Matié 24
24
Pákakata kitamb
(Mál 13.1-4; Lúk 21.5-7)
1Yésuse waám á kitamb umɛɛlɛ́ úkayuúkan, Popiónyí pɛ́ɛ́yɛ́ péépísíítin wɔ é kupísiimesi nuwáák nú Kitamb. 2wɔ́ kɔ́ɔ́p ɛ́ɛ́: «Tíkɛ nuɛ́kɛɛ́nɛn nuwáák enué kitikit á? Kémuémue yɔɔ́núɔ́yɔn ɛ́ɛ́ tɛ nitányí nímoómi tíɔ́lɔpɔ́ nitálán ó nímotí akɛ. Pákakat yɔ́ yeem.» 3Aná umaápá ɔnyɔ́lí kɔ́ ɔkɛ́l ú poolifié, popíónyí péépísíítin wɔ́ kí isumbú, pɔ́ kɛ́ɛ́yɛ́ ɛ́ɛ́: «tútíán nííkí púɛ́nyípíɛlɛɛ́, pulinsí púnín púényítíínyée kuosiondó kúáwɔ na kuman kú kúúsí.»
Kutúm kú muyú
(Mál 13.5-13; Lúk 21.8-19)
4Yésuse kɔ́ɔ́p ɛ́ɛ́: «Énupíkeŋényésí emenyí mɔɔnd nútemi. 5Á kiákí ɛ́ɛ́ puólíkóoli ónyóólon nɛ kisiɛ́n kíámɛ é niít, pɔ́núɔ́yɔn ɛ́ɛ́: Niŋúɛ inyɛɛ́ Kilíise waayúúnánɛ́ɛ u Támbák, pétemesi pɛɛnd puólíkóoli. 6Nukɔɔ́pɔn aná pɛ́tɛɛtɛnɛ́ pitíí ne embííŋunyí ú pitíí. Nutitúmén: púɛ́kɛɛsikɛnɛn kupíɛl, kisikɛl manyi kítiɛsíkɛ́n kí kuman kú kúúsí. 7Púkapá ɛ́ɛ́ kitɔŋ nuénesi sɔ́k kitɔŋɛ, pufuŋ sɔ́k pufuŋe; na akááníɛ insaná, na akááníɛ kúúsí píéyen. 8Makáánɛ́ meem kapá ɛlɛɛ́ kutúm kú kutɛ́ɛ́ kú akáandɔ́ upíénenée. 9Akáánɛ́ pɛ́ɛ́nyínúsɛmɛnɛ́ kí insíkíl, pɔ́núɔ́nɔ, pátiányípá páátapan Támbákɛ́ɛ núfɛmɛ ó pusíó pú kisiɛ́n kíámɛ; 10Puólíkóoli kakuanɛn; epe nyáánɛn mutɔk pɔ́ɔ nɔ pɔ́ɔ, epéné fɛminɛn pɔ́ɔ nɔ pɔ́ɔ. 11Peémímekélíe má pisupɔ́ áányínúáminan kí imbúlu kí imbúle é kutemi pɛɛnd puólikóoli. 12Ó pusíó ɛ́ɛ́ Pufal ɔ́ɔ́nyíyɔkɔn, iŋɔyɔ í pɛɛnd puóli áányíman; 13Maná ewú waányípílúndinɛ́ kuám á kuamaná ɔ́ɔ́nyísɔt. 14Kinɔ́k kí niɔy kí Pufuŋ pú Támbák ekie pényíkémé kɛ́ɛ e kúúsí kuum; nukál enue núányípáánɛ́ɛ etétúnyí ó pusíó pú pitɔŋ píím; káákáánɛ́ kúúsí áányímanɛɛ́.»
