Lomɛ́ŋ 1
1
Imbíkélie
1Iŋúɛ Póole, eŋelípuólí u Kilíis inúɔ́ŋɔ́nɛ. Támbák miyɔ́ɔ́n ɛ́ɛ́ ímbá etúmí; waakinyáŋɛk ɛ́ɛ́ yóol yɔ́ɔ́yɔ́ insɔ́m yɛɛyɛ́ yi indámb; 2Insɔ́m yi indámb ikáánɛ́ Támbák meekí indán á yɛ́ɛ tɔɔm kɔ́ tɔɔm, waatápukɛn é peémímekélíe pɛ́ɛ́yɛ́ kí imfiɔ́ŋ sí kitɔ́k, 3maandá insɔ́m yi indámb ikáánɛ́ ɔ́ɔyɔnɛ́ óóyooson muɔ́nɔ́ wɛɛyɛ́ ewú, índɛ tuóyooson wɔ́ á nuu mɔɔndɛ pémepíén wɔ́ é nikúli ní tafíit Síí ɔkúnɛ́ɛ wɛɛyɛ́. 4Maná á kiáyí kí Emfúnukufúúmɛ Támbákɛ́ɛ wɛɛtɛ́k wɔ́ muɔ́nɔ́ wɛɛyɛ́ na pukaaka aká umeényí wɔ́ á pilɔ́ŋ. Wɔ́ unyɛɛ́ Yésus Kilíise, Ɔkɔ́n waasɔ́. 5Kɛ́ɛ́yɛ́ Támbákɛ́ɛ wuumbooki ɛ́ɛ́ imbá etúmí ó pusíó pú nuúmu nú Kilíis ɛ́ kuɛlɛ ɛ́ɛ́ piɛ́nɛ́ɛ́n pí pitɔŋ kitikit píóndonyi ɔtɛ́m nɛɛyɛ́ píond píɔ́pinɔn wɔ. 6Panɔ́ muɛ́t nunyɛɛ́ kɔ́ ɔlɔŋ ú piɛ́nɛɛ́n pikáánɛ́ panɔ́ epé Yésus Kilíis nyɛɛ́ anúpílán. 7Yɔɔ́núɔ́ŋɔ́n panɔ́ nunyɛɛ́ Lóma panɔ́ kitikit epé Támbák ɔ́ɔ́yɔɔnɛ́ɛ woond waanúyɔ́ɔn ɛ́ɛ́ nusɔ́tɔn kɛ́ɛ́yɛ ó pusío. Yoópísókolonyi Támbákɛ́ɛ, Síí waasɔ́ nɛɛyɛ́ nɔ Ɔkɔ́n Yésus Kilíis ɛ́ɛ́ pápá ɔtɛ́m peseé naanɔ́ pánúfá kiyeéwe.
Póol nyɛ insaná ɛ́ɛ́ úpítá peétépí pó Lóma
8Yaátúan ílémbi Támbákɛ́ɛ waamɛ ó pusíó puánɔ́ kitikit; Yɛɛ́kɛlɛ nɔ́ɔ indápukanɛn é Yésus Kilíis, á kiákí ɛ́ɛ́ pɔ́ɔ́kɔyɔ kuátap kuánɔ́ kúúsí kitikit. 9Támbák áákimbiákinan itóy, wɔ́ ewú iŋɔtɔnɛ́ɛ wɔ́ nɔ ɔtɛ́m wáámɛ kitikit ó kuól kúkémé insɔ́m yi indámb iyoosonée muɔ́nɔ́ wɛɛyɛ́. Weémenyen ɛ́ɛ́ yaánupitaáka indipá iyɔtɔn, 10kisikɛl kitikit imbisókolonyée. Yɔɔ́kɔŋɔn Támbákɛ́ɛ ɛ́ɛ́, índɛ wɔɔ́kɔɔyɔ, wuúŋátápɛ́n ɛ́ɛ́ yɛ́ɛndɛn yáasinúpítá. 11Púnyɛ ɛ́ɛ́, inyɛ insaná táásɛ ɛ́ɛ́ ínúɛn ó kunuólin no nupoo núólinoné ké Emfúnukufúúmɛ, núnúák malúnda, 12púnyaánɛ ɛ́ɛ́ kuátap kunyɛɛ́ kúmoómí naamɛ naanɔ́ túák malúnda naamɛ naanɔ́ kuanɔ́. 13Yaákaamba ɛ́ɛ́, paandimán númenyi ɛ́ɛ́ yaámán apímak pisikɛl puólíkóoli ɛ́ɛ́ yóól kuanɔ́; siki kisikilɛ puandá áákiŋáminan, púkány kuasiám ínanɔ. Imapá yaamba ɛ́ɛ́ ímbia puandá puutámb káámɛ ó puólí kuanɔ́ kákáánɔ́ yá aná yoólé ímbián ɔ́ pɔsɔ́k piɛ́nɛɛ́n pí kúúsí. 14Yɛɛ́kɛɛsikɛnɛn kupíéki ɛ́ pɛɛnd kitikit, pɛɛnd pémenyenée kusɔ́t ne epé pɔ́sɔ́tɔnɛ́ɛ ɛlɛɛ́ pɛɛnd pɛ́ ɛɛ́m, pɛɛnd pɛ́nyɛɛ́ ni ifɛk ne epé pɛ́nyɛɛ́ meéne kutɔɔ́. 15Púúpɔ́ inyɛɛ́ insaná ɛ́ɛ́ ínúólin ni insɔ́m yi indámb á panɔ́ kákáánɔ́ nunyɛɛ́ Lóma.
