JOHN 8
8
1kintu Jisu he Olives Pahar te uthi jaise. 2Ekdom phujor homoi te arubhi Tar girja ghor te ahhise. Aru manuh khan sob Tar usor te ahhise, aru Tar bohi kene tarkhan ke sikhai dise. 3Tetiya Pharisees aru pondit khan pora tiruta ekjoni, kon biyobichar te dhori loise, tai ke manuh khan majot te anise 4aru tarkhan pora koise, “Guruji, eitu tiruta biyobichar kori thaka homoi te dhorise. 5Etiya Moses laga kanoon te eneka tiruta tu pathor pora mari kene morai dibole hukum ase. Eitu karne apuni bhi ki koi?” 6Eitu Tar ke porikhya koribole aru Tar laga kotha pora Tar ke dhoribole he hudise. Kintu Jisu he chehera niche te nami kene Tar laga anguli pora maati te likhise. 7Aru tarkhan pora bar bar huda karne, Tar uthise kene tarkhan ke koise, “Tumikhan majot te kon logot te paap nai tar pora pahila eitu tiruta logot te pathor pora maribi.” 8Eitu pasot te arubhi Tar chehera niche nami kene maati te likhise. 9Kintu ketiya tarkhan pora eitu kotha hunise, sobse bridho pora shuru hoi kene, tarkhan sob ekta pasot te ekta eneka jai jaise, aru Jisu ekela eitu tiruta aage te shari dise. 10Jisu he uthi kene eitu tiruta ke koise, “Hei tiruta, tarkhan kot ase? Konuba pora tumi ke ninda korise?” 11Tai pora koise, “Kon pora bhi nahoi, Prabhu.” Aru Jisu he koise, “Moi bhi tumi ke ninda nakore; jabi aru etiya pora paap nakoribi.”]]
Moi Jogot Laga Puhor
12Arubhi Jisu he taikhan logot te koise, “Moi jogot laga puhor ase. Kon kon pora Moi laga piche ahhe, taikhan ketiya bhi andhera te naberabo, kintu jivon puhor pabo.” 13Eitu karne Pharisees khan pora Tar ke koise, “Tumi nijor laga sakhi di ase; tumi laga haikhyo tu thik nahoi.” 14Jisu he jawab dise, “Moi nijor laga sakhi nijor pora dile bhi, Moi laga haikhyo thik ase, kilemane Moi kot pora ahhise aru Moi kot jai ase eitu Moi jane, kintu tumikhan pora eitu najane. 15Tumikhan pora gau mangso hisap te bichar kore; Moi tu kon ke bhi bichar nakore. 16Kintu jodi Moi bichar korile bhi, Moi laga bichar tu hosa ase, kilemane eitu bichar tu Moi ekela pora nahoi kintu Pitri kon pora Moi ke pathaise duijon pora ase. 17Tumikhan laga kanoon te likhi kene ase, duijon laga sakhi hole eitu hosa ase. 18Moi nijor laga sakhi koi ase, aru Pitri kon pora Moi ke pathaise Tar pora Moi karne sakhi di ase.” 19Eitu karne tarkhan pora Tar ke koise, “Tumi laga Pitri tu kot ase?” Jisu he uttar dise, “Tumikhan pora Moi ke bhi najane nahole Pitri ke bhi najane. Jodi tumikhan pora Moi ke jani thakile, tumikhan pora Pitri ke bhi janibole thakise.” 20Tar pora sikhai diya homoi, girja ghor te sampoti jama kora jaga pora eitu kotha koise; kintu kon pora bhi Tar ke dhora nai, kilemane Tar laga homoi tu etiya tak pongcha nai.
21Eitu karne Tar pora koise, “Moi jai ase, aru tumikhan pora Moi ke bisaribo, kintu nijor laga paap te he tumikhan moribo. Moi kot te jai ase, tate tumikhan ahhibo naparibo.” 22Eitu karne Jews khan pora koise, “Tar nijor ke morabo neki, kilemane Tar koise, ‘Moi kot te jai ase, tumikhan ahhibo naparibo’?” 23Tar he tarkhan ke koise, “Tumikhan niche jaga pora ase; Moi upor jaga pora ase. Tumikhan eitu prithibi laga ase; moi tu eitu prithibi laga nahoi. 24Moi tumikhan ke koi dise, nijor laga paap te tumikhan moribo, kilemane Tar tu Moi ase eneka biswas nakorile tumikhan paap te moribo.” 25Eitu karne tarkhan pora Tar ke koise, “Tumi kon ase?” Jisu he tarkhan ke koise, “Moi aage pora ki koi ase eitu he ase. 26Moi tumikhan laga besi kobole ase aru bichar koribole bhi besi ase, kintu kon pora Moi ke pathaise Tar hosa ase, aru prithibi te Moi ki janai di ase eitu Tar pora Moi ke hunai diya ase.” 27Tar pora Pitri laga kotha koi ase eneka tarkhan pora buja nai. 28Eitu karne Jisu he tarkhan ke koise, “Ketiya tumikhan pora Manuh laga Putro ke uthai dibo, tetiya tumikhan pora janibo, Moi tu Tar he thakise, aru Moi nijor laga odhikar pora eku kora nai, kintu Pitri pora ki sikhai dise eitu he koise. 29Aru Kon pora Moi ke pathaise Tar Moi logot te ase. Tar pora Moi ke shara nai, kilemane Tar pora ki bhall pai eitu kam he Moi kore.” 30Tar pora eitu kotha kua homoi te besi manuh he Tar ke biswas kori loise.
