Lúúkas 10
10
Yésus mátɔ́m popíónyí
(Mat 9.37-38; 10.7-16; Mál 6.8-11; Lúk 9.3-5)
1É kélém kúɛ́yɛ́, Ɔkɔ́n Yésuse waayɔ́ɔn popíónyí etín átátɔ́ na páát na páandɛ́ woond woofooki pɔ́ɔ páandɛ́ páandíɛ á papálɛ́k nɔ kɔɔ́mɔ kitikit umɛɛ́síkɛ́nɛ́n kuyuukan wɔ́ muɛ́t. 2Kisíósíó ɛ́ɛ́ páyɔɔk, wɔ́ kɔ́ɔ́p ɛ́ɛ́: «Niok nyɛ kutek, peelímoólí paayɔ́. Ónupisókólónyí muɛ́t kisíén ɛ́ɛ́ útuɔ́m peelímoólí kɛ́ɛ́yɛ́ ó niok. 3Ánuyɔɔk! Panɔ́ pakáánɛ́, inútúmanɛ́ɛ asi paán pá pitúúmbɛ́ɛ ɛ́ kikɛtɛ́kɛtɛ́ɛ kí imbúá sí ɛɛ́m. 4Mɔɔnd tipíyuúkɛ́n púsɛ, tɛ imbalá i ɛŋɛnd, tɛ pipɔ́kɔ́t, nutitélímit kí iŋilí é kupíkéliti mɔɔnd.
5«Aká numényipíkín á kiansi, ánutúán kuɛl ɛ́ɛ́: Kiyeéwe pá na kiansi ekie. 6Índɛ mɔɔnd u kiyeéwe nyɛ á kiansi kikáánɛ́, kiyeéwe kíánɔ́ óókondón kɛ́ɛ́yɛ́; kati nɔ, ɛ́nyɛɛ́ kiyeéwe kíánɔ́ nuóndin. 7Ɔ́nulɔpɔ á kiansi kikáánɛ́, nunyáan, nupúwáan epú péményinúeki; á kiákí ɛ́ɛ́ eŋelípuóli kitikit ɛ́ɛ́kɛɛsikɛnɛn ɛ́ɛ́ úpia pinamá. Nutiɛ́l nuám é kííkie kiansi nupíkín ó kílotí.
8«Pálɛ́k kitikit nusiépíkin á wɔ, pónúkóli peseé, ánunyáan epú pénúekenyée. 9Énuéŋúkésí pɛɛnd pápítáyanɛ́ɛ kɔ́ɔk, nuɔyɔn pɔ́ɔ ɛ́ɛ́: Pufuŋ pú Támbák máásínúámɛ́n. 10Maná, pálɛ́k kitikit núményipíkín á wɔ, pótinúkóli, ánuupáan kó oŋonyí, ɛ́nuɛl ɛ́ɛ́: 11Tɛ etuúte ú pálɛ́k wáánɔ́ únyɛɛ́ káásɔ́ ɔ́ pikɔ́nd, tumówóónit wɔ ó kunúóndinyi. Maná, énumenyí ɛ́ɛ́: Pufuŋ pú Támbák máásínúámɛ́n.
