Málúkus 13
13
Yésus métééki kikata kí kitamb kí Támbák
(Mat 24.1-3; Lúk 21.5-7)
1Yésus mɛɛlɛ́ úkaatɔ́k kɔ ɔɔ́nd ú kitamb kí Támbák, opíónyí wɛɛyɛ́ omotí ɛ́ɛ́pí kɛ́ɛ́yɛ́ ɛ́ɛ́: «Oŋónyóonyi, yoósíni: epué atány á, epué nuwáák á!» 2Yésuse kɛ́ɛ́yɛ́ ɛ́ɛ́: «Pikaaka pí tuwáák tukáánɛ oyoosoné! Páányíkat túú tuum. Tɛ nitányí nínímoómí nítiɔ́nyilɔpɔ́ nitényí.» 3Waayɔɔk kɔ́ ɔkɛ́l ú Poolifié, wɔɔnyɔ́mbɛt, kitamb kí Támbák kɛ́ɛ́yɛ́ ó pusíó. Nɛ Píɛl, na Sáak, ni Isáaŋ ne Endelée mɛɛ́lɛ́ nɛ kusɛɛŋɛlɛt nɛɛyɛ́, pɔ́ kɛ́ɛ́yɛ́ ɛ́ɛ́: 4«Tutían kikúlɛ́ kinín maandá makáánɛ́ ɔɔyɔnɛ́ ɛ́ɛ́nyípíɛ́lɛnɛ́ɛ, ne pulinsí púényítíínyenyé ɛ́ɛ́ mákaman.»
Melinsí météékenyé kuman kú kúúsí
(Mat 10.17-22; 24.4-14; Lúk 12.11-12; 21.8-19)
5Yésuse woond ɔ́ kuɔyɔn pɔ́ ɛ́ɛ́: «Ɛ́nuɛ́ndɔk ɛ́ɛ́ mɔɔnd tinúpúlít. 6Pɛɛnd puólíkóoli koólon nɛ kisiɛ́n kíámɛ, pɔ́ɔ́yɔ ɛ́ɛ́ iŋúɛ inyɛɛ́ Kilíise. Péketemi pɛɛnd puólíkóoli. 7Aká nuɔ́nyɔ́ɔ́pɔnɛ́ pétéékenyi pitíí pínyɛɛ́ mekúye, na mayɔ́ mé pitíí pímanyɛɛ́ kaáyɛ́ɛ, nutiipɛ́ pumbíla: maandá makáánɛ́ ɛ́ɛ́kɛɛsikɛnɛn kupíwóónyi. Maná kɔk pútiányipá kuman kú kúúsí. 8Púányípá, pulukú nuenesi sɔ́k pulukée, kitɔŋ sɔ́k kitɔŋɛ. Kúúsi ényípíéyen ɔ́ kuɔ́m kutek, insaná áányípa. Muyú mukáánɛ áányípá ɛlɛɛ́ aká muɔ́nɔ́ ményipulú akáandɔ́. 9Panɔ́ epé nunyɛɛ́ naamɛ, yɛɛ́pí káánɔ́ ɛ́ɛ́ ɛ́nuɛ́ndɔk. Pɛ́kɛnuɛ́tikɛn, páyuukan naanɔ́ kí itúl na piansi pí imbísókólí, pénúkite. Káámɛ ó pusíó, nuketélimetin pɔŋgɔ́munɛ pɔɔkɔ́n ne pefuŋ ɛ́ɛ́ nutían pɔ́ ewú inyɛɛ́. 10Niɔy Niitámb ɛ́ɛ́kɛɛsikɛnɛn ɛ́ɛ́ nitúan kuɔ́pɛk piɛ́nɛɛ́n piim. 11Aká pɛ́kɛɛ́nyínuɛ́tikɛn ɛ́ kunúsɛm ɔ́ pɔkɔ́n, nutisúmbúsɔ́mb manɔ́ŋ á puandá nuɛsikɛnɛnɛ́ kuɔyɛt. Epú nuɛsikɛnɛnɛ́ kuɔyɛt konúólin ké Emfúnukufúúmɛ yá akáánɛ́, ɔ́nuɔyɛ́t pɔ, á kiákí ɛ́ɛ́ nutipá paanɔ́ nukaányíkála. 12Ɛ́ mɛɛ́tɛ metúk, mɔɔnd kanyɛ́ɛn andimán ikɔ́n ɛ́ɛ́ pɔ́ɔ́n wɔ, sí nyɛ́ɛn muɔ́nɔ́ ikɔ́n ɛ́ɛ́ pɔ́ɔ́n wɔ; paán támb pitíí ne pepíényí pɔ́ɔ́pɔ́ ɔ́ kuɔ́nɔ pɔ. 13Pɛɛnd peem kɛnúfɛmɛ ó pusíó pú kisiɛ́n kíámɛ. Ewú waányípílúndinɛ́ kuám kí insúkie, Támbák éényééki wɔ kusɔ́t kú teeníík.»
