LUKA 8
8
Bainto bambooyelakɛ Yesu
1La lombuha luuko, Yesu ataki itɔkɛndɛkɛ nde bamonga la bihe; aolake mpe aoyebye Nsango e Bɔlɔti eeki Bonkumu booki Ndjakomba. Ataki itɔkɛndɛkɛ nde la bɛnkɔmwa bekinde lyomu la bepe, 2la mpe bainto baamɔɔ babikyaki nde la belimo be bobe mpe la nkandi: Balia, banɛ baetaka ibɔ Balia ba Bangandala, ɔnɛ o umolaki ibɔ belimo be bobe nsambo, 3Yaane, waali ooki Kuza, bosali bolenda byomba biiki Elode, la Suzana la buuke bo bainto bankina baambookambolake Yesu la bakɛndi laa nde la byomba bikibɔ.
Lwɛlya looki booni
(Lenda la nde Mat 13, 1-9; Mlk 4, 1-9)
4Banto bauma bamonga bankuma mpe baya eka Yesu. Aiko eyalaki boloy bo bɔnɛnɛ, Yesu aopa lwɛlya lɔnɛ: 5«Booni bɔmɔɔ ataki itolikaka byopo nde ngonda ekinde. Aiko yolike nde, byopo benkina bɛkɔɔ nde ndjela; banto banyatɛ bɛkɔ mpe mpulu baheyɛ yɔɔlɛ bɛkɔ. 6Byopo benkina bɛkɔɔ nde ndye e babɔkɔ: byopo bɛmɛnɛ mpe tabɛtɛmɛ yoma, itina babu tabayala la bahi. 7Byopo benkina bɛkɔɔ nde ndye e nsɛndɛ. Byɔbɛlɛ byolwɛ bɔlɔngɔ la nsɛndɛ mpe nsɛndɛ iminyɛ byɔbɛlɛ. 8Byopo benkina bɛkɔɔ nde babu ba bɔlɔti; byɔbɛlɛ byolwɛ bɔlɔti mpe bebotɛ, bɔɔbɛlɛ bɔmɔɔ la bɔmɔɔ bobotɛ mmuma bonkama.» Yesu aohangya: «Bonto oyali la batoyi ba yoka, aoke.»
Itina Itepela Yesu nde ndjɛlya
(Lenda la nde Mat 13, 10-17; Mlk 4, 10-12)
9Bakɛndi la nde babuubolɛ kaki lwɛlya luuko lolimbola nnɔ. 10Aobabela: «Nyo, balopɛ lyanya i iyeba babomba baaki Bonkumu booki Ndjakomba; nga la bankina, ibɔ baokake nko nde ndjɛlya, kela “balendake nkwɛnɛ, baokake nkobuteya itina”.»
Ndimbo eeki lwɛlya
(Lenda la nde Mat 13, 18-23; Mlk 4, 13-20)
11«Lookaka ndimbo eeki lwɛlya luuko: boopo, wambɔ Lyoi iiki Ndjakomba. 12Banto baayali nde bokili bo ndjela, wambɔ banɛ baoka, anɛ eha bolengoli aya, ahumola Lyoi nde betema bekibɔ, tabaoyamba Lyoi babike. 13Banto bankina bayali nga babu banɛ bayolɛ la babɔkɔ: baokake Lyoi mpe baambake iikɔ la bosalangano. Yaa nko Lyoi ipobate belubo, ɛkɔiko baambake nko bonwema, mpe nko la bɔkɛkɛ baotona kaki bolengoli booya. 14Boopo bɔɔkɔ nde babu baayali la nsɛndɛ, wambɔ banto banɛ baoka Lyoi, yaa nko lyale iiki bokili, byomba la mpoha e bokili ebabutɛ nde ndjela, ɛkɔikɔ bapokite yobota mmuma inɛ yɛlɛ. 15Boopo bɔɔkɔ nde babu ba bɔlɔti elakya banto banɛ baoka Lyoi mpe baobomba nde botema bo bɔlɔti mpe bo ipiki, ibɔ babombake mbo mpe babotake mmuma la itingɛ.»
Lwɛlya lo moinda
(Lenda la nde Mlk 4, 21-25)
16«Bapɔpɛtyake moinda kela babombe nde mpoke la mpe nde nse e ntange; baemyake nde ikondi kela banto banɛ baɔtwa nde botumba baɛne. 17Itina nkola la yoomba ɛmɔɔ ebombi engoyala nko ola nde boponga, nkola la ɛmɔɔ iihi engoyala nko ebetana mpe nko ola nde bongala. 18Nga la nyo, luumaka nkulupa lokite mbɛngɛlɛ nde inɛ yoka nyo. Itina bonto okati bangoobopa lenkina; opa tokati bangɔɔbɔpɔmɔlɔ la yoomba iiko ekamba nde akati.»
