Isáaŋ 10
10
Ekííkí pitúúmbɛ́ɛ waatámb
1Yésus kanyi ɛ́ɛ́: «Kémuémue kémuémue, yɔɔ́núɔ́yɔn ɛ́ɛ́ mɔɔnd utiányípá upíkenin é niít ní ɔmindɛ́ ú pitúúmbɛ́ɛ, umákatanɛn kiáyí kílotí, sɔ́k ukáánɛ́ nyɛ eŋépi na kisiliŋanɔ́. 2Maná ewú upíkeninée é niít ní ɔmindɛ́ nyɛ ekííkí pitúúmbɛ́ɛ. 3Ewú ukííkanɛ́ nipíkínín ni ɔmindɛ́ fuunin wɔ́, pitúúmbɛ́ɛ pítɔ́likɔn ekelú wɛ́ɛ́yɛ́; epí piɔ́pɔninɛ́ wɔ́, upílan pɛ́ɛ, siki kitúúmbɛ́ɛ kɛ́ɛ́yɛ́ ɛ́ kisiɛ́n, waám na pɛ́ɛ kɔ́ ɔɔ́nd. 4Aká úmányimaná kuémenyi pɛ́ɛ, ufookon píɔ́ŋɔn kɛ́ɛ́yɛ́, á kiákí ɛ́ɛ́ píemenyen ekelú wɛ́ɛ́yɛ́. 5Pítíɔ́kɔɔŋɔ́ á mɔɔnd pílemené, maná píɔ́pínɔnin wɔ́ kaáyɛ́, á kiákí ɛ́ɛ́ pítipá pímenyen ekelú wɛ́ɛ́yɛ́.» 6Yésuse weetíínyi pɔ́ pulinsí pukáánɛ́, maná tɛ ɛ́ɛ́ pɔ́ɔ́p epú umaámbá kuɔyɛt. 7Yésus kanyi andíkɛ́k ɛ́ɛ́: «Kémuémue, kémuémue, yɔɔ́núɔ́yɔn ɛ́ɛ́, inyɛ nipíkínín ní pitúúmbɛ́ɛ. 8Epé kitikit pámaátúán kuól káámɛ nyɛ peépi na pisiliŋanɔ́, maná pitúúmbɛ́ɛ tɛ ɛ́ɛ́ pípítɔ́likɛn pɔ́. 9Inyɛ nipíkínín: índɛ mɔɔnd siepíkinin káámɛ, wɔɔ́nyisɔ́t, waányípá upíkin, waám woond wɛɛ́n púkunyá púkupíóyi na pú. 10Eŋép óókoólon yá é kuesiép, ɔ́ kuɔ́n ne é kunyími; iŋúɛ inyɛ oŋólón ɛ́ɛ́ pɛɛnd pia kusɔ́t póond pápia kúú kutek.» 11«Inyɛ ekííkí pitúúmbɛ́ɛ waatámb. Ekííkí pitúúmbɛ́ɛ waatámb éékekenyi kusɔ́t kúɛ́yɛ́ ó pusíó pú pitúúmbɛ́ɛ píɛ́yɛ́. 12Ekííkí pitúúmbɛ́ɛ ewú ukɔtɔnɛ́ yá ó pusíó pú muenyí tipá kémuémue ekííkí pitúúmbɛ́ɛ; pitúúmbɛ́ɛ tipá píɛ́yɛ́. Waáyapan pitúúmbɛ́ɛ úpínɔ aká úmɛ́nyɛɛ́n imbúá i ɛɛ́m óólon; ipítuútɛn pitúúmbɛ́ɛ isélemendi pɛ́ɛ. 13Á kiákí ɛ́ɛ́ mɔɔnd ukáánɛ́ ɔ́kɔtɔn yá é muenyí utipá utúmen na pitúúmbɛ́ɛ. 14Inyɛ ekííkí pitúúmbɛ́ɛ waatámb, yeémenyen pitúúmbɛ́ɛ píámɛ, píi píond píimenyen, 15aná Taatá ímenyenée yoond imenyen Taatɛ́ɛ; yoókond yeekenyi kusɔ́t kúámɛ ó pusíó pú pitúúmbɛ́ɛ píámɛ. 16Yaákand apian pitúúmbɛ́ɛ pílotí pítiányípá kɔ ɔmindɛ́ ewe, pikáánɛ́ káká pɛ́ɛ, púɛ́kɛsikɛnɛn ɛ́ɛ́ ínúŋuna pɛ́ɛ; píkɔɔ́p ekelú wáámɛ, akáánɛ́ píkaányípá ɔlɔŋ táŋ ómoómí ne ekííkí táŋ omoómí. 17Taatá ɔ́ɔ́kiŋɔyɔ á kiákí ɛ́ɛ́ yeékekenyi kusɔ́t kúámɛ, á kuand atáŋap kɔ́ɔ. 18Mɔɔnd ukukɔ́l kusɔ́t kúámɛ káámɛ tipá, maná yeékekenyi kúú káámɛ ɔ́ kuɔyɛt; yaápian pukaaka pú kueki kúú, yoond imbian pukaaka pú kuand ɔkɔ́l kúú: pukaaka pukáánɛ́ Taatá miímfá.» 19Tukál tukáánɛ́ túakand kuól na tusalasala ɛ́ kikɛtɛ́kɛtɛ́ɛ kí Pɛyúútɛn. 20Puólíkóoli kɔ́ɔ́p ɛ́ kikɛtɛ́kɛtɛ́ɛ ɔ́ɔ́yɔ ɛ́ɛ́: «Unyɛ nɔ kilɔk kí kiliínditíe, unyɛ etiití, kiákí nupítɔ́likɔnɛ́ wɔ́?» 21Polotí ɔ́ɔ́yɔ ɛ́ɛ́: «Mɔɔnd u kilɔk kí kiliínditíe tipá ukála anɛ; kilɔk kí kiliínditíé nyɛ pékufuun epútepute eŋís á?»
