Lúúkas 15
15
Yésuse na pafalfal
1Petúúsi lemfúe na pafalfal kitikit mapá pépísíítenin Yésuse ɔ́ kupítɔlikɔn wɔ́. 2Pafalisiɛ́ŋ ne pemenyípikotí píŋunye; pɛ́ɛlɛ ɛ́ɛ́: «Mɔɔnd ukáánɛ́ óókólosi pafalfal peseé woond unyáan nɔɔpɔ́!»
Insap í kitúúmbɛ́ɛ kímeényím kíand kuɛ́nɛk
(Mat 18.12-14)
3Yésuse weetúmin pɔ́ insap eye: 4«Unín káánɔ́ kɔ́ ɔlɔŋ unyɛɛ́ pákupian pitúúmbɛ́ɛ etín átáan, kímoómí nyim, utiyapá epie píményisíén etín éni no punyo ne píni píéŋényí putíɛ́púlɛ́ɛ ó kuól kuámbá ekí kísiényim kuám aká wɛɛ́nɛ́nɛ́ kɛ́ɛ? 5Aká umɛ́nyɛɛ́n kɛ́ɛ, na anyámɔ́ kitikit upítál kɛ́ɛ á pikumbɔ́kumbɔ́; 6wɔ́ nakuám á nuyá, ukúsikan pekúl pɛ́ɛ́yɛ́ na mufák múɛ́yɛ́, wɛɛl kɔ́ɔ́p ɛ́ɛ́: Ɛ́nyɛɛ́ túyayapa, á kiákí ɛ́ɛ́ kitúúmbɛ́ɛ kíámɛ kímeényím mɛ́ɛ́nɛ́k!» 7Yɔɔ́núɔ́yɔn ɛ́ɛ́, yá anakáánɛ́ anyamɔ́ áányípáánɛ́ɛ mɛnɛ́mɛnɛ́ɛ ó pusíó pú afalfál táŋ omoómí úmányipíkúŋɔ́n, kutápɔk anyamɔ́ únyɛɛ́ ó pusíó pú pɛɛnd píndɛ́ndɛ́nɛ etín éni no punyo ne péni pátiányípá ni insaná ɛ́ɛ́ pénúki.
Insap í kikɔ́ŋ kímeényím kíond kíɛ́nɛk
8Wɔ́ andíkɛk ɛ́ɛ́: «Púnyaánɛ, akáandɔ́ unín unyɛɛ́ pákupian pikɔ́ŋ píát, kímoómí nyim, ukaná kuɛlɛ́ utitúm ilámba, úwɔɔnɛt kiansi, wáamba peseékese kuám aká wɛ́ɛ́nɛ́ kɛ́ɛ? 9Aká úmɛ́nyɛɛ́n kɛ́ɛ, ukúsikan pekúl pɛ́ɛ́yɛ́ paakáandɔ́ nɔ pɔsɔ́k pakáandɔ́ pɛ́nyɛɛ́ mufák muɛ́yɛ́, wɛɛl kɔ́ɔ́p ɛ́ɛ́: Ɛ́nyɛɛ́ túyayapa, á kiákí ɛ́ɛ́ kikɔ́ŋ kíámɛ kímeényím mɛ́ɛ́nɛ́k! 10Yɔɔ́núɔ́yɔn ɛ́ɛ́ yá anakáánɛ́ Peéŋele pá Támbák nyɛɛ́ ká anyamɔ́ mɛnɛ́mɛnɛ́ɛ ó pusíó pú afalfál táŋ omoómí umányipíkúŋɔ́n.»
