LUKA 16
16
Lyanya iiki banto ba bokili
1Yesu aunwɛ yobela bakɛndi laa nde: «Bokulaka bɔmɔɔ ayalaki la kalaki yolendelaka lokutu lokinde. Baoboloba apiita byomba biki bokulaka buuko. 2Bokulaka awetɛ mpe abobelɛ: “Iiko nsango eyoka emi itina ikiɛ nnɔ? Ɔnyɛnie ndenge ebutaki wɛ lokutu lokimi, itina ima lɔlɔkɔ, tonguunwa yobuta lokutu lokimi”. 3Kalaki ayahangelɛ nde kiika: “Ndjokela ngamo aiko eya Nkolo ekimi anyumola nde bohala bo yolenda byomba bikinde? Ntiyali la nguya yotya ngonda, lobondeli mpe nsɔni. 4Nsweba yoomba engokelɛ emi kela kaki baonyumola nde bohala, ngobatɛ banto baangonyambe bikaabɔ.” 5Aetɛ ɔmɔɔ la ɔmɔɔ banto baayalaki la bembale beki nkolo ekinde; aubolɛ o lontondo: “Oyali la bombale booki nkolo ekimi botuya nnɔ?” 6Bonto oyali la bombale ahangɛ: “Bombale bo nkala i bohuku bonkama.” Kalaki aobelɛ: “Kɔhɔ bonkanda bokiɛ bo bombale, kiha aiko mpe kɔtɔ: nkala ntuku itano.” 7Aubolɛ bonto ɔnɛ o bape: “Bokyɛ bombale botuya nnɔ?” Aohangelɛ: “Saki i bakɔngɔ bonkama.” Kalaki aobelɛ: “Kɔhɔ bonkanda bokiɛ bo bombale, kɔtɔ: saki ntuku mwambi.” 8Nkolo atotiɛ kalaki iiko e boyanga itina i lyanya iiko ibataki nde. Banto ba bokili bɔnɛ bayali la lyanya buuke penda bana baaki lwɛya.»
9Yesu ahangyɛ: «Emi ndobela: Lotilaka lobate baninga la lokutu lo bokili, kela kaki lokutu luuko loohila, baninga baiko bangolwambe nde bikihelo bi botako. 10Bonto ɔnɛ wɛli babutye byomba bi bɔkɛ, aɛli mpe abute byomba bi buuke; bonto opa la sembo nde byomba bi bɔkɛ taɛli mpe abute bi buuke. 11Kaki talɔɔhɔ yobuta ikulaka iiki bokili, ongolobutya ikulaka inɛ i nhɔhɔlɔ nnɔ? 12Mpe kaki taloyala sembo nde lokutu loki bonto onkina, ongolobutye lokinyo kiika nnɔ?»
13«Bohali bɔmɔɔ apɔɔhe yohalela nkolo ipee: angooyuna ɔmɔɔ mpe aolanga ɔnɛ onkina, la mpe angooyapa la ɔnɛ o ntondo mpe aotona ɔnɛ o bapee. Talɔngɔhɔ yohalela mbala ɛmɔɔ la Ndjakomba la Bɔhɔlɔ.»
Batina ba mbo bankina
(Lenda la nde Mat 11, 12-13. 5, 31-32; Mlk 10, 11-12)
14Bafalisaya baokaki mbo iiko inkuma mpe babɔɔlɔke nko ntɔɔlɔ, itina ibɔ balangake bɔhɔlɔ buuke. 15Yesu nde ɔnɛ obabela: «Nyo loyaɛnɛke banto ba sembo nde baiho baaki banto, yaa Ndjakomba aeba betema bekinyo: yoomba ɛnɛ ɛniaka bɔnɛnɛ nde baiho baaki banto, ɛniake ingai nde baiho baaki Ndjakomba.
16«Eleko eeki bobeko booki Mose la buku iki ntepeli ehukaki eka Yowane; lombuha luuko, Nsango e Bɔlɔti eeki Bonkumu booki Ndjakomba elakama mpe bonto onkuma akela nguya kela aɔtwe mpiko. 17Liko la nse ingooleka nko lyale, yaa yumola bɔkɔlɔtɔ nkya bɔmɔɔ boki bobeko ependa lyale.
18«Loondo lonkuma longotonɛ waali okinde mpe aobala waali onkina, angokelɛ iyee; mpe loondo longobalɛ buunto onga boome atonɛ, angokelɛ iyee.
Bokulaka la bɔmbɔlɔ Layalo
19«Eyalaki la bokulaka bɔmɔɔ bɔmbɔlɔtɔke nko bihenda bi ikulaka mpe biina benkuma aolambyake bikola bi balambo. 20Bɔmbɔlɔ bɔmɔɔ, lina ikinde Lazalo, amboolalake nde lontondo lo buuho bo botumba booki bokulaka buuko, byonge binkuma nko mpota. 21Ambooyalake la mpoha ale byomba biikɔ nde nse e mesa eeki bokulaka buuko, nde ndye iko mbwa bamboyake yɔmbɔlɔ mpota ikinde. 22Buuna bɔmɔɔ, bɔmbɔlɔ awɛ, bentomwa beeki Ndjakomba bayɛ yɔkɔhɔ, babotombɛ eka Abalayama. Bokulaka mpe awɛ, babokundɛ. 23Mpiko nde bokili booki baawɛ, bokulaka aɛnɛ eelo ependa. Alikɛ baiho nde liko, aɛnɛ mpeni buuli Abalayama la Lazalo akihi ntute la nde. 24Bokulaka abobɛ: “Papa Abalayama, ondjokele ihɛi. Tinda Lazalo atu yobɔbya nsɔli e bohai bokinde nde bahi kela antangiele bakɔ nde lolemu. Itina anɛ nde ibeba i ntyɛ inɛ, lyale yopenda.” 25Abalayama abunoyelɛ: “Bona, wɛ ebaka mbɔ elaka eyalaki wɛ la lobiko, obataki bɔmɛngɔ buuke, Lazalo nde aɛnɛki nsuki eeki lyale. Aikekeko, nde aobata ibɔndi, wɛ oyɛ nde bɔnyɔkɔ. 26Lendaka lenkina, ima ondoko eyali nso la yokita mpiko eyali nyo, ipoku imɔɔ bɔnɛnɛ itokapola, iikela mbɔ kaki banto balanga baime oondoko kela baye mpiko, tabangɔɔhɔ, ndenge ɛmɔɔ kaki bonto alanga aime mpiko eyali wɛ kela aye oondoko, tangɔɔhɔ mpe.” 27Bokulaka ahangɛ: “Papa, nkɔbɔndɛlɛ, kaki eyali ngauko, tinda Lazalo ekanso, 28itina emi ndjali la baakume la biboto bitano. Atu yobakokomya kela tabayake la ibɔ nde epoku ɛnɛ e lyale ngɔnɛ.” 29Abalayama aobelɛ: “Bayali la Mose la ntepeli mpiko, babaoke.” 30Bokulaka aunɔyɛ: “Ngauko nkola, papa Abalayama. Yaa kaki bonto ɔmɔɔ anguumɛ oondoko eka banto baawɛ mpe angohulwɛ mpiko, aiko bangɔobɔngya betema.” 31Abalayama aobelɛ: “Kaki tabaoka Mose la ntepeli, ɔmbɔɛnɛkɛ bonto ɔmɔɔ angokundwɛ, tabangɔbɔngya betema.”»
ទើបបានជ្រើសរើសហើយ៖
LUKA 16: lol
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2025 Communauté des Eglises Travaillistes (CET)