Péméén Yésuse
22Pɔ́mɔtɔyɔ́ Yelúsalɛm putɔ́mbí pú puɔ́s pámaásukúná kitamb kí Támbák. Púmapá kisikɛl kí puyo puukɔ́n. 23Yésus mapá woól woond á kitamb kí Támbák, ɛ́ kikɛtɛ́kɛtɛ́ɛ kí ilɔŋ sí itɛ́n sí Sálúmun. 24Pɔkɔ́n pɛ́ Pɛyúútɛn péékéŋeliti wɔ́, pɔ́ kɛ́ɛ́yɛ́ ɛ́ɛ́: «Túpéétenyi kuám níík ɛ́ɛ́ ɛtuɛ́ndɔn meéne? Tútíán kutútíán índɛ aŋúɛ ɛnyɛɛ́ Kilíise!» 25Yésuse woondinyi pɔ́ ɛ́ɛ́: «Insiaman anútían nɔ, maná nutipá nuátapan. Maandá emé yɛɛlɛnɛ́ɛ ɛ́ kisiɛ́n kí Taatá nyɛ etétúnyí waamɛ, 26maná nutipá nuátapan, á kiákí ɛ́ɛ́ nutípá pitúúmbɛ́ɛ píámɛ. 27Pitúúmbɛ́ɛ píámɛ ɔ́ɔ́pítɔ́likɔn ekelú wáámɛ; yeémenyen pɛ́ɛ, píond píɔ́ŋɔn káámɛ. 28Niŋúɛ kɔk yoond yeekenyi pɛ́ɛ kusɔ́t kú teeníík; pítiényinyím tɛ puɔ́s andíkɛ́k mɔɔnd ukɔɔ́nyɔ́ɔk pɛ́ɛ káámɛ kɔ́ ɔmbɔ́k tipá. 29Taatɛ́ɛ umiímfá pɛ́ɛ áákányinan maandá meem, andíkɛ́k tɛ mɔɔnd utipá na pukaaka pú kuɔk puandá kɔ́ ɔmbɔ́k ú Taatá. 30Naam na Taatá tunyɛ omoómí.» 31Pɛyúútɛn páand apát atányí á kutúútan Yésuse. 32Maná Yésus kanyi kɔ́ɔ́p ɛ́ɛ́: «Iménútíínyí piták pí meelíe kutek moólinoné ku Taatá. Ménín kɔk nuambanɛ́ɛ kundúútan atányí á mɔ́ɔ?» 33Pɛyúútɛn póondinyi wɔ́ ɛ́ɛ́: «Pútipá á kiták kí meelíe tuambanɛ́ɛ kukutúútan atányí, maná ó pusíó pú insikɛ́ asikanɛ́ Támbákɛ́ɛ, ɛ́ kuɛl ɛ́ɛ́ aŋúɛ ɛnyɛɛ́ mɔɔnd, ɛɛl ɛ́ɛ́ anyɛ Támbákɛ́ɛ.» 34Yésuse woondinyi pɔ́ ɛ́ɛ́: «Púnyɛ puɔ́ŋɔ́n káánɔ́ ó pikotí ɛ́ɛ́ Támbák ɛ́ɛ́pí ɛ́ɛ́: “nunyɛ patámbákɛ́ɛ”. 35Kisikɛl kílotí, kikotí ápílan epé mekélíe má Támbák maákálá kɔ́ɔ́p ɛ́ɛ́, patámbákɛ́ɛ. Kɔ́ɔk tɛ mɔɔnd utipá ukuéli epú Ɔmfíɔ́ŋ ɔ́ɔ́yɔɔnɛ́ɛ. 36Nuɛ́pí ké ewú Taatá maáyɔ́ɔ́n woond waatɔ́m wɔ́ e kúúsí, ɛ́ɛ́: “Aásikan Támbákɛ́ɛ”, á kiákí ɛ́ɛ́ imɛ́ɛl ɛ́ɛ́ inyɛ Muɔ́nɔ́ u Támbák. 37Índɛ indipá yɛɛlɛ moólí má Taatá nutiŋátáp! 38Maná kɔk índɛ yɛɛ́kɛlɛ mɔ́, tɛ nutiŋátápan, ánuátáp mɔ́, ɛ́ɛ́ númenyi peseé ɛ́ɛ́ Taatá nyɛ káámɛ aná niŋúɛ inyɛɛ́ á Taatá.» 39Akáánɛ́ kɔk, páand kuond á kuamba kuɛtikɛn Yésuse, maná wasúlɔk kɔ́ɔ́p kí imbɔ́k. 40Yésuse waand kuond nakúnɛ u Sulutɛ́ŋ, kɔɔ́mɔ Isáaŋ meétúm kutuenin, wɔɔlɔp kɔ́ɔk. 41Pɛɛnd puólíkóoli póolin wɔ́ pɔ́ɔ́yɔ ɛ́ɛ́, «Kémuémue, Isáaŋ timɛɛl tɛ kisey kímoómí, maná epú kitikit umɔɔ́yɔ́ á mɔɔnd ewe mapá kémuémue.» 42Pɛɛnd puólíkóoli póopíóndonyi ɔtɛ́m ne Yésus kɔ́ɔk.
ទើបបានជ្រើសរើសហើយ៖
Isáaŋ 10: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