Iŋɛ́n yiiŋɔ́n
(Mat 24.15-25; Lúk 21.20-24; 17.23; 21.8)
14«Aká nuɛ́nyɛ́ɛ́nɛnɛ́ ewú unyɛɛ́ kisiɛ́n ɛ́ɛ́ mɔɔnd u kisɛ́lukɛ ɔpɔkímɔ́t á kitamb kí Támbák, kɔ́ɔm utiányípá wɛɛsikɛnɛn ɛ́ɛ́ úpá, eŋenúní u Mekélíe eme ɛ́ɛ́kɛɛsikɛnɛn kuɛ́ndɔk, pɛɛnd páányípáanɛ́ é kúúsí kú Yuté, ɛ́ɛ́nyɛ́ɛ́sikɛnɛn kupínɔnɔn kí ikɛ́l; 15ewú unyɛɛ́ kí insɛkɛ́ mɛnɛ́mɛnɛ́ɛ utiselé ɔ́ kuɔkɔ́l puandá á kiansi. 16Ewú waányípáanɛ́ putiɛ́púlɛ́ɛ, utiondó á nuyá ɔ́ kuɔkɔ́l indífɔnɔ́ i puyo! 17Ɔsɔ́k ɛ́ mɛɛ́tɛ metúk na akáandɔ́ u niim ne ewú weényéelepenée! 18Ónupísókólónyí Támbákɛ́ɛ ɛ́ɛ́ pútiámɛ́n á kisikɛl kí imɛŋu. 19Á kiákí ɛ́ɛ́ mɛɛ́tɛ metúk áányípá metúk mí iŋɛ́n i katɛ iŋetíe Támbákɛ́ɛ wáápundɔ́ kúúsíe, na aná mɔɔnd tiányáandá kuɛ́nɛ tɛ puɔ́s. 20Ɔkɔ́n sɔ́tɔ utikɔ́l kiansɛ́ kí kupɔ́ndɛk maátákáánɛ́ metúk, tɛ mɔɔnd utisiɔ́sɔ́t. Kúúkɔ́, ó pusíó pú pɛɛnd umaáyɔ́ɔ́n, wɔɔ́nyípɔ́ndɛk metúk mí iŋɛ́n yɛɛ́tɛ. 21Índɛ kɔk mɔɔnd siɛl káánɔ́ ɛ́ɛ́: (Índɛ́, Kilíis ewe akɛ! wuunóónóo!), nutiátáp epú unúɔ́yɔnɛ́ɛ. 22Pasupɔ́sɔp kaam, epe ɔ́ɔ́yɔ ɛ́ɛ́ pɔ́ɔ pɛ́nyɛɛ́ Kilíise, pólotí ɔ́ɔ́yɔ ɛ́ɛ́ pɔ́ɔ pɛ́nyɛɛ́ peémímekélíé má Támbák. Pɛ́ɛ́kɛɛlɛ maandá matápukanɛ́ pɛɛnd é kutemi pɔ, niɛlɛ́n síákápá, tɛ epé Támbák maáyɔ́ɔ́n. 23panɔ́ kɔk, ɛ́nuɛ́ndɔ́k á maandá meem, iménúkésítényí kúmany insúá.»