Hoityo Pora Tumikhan Ke Mukti Dibo
31Eitu karne Jews kon pora Tar ke biswas kori loise tarkhan ke koise, “Jodi tumikhan pora Moi laga kotha te thakile, tumikhan hosa bhi Moi laga chella ase, 32aru tumikhan pora hoityo tu jani lobo, aru hoityo pora tumikhan ke mukti dibo.” 33Tarkhan pora jawab di koise, “Amikhan Abraham laga khandan ase aru ketiya bhi manuh laga daas aru daasi hua nai. Tenehole keneka tumi koi, ‘Tumikhan mukti pabo’?”
34Jisu he tarkhan ke uttar dise, “Hosa kotha Moi tumikhan ke kobo, kon pora paap kore, taikhan sob paap laga daas ase. 35Daas ekjon ghor te hodai nathake; kintu putro tu hodai thake. 36Eitu karne jodi Putro pora tumikhan ke mukti dile, tetiya tumikhan hosa pora bhi mukti pabo. 37Tumikhan Abraham laga khandan ase eneka Moi bhi jani ase; kintu tumikhan pora Moi ke morai dibole bisari ase, kilemane Moi laga kotha tumikhan logot te namilile. 38Pitri logot te Moi ki paise, eitu laga kotha he Moi koise ase, aru tumikhan bhi tumikhan laga pitri pora ki paise eitu koi ase.”
Tumikhan Tu Tumi Laga Pitri Saitan Pora Ase
39Tarkhan pora koise, “Abraham he amikhan laga pitri ase.” Jisu pora tarkhan ke koise, “Jodi Abraham tu tumikhan laga pitri hole, Abraham pora ki korise, eitu koribole thakise, 40kintu hoityo kotha Isor pora huni kene tumikhan ke kua, Moi ase, aru moi ke morai dibole tumikhan pora bisari ase. Abraham pora eneka kora nai. 41Tumikhan pitri pora ki korise eitu he tumikhan pora kori ase.” Tarkhan pora Tar ke koise, “Amikhan biyobichar pora jonom kora nai. Amikhan ekjon pitri ase—eitu Isor.” 42Jisu pora tarkhan ke koise, “Jodi Isor tu tumikhan laga Pitri ase, tumikhan pora Moi ke prem koribo, kilemane Moi Isor pora ahhise, aru Moi iyate ase. Moi nijor itcha te ahha nai, kintu Tar pora he Moi ke pathaise. 43Moi ki kotha koi ase eitu kile tumikhan pora nabuje? Kilemane Moi kua kotha tumikhan pora lobole monn nai. 44Tumikhan tu tumar pitri saitan laga he ase, aru tumikhan laga itcha tu tumar pitri pora ki itcha kore, eitu ase. Aage pora tar tu manuh morai diya thakise aru tar logot te hoityo ekebare nai, kilemane hoityo he tar logot te nai. Ketiya misa koi eitu tar laga niyom he ase, kilemane tar tu misolia ase aru misa laga baba ase. 45Kintu Moi hosa kotha kua karne he tumikhan pora biswas nakore. 46Tumikhan majot te kon pora Moi paap korise eneka kobo paribo? 47Kon Isor laga ase, taikhan pora Isor laga kotha huni loi. Eitu kotha tumikhan pora hunibole napara pora, tumikhan Isor laga nahoi eneka jani ase.”
Abraham Aage Te Moi Ase
48Jews khan pora uttar dise, “Apuni Samaria manuh ase aru apuni logot te ohusi atma ase eneka amikhan pora kua tu thik nahoi neki?” 49Jisu he jawab dise, “Moi logot te ohusi atma nai, kintu Moi Pitri ke sonman kori ase, aru tumikhan pora Moi ke sonman nakore. 50Kintu Moi nijor laga mahima nabisare; eitu bisara ekjon ase tar he bichar korta ase. 51Hosa kotha Moi tumikhan ke koi ase, Jodi konuba pora Moi laga Kotha mani ase, tar mora ketiya bhi log napabo.” 52Jews khan pora Tar ke koise, “Apuni logot te ohusi atma ase eneka amikhan pora etiya janise! Bhavobadi khan sob mora nisna he Abraham bhi morise, kintu apuni pora koi ase, ‘Jodi konuba pora moi laga kotha manile ketiya bhi namoribo.’ 53Apuni tu amikhan laga pitri Abraham, kon morise tar pora bhi dangor neki? Aru bhavobadi khan bhi morise! Apuni nijor tu kon ase eneka bhabi ase?” 54Jisu he jawab dise, “Jodi Moi nijor pora mahima kori ase, Moi laga mahima tu eku nahoi. Kintu tumikhan pora, ‘Tar tu amikhan laga Isor ase,’ eneka kua Pitri pora he Moi ke mahima kori di ase. 55Kintu tumikhan pora Tar ke najane. Moi tu Tar ke jane. Moi Tar ke najanile Moi tu tumikhan nisna misolia hobo, kintu Moi Tar ke jane aru Tar laga kotha mani loi ase. 56Tumikhan laga pitri Abraham pora Moi laga din ahhi thaka dekhi kene anando paise. Tar pora eitu dekhi kene khushi paise.” 57Eitu karne Jews khan pora Tar ke koise, “Apuni etiya tak ponchas saal bhi hua nai, aru apuni Abraham ke dekhise neki?” 58Jisu he tarkhan ke koise, “Hosa kotha Moi tumikhan ke kobo, Abraham laga aage te Moi ase.” 59tetiya tarkhan pora Tar ke maribole pathor uthaise, kintu Jisu he nijor pora lukai kene girja ghor pora ulai jaise.
ទើបបានជ្រើសរើសហើយ៖
JOHN 8: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
