LUKA 10
10
Lotomo lotindaki Yesu Bakɛndi la nde ntuku nsambo la bape
1La lombuha luuko, Nkolo ahɔlɛ bakɛndi laa nde ntuku nsambo la bape bankina mpe abatindɛ bapee la bapee balɔndye nde bamonga la bihɛ biinga nde kiika aleke. 2Abahangelɛ: «Muma ingɔtɔɔ mpe ingwɛlɛ buuke nde ngonda, yaa basali bayali bɔkɛ. Lɔbɔndɛlɛkɛ bɔmɛlɛ ngonda atinde basali nde ngonda ekinde. 3Lɔkɛndɛ! Lolenda emi nde ɔnɛ ongolotindɛ nga wɛnɛ nyo mpata eka nkɔy. 4Talɔkɔhɔke bɔhɔlɔ, mango nkola, bikote nkola, taloyabekolake la banto nde ndjela. 5Nde botumba bonkuma bɔngɔtwe nyo, lobangaka yobabela: “Bɔlɔti booki Ndjakomba boyale la nyo”#10, 5 Bɔlɔti boki Ndjakomba boyale la nyo eyali wambɔ yeeta wai eeki Nkolo eka banto baakinde. . 6Kaki bonto o bɔlɔti ayali aiko, bɔlɔti bookinyo bongoyala la nde; kaki tayali, bongolunwela nyo bamɛlɛ. 7Lokihaka nko nde botumba buuko, lɔlɛkɛ, lɔmɛlɛkɛ binkuma bilopa ibɔ, itina bosali aɛli nko la boputo bokinde. Talumake nde botumba bɔmɔɔ lopendya nde bonkina. 8Kaki lɔngɔtwɛ nde imonga imɔɔ mpe bangolwambɛ, lɔlɛkɛ byomba binga balopɛ. 9Lobikyaka banto ba nkandi baanga lotane mpiko, mpe lobahangelaka: “Bonkumu booki Ndjakomba bongolokitelɛ.” 10Kaki lɔngɔtwɛ nde imonga mpe tabayolwamba, loolaka nde betalimbo mpe lohangaka: 11“Tongopuupolɛ la buutu booki imonga ikinyo boongobakemɛ nde bekolo beekinso, kela toloheneye bɔkɔ. Yaa nyo lwebaka: Bonkumu booki Ndjakomba bongokitɛ.” 12Ndohangela: Buuna buuko bo bɔntɛndi, etumbo engobata imonga iiko engoleka eeki Sodoma la boolo.
Bamonga baatonaki yuumeya
(Lenda la nde Mat 11, 20-24)
13«Ihɛi ingoyala eka wɛ imonga i Kolazini! Ihɛi eka wɛ imonga i Besaida! Itina kaki biɛnywa binɛ bingokelamɛ anɛ eka nyo bikelamaki nde bamonga ba Tilɛ la Sido, ntiki ima kala, bamonga baiko babɔngyɛ bihɛlɛlo, balɔɔtɛ bahaki mpe bakihɛ nde betoko. 14Ndohangela, nde buuna bo bɔntɛndi, etumbo ekinyo engopenda eeki Tilɛ la Sido. 15Yaa wɛ, Kapalanaumu, okamba bangookokondeya nde liko? Po! Ongohulwa tii nde bokili booki baawɛ.» 16Aunwɛ yohangela bakɛndi laa nde: «Bonto ongolookɛ angondjokɛ, ongolotonɛ, angontonɛ, mpe ongontonɛ, angotonɛ la bonto ɔnɛ onsokolaki.»
Inwelo eeki bakɛndi ntuku nsambo la bape
17Anɛ inwaki bakɛndi ntuku nsambo la bape, bayɛ la ibulwako baa mpe bahangɛ: «Nkolo, la belimo be bobe betookela kaki tobapa betindo nde lina ikiɛ!» 18Yesu abaunoyelɛ: «Nyɛnɛki bokakwa Satana ima nde liko nga bokalyali. 19Lolenda: Emi ndopɛ nguya lonyate ndjɔ la nkoto, lopite nguya inkuma iiki banto bapololange, mpe la yoomba ɛmɔɔ tengolokela bobe. 20Nkya ko ngauko, talohulake itina belimo be bobe belookela, lohulaka itina baina baakinyo bakɔtɔmɛ nde lobola.»
Ibulwako iiki Yesu
(Lenda la nde Mat 11, 25-27. 13, 16-17)
21Nko nde elaka iiko, Yesu aokɛ ibulwako la nguya eeki Bolimo bo Bɔyɛngwa mpe ahangɛ: «Nkokumya, Papa, wɛ Nkolo eeki liko la nse, itina obombelɛ banto ba wanya la ba lyanya bakambo, mpe oebyɛ bakɔ eka balɛɛlɛngɛ. Ɔnde Papa, eyali nko ngauko ee wɛ mongo olangake eyale.»
22«Ihe ekimi ampɛ byomba binkuma, mpe nko bonto ɔnɛ oeba Bona kaki teyali Ihe, mpe nko ɔnɛ oeba Ihe kaki teyali Bona la mpe bonto onga Bona alangɛ aebye.»