Insap i kinɔ́k kímeényím kíand kuɛ́nɛk
11Yésus kanyi andíkɛ́k ɛ́ɛ́: «Mɔɔnd mapá nɔ pinɔ́k píandɛ́. 12Kikuke kanyɛ é síí ɛ́ɛ́: “Taat, imfá níámɛ niap ni punɛ́m níɛ́sikɛnɛnɛ́ kúŋɔ́pinɔn.” Síí waaman kuapan pɔ́ punɛ́m púɛ́yɛ́. 13Metúk na kisúmbɔ́ ne kikeli, kikuke máápát punɛ́m púɛ́yɛ́ puum, tóóŋi mɛ́ɛ́yɛ́ ɔ́ kitɔŋ kímotí kaáyɛ́, waaman ɔlɔkɔ púu wɔ́ɔ́sɛ́ nɛ piɛndɛndɛ. 14Úmááman etuénen punímɛ, ɔndumɔ́ wáákua ɔ́ kitɔŋ kiɛ́tɛ, imbalá kanyɛ sikúsé imbɔ́k kutɔɔ́, pipíkíŋín mɔɔyɔ́ tɛ píɛ. 15Woonyoówún ɔtɔŋtɔ́ŋ omotí puólí ɔ́ kitɔŋ kiɛ́tɛ, páátúm wɔ́ putíɛ́púlɛ́ɛ á kúakííká paán pí iŋunɛ́p. 16Upísémenyi múkúnyá pátááŋanɛ́ iŋunɛ́p, wɛɛ́n naánɛ́ emfumfí ú kupat, tɛ mɔɔnd ukuyosini wɔ́. 17Muúŋayɔ́ wɔɔlɔŋimɛt woond á kuanuna, ukanyɛ ɛ́ɛ́: “peelímoólí pá taatá ápíyaka póóyon, múkúnyá pɛ́kɛn, iŋúɛ yeesikúén insaná akɛ! 18Yoókoondon ku taatá, yɛ́ɛl kɛ́ɛ́yɛ́ ɛ́ɛ́: Taat, yɛɛ́l kilɔk ke eŋis yá Támbák na yááwɔ, 19Indipá ɛŋɛsíkɛ́nɛ́n ɛ́ɛ́ áand kumbílan ɛ́ɛ́ muɔ́nɔ́ aawɔ; ííŋɔ́l asɛ eŋelípuólí waawɔ.” 20Waatukɛn kakat, suŋɔ́suŋɔ́ ku síí. Umɛɛlɛ́ umanyɛ kaáyɛ́ síí weemenyi wɔ wɛɛ́n wɔ́ ɔsuk, waatɔk nɔ ɔtɛ́t ó kuokólí wɔ, wɔɔkɔ́l wɔ́ kisas. 21Muɔ́nɔ́ kanyɛ kɛ́ɛ́yɛ́ ɛ́ɛ́: “Taat, yɛɛ́l kilɔk ké eŋís yá Támbák na yááwɔ, indipá ɛŋɛsíkɛ́nɛ́n ɛ́ɛ́ áand kumbílan ɛ́ɛ́ muɔ́nɔ́ ááwɔ.” 22Maná síi kanyɛ é peelímoólí pɛ́ɛ́yɛ́ ɛ́ɛ́: “Ónuól nɔ kinɔ́k kí indífɔnɔ́ núsɔn wɔ́; núák wɔ́ amánd kí inɛɛ́, núák wɔ́ pipɔ́kɔ́t ɔ́ pikɔ́nd. 23Ónuól no kindombíó kí inday kínyɛɛ́ né mekút núsikit, túnyáan túyayapa; 24Á kiákí ɛ́ɛ́ muɔ́nɔ́ áámɛ ewe mekú, umáand kuond ɔ́ kusɔ́t; umenyím kuukɔ́ umányand kuɛ́nɛk.”»
«Péétúm ayayapa. 25Muɔ́nɔ́ ukutúan mapá esikén putíɛ́púlɛ́ɛ. Ó kuosiondó ukanyɛ mekúye na nuya, wɔɔ́p mɔtɔ́ŋɛ́t na ambaná yɔ́ punɔ́k. 26Waapílikɛn eŋelípuólí omotí, woówun wɔ́ kiákí kínyɛɛ́ á nuya. 27Eŋelípuólí wɛɛ́tɛ kɛ́ɛ́yɛ ɛ́ɛ́: “Andimán ááwɔ móósíónd, aná tíɔ́ mɛ́nyɛɛ́n wɔ́ kilikil, umɔ́ɔ́nɛ́n wɔ́ kíndombío kí inday kínyɛɛ́ ne mekút.” 28Ilópi yɛ́ɛtikɛn muɔ́nɔ́ ukutúan, waasɔ́mb kiansɛ́ ɛ́ɛ́ utipá upíken á kiansi. Síi waám ó kuopísókólónyí wɔ́ ɛ́ɛ́ úpíkin. 29Ukanyɛ é síi ɛ́ɛ́: “Taat, ekéné akɛ, tuɔŋ asɛ tuɔŋ iŋuɛlɛn masɔm tɛ kupínan kikotí kíáwɔ puɔ́s, amapásɛ atiimfá tɛ ipúnyipúny ɛ́ɛ́ íyayapan kɔ́ɔk ne pekúl páámɛ. 30Muɔ́nɔ́ ááwɔ óólú, wɔ́ ewú wáánínyá punɛ́m púáwɔ nɛ piɛndɛndɛ wɔ́ ɔɔ́nɔnɛ́ wɔ́ kindombío kí inday kínyɛɛ́ ne mekút!” 31Síi kɛ́ɛ́yɛ́ ɛ́ɛ́: “Muɔ́nɔ́, aŋúɛ anyɛ akɛ naamɛ metúk meem, puandá kitikit imbianɛ́ɛ nyɛ púáwɔ; 32Imɛ́ɛ́síkɛ́nɛ́n kupíyaayɔn nuɔ́l yóond íyayapa á kiákí ɛ́ɛ́ andimán ááwɔ ewe mekú umóósíóndó ɔ́ kusɔ́t, umenyím umáand kuɛ́nɛk.”»
ទើបបានជ្រើសរើសហើយ៖
Lúúkas 15: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
