Matié 18
18
Ɛ́nyɛ́ utápukanɛ́ pɔsɔ́k é Pufuŋ pú mɛnɛ́mɛnɛ́ɛ
(Mál 9.33-37; Lúk 9.46-48)
1Á kiátákáánɛ́ kikúlɛ, popíónyí pé Yésus péépísíítin wɔ, pɔ́ kɛ́ɛ́yɛ́ ɛ́ɛ́: «Ɛ́nyɛ́ kɔk utápukanɛ́ pɔsɔ́k é Pufuŋ pú mɛnɛ́mɛnɛ́ɛ?» 2Yésuse waapílikɛn yiípayɔ́páyɔ́, weeténikenyi wɔ́ kɔ́ɔ́p ɛ́ kikɛtɛ́kɛtɛ́ɛ, 3wɔ́ ɛ́ɛ́: «Yɔɔ́núɔ́yɔn kémuémue ɛ́ɛ́ índɛ nusiɛl nutinuki, nutiɛ́yí ɛlɛɛ́ tuúpayɔ́payɔ́, aákóo, nutíépíkín é Pufuŋ pú mɛnɛ́mɛnɛ́ɛ. 4Ewú kɔk ukeényípíseli ɛlɛɛ́ muúŋayɔ́ ewe, wɔ́ ukaányítápukan pɔsɔ́k é Pufuŋ pú mɛnɛ́mɛnɛ́ɛ. 5Ewú úmónyikólí muúŋayɔ́ ɛlɛɛ́ ewe káámɛ kí iŋɔyɔ míŋgóli iŋú muɛ́t.
Yésus méékí kumenyi
(Mál 9.42-48; Lúk 17.1-2)
6«Á paápayɔ́ epé pópióndonyé ɔtɛ́m naamɛ, ewú ukeényíneni omoómí ɛ́ɛ́kɛɛsikɛnɛn ɛ́ɛ́ pátúŋ wɔ́ kinúm kí nitányí á kimɛn, pátúut wɔ́ ká asaá. 7Ɔsɔ́k nɛ pɛɛnd pé kúúsí pénenesíé peétépí! púnyɛ nɔ́ ɛ́ɛ́ maandá makáánɛ́ ɛ́ɛ́kɛɛsikɛnɛn kupíɛ́lɛ, maná, ɔsɔ́k na mɔɔnd unenesíé eŋétépí. 8Índɛ ɔmbɔ́k wááwɔ púnyaánɛ kikɔ́nd kíáwɔ kíkukuusenyé á kifal, sɔ́mb kɛ́ɛ, óomb kɛ́ɛ kaáyɛ́ɛ naawɔ; púnyi peseé naawɔ ɛ́ɛ́ épíkin ɔ́ kusɔ́t kú teeníík nɔ ɔmbɔ́k ómoómí, púnyaánɛ nɔ kikɔ́nd kímoómí kutápɔk ɛ́ɛ́ pákutɔ́ɔt ní imbɔ́k síáwɔ siim púnyaánɛ pikɔ́nd píáwɔ piim é yiik ítiányípá íwéen! 9Índɛ níinsi níáwɔ níkukuusenyé á kifal, sɔ́k nɛ́ɛ, óomb nɛ́ɛ kaáyɛ́ɛ naawu; púnyi peseé naawɔ ɛ́ɛ́ épíkin ɔ́ kusɔ́t kú teeníík ne níinsi nímoómí kutápɔk ɛ́ɛ́ pákutɔ́ɔt ne eŋíísi yááwɔ yeem á kikɔnyi kí yiik kítiányípá kíwéen!