(Mat 11.21-23)
12«Yɔɔ́núɔ́yɔn ɛ́ɛ́: Puátakáánɛ́ puɔ́s, Támbák éényíséésitenyi pálɛ́k ukáánɛ́ kutápɔk aná weényíséésitenyée pálɛ́k pápilanɛ́ɛ ɛ́ɛ́ Sɔtɔ́ɔm. 13Ɔsɔ́k naawɔ, pálɛ́k papílanɛ́ ɛ́ɛ́ Kolasɛ́ɛŋ! Ɔsɔ́k naawɔ pálɛ́k pápílanɛ́ɛ ɛ́ɛ́ Pɛtisayíta! Á kiákí ɛ́ɛ́ Támbák síɛ́kɛ́ɛ́l á papálɛ́k pápílanɛ́ɛ ɛ́ɛ́ Tíil nɔ Sitɔ́ɔŋ, pisey wɛ́ɛ́nyɛ́ɛ́l kuanɔ́, insí tɔɔm pɛɛnd pé Tíil nɔ Sitɔ́ɔŋ maápíák pilaá pí ambaŋɔ́ póond pɔ́nyɔ́mbitɔn kɔk, é kutíínyi ɛ́ɛ́ pányi kí imbúsúnáanɛ ó pusíó pú pifal píɔ́p, pémétúúm kusɔ́t kúɔ́p kú insúá kélém. 14Púúpɔ́ Támbák éényínúséésitenyée, panɔ́ pɛɛnd pó Kolasɛ́ɛŋ nɛ pɛ́ Pɛtisayíta kutápɔk pé Tíil nɔ pɔ́ Sitɔ́ɔŋ, puɔ́s woónyísóósosíé pɛɛnd pé kúúsí. 15Panɔ́ pɛɛnd pá Kapɛlnawúum, nuápítááka ɛ́ɛ́ Támbák áányínúnyálɛk kuám mɛnɛ́mɛnɛ́ɛ á? Aákóo! weényínúseli kɔɔmɔ ɔ́ nipiɔ́yɛt ní pilɔ́ŋ.»
16Yésuse waasuŋɔn, wɔ́ kɛ́ɛ́yɛ́ ó popíónyí ɛ́ɛ́: «Unúpítɔ́likɔnɛ́ ɔ́ɔ́kimbítɔ́likɔn, ewú úmányinúpíkásɛ́t mímbíkásɛ́t; maná, ewú úmányimbíkásɛ́t, mápíkásɛ́t ewú wáányíndɔ́m.»
17Popíónyí etín átátɔ na páát na páandɛ́ Yésus maátɔ́m, póosiondó na anyamɔ́ kí itɛ́m, pɔ́ é Yésus ɛ́ɛ́: «Ɔkɔ́n, aká tukálanɛ́ kááwɔ ɛ́ kisiɛ́n, tɛ pilɔk pí piliínditíe píɔ́túɔ́pinɔn.» 18wɔ́ kɔ́ɔ́p ɛ́ɛ́: «Yɛ́ɛ́nɛ́n Sáátan ɛ́fúkɛ́n mɛnɛ́mɛnɛ́ɛ ukuan ɛlɛɛ́ imɛtiminɛ yi imbalamandá. 19Índɛ́, yeénúékí pukaaka nukataapa ni inyɔ́ki, ni iŋiŋɛ́, na pukaaka kitikit pú ókoyikoy, puandá tinúɛ́lɛ́. 20Maná, nutiyayápá ɛ́ɛ́ pilɔk pí piliínditíe ɔ́ɔ́nuɔ́pinɔn, ánuyayápá ɛ́ɛ́ pisiɛ́n píánɔ́ nyɛ piɔ́ŋɔ́ á kálatɛ u Támbák mɛnɛ́mɛnɛ́ɛ.»
Ɔtɛ́m ú Yésus mówóón na anyamɔ́
(Mat 11.25-27)
21Kɔ́ɔk nɔ kɔ́ɔk, ɔtɛ́m ú Yésus wóówóon na anyamɔ́ u Emfúnukufúúmɛ; wɔ́ ɛ́ɛ́: «Taat, Ɔkɔ́n u kúúsí nɛ mɛnɛ́mɛnɛ́ɛ, yeékulémbesi aná emeétíínyí epé pátiányípá ne meéne maandá ɛmɛɛ́nɛmbɛ́n epé pɛ́nyɛɛ́ na tutátɔ́ nɛ pɛɛnd pɛ́mɛɛlɛ́ sekúle. Ɛ́ɛ́ɛŋ, Taat, yá aná áányámbá ɛ́ɛ́ púpá nɔ́ kááwɔ kɔ́ ɔtɛ́m peseé. 22Taatá ínsúkát puandá kitikit, mɔɔnd tipá wuumenyen, iŋúɛ inyɛɛ́ Muɔ́nɔ́, ɛsiɛ́ Taatɛ́ɛ; mɔɔnd tipá umenyen ewú unyɛɛ́ Taatɛ́ɛ, ɛsiɛ́ Muɔ́nɔ́ nɔ sɔ́k ewú Muɔ́nɔ́ áámbanɛ́ kutíínyi wɔ́.»
