LUKE 22
22
Jisu Ke Morai Dibole Budhi Kora
1Eitu homoi te khomir nahala roti laga bhojon, kon tu Par-Hua porokh eneka mate, eitu homoi usor ahhise. 2Aru prodhan puruhit khan aru pondit khan pora, keneka hole Tar ke morai dibo raasta bisarise, kilemane tarkhan pora manuh khan ke bhoi korise.
Judas Pora Jisu Ke Thogai Diya
3Tetiya barohjon majot te ekjon, kon Judas Iscariot thakise, tar laga mon te saitan humai jaise. 4Tar jai kene prodhan puruhit khan aru solaongta khan logot te keneka hoi kene Jisu ke thogai dibo, eitu laga kotha milai loise. 5Aru tarkhan khushi hoi kene tar ke poisa dibole kotha milai loise. 6Tetiya tar besi khushi paise aru manuh khan nathaka homoi ekta te Tar ke thogai dibole homoi sai thakise.
Chella khan logot te Parhua porokh
7Tetiya khomir nahala roti laga din, kon din te Par-Hua porokh laga mer bolidaan diye, eitu din pongchise. 8Tetiya Jisu he Peter aru John ke pathai kene koise, “Jabi, aru amikhan khabo karne Par-Hua porokh jugar koribi.” 9Tarkhan pora Tar ke koise, “Amikhan pora kot te jugar kori dibole monn ase?” 10Tar pora tarkhan ke koise, “Sabi, ketiya tumikhan sohor te humai jabo, manuh ekjon kolsi bukhi kene tumikhan ke log koribo. Tar kon tu ghor te humai jai, tar laga piche te jabi 11aru eitu ghor malik ke kobi, ‘Guru-ji pora apuni ke koi ase, Moi laga chella khan logot te Par-Hua porokh jugar koribole alohi khan laga kamra kot ase?’ 12Aru tar pora upor te kamra dangor ekta bhall pora jugar kori kene dekhai dibo; tate jugar koribi.” 13Aru tarkhan jai kene, Tar pora keneka koise, thik eitu nisna paise, aru tarkhan pora Par-Hua porokh tate jugar korise.
Prabhu Bhoj Shuru Kora
14Aru ketiya homoi tu ahhise, Tar mez te bohi jaise, aru pasonir khan bhi bohise. 15Aru Tar pora tarkhan ke koise, “Moi dukh napua aage te eitu Par-Hua porokh tumikhan logot te khabole besi itcha thakise. 16Kilemane Moi tumikhan ke koi ase, Isor laga rajyo te eitu hidho nakhua tak Moi aru eitu nakhabo.” 17Aru Tar pora cup ekta loise, aru dhanyabad diya pasot te koise, “Eitu lobi, aru tumikhan majot te bhag koribi. 18Kilemane tumikhan ke Moi koi ase, etiya pora Isor laga rajyo naha tak Moi eitu angur phol laga paani napibo.” 19Aru Tar pora roti loi kene dhanyabad dise, aru eitu bhangai kene tarkhan ke dise, aru koise, “Eitu moi laga gau ase, kon tu tumikhan karne dise. Moi ke yaad koribole eneka koribi.” 20Aru tarkhan khua pasot te eitu nisna cup tu loise, aru koise, “Eitu cup kon tu tumikhan karne boi ulai ahha khoon, eitu Moi laga notun vachan ase. 21Kintu sabi, kon laga haat pora Moi ke thogai dibole ase eitu manuh bhi Moi logot mez te ase. 22Kilemane Manuh laga Putro tu keneka hobole ase eneka he jai ase, kintu kon pora Tar ke thogai dise tar karne dukh kosto ase!” 23Aru tarkhan majot te eitu kon hobo, eneka tarkhan pora ekjon he ekjon ke hudibole shuru hoise.
Sob Pora Dangor Kon Ase?