23Nkamba nde ɔnɛ oolenda bakɛndi laa nde mpe aobabela nko ibɔ kiika: «Ɛmɛngɔ la baiho banɛ baɛnɛ mbo iiko yɛnɛ nyo! 24Itina, ndjolohangela, ntepeli buuke, nkumu buuke bayalaki la mpoha baɛne iiko yɛnɛ nyo mpe tabaɛnɛ ikɔ, balangaki baoke iiko yoka nyo mpe tabaoka ikɔ.»
Lwɛlya looki Bosamalia bo bɔlɔti
(Lenda la nde Mat 22, 34-40; Mlk 12, 28-31)
25Bolaki booki bobeko bɔmɔɔ aemalɛ mpe aubolɛ Yesu itina iki yobolenga: «Bolaki, nkele ngamo itina iiki mbate lobiko lo botako?» 26Yesu abobelɛ: «Nde buku e bobeko bakɔtɛ nnɔ? Otangake mpiko ngamo?» 27Bolaki booki bobeko abunoyelɛ: «Olangaka Nkolo Ndjakomba ekiɛ, la botema bokiɛ bonkuma, la nguya ekiɛ enkuma mpe la bikaneno bikiɛ binkuma mpe la lyanya ikiɛ inkuma, olangaka mpe boninga okiɛ lolenge loyalanga wɛ mɛlɛ.» 28Yesu abuunoyelɛ: «Ongopɛ mbuto e bɔlɔti. Kela ngauko mpe ongobata lobiko.» 29Bolaki atilɛ abate elonga, aunwɛ yuubola Yesu: «Yaa oyali boninga okimi nnɔ?» 30Yesu abounoyelɛ: «Bonto ɔmɔɔ aumaki Yelusalɛmɛ, aoli Yeliko. Nde ndjela, aponanɛ la banto ba bobe, babɔpɔɔmɔlɛ byomba, babokulɛ lolii, mpe bakɛndɛ, babohenɛ ntute la iwa. 31Nko nde elaka iko, nkanga ɛmɔɔ eki Ndjakomba ahulwaki nko nde ndjela iiko. Aɛnɛ bonto uuko, apendyɛ ibu i mboka mpe alekɛ ekande. 32Bolewi bɔmɔɔ alekɛ la nde nko aiko. Aɛnɛ bonto uuko mpe alekɛ ekande. 33Endaka, Bosamalia bɔmɔɔ oyalaki nde lɔkɛndɔ lokinde akitɛ mpe aiko eyalaki bonto uuko; aboɛnɛ mpe abookelɛ ihɛi. 34Ayɛ ntute la nde, akolɛ mpota ikinde la vino, autumolɛ bohuku mpe akandɛ ikɔ#10, 34 Eka Bayuda, bambootutake mpota la vino mpe la bohuku.. Akondeyɛ bonto uuko nde mpunda ekinde, abotombɛ nde botumba bo babutu mpe abotutɛ. 35Pukya, akɔhɛ mpata ipe apɛɛ bɔmɛlɛ botumba bo babutu mpe abobelɛ: “Tuta bonto ɔnɛ bɔlɔti; kaki ɔngɔkɛndyɛ bɔhɔlɔ bonkina nde liko, emi kiika ngokunoyela bɔkɔ anɛ enga emi nyunwe.” 36Nde banto baiko bahato, ɔnɛ wɛnɛ wɛ oyaɛniɛ boninga ooki bonto uuko okulamaki la banto ba bobe nnɔ?» 37Bolaki booki bobeko ahangɛ: «Eyali ɔnɛ obookelaki ihɛi.» Yesu abobelɛ: «Kɛndɛ, la wɛ mpe okele nko ngauko.»
Yesu eka Malata la Balia
38Nko aiko eyalaki Yesu la bakɛndi nde boboko, Yesu aɔtwɛ nde ehe ɛmɔɔ mpe buunto ɔmɔɔ lina ikinde Malata aboambɛ nde botumba bokinde. 39Balia, bohibotonga okinde, ayɛ yokiha ntute la Nkolo, aokake itepela nde. 40Nga la Malata, ayapɛ la besala benkuma beki botumba. Ayɛ la lobango mpe abelɛ Yesu: «Nkolo, aiko oɛnɛ bɔlɔti ndenge enga bohibotonga okimi anseneyɛ besala? Bela nde aye yonsalya.» 41Nkolo abuunoyelɛ: «Malata, Malata, oyatungya mpe oyanyɔkɔlɔ la bakambo buuke. 42Eyali nko la ikambo imɔɔ iyali la itina. Balia bonto ɔngɔhɔlɛ ipenda bɔlɔti, mpe nkola la bonto ɔmɔɔ ɔngɔbɔpɔɔmɔlɔ ikɔ.»
ទើបបានជ្រើសរើសហើយ៖
LUKA 10: lol
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2025 Communauté des Eglises Travaillistes (CET)