Peseé u popíónyi
(Mat 13.16-17)
23Ekéléme kuɛ́yi Yésuse wapíkúŋunɔ kiáyi kí popiónyi pɛ́ɛyi, wɔ́ kɔ́ɔ́p pɔ́ péŋényi ɛ́ɛ́: «Peseé ne eŋís eyí yɛ́nɛnɛ́ epú nuɛ́nɛnɛ́! 24Akiákí ɛ́ɛ́, yɔ́nuɔyɔn kémuémue, peémímekélíe má Támbák ne pefuŋ puólikóli ámbá kuɛ́n epú panɔ́ nuɛ́nɛnɛ́, tɛ ɛ́ɛ́ pɛɛ́n puɔ, púnyaánɛ kupítɔlikini epú panɔ́ nupítɔlikɔnɛ́, tɛ ɛ́ɛ́ pɔpítɔlikinɛ.»
Niɔy nínyɛɛ́ iŋilí í kusɔ́t kú teeníík
(Mat 22.34-40; Mál 12.28-31)
25Emenyí pikotí omotí waatukɛn ɔ́ kupíɔ́pitɛn Yésuse, woówun wɔ́ ɛ́ɛ́: «Oŋónyóonyi, kiákí yɛɛsikɛnɛnɛ́ kuɛl ɛ́ɛ́ índáŋap kusɔ́t kú teeníík?» 26Yésuse kɛ́ɛ́yɛ́ ɛ́ɛ́: «Kiákí kínyiɛ́ kiɔ́ŋɔ́ ó pikotí pí Támbák, aákaanuna kɔ́ɔk ɛ́ɛ́ kiákí?» 27Woondinyi Yésuse ɛ́ɛ́: «Ɛɛ́kɛɛsikɛnɛn kuɔyɔ Ɔkɔ́n Támbákɛ́ɛ waawɔ nɔ ɔtɛ́m wááwɔ kitikit, na pumuundɛ púáwɔ kitikit, ní imbekí yaawɔ kitikit, ní imbítáákítɛ́n yaawɔ kitikit, oond ɔɔyɔ sɔ́k mɔɔndɛ ɛlɛɛ́ aŋúɛ muɛ́t.» 28Yésuse kɛ́ɛ́yɛ́ ɛ́ɛ́: «Omóóndinyí peseé. Ɛlɛ́ nɔ áányípia kusɔ́t kú teeníík.»