Pukaaka pú insɔ́m yi indámb
16Indipá yɔɔ́pɔn ɛtɔ kunuá ni insɔ́m yi indámb. Inyɛɛ́ pukaaka epú Támbák kɔtɔnɛ́ɛ na púɔ ó kusóti ewú ne ewú waátapanɛ́ɛ: Yúútɛn ó pusíó, ukatí Yúútɛnɛ́ ɔ́ɔŋɔn. 17Púnyɛ ɛ́ɛ́ insɔ́m yi indámb yɛ́ɛ itíínyenyée aná Támbák óondonyée pɛɛnd indɛ́ndɛ́nɛ kɛ́ɛ́yɛ́ ké eŋis: Púétúmen á kuátap kú mɔɔnd kúéŋényí púésúkínén kɛ́ɛ́yɛ́ á kuátap, yá aná imfiɔ́ŋ ɔ́ɔ́yɔɔnɛ́ɛ: «Ewú unyɛɛ́ indɛ́ndɛ́nɛ ó pusíó ɛ́ɛ́ waákaátapan, ɔ́ɔ́nyísɔt.»
Inséésítényí i péépé péményenée Támbákɛ́ɛ
18Kuatɔ́k mɛnɛ́mɛnɛ́ɛ, Támbák éétíínyenyi ilópi yɛ́ɛ́yɛ́ ó pusíó pú kifal kitikit nɔ kilɔk kitikit pɛɛnd ɛ́ɛlɛnɛ́ɛ; á kiákí ɛ́ɛ́ ne meelíe mɔ́ɔ́pɔ́ mɔ́ kilɔk pélindiken kémuémue. 19Á kiakí ɛ́ɛ́ epú mɔɔnd kitikit nyɛ́ pékumenyin Támbákɛ́ɛ á pɔ ɛ́kɛɛ́nikɛnɛk peseé ké pesee. Támbákɛ́ɛ wɔ́ puɛ́t weetíínyi pú kɔ́ɔ́p peseé ké peseé. 20Púnyɛ ɛ́ɛ́, kuétúm á nipundɛ́n ní kúúsí, maandá má Támbák mátiányípá mɛ́ɛ́nikɛnɛk, anakáánɛ́ kunyɛ ɛ́ɛ́ pukaaka púɛ́yɛ́ pú téníík na kupá kú pú Támbákɛ́ɛ kuɛ́yɛ́ ɛ́kɛɛ́nikɛnɛk peseé ké peseé aká oyoosoné maandá umaáluŋa. Tɛ mɔɔnd utiányipiána iŋál á kati kumenyi Támbákɛ́ɛ. 21Péemenyen Támbákɛ́ɛ tɛ ɛ́ɛ́ pékúmesi wɔ, tɛ ɛ́ɛ́ pélémbesi wɔ́ aná kuɛ́sikɛnɛnɛ́ɛ kɛ́ɛ́yɛ́ ó pusío. Maná meéne mɔɔ́p épípueŋitenyi imbíné yaasak itɛ́m síɔ́p siimbiŋílá. 22Pɔ́ɔ́yɔ ɛ́ɛ́ pɔ́ pányi ni insiŋí pétimenyi ée pányi pɛɛ́yɛ́n petiití. 23Péeséndi nuúmu nú Támbák ewú utiányípá ukúén, póond pésukenin pifɛ́lɛfɛ́lɛ tunúúnú ne piéye pí pɛɛnd peékúéné, no munoní, manyam, ni inyɔ́ki. 24Púúpú Támbák ényítúm pɔ́ kélém, waayap pɔ́ ɛ́ɛ́ pɛ́ɛlɛ maandá mɔ́ kilɔk aná itɛ́m síɔ́p pílɔ́ɔ́ŋɔnɛ́ɛ, ɛ́ɛ́ peem ɛ́ɛlɛ nɔ tuɔ́l túɔ́p maandá mɛ́ ɛtɔ kunúa. 