Rawma iyi 3
3
1Əŋgah mənaŋ wa seh, Yahuda iyi i day hedi Yahuda iyi səku seh, abə mey? Zla viɗe seh, zay tə mey? 2Zay ta aka mbeh səku, əŋ məsəkəŋ iyi fuk! Titʉz ta seh, əŋ Yahuda iyi ndagwa, Bizlaf mə vəlaŋta zlap ŋga iyi. 3Məndiwiŋ ta seh, əŋgah Yahuda dakayta iyi tə əŋ faŋw tata hedi sə delele iyi səku, ama, a gula i tak Bizlaf za ley mbaɗ əŋ hedi sə delele za vaw? 4Məndiwiŋ ta seh, mənaŋ mba səku! Sey nakwa iyi səŋ lawlaw Bizlaf seh, ar hedi mə zlap zlap məndiwiŋ, hedi iyi fuk, ar hedi mə bərəsl ma iyi, mənaŋ ma mawuzlel tə əŋ Ɗerewel tə Bizlaf mə zlap, a zla:
«I nda i səŋgah əŋ hedi sə delele seh, kəɗi əŋ zlap təkwa iyi,
hwa nda i mbaɗ əŋ bay gula seh, əŋgah hedi kədeɓeh za ley mbəzlah ma a talaŋ.»
5Ama əŋgah nja takwa sə delele səku wa, a kətəɗaha nja sə delele tə Bizlaf seh, nakwa iyi nda i zlap seh viŋgey? Əŋ Bizlaf a kətawanakwa abə zəm nəf ŋga wa seh, ar hedi madawar vaw? (A nawa, sa kəzlap mənaŋ hedi dəgənak). 6Məndiwiŋ ta seh, mənaŋ mba səku! Məŋgəvday əŋgah Bizlaf, ar hedi sə delele səku seh, a gula i mbəzl ma a talaŋ məŋhayak seh, viŋgey?
7Ama əŋgah bərəsl ma na, a kətəɗaha zlap məndiwiŋ tə Bizlaf, a kəgizehe səndawl ŋga seh, i nda i mbəzlaka ma a talaŋ mənaŋ hedi mə ɗal hem seh, məŋgəvday a mey? 8Hedi dakayta iyi i kəranakwa, hedi iyi ta mba seh tiɗe ley lim zləŋ takwaŋ. I kəbərəslanakwa ma a talaŋ abə ley zlap, i zla: «Mazukwa i ɗal məsəkəŋ madawar amba məsəkəŋ səntaŋ mə təɗaha.» Mənaŋ wa izey, nakwa iyi ɗal məsəkəŋ madawar səku seh, məŋgəvday a mey?
Kwa hedi ntaɗ sə delele seh halla
9Ama mənaŋ wa seh, nini Yahuda iyi nini pay day a hedi dakayta iyi izey vaw? Kay, nini dayta halla səlak! Sa kəgiz məsəkəŋ ntaɗ za: Yahuda iyi abə hedi Yahuda iyi səku fuk i mbə a gədaŋ mazla tə hem. 10Mənaŋ ma mawuzlel tə əŋ Ɗerewel tə Bizlaf mə zlap, a zla:
«Kwa hedi ntaɗ mə ɗal kəzəɗ səntaŋ seh halla, kwa ntaɗ halla.
11Kwa hedi mə səŋ məsəkəŋ seh halla,
hedi mə pələk Bizlaf seh halla.
12Tata fuk i kəzləŋgəɗ kataf səntaŋ za,
tata fuk a lay ta, i kəkuɗəp za.
Kwa hedi mə ɗal məsəkəŋ səntaŋ seh halla.
Kwa ntaɗ halla.
13Muŋgurlum tata iyi seh, mənaŋ talaŋ jiɓ marəz.
Ganaɗ tata iyi seh, i kətərta ley bim hedi iyi.
Ar dara tə zʉzʉk mə təɗaha a pakwam tata iyi.
14Pakwam tata iyi seh i mə gweɗi abə gay, abə zlap sə ɗʉwek iyi.
15Ŋgas tata iyi i kəvazta ley nda i ja hedi iyi.
16I kəgay məsəkəŋ iyi, i zləŋgaŋta takwaŋ əŋ hedi iyi, əŋ lay tata mə taŋ fuk.
17I kəsəŋ kataf tə zahay səku.
18I mə nji kwa ley səŋ Bizlaf, ar viyey seh halla.»