Insap ɔ́ mɔnɔ́ Samalí
29Aná Emenyípikotí ukáánɛ́ máambá kutíínyi puandá umónyoówún iŋówúnín ikáánɛ́, woówun Yésuse ɛ́ɛ́: «Ɛ́nyɛ́ unyɛɛ́ sɔ́k mɔɔndɛ?» 30Yésuse weetúúmin wɔ́ insap eye: «Mɔɔnd omotí woólín Yelúsalɛm utúnuken á kuyɔɔk Yelíko. Weesilumén na pisiliŋanɔ́ kí iŋilí. Píɔk maandá umaápian. Píékite wɔ peseékepese, píayap wɔ́ upíiŋe. 31Púamin ɛ́ afunúfɔn u Támbák omotí meesítúnúkénín ɛ́ yɛɛ́tɛ iŋilí, wɛɛ́n wɔ, wɛɛpíɛ́ŋɔn wɔ́ iŋilí nakúnɛ waasuŋɔn. 32Mɔɔnd omotí u nikúli ní Lefi waasiám ɔ́ kɔɔ́mɔ kakáánɛ́; wɛɛ́n mɔɔnd ukáánɛ́ pémeékite, wɛɛpíɛ́ŋɔn iŋilí nakúnɛ, waasuŋɔn kɛ́kɛ́ɛ́yɛ́. 33Maná, mɔnɔ́ Samalí, kɛ́ ɛŋɛnd, waasiám kɔɔ́mɔ mɔɔnd pémeékité maápá, wɛɛ́n wɔ́ ɔsɔ́k. 34Weepísíítin wɔ, waándinan wɔ imféŋ síɛ́yɛ́ nɛ kisɛŋ na makɛp, waakúta sɛ́ɛ ne piénsi pí insunú, weeméketi wɔ́ kɛ́ɛ́yɛ́ é pulúk pú ɛŋɛnd, waayɔɔk nɛɛyɛ́ ɔ́ nipíɔ́yɛt ní peendí, ukɛnɛkɛn nɛɛyɛ́. 35Kúépéli, wɔɔsɔ́k pikɔ́ŋ pí muenyí píandɛ́, weeki muɛ́t nipiɔ́yɛt, wɔ́ kɛ́ɛ́yɛ́ ɛ́ɛ́: “Síén íŋándínán mɔɔnd ewe, pitál áám á nupɔ́k núɛ́yɛ́, iŋasinamá iŋúɛ muɛ́tɛ́muɛtɛ ó kuosiondó kúámɛ.”» 36Yésus mɛɛlɛ́ umanan, wɔ́ ké Emenyí pikotí ɛ́ɛ́: «Á kuáwɔ kuɛ́n, ɛ́ pɛɛnd epe pátát, unín unyɛɛ́ sɔ́k mɔɔndɛ ó pusíó pú mɔɔnd pisiliŋanɔ́ meékite?» 37Emenyí pikotí kɛ́ɛ́yɛ́ ɛ́ɛ́: «Sɔ́k ewú umɛɛ́n wɔ́ ɔsɔ́k.» Yésus kanyi kɔk kɛ́ɛ́yɛ́ ɛ́ɛ́: «Apá, aŋúɛ kákááwɔ kɛɛlɛ́ nɔ.»
Yésus nyɛ ku Máta na Malía
38Ne Yésus no popíónyí pɛ́ɛ́yɛ́ mɛɛlɛ́ pámanyi kí iŋilí i kuyɔɔk Yelúsalɛm, páányaám ɔ́ kitɔŋ kímotí, péépíkin. Akáandɔ́ omotí, kisiɛ́n ɛ́ɛ́ Mátɛ, wookóli pɔ́ kɛ́ɛ́yɛ́ á kiansi. 39Máta mapián andimán waakáandɔ́ kisiɛ́n ɛ́ɛ́ Malíɛ. Malíɛ wɔɔnyɔ́mbɛt, á masiá mɔ́ pikɔ́nd pí Ɔkɔ́n, upítɔ́likɔn iŋónyítónyí yɛɛyɛ́. 40Mátɛ wɔ, ukutukut na masɔm, ní inámb. Waanyaatɔ́k, wɔ́ é Yésus ɛ́ɛ́: «Ɔkɔ́n, ɛɛ́kɛɛ́nɛn pú peseé ɛ́ɛ́ andimán áámɛ íyɛkɛn masɔ́m á? Ɛɛlɛ́ kɛ́ɛ́yɛ́ ɛ́ɛ́ wóósiŋólí masɔm.» 41Ɔkɔ́n woondinyi wɔ́ ɛ́ɛ́: «Máta, Máta, eétúúmen oond ɛyɛ́kɛpɛ á maandá kutek. 42Táŋ púmoómí mɔɔnd nyɛ́ insaná na pɔ. Malíɛ wɔ́ úmányiyɔ́ɔ́n niap ni itámb; mɔɔnd tíɔ́kɔ́l nɛ́ɛ kɛ́ɛ́yɛ́.»
ទើបបានជ្រើសរើសហើយ៖
Lúúkas 10: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