24Aru tarkhan majot te sobse dangor kon hobo, eitu kotha te juji thakise. 25Aru Tar pora tarkhan ke koise, “Porjati laga raja khan pora manuh khan upor te malik hoi kene uthi jai aru khyomota cholai, aru kon he odhikar cholai ase tarkhan he lab pua khan eneka koi. 26Kintu tumikhan tu eneka nahoi. Tumikhan majot te kon he sob pora dangor ase, tar he sob pora huru hobo lage aru solaongta tu he seva dibo lage. 27Kilemane kon he dangor ase, mez te bohi thaka khan ne ki, nahole seva kora khan? Eitu mez te bohi thaka khan nahoi ne ki? Kintu sabi, Moi tumikhan majot te seva di ase.
28“Moi kosto kori ahha sob te tumikhan Moi logot te thakise, 29aru keneka Moi laga Pitri pora Moi ke rajyo ekta dise, eneka Moi bhi tumikhan ke ekta rajyo di ase, 30tetiya tumikhan bhi Moi laga mez te bhojon kori kene pibo aru Moi laga rajyo singsason te bohi kene Israel laga baroh zati upor te bichar koribo.
Peter pora Ninda Nakora Aage te Jisu He Koise
31“Simon, Simon, sabi, ghehu dhan nisna chani lobole saitan pora tumi ke mangi loise, 32Kintu biswas pora tumi nagiribo karne Moi prathana kori di dise. Aru ketiya tumi ghurai ahhe, tumi laga bhai khan tagot kori dibi.” 33Peter pora Tar ke koise, “Prabhu, apuni logot te bandhi ghor aru mora tak bhi jabole moi jugar ase.” 34Jisu he koise, “Moi tumi ke koi ase Peter, Moi ke najane eneka tumi tin-bar oshikar nakora tak murga pora dag nadibo.”
Jisu Logot He Hastro Hidho Hobo
35Aru Tar pora tarkhan ke koise, “Ketiya Moi tumikhan khalli haat pathai dise, poisa nai, jhola lua nai, juta lua nai, tetiya tumikhan kiba dorkar hoise ne ki?” Tarkhan pora koise, “Eku dorkar hua nai.” 36Tar pora tarkhan ke koise, “Kintu etiya tu poisa bhi uthai lobi, jhola bhi lobi. Aru kon laga haat te taruwal nai, tar laga kapoor bikiri kori kene ekta kini lobi. 37Kilemane Moi koi ase, eitu hastro te ki likhi ase sob tu Moi logot te hidho hobo lage: ‘Aru tar tu kanoon namana khan logot te genti korise.’ Kilemane moi laga ki likhise, eitu tu hidho hobo he lagibo.” 38Aru tarkhan pora koise, “Sabi, Prabhu, iyate duita taruwal ase.” Aru Tar pora koise, “Eitu pora hoi jabo.”
Olives Pahar Te Jisu Prathana Kora
39Aru Tar laga niyom nisna, Tar ulai kene Olives pahar te jaise, aru Chella khan bhi Tar laga piche te jaise. 40Aru ketiya Tar jaga tu pongchise, tarkhan logot te koise, “Tumikhan porikhya te najabo karne prathana koribi.” 41Aru Tar nijor tarkhan pora olop dur te jai kene, athukarhi kene prathana korise, 42aru koise, “Pitri, jodi apuni itcha hole, eitu bati Moi pora hatai dibi. Kintu eneka holebhi, Moi laga itcha te nahoi, kintu apuni laga itcha he koribi.” 43Aru tate sorgo pora dut ekjon Tar logot te ulaise, aru Tar tagot kori dise. 44Aru dukh kosto te mon besi di kene Tar prathana korise; tetiya Tar laga posina tu khoon laga bund gira nisna mati te girise. 45Aru ketiya Tar prathana pora uthise, Tar laga chella khan usor te ahhise aru tarkhan mon dukh te tagot sob harai kene ghumai thakise, 46aru Tar pora tarkhan ke koise, “Kile tumikhan ghumai ase? Uthibi aru tumikhan porikhya te najabole prathana koribi.”
Thogai Kene Jisu Dhora
47Ketiya Tar kotha koi thakise, tetiya genti napara manuh khan ahhise, aru barohjon majot te Judas eneka kua manuh pora he tarkhan anise. Tar usor te ahhi kene Jisu ke chumma dise, 48kintu Jisu he tar ke koise, “Judas, tumi ekta chumma di kene Manuh laga Putro ke thogai ase ne ki?” 49Aru Tar logot te thaka chella khan pora ki hobole ase eitu ketiya janise, tarkhan pora koise, “Prabhu, taruwal cholabo ne ki?” 50Aru tarkhan majot te ekjon he mahan puruhit laga nokor ekjon laga daina kan kati dise. 51Kintu Jisu he koise, “Eitu aru nalage!” Aru Tar pora kan te chui kene hustho kori dise. 52Tetiya Jisu he prodhan puruhit aru girja laga solaongta khan, bridho khan, kon Tar birudh te ahhise tarkhan ke koise, “Tumikhan rosi aru taruwal loi kene dacoit ekjon birudh te ahha nisna ahhise ne ki? 53Ketiya Moi tumikhan logot girja ghor te hodai din thakise, tetiya tumikhan pora Moi ke haat chua nai. Kintu etiya tu tumikhan laga homoi aru andhera laga shakti tu ase.”
Peter Pora Jisu Ke Oshikar Kora
54Tetiya tarkhan pora Jisu ke dhorise aru mahan puruhit laga ghor te loi anise aru Peter pora dur te piche piche jaise. 55Aru ketiya manuh ghor bahar te jui jolai kene eke logot te bohi thakise, Peter bhi taikhan majot te bohise. 56Tetiya nokorani ekjoni jui laga puhor te tar ke dekhise aru usor te ahhi kene koise, “Eitu manuh bhi Tar logot te thakise.” 57Kintu tar pora oshikar kori koise, “Hei tiruta, moi Tar ke najane.” 58Aru olop piche te konuba pora tar ke dekhi kene koise, “Tumi bhi tarkhan logot te thakise.” Kintu Peter pora koise, “Moi nahoi.” 59Aru ek ghonta nisna thaki kene aru ekjon pora koise, “Hosa eitu manuh bhi Tar logot thakise, kilemane tar bhi Galilee manuh ase.” 60Kintu Peter pora koise, “Hei manuh, tumi ki kotha koi ase, eitu moi najani.” Aru loge loge, tar kotha koi thaka homoi te murga pora dag dise. 61Aru Prabhu he ghurai kene Peter logot te saise. Tetiya Prabhu he ki koi thakise, eitu Peter pora yaad korise, Prabhu he eneka koise, “Aji murga pora dag nakora aage te tumi Moi ke tinbar oshikar koribo.” 62Aru tar ulai jai kene mon dukh kosto te besi kandise.
Jisu Ke Hinsa Kora
63Eitu homoi te, kon laga haat te Jisu thakise tarkhan pora Tar ke piti kene hinsa korise. 64Tarkhan pora arubhi soku bandhi dise, aru hudi thakise, “Bhavobani di kene kobi, tumi ke mara tu kon ase?” 65Aru Tar birudh te tarkhan pora besi kotha koise, aru Tar upor te bodnam dise.
Sobha Aage te Jisu
66Ketiya din hoise, zati laga bridho sobha eke logot te jama korise, prodhan puruhit khan aru pondit khan sob jama korise. Aru Tar sobha te loi jaise, aru tarkhan pora koise, 67“Jodi tumi Khrista tu hoi, tetiya amikhan ke kobi.” Kintu Tar pora tarkhan ke koise, “Jodi Moi kolebhi tumikhan pora biswas nakoribo, 68aru jodi Moi hudilebhi tumikhan pora jawab nadibo. 69Kintu etiya pora Manuh laga Putro tu mahan shakti te Isor laga daina haat te bohibo.” 70Tetiya tarkhan sob pora koise, “Tetiya, tumi Isor laga Putro ase ne ki?” Aru Tar pora tarkhan ke koise, “Tumikhan pora Moi ase eneka koi ase.” 71Tetiya tarkhan pora koise, “Amikhan aru dusera sakhi ki lage? Amikhan sob pora Tar nijor mukh pora kua huni loi loise.”
ទើបបានជ្រើសរើសហើយ៖
LUKE 22: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
