Lúúkas 21
21
Nupoo nú ɔ́sukɔsukɔ u kisík kí akáandɔ́
(Mál 12.41-44)
1Yésuse watámba eŋis, wɛɛ́n pɛɛnd ákana nupoo nuɔ́pu ónukólópóŋ. Pamapá inimi sí pɛɛnd. 2Wɛɛ́n kɛ́kɛ́yɛ ɔsúkɔsukɔ ú kisík kí akáándu kímaásiákana paána pápikɔ́ŋ pándɛ́; 3wɔ́ ɛ́ɛ́: «Kémuémue, yɔ́núɔyɔn ɛ́ɛ́ ɔsúkɔsukɔ ukisík ukáánɛ méekí kutápɔk pɛɛnd kitikit. 4Á kiákí ɛ́ɛ́ inɛ́m mɔ́kɔ́lɔ́n nuɔ́p nupoo epúúpu patiánipá nsaná na pu; kisík kí akáándu, kí, kímɔ́kɔ́l kɛ́ɛ́yɛ́ kɔ́sɔk ékueki pipiɔ́kɛ́n píɛ́yi pim.»
Yésus métééki kikata kí kitamb kí Támbák
(Mat 24.1-2; Mál 13.1-2)
5Pɔsɔ́k pomotí mapá akáánɛ pɔyɔ aná atány pamaáwáákan kitamb kí Támbák kɔ́ɔk nyɛɛ́ kupɔt na maandá matámbu pɛɛnd moópokosi Támbákɛ́ɛ, popotokosi amáám na mɔ; Yésus ɛ́ɛ́pí ɛ́ɛ́: 6«Pukáánɛ nuyíkinanɛ, metúk ókólon nuɛ́niɛ́lɛ nutiand kuɛ́n nitányí nitálána ɔ sɔ́k: paánikat puandá kitikit.»
Melinsí má kuman kú kúúsí
(Mat 24.3-8; Mál 13.3-8)
7Pokoówun wu ɛ́ɛ́: «Oŋónyóonyi, kikúli kinín pukáánɛ ɔyɔnɛ́ ɛ́nipiɛ́lɛnɛ́ ne pulinsí puenitíínye kisikɛl kí pu kuasiám?» 8Wu ɛ́ɛ́: «Enupíkeŋenyesi ɛ́ɛ́ mɔɔnd tinúneni, á kiákí ɛ́ɛ́ puólikóli óniólon, pɔkɔ́lɔn kisiɛ́n kiámɛ; pɛɛ́niɛ́l ɛ́ɛ́: “Iŋuɛ́ wu” punyáanɛ “kisikɛl másiám;” nutiɔŋɔ́ kɔ́ɔ́p. 9Aká nuɔ́niɔ́pɔnɛ́ petéékenyi pitíí: kitɔn nuenesi sɔ́k kitɔŋɛ, punyáanɛ pitíí ɔkitɔŋ nɛkɛtɛ́ɛ, nutiipɛ́ pumbíla. Akiákí ɛ́ɛ́ puɛ́kɛsikɛnɛn ɛ́ɛ́ putúan kupíɛl, maná kɔk kuman ku kúúsí tiánipá nɔ niɔ́kɔ́tɔ́n.»
10Wu kɔk kɔ́ɔ́p ɛ́ɛ́: «Kitɔŋ ánipá kiátukɛn kinuenesi sɔ́k kitɔŋɛ, efuŋ nuenesi sɔ́k efuŋ é. 11Kúsí énipíeyen na pukaaka, mapat ni nsaná ánipá ɔ kuɔ́ɔ́mu kutek, meelíe ma pulúlúkɛ óólonin mɛnɛ́mɛnɛ́ɛ ne melinsí mɔkɔ́n.»
Kisikɛl kí yɔ́pítɛ́n ne kí kutétunyi áátúánan
(Mat 10.17-22; Mál 13.9-13)
12«Kisiósíe maandá makáánɛ ásiám, pɛkɛnuɛ́tikɛn pond penuénesi iŋɛ́n; payuukana nanu á piansi pi Pɛyúútɛn pí imbísókólí ókuonusososi, panuákan á piansi pí imbíne; pakayuukana nanu ku pefuŋ nɔ pɔngɔ́munɛ pɔkɔ́n opusió pu kisiɛ́n kiámɛ. 13Kɔ́ɔk nukánimbiákɛn itóyi. 14Enumenyi ɛ́ɛ́ nutipá nuɛsikɛnɛn ɛ́ɛ́ nuondo ákuamba panúmuɛt pipiɔ́kín numanyɛ nutipɛ́ kuám. Iŋál ikueki kɔ́ɔk. 15Akiákí ɛ́ɛ́, iŋúɛ, iŋenuéki nukal na tutáátɔ etú tɛ mɔɔnd omoómí epéepé penúnuenesié tiánipá pokuondinyi, tɛ kutímbimit á tɔ. 16Pɔtiɔ no ponikotié, pandímán pánu nɛ pɛɛnd peekúli yánu ne pekúl pánu pɔ pɛkɛɛ́ninusɛm kú ɔngɔ́mɔn, pond pɛɛlɛ ɛ́ɛ́ pɔɔ́nɔ puólíkoli kánu kɔ́ɔlɔŋ. 17Pɛɛnd peem kɛnúfɛmɛ opusió pu kisiɛ́n kiámɛ; 18Tɛ kupá nɔ, nuúnye númoómi tiényím kánu kítuɛ. 19Kupílúndɛn kuánu kukɛ́niɛl ɛ́ɛ́ nutáŋap kusɔ́t kú téníík.»