Pulinsí á Kitúmbɛ́ɛ kímeényim
(Lúk 15.1-7)
10«Énupíkeŋényésí paápayɔ́ epe, wɛɛ́tɛ tiyɛɛ́nɛ́t tɛ woomoómí, á kiákí yɔɔ́núɔ́yɔn ɛ́ɛ́ Peéŋele pɔ́ɔ́pɔ́ nyɛ mɛnɛ́mɛnɛ́ɛ petényí kisikɛl kitikit ó pusíó pú Taatá. [11] 12Panɔ́ nuápítááka ɛ́ɛ́ kiákí? Índɛ mɔɔnd ápian pitúmbɛ́ɛ etín átáan, kímoómí nyími, utiáyapá pínyɛɛ́ etín éni no punyo ne píni kɔ́ ɔkɛ́l ó kuól kuambá ekí kísiényím á? 13Yɔɔ́núɔ́yɔn kémuémue ɛ́ɛ́ índɛ usiɛ́n kɛɛ, anyamɔ́ wɛ́ɛ́yɛ́ ó pusíó pú kitúúmbɛ́ɛ kikáánɛ́ kímoómí áátápukan anyamɔ́ unyɛɛ́ naawɔ ó pusíó pú pitúmbɛ́ɛ etín éni no punyo ne píni písiɛ́kɛl pítinyím. 14Yá aná púnyɛɛ́ nɔ́ɔ ne Síí waanɔ́ unyɛɛ́ mɛnɛ́mɛnɛ́ɛ; utipá waamba ɛ́ɛ́ á paápayɔ́ epe, táŋ omoómí nyim.
Kusɔ́t kú puundimán
15«Índɛ andimán ááwɔ siɛkuɛl kilɔk, yuúk kɛɛ́n wɔ́ ákálitɛn wɔ́ panɔ́ páandɛ́ kɔ́ɔ́m. Ukupítɔ́likɛn, amánúŋɔ́n andimán ááwɔ. 16Ween ku kupítɔ́likɛn, kɔ́l mɔɔnd omoómí púnyaánɛ páandɛ́ ɛ́ɛ́ puónyi pukáánɛ́ píɛ́yɛn é mekélié mé petétúnyí páandɛ́ púnyaánɛ pátát aná Imfiɔ́ŋ ɔ́ɔ́yɔɔnɛ́ɛ. 17Ween kupítɔ́likɛn pɔ́ɔ, ɔyítɛ́n ɔlɔŋ ú peétépí; tɛ ɔlɔŋ u peétépí ween kupítɔ́likɛn wɔ, ɛ́nyɛɛ́ upá káánɔ́ ó pusíó asi mɔɔnd utiányípá umenyen Támbákɛ́ɛ púnyaánɛ etúúsi lemfúe. 18Yɔɔ́núɔ́yɔn kémuémue ɛ́ɛ́ epú kitikit nukeényílit e kúúsí pékelit pú mɛnɛ́mɛnɛ́ɛ, epú kitikit nukoónyóólun e kúúsí, pókoolun pú mɛnɛ́mɛnɛ́ɛ.
Ónupísókólónyí ɔlɔŋ
19«Yɔɔ́núɔ́yɔn andíkɛ́k ɛ́ɛ́, índɛ páandɛ́ káánɔ́ kɔ́ ɔlɔŋ e kúúsí sielumen ekelú ɔ́ kuɔŋɛn puandá tɛ púnín, Taatɛ́ɛ unyɛɛ́ mɛnɛ́mɛnɛ́ɛ keeki pɔ́ puɛ́tɛ puandá. 20Á kiákí ɛ́ɛ́, kɔɔ́mɔ páandɛ́ púnyaánɛ pátátɔ́ nyɛɛ́ pakúsá káámɛ ɛ́ kisiɛ́n, inyɛ kɔ́ɔ́p ɛ́ kikɛtɛ́kɛtɛ́ɛ.»
Iyayɔ́ ɛ́ kikɛtɛ́kɛtɛ́ɛ kí paandimán
(Lúk 17.4)
21Píɛ́lɛ weepísíítin kɔk Yésus wɔ́ kɛ́ɛ́yɛ́ ɛ́ɛ́: «Ɔkɔ́n, aká andimán áámɛ kɛɛ́nyíŋɛl maandá mɔ́ kilɔk, kánɛ́k iŋaányíyapɛn wɔ́? Kuám kátíndatɔ́ neémue á?» 22Yésus ɛ́ɛ́pí kɛ́ɛ́yɛ́ ɛ́ɛ́: «Indipá iŋuɔyɔn ɛ́ɛ́ kuám kátíndatɔ́ neémue kɔ́ɔ́m, yɔɔ́kuɔyɔn ɛ́ɛ́ kuám pisikɛl etín átátɔ́ na píát etekinyi pɛ́ɛ kátíndatɔ́ neémue.