19Nakwa iyi kəsəŋ zlap ma majaw mə zlap fuk, a kəzlapaŋta əŋ hedi mə waŋgaŋ talaŋ əŋ ma majaw iyi, amba kwa hedi ntaɗ mə mba i rəz ma ley zlap i per talaŋ ŋga səku, amba hedi tə əŋ məŋhayak iyi fuk i mə səŋta tata hedi tə abə hem iyi a ma tə Bizlaf. 20Kwa hedi ntaɗ mə nda i mbaɗ əŋ hedi sə delele a ma tə Bizlaf#3:20 Jabura 143:2. abə ley waŋgaŋ talaŋ əŋ ma majaw seh halla. Ma majaw a gula i giz məsəkəŋ seh, a talaŋ hem taataɗ dap.
Bizlaf a reh hedi dəgənak iyi seh, viŋgey
21Ama mənjawa, Bizlaf kəgizenakwa za, a nda i mbaɗanakwa əŋ hedi sə delele a ma ŋga mə tak ma majaw seh viŋgey. Ɗerewel tə ma majaw iyi liŋ tə hedi mə giz ma abə miya tə Bizlaf iyi i kəzlap za a talaŋ ma ta mar zlezle. 22Bizlaf a mbaɗ hedi iyi əŋ hedi sə delele iyi seh, kəɗi kuw ma tata əŋ Yesu Almasihu#3:22 Galatiya iyi 2:16.. A ɗalu əŋ hedi iyi fuk i mə ɗiy kuw ma tata a mbiŋ. Məŋgəvday məsəkəŋ mə wuɗak hedi əŋ faŋw tata seh halla. 23Tata fuk i kəɗal hem za, tata guduk abə səndawl tə Bizlaf. 24Ama Bizlaf seh, kəɗi əŋ səntaŋ ŋga, kəmbaɗta za haya əŋ hedi sə delele iyi kəɗi əŋ Yesu Almasihu mə rehta mar tə əŋ nja tata tə əŋ məva. 25-26Bizlaf kəvəl Yesu Almasihu za mənaŋ məsəkəŋ mandaham kə fat ley baŋ hem tə hedi iyi: kəɗi əŋ kuw ma ŋga ha a gwar ley mbaɗaha məmbəz ŋga, Almasihu ta, kəgiz za Bizlaf seh, ar hedi sə delele kwa a pipi a pipi. Kəɗal za zlezle əŋ mbiŋ mə dak nəf, mbiŋ mə yakaŋta hem tə hedi iyi. Əŋ hala mənjawa, məŋgəvday a kəmba ley mbaɗ əŋ hedi sə delele, abə ley mbaɗ hedi mə kuw ma tə Yesu iyi əŋ hedi sə delele iyi fuk a lay ta.
27Mənaŋ wa seh, kataf aka baha, amba nakwa iyi hav talaŋ vaw? Halla səlak! Mənaŋ wa seh, nakwa iyi zlap seh abə miya tə mey? A talaŋ ma majaw amba i waŋgaŋ talaŋ vaw? Mənaŋ mba səku, ar kəɗi əŋ ma majaw mə ɗaf ma əŋ kuw ma! 28Nakwa iyi wulək seh mənaŋ wa, Bizlaf a kəɗiy hedi əŋ hedi sə delele seh, kəɗi əŋ kuw ma, ama kəɗi a mbiŋ mə waŋgaŋ talaŋ əŋ ma majaw səku. 29Aka səku seh, Bizlaf seh, a nda i nja əŋ Bizlaf tə Yahuda iyi taataɗ dap vaw? A nja əŋ Bizlaf tə hedi dakayta iyi bahayim seh halla vaw? Mənaŋ mba, mbiŋ seh, ar Bizlaf tə hedi dakayta iyi bahayim, 30məŋgəvday Bizlaf taataɗ, a nda i ɗiy Yahuda iyi əŋ hedi sə delele iyi seh, kəɗi əŋ kuw ma, hedi Yahuda iyi səku bahayim kəɗi əŋ kuw ma. 31Mənaŋ zlap ta seh, əŋ nakwa abə kuw ma seh, nakwa iyi kəbəreŋgeŋ səndawl tə ma majaw vaw? Mənaŋ mba səku səlak! Ɗəba, nakwa iyi kəvəlaŋ səndawl məndiwiŋ.
ទើបបានជ្រើសរើសហើយ៖
Rawma iyi 3: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