Muyú muukɔ́n múónyóólée
(Mál 13.14-23; Lúk 21.20-24)
15«Aká nuɛ́nyɛ́ɛ́nɛ Olokí waasɔ́ wɔɔkɔ́n u kuáyakuáya, eŋémí moónyi Taniɛ́l mɔɔ́yɔ#24.15 Daniel 9.27; 11.31; 12.11, ɔpɔkímɔ́t ɔ́ kɔɔ́mɔ kɔ́ kitɔ́k kɔ́ɔ́pinɔnɛ́ Támbákɛ́ɛ, ewú úlááŋanɛ́ ɛ́nyɛɛlɛ́ wɔp! 16Akáánɛ́ kɔk pɔsɔ́k pányípáanɛ́ yuté pɔ́pínɔnɔn kí ikɛ́l; 17ewú waányípáanɛ́ kó otío, utipíkín ɔ́ kukɔ́l puandá á kiansi nɛkɛtɛ́ɛ; 18ewú waányípáanɛ́ é kisíén, utiondó ni inúú ɔ́ kuɔkɔ́l indífɔnɔ́ yɛɛyɛ́. 19Ɔsɔ́k na pakáandɔ́ pé eŋiim nɔ pɔɔ́ndɔkɔ́nɛ́ɛ péényéélepenée ɛ́ mɛɛ́tɛ metúk. 20Ónupísókólónyí ɛ́ɛ́ pútiɛlɛ́ ɛ́ɛ́ núpínɔ á kisikɛl kí imɛŋu tɛ ɔ́ puɔ́s pú sápat. 21Muyu áányípá kɔk táásɛ aná mɔɔnd mapásiɛ́ utiɛ́n kuetúm á nipundɛ́n ní kúúsí kuasiám inanɔ, epú mɔɔnd ɛ́ɛ́nyɛ́ɛlɛɛ́ utiandá kuɛ́n tɛ puɔ́s. 22Támbák sɔ́tɔ utiák metúk makáánɛ́ pukuy, ó pusíó pú paayúúnánɛ́ɛ mɔɔnd tisiɔ́sɔ́t. 23Índɛ mɔɔnd siɛl káánɔ́ ɛ́ɛ́: Kilíis nyɛ akɛ kúnyaánɛ unyi ekénée, nutipióndi ɔtɛ́m nɛɛyi. 24Á kiákí ɛ́ɛ́ pasupúsɔp pé pe Kilíise#24.24 Pɛɛnd pɔyɔnɛ panyi posoti. ne peémí moónyi pá pisupɔ́ áányáátukɛn ɛ́ kuɛlɛ pikaaka pí melinsí ne pisey é kupúmbesi pɛɛnd, kipán kɔ́ɔk, tɛ paayúúnánɛ́ɛ pá Támbák. 25Índɛ́, iménukésitenyi.»
Kuól kú Muɔ́nɔ́ u mɔɔnd
(Mál 13.24-31; Lúk 17.23-24; 21.25-31)
26«Yésuse waasuŋɔn ukanyi ɛ́ɛ́: Índɛ kɔk pɛsiɛl káánɔ ɛ́ɛ́: Muɔ́nɔ́ u mɔɔnd ewe ɔ́ kiɔ́sɔ́kɔliɔ, nutiyɔɔ́k. Púnyáánɛ índɛ pɛ́siɛl káánɔ ɛ́ɛ́: Ónuyoosín, káakɛ unyɛɛ́ kí insúmbiɛ, nutiátáp. 27Yá aná imatimina púnyaánɛ kutál á nipálɛ́n, kuám ɛ́ nisɛ́ndɛ́n, yá aná Muɔ́nɔ́ u mɔɔnd óónyólonée nɔ. 28Kɔ́ɔmɔ kitikit kikú nyɛɛ́, kɔ́ɔkɔ iŋɔ́mbí wééŋekenée. 29Iŋɛ́n imaátakáánɛ́ metúk ɛ́ɛ́nyɛ́ɛ́l imanan, nɔ niɔ́kɔ́tɔ́n ɔɔ́nyí wuu, oólí tiandá ɛsɛ́kɛt, muótiótio pálpal mɛnɛ́mɛnɛ́ɛ múkuan, Támbák yɛ́ɛ́kɛt pifuɛ́yɛk pí mɛnɛ́mɛnɛ́ɛ. 30Káaká pulinsí pú Muɔ́nɔ́ u mɔɔnd éényípítíínyée mɛnɛ́mɛnɛ́ɛ; káaká pɛɛnd pé ésípi yé kúúsí kitikit ɛ́ɛ́nyípíyɛ́kɛlɛnɛ́ɛ; pɛɛ́nɛn Muɔ́nɔ́ u mɔɔnd óólon ɔ́ kilɔndɔ́ mɛnɛ́mɛnɛ́ɛ, asakán kusakan na pukaaka kitikit ne nuúmu nuukɔ́n. 31Aká insɛ́p yiiŋɔ́n ɔ́ɔ́nyítɔ́ŋitɛɛ́ waányítɔ́m Peéŋele pɛ́ɛ́yɛ́ ké embún yeem éni yé kúúsí ɛ́ɛ́ pákúsan wɔ́ epé Támbák maáyɔ́ɔ́n é kúúsí kitikit. 32Ɔ́nuɔ́p iŋónyítónyí eye yoóloninée á putɛ pú pufikié: pikasi píɛ́yɛ́ nɛ kutɛpɛt, piány tɔsɔ, nuémenyen ɛ́ɛ́ kisikɛl kí masamɔ́ kanyi mekuye. 33Puandá púmoómí naanɔ́, aká nuɛ́nyɛ́ɛ́nɛ maandá makáánɛ́, enumenyí ɛ́ɛ́ Muɔ́nɔ́ u mɔɔnd kanyi mekúye. 34Yɔɔ́núɔ́yɔn kémuémue ɛ́ɛ́ ipaki eye tiékú kati ɛ́ɛ́ maandá makáánɛ mɛ́piɛ́lɛ. 35Mɛnɛ́mɛnɛ́ɛ ne kúúsí áányítápɔk, Mekélíe máámɛ, mɔ mányɛ yá pɔkɔ́.»
