LUKA 9
9
Olomama ba batingami doomi na babae
(Hokea koko Mat 10, 1-14; Mal 6, 7-13)
1Yesu asanganedja batingami doomi na babae ko abapa ngulu na kpati ɛ obengana miembo mibe misusu ko oheledja bato ba bipeko. 2Bea, abaloma tina ɛ otɔndɔ okumu ba Ndjambe ko na oheledja bato ba bipeko. 3Abala na bu boo: «Pɛpɛ otombani eka ta tina ɛ mwɛngo, pɛpɛ pango, pɛpɛ tɔmbi, pɛpɛ ipa, pɛpɛ falanga, ko engi moto adae oko na esendja emɔti. 4Esika esusu eosɔleani bo, dani oko ta ndako ena mbunoko okadongani ena. 5Esika esusu elonalea bo oosɔni, dongani ta ibonga la bobo ko pupolani mbumbu dja mako#9, 5 Opupola mbumbu dja mako etingodjai bo oditi na modjɔ okɔ na bato ba ngando ena ibaloni oosɔ Mwako Mopele ma Ndjambe. Obadikei ibo mɛnɛ mbumbu dja bobo, edi embete ɛ bo Ndjambe abapalea etumbu. ma boono: edalea ekebedjɛli tina ɛ bobo.» 6Batingami bakɛɛ; banɔɔnɔ ta ngando isusu, batɔndɔkɔ mwako mopele ko baheledjaka bato ba bipeko mɔngɔ masusu.
Okɛsɛli ba Elode
(Mat 14, 1-2; Mal 6, 14-16)
7Bea, Elode, kumu ɔ Galilai aoka midjɔ mia misusu imanɔkɔ. Aidjeba modjɔ ma okɔ, tina ɛ bakina babalaka boo: «Yoani Mobatisi apusoi ta ndanda ɛ bato bago.» 8Bakina babalaka boo: «Edii Elia aenɛmi.» Bakina koko babalaka boo: «Omɔti ɔ batɛli ibayou apusoi ta ogwa!» 9Endolo Elode abala ohuu boo: «Mbai moto ɔkɛsɛdja molo ma Yoani. Ona moto ndani ɔkaka mbai babala midjɔ mia misusu ta tina ɛ nde?» Ko ahombaka aenɛ Yesu.
Yesu ayakedja bato koto itano
(Hokea koko Mat 14, 13-21; Mal 6, 30-44; Yoa 6, 1-15)
10Ta ihule la ba Apotele, badjebedja Yesu midjɔ misusu imakɔɔ boo. Abatomba ko asasua na bu mbuti na ibonga ilabeaka bo Betesaida. 11Bimumu ba bato baoka ko babakimana. Yesu abaosɔ, abala na bu tina ɛ okumu ba Ndjambe ko aheledja bato ba bipeko. 12Ɔtita busa, batingami doomi na babae basabatea mbuti na Yesu ko babala na nde boo: «Yanedja bato bii basusu bɛngɛɛ bakɛɛ ta ngando ko ta ndako dja mbuti. Oho, badihalea bisika ba ohwɛ na mia ma oyaka, tina ɛ boo lodii ha wɛte ta esobe.» 13Endolo Yesu abala na bu boo: «Bapani ino mɛɛnɛ mia ma oyaka!» Bamosɔmbɛdja boo: «Lodii oko na mapa matano na swi babae, na bea ɛpalaka wɛ boo iso mɛɛnɛ lakɛɛ asomba mia ma oyaka tina ɛ bato bii basusu?» 14Badaka ena baami mbuti na koto itano. Yesu abala na batingami ba nde boo: «Badedjani na bibole ba tuku itano.» 15Batingami basuma ko babadedja ibo basusu. 16Yesu atomba mapa matano na swi babae, aihwedja miso o diko ko asakoa Ndjambe. Na bea abuka mapa na swi ko apa odii batingami bɛngɛɛ boo bakaane na bato basusu. 17Ibo asusu bayaka ko bagola. Batuta tikaika olumedja mapole doomi na mabae.
Piɛlɛ abali ohuu boo Yesu adii Masiya
(Hokea koko Mat 16, 13-20; Mal 8, 27-30; Yoa 6, 67-71)
18Busa bomɔti, Yesu asasua tina ɛ miongɔɔnɔ ko batingami ba nde badaka engbanga na nde. Yo abahɔdja boo: «Bato babalaka boo mbai nadii nda?» 19Bamosɔmbɛdja boo: «Bakina babalaka boo odii Yoani Mobatisi, bakina odii Elia, ko bakina koko odii omɔti ɔ batɛli ibayou ona ɔpusoa ta ogwa.» 20«Yesu abahɔdja boo bea ino odini obala boo mbai nadii nda?» Piɛlɛ amosɔmbɛdja boo: «Wɛ odii Masiya ɔ Ndjambe.»