Nyango la bahi botonga baaki Yesu
19Nyango eeki Yesu la bahi botonga baakinde bayɛ yobotilaka, yaa nko tababata epoha e yokita tii ndye eyalaki nde itina boloy boyalaki bɔnɛnɛ. 20Baobobela ngɔnɛ: «Nyango ekiɛ la bahi botonga baakiɛ bayali aiko nde bongala, balanga bakwɛne.» 21Yesu aobela baayalaki aiko: «Nyango ekimi la bahibotonga baakimi, eyali banto banɛ baoka Lyoi iiki Ndjakomba ko baahalela ikɔ.» 22Bɔɔmɔɔ buuna, Yesu akondelɛ nde waato nde la bakɛndi laa nde mpe ababelɛ: «Topendye loko loni lonkina lo ndeko.» Ibɔ banɛ batɛ. 23Aiko yoluke ibɔ, Yesu aɔngɔlɛ ilɔ. La mbala ɛmɔɔ, bonketi bɔmɔɔ bɔnɛnɛ bobaolelɛ nde ndeko; waato boyaki ibɔ booyoola la bahi, bayɛɛ nde ikuma nkɔlɛ. 24Bakɛndi laa nde bayɛ ntute laa nde mpe baboemolɛ ibɔ baambɔ: «Bolaki, Bolaki, toowa!» Yesu aemwɛ, aangwelɛ bɔmpɛmpɛ la buula. La bɔmpɛmpɛ la buula beyahuloyɛ mpe ndeko enkuma ekitɛ way. 25Nde ɔnɛ obabelɛ: «Nyumeya ekinyo eyali nko?» Bɔɔmɔ boobabuta, bakulɛ nko bakoto mpe bayahangelɛ: «Bonto ɔnɛ ayali mpendja nnɔ? Aangoya la bɛmpɛmpɛ la bahi mpe bebookela!»
Yesu aleka belimo be bobe la nguya
26Yesu la bakɛndi laa nde bakitɛ nde ibongo iiki bokili bo Ngelaza, ibu i mboka la Ngalilaya. 27Anɛ ehulwa Yesu nde waato, bonto ɔmɔɔ oki imonga iiko ayɛ yoponana la nde. Bonto ɔkɔ ayalaki la belimo be bobe. Ima kala, tatindeya yɔlɔtɔ bihenda mpe apokihake nde botumba, nko nde baombo. 28Anɛ ɛnɛki nde Yesu, aulɛ waandje mpe ayalikɛ nde bekolo bekinde, abobɛ la longuya: «Lokimi la wɛ nnɔ, Yesu, Bona ooki Ndjakomba ɛnɛ e lobola? Nkɔbɔndɛlɛ, tontungyake!» 29Atepela ngauko itina wambɔ Yesu atindaki bolimo bo bobe buuko aole nde byonge biki bonto uuko. Mbala la mbala aɔtwake nde byonge bikinde. Mpe ɔmbwɛnɛkɛ bangotungyɛ bɛlɔkɔ, apupolake nko mpupola mpe bolimo bo bobe bobotindake nko nde bipoka. 30Yesu abuubolɛ: «Lina ikiɛ nnɔ?» Abuunoyelɛ: «Botonga.» Itina belimo be bobe buuke bɛbɔtwɛlɛ nde byonge. 31Belimo bɛkɔ be bobe bebɔbɔndɛlɛ tabatindake nde ipoku i lyale ipa la nsuki.
32Ndye eyalaki ibɔ, botonga bɔmɔɔ bo ngulu boyaki yɔɔlɛ baɔmbi nde liko i ngomba. Belimo bɛkɔ be bobe bɛbɔndɛlɛ Yesu abapa ndjela batu yɔɔtwa nde ngulu iiko. Yesu abapɛ ndjela. 33Belimo be bobe byolɛ nde bonto uuko, betɛ itɔɔtwa nde ngulu. La mbala ɛmɔɔ, botonga lonkundu boyabilingolɛ ima nde ngomba tii nde ndeko mpe boninɛ nde ndeko. 34Anɛ ɛnɛki baahɛnjɛlɛ ngulu ehanha iiko, bayabɛlɛ lobango mpe batɛ itohangelaka banto ikambo iiko nde imonga mpe nde bahala batuti aiko. 35Banto bayɛ yolenda ilekaki aiko. Bakitɛ loko loyalaki Yesu. Bataanɛ bonto ɔnɛ ombolye ibɔ belimo be bobe akihi nde bekolo beki Yesu, alɔti bihenda mpe bolimo bo bonto bongobuunwɛ. Banto baokɛ bɔɔmɔ. 36Banto banɛ baɛnɛki mbo inkuma ilekaki bahangelɛ banɛ bayaki la mpe ndenge ebikaki bonto uuko oyalaki la belimo be bobe. 37Ɛkɔiko banto bankuma baaki Ngelaza babelɛ Yesu aume eka ibɔ, itina baokɛ epapo e bɔɔmɔ. Yesu akondelɛ nde waato mpe ayaunoyɛ. 38Bonto ɔnɛ oolyaki ibɔ belimo be bobe abɔndɛlɛ Yesu ayale la nde. Yesu talanga mpe abobelɛ: 39«Inwa ekanyo mpe hangela banto inkuma ikelɛ Ndjakomba itina ikiɛ.» Bonto uuko aunwɛ ekabɔ, atɛ itɔlɔndɔlɔkɔ nde imonga lokundu bɔlɔti bonkuma bokelɛ Yesu itina ikinde.
