӱгӱрӱп, анда аргаданарым.
21Кудайдыҥ элчизи ого айткан:
– Је, јакшы, сеге болуп, айдып турган каланы јоголтпозым. 22Эмди капшай јӱгӱр: ого јетпегенчеҥ, мен нени де эдип болбозым.
Оныҥ да учун бу кала Цоар (Кичинек) деп адалат.
23Кӱн чыгып келерде, Лот Цоарга јеткен.
24Бу ла ӧйдӧ Кайракан теҥеринеҥ Содом ло Гоморраныҥ ӱстине, јааш чылап, кӱйӱп турган кӱкӱр уруп ийген. 25Ол бу калаларды, ончо ӧзӧкти, андагы бастыра ӧзӱмдерди ле улусты јок эдип салган. 26Лоттыҥ ӱйи дезе кайа кӧрӱп ийеле, тус тӧҥӧш боло берген.
27Эрте таҥда Авраам кече Кайраканныҥ алдында турган јерине келген. 28Ол Содом ло Гоморрага ла бастыра ӧзӧккӧ ајарып кӧрзӧ, ол јердеҥ, печкедеҥ чылап, ыш кӧдӱрӱлӱп турган.
29Ӧзӧктӧги калаларды јоголтып тура, Кудай Авраамды эске алган. Оныҥ да учун Лот јуртаган калаларды јоголтып тура, Кудай оны ӧлӱмнеҥ туураладып апарган.
Лоттыҥ кыстары: моав ла аммон элдердиҥ бӱткени
30Лот эки кызын алганча Цоардаҥ чыгып, кырлар јаар јӱре берген. Цоарда артарга ол коркып турган. Олор куй ташка кирип, јуртай бергендер.
31Јаан кыс кичӱзине айткан:
– Адабыс карган. Јер-телекейде јаҥжыкканы аайынча бисле јуртайтан эр кижи јер ӱстинде јок. 32Адабысты аракыдадып эзиртеле, оныла кожо конолы. Бойыстыҥ да адабыстаҥ болзо, бисте балдар болор.
33Ол кӱн тӱнде олор адазын аракыдадып эзирткендер. Јаан кызы адазыныҥ койнына кирип, оныла кожо конгон, адазы дезе кызы оныҥ койнына киргенин де, туруп барганын да билбеген. 34Эртенгизинде јаан кыс кичӱзине айткан:
– Кече мен адамла кожо конгом. Бу да тӱнде оны аракыдадалы, сен барып, оныла кожо кон. Бойыстыҥ да адабыстаҥ болзо, бисте балдар болор.
35Бу да тӱнде адазын аракыдадып эзирткендер. Кичӱ кызы адазыныҥ койнына кирип, оныла кожо конгон, ол дезе кызы оныҥ койнына киргенин де, туруп барганын да билбеген.
36Анайып Лоттыҥ кыстары экилези адазынаҥ барланган. 37Јаан кыс уул бала таап, оны Моав деп адаган. Ол – эмдиги моав уктулардыҥ адазы. 38Кичӱ кыс база уул бала тапкан, оны Бен-Амми деп адаган. Ол – эмдиги аммон уктулардыҥ адазы.
ទើបបានជ្រើសរើសហើយ៖
Башталганы 19: АЛТ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Российское Библейское Общество, 2025
© Институт перевода Библии, 2025