Matié 28
28
Yésus tikápá á kipɛ́l nɛkɛtɛ́ɛ
(Mál 16.1-8; Lúk 24.1-11; Isŋ 20.1,11-18)
1É kélém kú sápat, puɔ́s pú sɔndiɛ kiɛmɛ́ɛm túú, na Malía u pálɛ́k u Makatala na Malíɛ olotí póókoól ɛ́ kuɛsiɛ́n kipɛ́l kí Yésus. 2Nɔ niɔ́kɔ́tɔ́n Kúúsí kúond á kupínyuŋan na pukaaka: á kiákí ɛ́ɛ́ Éŋele u Ɔkɔ́n moólin mɛnɛ́mɛnɛ́ɛ, weetíŋiliti nitányí pémeéfuúk nipíkínín ní kipɛl na nɛ́ɛ, woond wɔnyɔ́mbitɛn nɛ́ɛ. 3Upunya ɛlɛɛ́ imatimina, indífɔnɔ́ yɛ́ɛ́yɛ́ mapá imfúmfúɛ ɛlɛɛ́ nukɔlɔɔ́mbɔ. 4Puwaá puukɔ́n púɛtikɛn pisimb pímaákííká kipɛ́l, píond ɛ́ kutɛɛtinɛ, píɛ́yi asɛ pɛɛnd peekuén. 5Éŋele waambun níít, wɔ́ á pakáandɔ́ ɛ́ɛ́: «Panɔ́, nutitíín. Yeémenyen ɛ́ɛ́ nuákamba Yésuse pɔɔ́nyitɔndin ó kolóse. 6Utipá akɛ, usiɛnyɔk á pilɔ́ŋ yá aná umɔɔ́núɔ́yɔn; ɛ́nuɛsíɛ́n kɔ́ɔm wáányípá apítíkán. 7Ánuupɔ́ kuɛ́kɛt núɛl ó popíónyí pɛ́ɛ́yɛ́ ɛ́ɛ́: Umɛ́ɛ́nyɔ́k á pilɔ́ŋ, umófoók, weénúpétényí Kalilée; kɔ́ɔ́kɔ́ɔ nukaná kuɛ́nɛnɛ́ wɔ́. púúpɔ́ imányipián ɛ́ɛ́ inúɔ́yitɛn.» 8Pakáandɔ́ pakáánɛ́ páátɔk kuɛ́kɛt á kipɛ́l pááyɔɔk, ná puwaá ná kiandákáand kí anyamɔ́ kɔ́ ɔtɛ́m, póól pétííné ɔ́ kuɔyítɛ́n popíónyí pé Yésus insɔ́m. 9Nɔ niɔ́kɔ́tɔ́n Yésuse weelumen nɔɔpɔ́; wɔ́ kɔ́ɔ́p ɛ́ɛ́: «Iménupíkélíti.» Péépísíítin wɔ́ páákɔn wɔ́ iŋɔlɔpɛ, páásaman pikɔ́nd píɛ́yɛ́ ó kuómokosi wɔ́. 10Yésus ɛ́ɛ́pí kɔk kɔ́ɔ́p ɛ́ɛ́: «Nutitíín. Anuupɔ́ kuɔyítín paandimán páámɛ ɛ́ɛ́ páyɔɔk Kalilée: kɔ́ɔ́kɔ́ɔ pákaná kuŋɛ́nɛnɛ́ɛ.» 11Pakáandɔ́ mɛɛlɛ́ pámany kí iŋilí, pisimb pímotí pí ɔlɔŋ u pisimb pímaákííká kipɛ́l kí Yésus píépíkin á pálɛ́k, píɔ́nyɔɔyítɛ́n pɔkɔ́n pá pafunɔ́fɔn puandá kitikit púmɛɛ́píɛ́l á kipɛ́l. 12Pɔkɔ́n pá pafunɔ́fɔn páápíkúsikan nɔ pɔkɔ́n pɛ́ Pɛyúútɛn; pɛmɛɛlɛ́ péméélumen ekelú, pééki pisimb muenyí puólíkóoli, 13pɔ́ɔ kɔ́ɔ́p ɛ́ɛ́: «núɔ́yɔ ɛ́ɛ́: popíónyí pɛ́ɛ́yɛ́ siól né putúk, pasɔ́ tupítiman, péméésíép kilɔ́ŋ kíɛ́yɛ́. 14Índɛ púsiip kuámɛ́n Ɔŋgɔmunɛ, pasɔ́ tumenyené aná tukaányíkálɛt kɛ́ɛ́yɛ́ ɛ́ɛ́ úluŋ puandá tinúɛ́lɛ́.» 15Pisimb píɔ́kɔ́l muenyí píond píɛ́kɛl yá aná pɔ́mɔɔ́yítín pɔ́ɔ. Epú pisimb mɔɔ́yɔn pɛɛnd púu púmɔɔ́lɔpɔ́ é meéne mɛ́ Pɛyúútɛn, kuasiám ínanɔ.
Ewú wɛ́ɛ́nyɛ́ɛ́nyɔ́k á pilɔ́ŋ mátɔ́m popíónyí pɛ́ɛ́yɛ́ á pusɔ́m
16Popíónyi pé Yésus páát no omoómí, pɔ́ɔ, pááyɔɔk Kalilée kɔ́ ɔkɛ́l Yésus maápitiánɛ́n pɔ́ɔ. 17Pɛ́mɛɛlɛ́ pɛɛ́nɛn wɔ́, páákɔn wɔ́ iŋɔlɔpɛ ó kuómokosi wɔ́; pɔsɔ́k pómotí kɔ́ɔ́p kɔ́ ɔlɔŋ páák imfɛ́lu. 18Yésuse weepísíítin pɔ́ɔ, wɔ́ kɔ́ɔ́p ɛ́ɛ́: «Pímfá pukaaka kitikit á maandá meem mɛ́ mɛnɛ́mɛnɛ́ɛ ne kúúsí. 19Anuupɔ́ kɔk, núpɔŋ ekúli yé kúúsí kitikit, nuɛ́lɛ ɛ́ɛ́ é siki nikúlie ímbian popíónyí, nútuenen pɔ́ɔ ɛ́ kisiɛ́n kí Síí nɔ kí Muɔ́nɔ́ ne kí Emfúnukufúúmɛ, 20nuond nuónyonyi pɔ́ɔ ɛ́ɛ́ páákan ɔ́ niɔlɔ́ puandá kitikit yóónyínúónyítónyi. Énumenyén ɛ́ɛ́ Iŋú, inyɛ naanɔ́ mɔɔ́sí meem kuám á kuman kú kúúsí.»
ទើបបានជ្រើសរើសហើយ៖
Matié 28: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