25Pémeséndí kémuémue u Támbák na kisupɔ́. Kutápɔk ɛ́ɛ́ pɔ́kɔtɔn, póond pékúmesi Támbákɛ́ɛ wɛɛsikɛnɛnɛ́ ɛ́ɛ́ pékúmesi wɔ́ é teeníík ne níík. Anakáánɛ́; Pɔ́ pɔ́kɔtɔn póond pékúmesi kiluŋaluŋa. 26Púúpú Támbák maáyáp pɔ́ ɛ́ɛ́ pɛ́ɛlɛ maandá itɛ́m síɔ́p pílɔ́ɔ́ŋɔnɛ́ɛ táásɛ, maandá mɛ́ ɛtɔ kunúa. Pakányí pɔ́ɔ́pɔ pɔ́ muɛ́t éséndesi nipɛ́t ní akáandɔ́ nɛ ɛnumɛ́ndɔ́ aná Támbák mɛɛ́tɛ́k póond ɛ́ kuɛlɛ aná umɛɛ́lɛ́ utitɛ́k. 27Puandá púmoómí nɛ pɛnúmɛndɔ́. Pááyapan nipɛ́t ní akáandɔ́ nɛ ɛnúmɛndɔ́ póond ɔ́ kupilɔ́ɔ́ŋɔ ɛ́ɛ́ ɛnúmɛndɔ́ pitima nɔ sɔ́k enúmɛndɔ́ ɛ́ɛ́. Póond ɛ́ kuɛlɛ pɔ́ɔ nɔ pɔ́ɔ maandá mɛ́ ɛtɔ kunúa. Ɛ́ kuɛl kukáánɛ́ pápianɛ́ insésitényí yɛɛsikɛnɛnɛ́ ne punyím púɔ́p. 28Aná pémeéné kumeny Támbákɛ́ɛ, umáyáp pɔ́ kɔɔ́p é meéne mɛnyɛɛ́ mapiŋílá ɛ́ɛ́ pɛ́ɛlɛ maandá pátiányípá pɛ́ɛsikɛnɛn kuɛl. 29Pányɛ itɛ́m siwónón na maandá mátiányípá indɛ́ndɛ́nɛ, nɔ́ kilɔk, nɔ kilɔ́ɔ́ŋɛ́t, ni ifil, pányɛ itɛ́m siwónón na yaák, nɔ nuɔ́nɔnɔ, nɔ pitɔ́kɔtɔkɔ, nɛ yɛɛ́ndɔ, nɔ ɔtɛ́m kilɔk, pɔ́pɔ́ŋinɔn pɔsɔ́k, 30pɛ́ɛ́kɛɛlɛ imbásia, pokóyikoy pá Támbák, pétúmenin eŋít, pépíméketesi, pɔ́píkɔ́lɔn, pányɛ kisikɛl kitikit pɛ́píɛ́yɛn ɛ́ɛ́ wɛɛ́tɛ túun kipán kí kuɛl kilɔk kiikɔ́s, pɛ́ɛlɛ pepíény pɔ́ɔ́p ɛtɔ kulal, 31pátipá ne meéne, pátipá pówóónyosi indán siɔ́p, pányɛ itɛ́m kulal, pátipá pɛ́ɛ́ninɛn ɔsɔk. 32Tɛ aná pémenyené epú Támbák maásɔmb ɛ́ɛ́ ewú wɛɛlɛnɛ́ maandá makáánɛ́ ɛ́ɛ́kɛɛsikɛnɛn ne niku, pátipá pésúkén kuɛlɛ maandá makáánɛ́, pókoond páákinan epé pɛ́ɛ́lɛnɛ́ mɔ.
ទើបបានជ្រើសរើសហើយ៖
Lomɛ́ŋ 1: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
