JOHN 10
10
Moi Bhall Mer Roikhya
1“Hosa kotha Moi tumikhan ke koi ase, kon kon pora dorja phale nahoi kene dusera raasta pora uthi kene mer ghor te ahhe, eitu khan choor aru dacoit ase. 2Kintu kon he dorja phale humai ahhe, eitu khan he mer roikhya laga asol mer ase. 3Aru dorja roikhya manuh pora taikhan karne dorja khuli dibo aru mer khan pora bhi Tar laga awaz huni loi, aru Tar pora bhi nijor mer laga nam mati kene tarkhan ke bahar te loi jai. 4Ketiya Tar pora mer sob tu ulai loi, tetiya eitu khan aage te Tar jai aru mer khan pora Tar laga piche te jai, kilemane eitu khan pora Tar laga awaz buji loi. 5Dusera manuh laga piche te tarkhan najai kintu polai jabo, kilemane tarkhan pora dusera manuh laga awaz nabuji.” 6Eitu tulona kotha Jisu he tarkhan majot te koise, kintu ki kotha koi ase tarkhan pora eitu buja nai.
7Eitu karne Jisu he aru tarkhan ke koise, “Hosa kotha moi tumi khan ke koi ase, mer khan laga dorja tu Moi ase. 8Moi laga aage te kon kon jai ase tarkhan choor aru dacoit khan ase, aru mer pora tarkhan ke nahunibo. 9Moi he dorja ase, jodi konuba Moi darai dorja phale pora humai jai, tar bachai kene thakibo, aru ahha jua kori kene bhojon pabo. 10Choor manuh tu khali choor koribo, morai dibo aru nosto kori dibole he ahhe; Moi ahha tu tarkhan jivon pabo aru eitu pura puri dibo karne ahhise. 11Moi he asol mer roikhya ase. Asol mer roikhya pora mer khan nimite nijor jivon bhi diye. 12Kintu kon he hazira kora manuh ase aru asol mer roikhya nahoi aru tar nijor laga mer nai, tar pora rang-kukur ahha dekhi kene mer shari kene polai jai aru rangkukur pora mer khan ke dhori loi, aru taikhan sob alag alag jaga te pathai diye. 13Tar polai jai kilemane tar tu hazira manuh he ase aru mer khan karne eku chinta nai. 14Moi he asol mer roikhya ase. Moi nijor laga mer ke jane, aru tarkhan pora bhi Moi ke jane, 15keneka Pitri pora moi ke jane aru Moi bhi Tar ke jane, eitu nisna he mer khan karne Moi laga jivon di ase. 16Aru eitu mer ghor te nathaka Moi laga dusera mer bhi ase. Moi tarkhan ke bhi anibo lage aru tarkhan pora bhi Moi laga awaz hunibo. Eneka he mer khan sob ekta hobo aru mer roikhya bhi ekta he hobo. 17Eitu nimite Pitri he Moi ke prem kori ase, kilemane Moi nijor laga jivon tu arubhi wapas uthai lobole moi di ase. 18Kon pora bhi eitu Moi laga haat pora loi jabo naparibo, kintu moi nijor monjur hoi kene jivon di ase. Moi eitu dibole odhikar ase, aru eitu wapas uthai lobole bhi odhikar ase. Eitu hukum tu Moi Pitri pora paise.”
19Eitu kotha nimite Jews majot te arubhi bhag hoi jaise. 20Tarkhan besi manuh pora koise, “Tar logot te ohusi atma ase, aru mogos thik nahoi; ki karne Tar laga kotha hunibo?” 21Dusera khan pora koise, “Eitu kotha khan tu ohusi atma thaka manuh laga kotha nahoi. Ohusi atma pora andha manuh soku khuli dibo neki?”
Moi aru Pitri Ekjon He Ase
22Heitu homoi, Jerusalem te protisthan laga porokh thakise aru eitu thanda din thakise, 23aru Jisu he girja ghor te Solomon laga varanda eneka kua jaga te berai thakise. 24Tetiya Tar usor te Jews khan jama kori kene hudise, “Apuni kiman din amikhan hondeh te thakibole dibo? Jodi apuni Khrista ase tetiya sidha sidhi kobi.” 25Jisu he tarkhan ke koise, “Moi koi dise aru tumikhan pora biswas nakore. Ki kam Pitri laga nam te Moi kori ase eitu khan pora Moi laga sakhi di ase, 26kintu tumikhan pora biswas nakore kilemane tumikhan Moi laga mer nahoi. 27Moi laga mer pora Moi laga awaz hune aru Moi bhi tarkhan ke jane aru eitu khan Moi laga piche te ahhe. 28Aru Moi taikhan ke ananta jivon di ase, aru tarkhan ketiya bhi naharabo, aru kon pora bhi Moi laga haat pora taikhan uthai loi najabo. 29Moi laga Pitri Kon pora Moi ke taikhan dise Tar sob pora dangor ase aru kon pora bhi Moi laga Pitri haat pora taikhan uthai loi jabo naparibo. 30Pitri aru Moi ekjon he ase.”
31Jews khan pora arubhi pathor uthai kene Tar ke maribole thakise. 32Jisu he taikhan ke jawab di koise, “Pitri pora koribole diya bhall kam besi tumikhan logot te Moi dekhai dise; eitu khan kon tu karne tumikhan pora Moi ke pathor pora maribole monn ase?” 33Jews khan pora jawab di koise, “Eitu bhall kam nimite apuni ke pathor pora maribole nahoi, kintu Isor ninda kora kotha nimite ase kilemane apuni manuh hoi kene nijor pora Isor ase eneka koi ase.” 34Jisu pora tarkhan ke koise, “Tumikhan laga kanoon te eneka likha nai neki, ‘Moi koise, tumikhan Isor ase’? 35Tetiya kon karne Isor kotha tu ahhise jodi tarkhan ke Isor eneka mate—aru Hastro tu ketiya bhi bhangibo napare— 36Tetiya Pitri pora kon abishek kori kene prithibi te pathaise, Tar pora, ‘Moi Isor laga Putro ase,’ eneka kua karne Isor ke ninda kotha koi ase eneka tumikhan pora keneka koi? 37Jodi Moi Pitri laga kam nakore tetiya Moi ke biswas nakoribi; 38kintu jodi Moi eitu khan kori ase, Moi ke biswas nakorile bhi, kam tu sai kene biswas koribi, tetiya tumikhan pora Pitri Moi logot te ase aru Moi Pitri logot te ase eneka bujibo.” 39Arubhi tarkhan pora Tar ke dhoribole bisarise, kintu tarkhan laga haat pora Tar ulai jaise.
40Tar Jordan par kori kene, kon jaga te John pora aage te baptisma di thakise tate jaise, aru tate thakise. 41Aru besi manuh khan Tar usor te ahhise. Aru tarkhan pora koise, “John pora asorit sign eku kora nai, kintu eitu manuh laga John pora ki koise eitu sob hosa ase.” 42Aru besi manuh khan pora Tar ke biswas korise.
ទើបបានជ្រើសរើសហើយ៖
JOHN 10: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