Mɔɔnd ukati niɛ́nɔsúkɛ
23«Pufuŋ pú mɛnɛ́mɛnɛ́ɛ nyɛ ɛlɛɛ́ efuŋ omotí umɛɛ́lɛ́ ɛ́ɛ́ peelímoólí pɛ́ɛ́yɛ́ sámba muenyí pámaápián wɔ́. 24Umɛlɛ́ úméétúm kuówon siɔlɔ́, póókoólin wɔ́ nɔ sɔ́k omotí umaápián wɔ́ muenyí táásɛ. 25Aná umɛɛ́l utipián puandá á kusámb ɔɔlɔ́ wɛ́ɛ́yɛ́, efuŋ ɛ́ɛ́pí ɛ́ɛ́ pétúú wɔ́ na akányí, na paán na puandá puum umaápian á kusámb ɔɔlɔ́ wɛ́ɛ́yɛ́. 26Eŋelí puólí ukáánɛ́ waakɔɔn efuŋ iŋɔlɔpɛ, woond ɛ́ kupíyɛ́kɛlɛn wɔ́, wɔɔyɔn wɔ́ ɛ́ɛ́: Ímbílimbít, iŋokuondinyi muenyí múáwɔ muum. 27Másɛ u eŋelípuólí ukáánɛ́ wɛɛ́n wɔ́ ɔsɔk, waayap eŋelípuólí waayɔɔk, wɔ́ kɛ́ɛ́yɛ́ ɛ́ɛ́ utipá waand kuówon wɔ́ puandá, múɛ́yí mukáánɛ́ umáyapɛ́n wɔ. 28Úkaáman á, eŋelípuólí ukáánɛ́ welumen nɔ wɔɔkúɔ́p omotí umaápián wɔ́ muenyí kati kúsolée; wɛɛtikɛn wɔ́ á kimɛn, ukanyɛɛ́ kuɔ́tɔ wɔ́ kimɛn mekúye ɛ́ɛ́ úsɔ́mb wɔ́ kiélum; wɔɔyɔn wɔ́ ɛ́ɛ́: Íŋondínyí epú imbianɛ́ɛ. 29Wɔɔkúɔ́p waakɔɔn wɔ́ kɔk iŋɔlɔpɛ, upíyɛ́kɛlɛn wɔ, wɔɔyɔ ɛ́ɛ́: Ímbílimbit, iŋokuondinyi. 30Ween kupítɔ́likɛn ɛmbíyɛ́kɛ́l ú wɔɔkúɔ́p; Kútisúkín akáánɛ́, waayɔɔk nɛɛyɛ́ ɛ́ɛ́ pɛ́ɛfɛlɛ́n wɔ́ á kiansi kí imbíne kuám aká waányísámbanɛ́ ɔɔlɔ́ wɛ́ɛ́yɛ́. 31Pɔ́kúɔ́p ɛ́ɛ́nɛn epú púmɛ́nyipíɛ́lɛ́, púéséésitenyi pɔ́ táásɛ; páányatíán másɛ wɔɔpɔ́ puandá kitikit. 32Waatɔ́m mɔɔnd waanyapílíkɛ́n wɔ, másɛ wɛɛyɛ́ ɛ́ɛ́pí kɛ́ɛ́yɛ́ ɛ́ɛ́: Anyi kilɔk kí eŋelípuólí, tíkɛ insiakuyapɛn ɔɔlɔ́ wááwɔ́ wuum aká ɛsiɛ́kimbíyɛ́kɛlɛn á? 33Aŋú kákáwɔ atimápá pɛ́kuɛ́n waakúánɔ ɔsɔ́k yá aná iŋú muɛ́t insiɛ́kuɛ́n ɔsɔ́k á? 34Ní ilópi kitikit, másɛ wɛɛyɛ́ waanyatál wɔ́ kí imbɔ́k sí pɛɛnd péénesíé iŋɛn, kuám aká waányísámbɛ́ ɔɔlɔ́ wɛ́ɛ́yɛ́ wuum. 35Yá anakáánɛ́ Taatɛ́ɛ unyɛɛ́ mɛnɛ́mɛnɛ́ɛ ɛ́ɛ́nyínúɛ́lɛnɛ́ índɛ siki mɔɔndɛ káánɔ́ kɔ́ ɔlɔŋ tipá uyapinan andimán wɛɛyɛ́ nɔ ɔtɛ́m wɛ́ɛ́yɛ́ kitikit.»
ទើបបានជ្រើសរើសហើយ៖
Matié 18: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