Tɛ mɔɔnd utipá umenyen puɔ́s: nutipítíman
(Mál 13.32,35; Lúk 17.26-27,34-35; 12.39-40)
36«Nɔ puɔ́s na kikulɛ́ maandá makáánɛ́ ɛ́ɛ́nyípíɛ́lɛ mɔɔnd tipá umenyen, tɛ Peéŋele pɛ mɛnɛ́mɛnɛ́ɛ, tɛ Muɔ́nɔ́, tɛ mɔɔnd ɛsiɛ́ Taatɛ́ɛ wééŋényí. 37Epú púmɛɛ́píɛ́lɛ́ á kisikɛl kí Noé, púú púɛ́nyípíɛ́lɛnɛ́ɛ aká Muɔ́nɔ́ u mɔɔnd óónyóólonée; 38á kiákí ɛ́ɛ́ é metúk eménée, akáánɛ́ nupɔ́l nuukɔ́n númaányɛ́n kúúsí manyi nútikuá, á maátákáánɛ́ metúk, pɛɛnd mapá pápíyaka póond pápúwáan, pɛnúmɛndɔ́ pítikan pakáandɔ́ kúnyaánɛ pɛɛnd éékenyi paán pɔ́ɔ́p paakáandɔ́ ɔ́ nuɔ́ndɔ́n, kuám puɔ́s Noé meépíkín ó kitóóŋ; 39Tɛ ɛ́ɛ́ pɛɛnd mémenyí, kuám puɔ́s nupɔ́l nuukɔ́n maákuá, peem pááfɔf. Yá aná púányipáanɛ́ɛ ó kuól kú Muɔ́nɔ́ u mɔɔnd. 40Kúúkɔ́, ɛ́ pɛɛnd páandɛ́ páányípáanɛ́ɛ putiɛ́púlɛ́ɛ: pɔ́ɔ́nyíkɔ́l omoómí, páyap olotí#24.40 1Te 4.13,18; 41Á pakáandɔ́ páandɛ́ páányípáanɛ́ɛ pákula ká atányí, pɔ́ɔ́nyíkɔ́l omoómí, páyap olotí. 42Nutipítíman kɔk, á kiákí ɛ́ɛ́ nutipá numenyen puɔ́s Ɔkɔ́n waanɔ́ óónyóólone. 43Nuémenyen ɛ́ɛ́: muɛ́t nuyá síékéményén kikúlɛ́ kí putúk eŋépi kaná kuólonée, usíékúle ɛ́ɛ́ utiyapá wɔ́ úkatɛt níítí níɛ́yɛ́ ní kiansi ɛ́ úpíkin. 44Púúpɔ́ panɔ́ kákáánɔ́ nuɛsikɛnɛnɛ́ɛ kupá pɛpíɛ́yɛ́n, á kiákí ɛ́ɛ́ niŋúɛ Muɔ́nɔ́ u mɔɔnd yoónyóól á kikulɛ́ nutiányípá numenyen.»
Eŋelípuólí u makánákana
(Lúk 12.42-46)
45«Eŋelípuólí unín unyɛɛ́ makánákana na tutátɔ́? omotí ewe másɛ wɛɛyɛ́ ményeekí wɔ́ pusɔ́m ɛ́ɛ́ ukɛnɛkɛn nɔ pɔsɔ́k peelímoólíe á kutááŋa pɔ́ á kisikɛl. 46Peseé ne eŋelípuólí ukáánɛ́ índɛ másɛ wɛɛyɛ́, aká úmónyoosíónd, siokóóki wɔ́ wɛɛlɛ pusɔ́m pukáánɛ́! 47Yɔɔ́núɔ́yɔn kémuémue ɛ́ɛ́ másɛ wɛɛyɛ́ katál wɔ́ punɛ́m púɛ́yɛ́ kitikit kí ímbɔ́k ɛ́ɛ́ ukííkan wɔ́ puɔ. 48Índɛ kɔk eŋelípuólí ukáánɛ́ nyɛ kilɔk kí eŋelípuólí, wɔɔ́kɔyɔ kɛ́ɛ́yɛ́ kɔ́ ɔtɛ́m ɛ́ɛ́: Másɛ waamɛ tipá wɛɛ́kɛt kuosiondon, 49woond é kukite pɔ́kúɔ́p, upíyaka upúwáan ne pepuwúúsí makɛp. 50Másɛ wɛɛyɛ́ óókosiondón puɔ́s utiányípá upétenyi wɔ́ na kikulɛ́ utiányípá umenyen; 51Másɛ wɛɛyɛ́ áányíkúŋɛt wɔ́ woond weeki wɔ́ inséésítényí i pɛɛnd pɛ́ nunɛ́m: kɔɔ́mɔ pɛɛnd paŋanɛ́, pápípanda eŋiŋ.»
ទើបបានជ្រើសរើសហើយ៖
Matié 24: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