Yesu aleka nkandi la iwa la nguya
40Anɛ inwɛ Yesu, boloy bɔnɛnɛ boyɛ yowamba, itina babolilaki. 41Loondo lɔmɔɔ ayɛ, lina ikinde Yailo, ayalaki bonkondi bo botumba bo lɔbɔndɔ. Ayakɔyɛ nde bekolo beki Yesu la yɔbɔndɛlɛ atu nde botumba bokinde, 42itina mbɔ bona okinde o buunto nko ɔkɔ ɔmɔɔ, okitaki la mbula ntute la lyomu la ipe alangaki awu.
Aiko etaki Yesu mpiko, banto buuke bayaki yoboyelaka, mpe yobotikaka mpika. 43Nde banto baiko, eyalaki la buunto ɔmɔɔ ɔkɔnɛ nkandi yotanga bakila, akelɛ la ɛkɔ mbula lyomu la ipe. Aheyɛ lokutu lokinde eka benganga mpe nkola la ɔmɔɔ ɔɔhɔki yobobikya. 44Ayaindjɛ nde lombuha loki Yesu, abobutɛ nde lolemba lo ehenda, mpe la mbala ɛmɔ, bakila batenɛ. 45Yesu aubolɛ: «Ombombute nnɔ?» Nga opa la bonto ɔmɔɔ taumeya, Petelo abobelɛ: «Bolaki, uuko wambɔ boloy bongokolingɛ bokotika mpika.» 46Yesu aunoyɛ: «Bonto ɔmɔɔ amboombute. Ngɔɔkɛ nguya ɛmɔɔ engondjolɛ.» 47Anɛ ɛnɛki buunto uuko bangowebɛ, ayɛɛ yotutumaka yoyakɔyɔ nde bekolo beki Yesu. Alɔndɔlɛ nde baiho ba banto bankuma itina ibutaki nde Yesu mpe ndenge ebikaki nde la mbala ɛmɔ. 48Yesu nde ɔnɛ obohangelɛ: «Eboha e buunto, nyumeya ekiɛ engokobikyɛ. Kɛndɛ bɔlɔti.»
49Nko atepela, bonto ɔmɔɔ aumɛ eka bonkondi bo botumba bo lɔbɔndɔ mpe abohangelɛ: «Bona okiɛ o buunto angowɛ. Tunwake yotungya Bolaki.» 50Yesu aokaki ndenge etepela ibɔ, aohangela Yailo: «Tookake bɔɔmɔ, yala nko la nyumeya, mpe bona akoobika.» 51Anɛ ekitaki ibɔ nde botumba booki Yailo, akɔhɛ nko Petelo, Yowane la Yakɛ, la mpe ihe la nyango eki bona baɔtwɛ. 52Banto bankuma balelaki mpe bayalaki la ihɛi itina iiki bona. Yesu abelɛ: «Lwambya yolela, bona tawei, alali nko ilɔ.» 53Banto baɔlɛ Yesu nko ntɔɔlɔ, itina ibɔ baeba mbɔ bona angohilɛ yowa. 54Yaa Yesu abutɛ bona nde lɔbɔ mpe aboetɛ la lyoi i boolo: «Eboha e buunto, emwa!» 55Bona loyomo luunwɛ mpe la mbala ɛmɔɔ aemalɛ. Yesu ababelɛ babopaa byomba bi ndɛlɛ. 56Ihe la nyango eki bona uuko o buunto baɛnɛ byɛnywa; nkamba Yesu aobakokomya tabahangelake la bonto ɔmɔɔ ikambo iiko yoyume yokelama.
ទើបបានជ្រើសរើសហើយ៖
LUKA 8: lol
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2025 Communauté des Eglises Travaillistes (CET)