Yesu adjebedjai ogwa na opusoa ba nde
(Hokea koko Mat 16, 20-24; Mal 8, 30-33)
21Yesu abasia na ngulu mɛɛnɛ boo batatɔndɔɔ noko moto omɔti, 22ko abakea boo: «Eboani boo Mwana ɔ moto anɔngɔme obuke; adumbame na basuku, banganga ba Ndjambe ibanɛnɛ ko bato ba edjebeli ɛ mibeko, aowamabi ko ta iswi la basato apuswabi.»
Moda ma okimana Yesu
(Mat 16, 24-28; Mal 8, 34-9, 1)
23Bea, Yesu abala na ibo asusu boo: «Ekadaa boo moto apali okimanani, asalone yo mɛɛnɛ, alwae ekulusu#9, 23 Olwa ekulusu etingodjai bo moto andimi minyɔkɔ kaoko ogwa tina ɛ Yesu. ɛ nde tu busa ko atingame na mbai. 24Na tina hee, ona opali oheledja mohelo ma nde amobungedjabi; endolo ona obungedjabi mohelo ma nde tina ɛ mbai amoheledjabi. 25Ekadaa boo moto akondji madiheli ma ngondo esusu, edihalea yo nde akabungedja mohelo ma nde kaoko akasabedja yo mɛɛnɛ? 26Na bea, moto ookeabini sɔni ko na bibaeli ba mbai, Mwana ɔ moto amokeabi koko yo sɔni, ta ehole eduabi yo ta ekumu ɛ nde ko ta ekumu ɛ Sango na babwɛndi basɛnɔke. 27Nabali na nu edii sooti: bakina badii haa, batagwa boso ba oenɛ okumu ba Ndjambe.»
Mose, Elia na Yesu
(Hokea koko Mat 17, 1-9; Mal 9, 2-10)
28Mbuti na maswi mwambe ngɔngɔ dja obala bea, Yesu atomba Piɛlɛ, Yoani na Djake ko aihwea na bu ta ngomba tina ɛ ongɔɔnɔ. 29Ta ehole ɛdaka yo aongɔɔnɔ, mbanda ɛ nde ɛ ngɛngɛ ko bisendja ba nde bangɛngɛ koko na ipɛɛ la pɛpɛ obɔngɔ ohokea. 30Sasimo, bato babae badaka ena basoola na Yesu: ɛdaka Mose nɔbɔ Elia, 31ibangɛngɛkɛ na ekumu. Basoolaka na Yesu moda imosukealea elomu ɛ nde na ogwa ta Yelusalema. 32Piɛlɛ na baminande bahwɛ hiɔ ipipo; endolo ɔtolima bo, baenɛ ekumu ɛ Yesu ko baami babae baemi na nde. 33Ta ehole ɛhɔmbaka baami bia bakina Yesu, Piɛlɛ abala na Yesu boo: «Molehi, edii opele ladae haa! Lapike bitondo bisato, emɔti tina ɛ wɛ, emɔti tina ɛ Mose ko emɔti tina ɛ Elia.» Piɛlɛ aitakanaka mua imabalaka yo. 34Oko adii abala bea, itute lidoi ko libahwui na esii ɛ lu. Batingami babanga oenɛ boo itute labahwua. 35Kɔpɛ eokama ta itute boo: «Hoo adii mwana ɔ mbai, ona ɔhɔɔ mbai, mookani!» 36Ehole esukea kɔpɛ obalama, Yesu adika yo mɛɛnɛ. Batingami bapɔpɔnɔ ko, ta maswi mia baitɔndɔɔ noko moto omɔti mia misusu imaenɛ bo.
Yesu aheledja mwana ɔ daka na mwembo mobe
(Hokea koko Mat 17, 14-21; Mal 9, 14-29)
37Ɔya busa, batita ta ngomba ko emumu ɛ bato ɛdoa asaka na Yesu. 38Ta ndanda ɛ emumu ɛ bato, moomi omɔti agamaka boo: «Molehi, naongɔɔni, hokeani mwana moomi hoo ɔ mbai, tina ɛ boo adii ikinda! 39Mwembo mobe mokamopee, mokamogamedjae ambuku, mokamodumbakake na ngulu ko mokamoimusedjae mapuli ta monɔkɔ; mokamonɔngɛdjae ko temomokine pɛpɛlɛ. 40Naongɔɔnɔ batingami ba wɛ boo bamobengane, endolo baihɔnɔ.» 41Yesu asɔmbɛdja boo: «Yangola ebe ɛ taka ɛ edhimeli! Mbunoko ehole ndani naboani odikama na nu ko nalwalea muna ma boono? Dua na mwana ɔ wɛ haa.» 42Ta ehole ɛ batama mwana, mwembo mobe mamodumba ta kpɔtɔ ko mamopukusa na ngulu mɛɛnɛ. Endolo Yesu agamea mwembo mobe, aheledja mwana ko amosɔmbɛdja odii sango. 43Ko bato basusu bakamoa ta oenɛ ngulu enɛnɛ ɛ Ndjambe.
Yesu adjebedjai naikina ogwa ba nde
(Hokea koko Mat 17, 22-23; Mal 9, 30-32)
Ena ɔdaka moto omɔti na omɔti akamoa ta misusu imakɔkɔ Yesu, abala na batingami ba nde boo: 44«Baneani opele modjɔ muu mapalaka mbai naodjebedjaeni hadɛdi: Mwana ɔ moto akabamalea ta mabɔ ma bato.» 45Endolo batingami baisipoaka ebaeli ena: tingo ɛ yu ebombama odii bo bɛngɛɛ boo batayesipoa ko babangaka ohɔdja Yesu ta tina ɛ yu.
Moto ɔ boso ta ndanda ɛ batingami
(Hokea koko Mat 18, 1-5; Mal 9, 33-37)
46Batingami babanga osweana: ndani ta ndanda ɛ bobo ɔboanaka oda moto ɔ boso. 47Yesu adjeba modjɔ imabatungeaka. Bea atomba mwana mokɛkɛ ko amoemea mbuti na nde, 48ko abala na bu boo: «Moto ona oosi mwana mokɛkɛ elengɛɛ hoo ta kombe ɛ mbai, aosini; ko moto oosini; aosi ona ɔlomani. Tina ɛ boo ona odii moto ɔ suka ta ndanda ɛ boono, edii yo ona odii moto ɔ boso.»
Ona odii pɛpɛ olonani adii ɔ boono
(Hokea koko Mal 9, 38-41)
49Yoani abala na Yesu boo: «Molehi, laenɛ moto omɔti ona ɔbenganaka miembo mibe ta kombe ɛ wɛ ko lapalaka omosia, tina ɛ boo aditi ɔ engbanga ɛ boso.» 50Yesu amosɔmbɛdja boo: «Pɛpɛ omosia, tina ɛ boo moto ona odii pɛpɛ olonani adii ɔ boono.»
Ngando emɔti ɛ Samalia eloni oosɔ Yesu
51Ɔbatama ehole ɛ Yesu boo akine ngondo hee, adiha malɛi mapipo boo akɛɛ ta Yelusalema. 52Aloma bato boso ba nde, bakɛɛ ko baingea ta ngando emɔti ɛ Samalia tina ɛ obɔngedja esika ɛ ohwee. 53Endolo bato ba ngando ena balona omosɔ, tina ɛ badjebaka boo akeke wɛte ta Yelusalema. 54Ehole ɛoka Djake nɔbɔ Yoani bea babala boo: «Kumu, opali boo labee mosa matite donga busa tina ɛ obabeedja ibo asusu?» 55Endolo Yesu ahombana odii bo ko abaosa dosa. 56Ko bakɛɛ ta ngando ekina.
Ibadii opala okimana Yesu
(Hokea koko Mat 8, 19-22)
57Ehole edaka Yesu na batingami ba nde badale na ndjia, moto omɔti abala na Yesu boo: «Mbai naokimanalea ngise isusu ikɛlea wɛ.» 58Yesu abala na nde boo: «Bibanga badii na maposi ko mbulu ba diko badii na moopu, endolo Mwana ɔ moto, aditi na esika ɛ osambea molo ma nde.»
59Yesu abala na moto okina boo: «Kimanani.» Endolo moto ona amosɔmbɛdja boo: «Kumu, pani enɔli napete kɛɛ boso apusea tata.» 60Yesu abala na nde boo: «Kina bago bapusee bago ba bobo; endolo wɛ, kɛɛ alehe okumu ba Ndjambe.»
61Okina koko abala na Yesu boo: «Kumu, naokimanalea, endolo pani enɔli nakɛɛ nakabɔtɔnɔ na denga la mbai.» 62Yesu abala na nde boo: «Moto ona obangi opusola mopkɔtɔ ma gue na epɛsɛ bo aone ena ahokea osangɔngɔ aboaniti na okumu ba Ndjambe.»
ទើបបានជ្រើសរើសហើយ៖
LUKA 9: ngc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2025 Communauté des Eglises Travaillistes (CET)