Kuól kú Muɔ́nɔ́ u mɔɔnd
(Mat 24.29-31; Lúk 21.25-28)
24Á maátákáánɛ́ metúk, é kélém kú iŋɛ́n ikáánɛ́, ɔɔ́nyi éényíwu, oólí tiɛ́nyisɛ́kɛ, 25muótiótio áányípálapal múkuan, Támbák áányíyúkat pifuɛ́yɛk pí mɛnɛ́mɛnɛ́ɛ. 26Kákáánɛ́ pɛ́ɛ́nyíŋɛ́nɛnɛ́, iŋúɛ Muɔ́nɔ́ u mɔɔnd, yoólon ɔ́ kilɔndɔ́ asakán na numiánsina nú pukaaka é nukúm nɛkɛtɛ́ɛ. 27Kákáánɛ yaányítúmanɛ́ɛ Peéŋele ké embuun yé kúúsí, péékíndimenyi pisal piim píni á kukúsa epé imaáyɔ́ɔ́n.
Iŋónyítónyí i pufikié
(Mat 24.32-36; Lúk 21.29-33)
28Ɔ́nuɔ́p iŋónyítónyí eye yoóloniné é pufikié: pikas kanyɛɛ́ kuákan pitɔ́ɔ́ŋɔ, piány tɔ́sɔ, nuémenyen ɛ́ɛ́ ɔɔ́ny kanyɛ mekúye. 29Náánɔ́ kákáánɔ́, aká nuɛ́nyɛ́ɛ́nɛɛ́ maandá makáánɛ́ kanyɛɛ́ ɛpíɛ́lɛ, énumenyí ɛ́ɛ́ iŋúɛ, Muɔ́nɔ́ u mɔɔnd, iŋanyɛɛ́ kí iŋilí. 30Yɔɔ́núɔ́yɔn kémuémue ɛ́ɛ́ nindaanda enie tíátápɔ́k kati ɛ́ɛ́ maandá makáánɛ́ meem mɛ́píɛ́lɛ́. 31Mɛnɛ́mɛnɛ́ɛ ne kúúsí katápɔk, Mekélíe máámɛ mɔ́ɔ, mányi yá pɔkɔ́. 32Taatɛ́ɛ wééŋényí umenyené na kisikɛl nɔ puɔ́s puɛ́tɛ. Tɛ Peéŋele, tɛ niŋúɛ Muɔ́nɔ́, tɛ mɔɔnd utipá umenyen.
Nutipítíman
(Mat 24.42; 25.13-15; Lúk 12.36-38; 19.12-13)
33«Ánupá iŋuɛ́l ni imfɛnyɔ́, nutipítíman, á kiákí ɛ́ɛ́ nutipá numenyen kisikɛl puányínuáminɛ́. 34Púnyɛ asɛ mɔɔnd uyuukanɛ́ kɛ́ ɛŋɛnd. Umétúm kiansi kíɛ́yɛ́ kélém, uyapɛn peelímoólí imbítíínɛ i nuya, nɔ muɔ́nɛ́ɛ nɛ púɛ́yɛ́ puólí, wɔ́ ké ekííkí pulaal ɛ́ɛ́: Atipitiman. 35Nutipítíman, á kiákí ɛ́ɛ́ nutipá numenyen kuosiondó kú muɛ́t nuya. Woókoosiondón nɛ kisɛ́ndɛ ééy, nɔ ɔtɛ́m ú putúk ééy, ne emfúnupálɛ ééy, kiɛmɛ́ɛm? 36Emenyí unúpeletenyi, woosinúkóókí ɔ́ tunɔ. 37Puandá yɔɔyɔnɛ́, óóyooson mɔɔnd kitikit: nutipitiman.»
ទើបបានជ្រើសរើសហើយ៖
Málúkus 13: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL