Genesis 10
10
Welekwa wa wana wa Nuhu
1Aho ugubiko mkulu wa mazi mwe isi wize usile, wana wa Nuhu awo wakina Shem na Hamu na Jafeti, welekaga wana wa kilume na wa kivele.
2Welekwa wa Yafeti ni awa, Gomeli na Magogu na Madai na Javani na Tubali na Mesheki na Tilasi. 3Welekwa wa Gomeli ni Ashikenazi na Lifasi hamwenga na Togama. 4Welekwa wa Yavani wandaga ni Elisha na Talashishi na Kitimu na Lodanimu. 5Awa nicho ichotoko cha want'hu wakwikala na kusambala mp'wani, kila want'hu kwa ulosi wawe na lukolo lwawe na kwa si zawe.
6Wana wa Hamu wandaga ni Kushi na Misili na na Kanaani. 7Wana wa Kushi wandaga ni Seba na Havila na Sabta na Laama na Sebteka. Wana wa kilume wa Laama wandaga Shebe na Dedani. 8Kushi amwelekaga Nimlodi uyo andaga mhumi ywa nk'hongo mwe si zose. 9Kwa wambizi wa Mnungu andaga mkala mkulu, naivo nivo vikuleka want'hu wagamba, “Zumbe akutende mkala mkulu enga ivo eli Nimlodi!” 10Mizi ya nk'hongo yo useuta wakwe yandaga ni Babeli na Eleki na Akadi na Kaline mwe si za Shinali. 11Eze alawe mwe isi idya aitaga Asilia no kuizenga mizi ya Ninawi na Lehoboti-Ili na Kala 12na Leseni ihagati ya Ninawi na Kalashi mzi mkulu.
13Wana wa Misili wandaga ni Waludi na Waanami na Walehabi na Wanafutuhi, 14Wapatilasi na Wakasiluhi, awa nawo chotoko cha Wafilisiti na Wakafutoli.
15Kaanani andaga niye ise dya Sidoni uyo nt'hula sasu ywakwe, hamwenga na Wahiti. 16Kanani iviya iviya andaga niye mkale ywa Wayebusi na Waamoli na Wagiligali, 17na Wahivi na Waaliki na Waasini, 18Waavadi na Wazemali na Wahamati. Akajika aho makabila ayo ye hengi ya Wakanani yasambalaga, 19niyo wabula nt'hendelo za Kwa mwenye mzi mwa Sidoni kuhinga Gelali hagihi na Gaza na nt'hendelo za ulailo wa zuwa mpaka Sodoma na Gomola na Adima na Zeboimu hagihi na Lasha. 20Awa nawo wana wa Hamu kwa nk'holo zawe na milosi yawe na si zawe. 21Shemu mkuluwe dya Yafeti andaga niye mkale ywa Waibulania wose. 22Awa nawo wana wa Shemu, Elamu na Asilia na Alipakishadi na Ludi na Asilia. 23Wana wa Asilia wandaga ni Usi na Huli na Getheli na Meshi. 24Alipakishadi amwelekaga Shela, Shela amwelekaga Ebeli. 25Ebeli niye elekaga wana kilume waidi. Ywa nk'hongo etangagwa Pelegi kwaviya elekagwa mwo lupisi want'hu we isi wakapangana. Wakaidi naye etangwagwa Yokitani. 26Wana wa Yokitani ni Alimodadi na Selefu na Hasamaweti na Yela, 27Hodulamu na Uzali na Dikilaha, 28Obali na Abimaleki na Sheba, 29Ofili na Havila na Yobabu. Awa wose ni welekwa wa Yokitani. 30Wekalaga mwe isi kulawa Mesha kuhinga Sefali mwe isi ye vigulu va Ulailo wa zuwa. 31Awa nawo welekwa wa Shemu wakwikala viligane ne zink'holo zawe ne si zawe na milosi yawe na makabila yawe.
32Awa wose ni welekwa wa lukolo wa wana wa Nuhu, viligane ne vyeleko vawe na si zawe. Kulawa kwa want'hu awo, want'hu wose wa si zose nawagenyela mwe si zose aho ugubiko mkulu wa mazi mwe isi wize womboke.
ទើបបានជ្រើសរើសហើយ៖
Genesis 10: OTNguuBL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Nguu @The Word for The World International and the Nguu Language translation, 2025. All rights reserved.