Insésítényí yaányíkuaninɛ́ Yelúsalɛm
(Mat 24.15-21; Mál 13.14-19)
20Yésuse wasuŋɔn na nukal, wɔ́ ɛ́ɛ́: «Aká nuɛ́niɛ́nɛ ilɔŋ sí petííti mé kéŋeliti Yelúsalɛm, énumenyi ɛ́ɛ́ kikúlɛ́ kí kikata kiɛ́yɛ másiám. 21Epé paánipáanɛ Yuté, ɛniɛ́ pɔpínɔnɔn kí ikili; epé paánipáanɛ apáliki nɛkɛtɛ́ɛ, ɛniɛ́ paaman; epé paánipáanɛ ɛmɛtiɛ́pulɛ, petipíkín á páliki! 22Akiákí ɛ́ɛ́ metúk makáánɛ ánipá metúk má kilia emé puandá kitikit pɔmɔɔ́ŋ ɛɛsikɛnɛnɛ́ɛ kupiɛ́l. 23Ɔsɔ́k táásɛ na pakáándu panipáanɛ né eŋimi neepé peniélepené amaátakáánɛ metúk akiáki muyú ánipá táásɛ ɔ́ kitɔŋu, Támbák ondo utíínyi ɔpɔtɔŋtɔ́ŋ ɛ́ɛ́ wɔ́kɔ́pinɔn pɔ kutɛɛ. 24Pɔkɔɔ́nɔ pɔ́ nɔ muɔ́nɔnɔ́ mú pitíí; pekeéyesi pɔ́ piɔ́lí, pesélemendi pɔ ɔpitɔŋ pi kúúsí kitikit, pɛɛnd pɔ pitɔŋu pí kúúsí kitikit óniól, pataapa Yelúsalɛm kuám á kisikɛli Támbák maásɔmbin pɔ́.»
Kuól kú Muɔ́nɔ́ u mɔɔnd
(Mat 24.29-31; Mál 13.24-27)
25Yésuse wasuŋɔn, wɔ́ ɛ́ɛ́: «Melinsí ánipá kɔ́ɔ́ny, noóli nó muótiótio; akɛ e kúúsí enduŋu wásáá ánipá pukaaka, moombu atukan mopióton na pukaaka á kiŋɛndɛŋɛnd puɛ́lɛ pitɔŋ puwaá; 26pɛɛnd ánikúndan ná puwaá aká wɛɛ́tɛ mánipitáakɛt muyú muóloniné kúúsí; á kiákí ɛ́ɛ́ Támbák ániyúkat pifuɛ́yɛk pí mɛnɛ́mɛnɛ́ɛ. 27Káakáánɛ pɛɛ́niɛ́nɛnɛ́ Muɔ́nɔ́ u mɔɔnd, kilɔndɔ́ keŋelenyi wu, wólon owóonón kuwóonon na pukaaka ne nuúmu.»
Pufuŋ pú Támbák kanyɛ mekúye
(Mat 24.32-35; Mál 13.28-31)
28Yésuse suŋuna, wɔ́ kɔ́ɔ́p ɛ́ɛ́: «Aká maandá makáánɛ énitúme kupiɛ́lɛ, anuatukɛn nuetukenyi ituɛ, á kiákí ɛ́ɛ́ Támbák kanyɛ mekúye ó kunúsóti.» 29Wetúmin pɔ insap, wu ɛ́ɛ́: «Ónuyosín pufikié na mati móólé móond: 30pikas nekutúm kutɔsɔ, nuémenyen ɛ́ɛ́ kisikɛl kí masamɔ́ kanyɛ mekúye. 31Puandá pumoómi nanɔ́, aká nuɛ́niɛ́nɛ maandá makáánɛ kanyɛɛ́ ɛpiɛ́lɛ, énumenyí ɛ́ɛ́ Pufuŋ pú Támbák kanyɛ mekúye. 32Yɔ́nuɔyɔn kémuémue ɛ́ɛ́ nindaanda enie tiátápɔ́k kati ɛ́ɛ́ maandá makáánɛ meem mɛ́piɛ́lɛ. 33Mɛnɛ́mɛnɛ́ ne kúúsí ánitápɔk, mekélíe mámɛ mɔ, manyɛ yá pɔkɔ́.»
Nutipítiman, Yésus ókosiondon
34Yésuse wasuŋɔn, wɔ́ ɛ́ɛ́: «Énupíkeŋenyesi, emenyí itím siánɔ nuáka no kuótukon makip, na kupúwáan táásɛ á pitaŋá pí makip ni ndúmtén si kusɔ́t ɛ́ɛ́ puɔ́s pukáánɛ tinúpeletenyi, 35ɛlɛɛ́ puolí pukuaninɛ́ muɔpɔ́; á kiákí ɛ́ɛ́ puɔ́s pukáánɛ ánikɔɔn pɛɛnd peem pɛnyɛ́ e kúúsí kitikit. 36Anupá pɛɛnyɔ́, nupísókolonyi kisikɛl kitikit ɛ́ɛ́ Támbák núeki imbéki i kupíɔk á maandá makáánɛ́ móólone nɔ kulɔp petényi ó pusíó pú Muɔ́nu u mɔɔnd.»
Metúk mé Yésus mé kusúkin á kitamb kí Támbák
37Yésus mapá wónyonyi á kitamb puɔ́sum puɔ́sum, nɛkisɛ́ndɛ wam wapítimɛn kɔ́kil ú poolifié. 38Pɛɛnd yuukan neemfúnpálɛ á kitamb ɔ kuɔpítɔ́likɔn wɔ.
ទើបបានជ្រើសរើសហើយ៖
Lúúkas 21: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
