Málúkus 16
16
Pakáandɔ́ máyɔɔk á kipɛ́l
(Mat 28.1-8; Lúk 24.1-11; Isŋ 20.1)
1Sápat mɛɛlɛ́ utápukan, na Malía u Makatala, na Salúma, na Malía, yóótí Sáak, pɔ́ɔ́nyɔɔ́nd pisɛŋ pí iŋuŋ pí niaŋɔ́ é kuekúkúlé kilɔ́ŋ kí Yésus. 2Kiɛmɛ́ɛm kiɛmɛ́ɛm túú, ɔ́ puɔ́s púkutúan pú sɔ́ndiɛ, ɔɔ́ny kuám na kuam, pááyɔɔk á kipɛ́l. 3Pópíówon ɛ́ɛ́: «Ɛ́nyɛ́ ukaná etúpíŋilitinyé nitányí ní ilolí?» 4Pápípúluminɛ, pɛ́mɛ́ɛ́n ɛ́ɛ́ kinɔ́m kí nitányí kiɛ́tɛ kanyɛ kipíŋílítényí. 5Péépíkin á kipɛl, pɛ́ɛ́n kiɔmfɔ́ kinyɔ́l kɔ́ɔ́p kɔ́ ɔmbɔk wɔɔnɛm ni indífɔnɔ́ ifúmfúɛ. Puwaá púɛ́tikɛn pɔ. 6Kinɔ́k kɔ́ɔ́p ɛ́ɛ́: «Nutitíín. Nuákamba Yésuse u Násalɛt, pɔ́ɔ́nyítɔɔ́ndɛ́n ó kolóse. Usiɛnyɔk á pilɔ́ŋ, utipá akɛ. Ónuyoosin ekéné wáányípá apítíkán. 7Ánuupɔ́ kuatíán popíónyí pɛ́ɛ́yɛ́ nɛ Píɛl ɛ́ɛ́: Umófóók Kalilée. Kááká nukɛɛ́nyɛ́ɛ́n wɔ, aná umaánútían.» 8Páákaám itɛ́m kundukundu, pɔ́ɔ́pínɔ nɔ ɔtɛ́t. Pátimáás mɔɔnd aná puwaá mɛɛ́lɛ́ pɔ.
Yésus építíínyenyi ɛ́ pɛɛnd
9Yésus mɛɛnyɔ́k á pilɔ́ŋ kiɛmɛ́ɛm kí puɔ́s púkutúan pú sɔ́ndiɛ, waatúan kuámɛn Malíɛ u Makatala, umaákúúŋɛt pilɔk pí piliínditíe pítíndatɔ́ neémue kɛ́ɛ́yɛ́ ɔ́ nuɔ́l. 10Malíɛ waanyatíán epé pámaápá ɔlɔŋ ne Yésus, weekítikenyi pɔ́ na andilɛ́ ké eŋis. 11Aká pɔ́mɔɔ́p Malia ɔ́ɔ́yɔ ɛ́ɛ́: «Imɛ́ɛ́n Ɔkɔ́n, unyi ɔ́ kusɔ́t» pátimaátap. 12Pútipípétípétí, weepítíínyi nunamá núlotí ó popíónyí pómotí páandɛ́ pámaáyuúkán ɔ́ kitɔŋ. 13Póond ni inúú pɔ́ɔ́siɔyítɛ́n pɔ́kúɔ́p. Tɛ ɛ́ɛ́ páátap pɔ́ kɔ́kɔ́ɔ́pɔ́. 14É kuesúkín, Yésuse waand epítíínyi á Pápáátanoomoómí, pápíyaka. Waakálan pɔ́ kɔ́ɔ́p á katɛ pipíóndínyí ɔtɛ́m na aná itɛ́m síɔ́p maápá kulal, á kiákí ɛ́ɛ́ pátimaátap puandá pɔsɔ́k pɛ́mɛɛ́n wɔɔkɔ́sɛ mɔɔ́yɔ. 15Wɔ́ kɔ́ɔ́p ɛ́ɛ́: «Ánuupɔ́ núkémé insɔ́m yi indámb e kúúsí kuum, á punyapɛɛnduɛ. 16Ewú ukoónyípíondi ɔtɛ́m naamɛ, pétuu wɔ, utáŋap kusɔ́t kú ténik. Maná, ewú ukeényéen, pɛ́ɛ́nyípɛn wɔ. 17Melinsí eme nukeényímenyinen epé pópíóndonyé ɔtɛ́m naamɛ á mɔ́ɔ: káámɛ ɛ́ kisiɛ́n pákakúúŋa pilɔk pí piliínditíe, pákála tukál tuukɔ́si, 18pɛɛtikɛn inyɔk ni imbɔk, tɛ wɛɛ́tɛ puwaá kupuwa ilɔk, itiɛl wɔ puandá; pátála pɛɛnd pánumanɛ́ imbɔk, pééŋuken.» 19Ɔkɔ́n Yésus mɛɛlɛ́ úmááman akála kɔ́ɔ́p anakáánɛ́, Támbákɛ́ɛ weeméketi wɔ́ mɛnɛ́mɛnɛ́ɛ woonyómbiti wɔ́ kɛ́ɛ́yɛ́ kí inyɛ́ŋ yinɛm. 20Pɔ́ kɔk, páap pékémé insɔ́m yi indámb kɔɔ́mɔ kitikit. Ɔkɔ́n kɔtɔ nɔɔpɔ́, melinsí ne pisey píɛ́lɛ, é kutíínyi ɛ́ɛ́ epú pámaápá pɔ́ɔ́yɔ nyɛ kémuémue.
ទើបបានជ្រើសរើសហើយ៖
Málúkus 16: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL