Rawma iyi 15
15
Sey nakwa iyi ɗal məsəkəŋ mə ŋgəmaŋ əŋ məslige, ama mə ŋgəmaŋ əŋ nakwa səku
1Nakwa tə abə fagay tə əŋ kuw ma iyi, sey nakwa iyi tər hulawf tə əŋ kuw ma iyi, ama nakwa iyi mba i pələk ley ɗal məsəkəŋ mə ŋgəmaŋ əŋ talaŋ takwa iyi səku. 2Kwa viyey takwa mə pələk ley ɗal məsəkəŋ səntaŋ mə ŋgəmaŋ əŋ məslige ŋga, amba ley gəlu əŋ kuw ma. 3Məŋgəvday Almasihu kəpələk ley ɗal məsəkəŋ mə ŋgəmaŋ əŋ talaŋ ŋga seh halla. Ama, mənaŋ ma mawuzlel tə əŋ Ɗerewel tə Bizlaf mə zlap, a zla: «Məra tə hedi iyi i mə rah wa seh, kənaha za a talaŋ na#15:3 Jabura 69:10..» 4Məsəkəŋ nakwa mə lim mawuzlel tə əŋ Ɗerewel tə Bizlaf iyi zlezle wa fuk, ar ley sərəkanakwa, amba kəɗi səɓ nəf, abə lim fagay wa seh, a kədahanakwa ley lim wulək kə lim məsəkəŋ. 5Bizlaf seh, ar nje yim mə vəl səɓ nəf, mə vəl fagay, mə vəlaheni fagay ley nja abə nəf ntaɗ əŋ faŋw təheni abə ley ziber kəzəɗ mənaŋ tə Yesu Almasihu mə ɗal. 6Mənaŋ wa izey, heni fuk a lay ta, abə wula ntaɗ, heni həmən Bizlaf, Baba tə Bay Bayta takwa Yesu Almasihu za.
Almasihu a kəkuw hedi iyi fuk
7Əŋ cukwaɗ ta seh, hi kuw wucum əŋ faŋw təheni mənaŋ Almasihu mə kuwaheni, məŋgəvday səndawl tə Bizlaf. 8Məŋgəvday a ɗek, sa kəzlapaheni, Almasihu kəndaha za ley ɗalaŋta kəzəɗ əŋ Yahuda iyi amba ley gər məsəkəŋ Bizlaf mə zlap wa seh, məndiwiŋ. Məŋgəvday a ɗek, kəgiz məsəkəŋ Bizlaf mə zlap a vəlaŋta za əŋ dide tə dide tata iyi wa. 9Mənaŋ mba bahayim, hedi Yahuda iyi səku i kəsəbaŋ Bizlaf məŋgəvday səŋ nje həhər ŋga, mənaŋ ma mawuzlel tə əŋ Ɗerewel tə Bizlaf mə zlap, a zla:
«Məŋgəvday a ɗek, sa səbaŋgah za əŋ faŋw tə hedi dakayta iyi,
sa ja dərif za amba ley havah talaŋ.»
10Ma mawuzlel tə əŋ Ɗerewel tə Bizlaf mə zlap baha, a zla:
«Heni, hedi manja tə əŋ hayak iyi fuk, hi səsəm abə hedi makwas tə Bay Bayta iyi!»
11Baha:
«Hi gizehe səndawl tə Bay Bayta, heni, hedi tə əŋ hayak iyi fuk,
hi səbaŋgu abə dərif, heni, hedi iyi fuk!»
12Hedi mə giz ma abə miya tə Bizlaf, Esaya bahayim, a zla:
«Hedi mambuwaha tə əŋ ntaŋw tə Yessa a ndaha za,
a gar za ley sla a talaŋ hedi Yahuda iyi səku,
i nda i ɗiy wulək tata kə lim məsəkəŋ a mbiŋ.»
13Bizlaf seh, ar nje yim mə vəl wulək kə lim məsəkəŋ, mə gwaɗaheni abə səsəm, abə zahay fuk kəɗi kuw ma təheni məŋgəvday mbiŋ, amba heni nja əŋ wulək kə lim məsəkəŋ sə mbeh səku kəɗi fagay tə Mimiɗ sə Kweɗek.
Pawl abə kataf ley wuzlel letir mənaŋ mbiŋ mə ɗalu
14Zliŋmana iyi, sa bahayim, sa kəsəŋ məndiwiŋ, heni abə talaŋ təheni heni mə gweɗi abə wulək tə əŋ nəf kə ɗal məsəkəŋ səntaŋ. Heni kəsəŋ məsəkəŋ kə səŋ iyi fuk, heni gula i ɗal yawa əŋ faŋw təheni. 15Ɗəba, sa kəwuzleleheni ma dakayta iyi za abə wulək məzəwindi sə ndʉlʉk əŋ lay məzəwindi iyi par par tə əŋ letir na, ley səŋgaheni kenek a talaŋ məsəkəŋ heni mə səŋ iyi. Sa wuzlel mənaŋ wa seh, məŋgəvday səntaŋ Bizlaf mə vəlaku 16ley mbaɗ əŋ hedi mə ɗal kəzəɗ tə Yesu Almasihu əŋ hedi Yahuda iyi səku. Sa kəɗal kəzəɗ mənjawa, abə ley giz Labara Səntaŋ Lawayaŋ tə Bizlaf, amba hedi Yahuda iyi səku i mə mbaɗ əŋ məsəkəŋ kə vəl mə ŋgəmaŋ əŋ Bizlaf, i mə nja əŋ mbiŋ kəɗi Mimiɗ sə Kweɗek.
17Məŋgəvday a ɗek, əŋ jam talaŋ na tə abə Yesu Almasihu, sa gula i səsəm mbeh səku a kəzəɗ na əŋ Bizlaf. 18Məŋgəvday sa gula i zlap a məsəkəŋ par seh halla ba, ar sey a talaŋ məsəkəŋ Almasihu mə ɗal kəɗi a sa, ley daha hedi Yahuda iyi səku ley waŋgaŋ talaŋ əŋ Bizlaf. A ɗalza za kəɗi zlap na iyi abə kəzəɗ na iyi, 19kəɗi məsəkəŋ tə abə fagay, kəɗi məsəkəŋ mə har hedi iyi, abə kəɗi fagay tə Mimiɗ tə Bizlaf. Ar Mənaŋ wa, sa kəgiz Labara Səntaŋ Lawayaŋ tə Almasihu, abə ley nda kwa kəɗi kəv vitikey iyi fuk mar tə əŋ Urusalima ha a gwar əŋ berne səndawl tə Illiriya. 20Ama sa kəhwas za ley giz Labara Səntaŋ Lawayaŋ taataɗ əŋ lay iyi hedi kəzlim ma tə a talaŋ Almasihu halla, amba sa mba i ləm biŋ a manjaraf tə biŋ maɗiy tə ndəra hedi məzəwindi səku. 21Mənaŋ wa, sa kəɗal wulək za mənaŋ ma mawuzlel tə əŋ Ɗerewel tə Bizlaf mə zlap, a zla:
«Hedi iyi ta wa i kəter ley gizeŋta ma tə a talaŋ Almasihu halla ndagwa seh, i gərza za abə nje tata,
abə hedi iyi, i kəter ley zlim ma tə a talaŋ Almasihu halla ndagwa seh, i zlim ma ta za#15:21 Esaya 52:15..»
Pawl a kəzlap a talaŋ kəzəɗ tə pik ŋga əŋ hayak tə Rawma
22Ar məsəkəŋ wa, mə takaka hwayhway ley nda əŋ wuta təheni. 23Ama mənjawa, sa kəcukwaɗ kəzəɗ na cuza əŋ hayak wa. Mar əŋ va mbeh səku, sa kəmba i nda i gəraheni. 24Sa mba i ɗalu, əŋ sa kənda i nda na əŋ Espaniya. Məŋgəvday sa kəwulək ley gəraheni əŋ sa kətaŋ na, ɓa, sa lim mətər təheni ley nda əŋ hayak ta, abə dawaŋ ta, sa kəsəsəm kwata abə heni tə nja mbizek. 25Ama mbehmbeh wa seh, sa nda əŋ Urusalima ndagwa, ley ɗalaŋta kəzəɗ əŋ hedi mə kuw ma tə a namba iyi. 26Məŋgəvday hedi tə Almasihu iyi tə əŋ Makedawniya abə tə əŋ Akaya i kəɓət wulək za ley cakal dala ley vəlaŋta əŋ hedi məstakwaŋ iyi tə əŋ jam talaŋ tə hedi makuw ma iyi tə əŋ Urusalima. 27I kəɓət wulək za tata abə talaŋ tata, ama, məndiwiŋ ta seh, ar mənaŋ tak wula əŋ tata. Məŋgəvday hedi tə Almasihu iyi mandaha tə əŋ Yahudiya, i kəwuɗak məsəkəŋ tata sə kweɗek iyi za abə hedi Yahuda iyi səku. Hedi iyi ta wa, sey i tərta bahayim abə məsəkəŋ tata iyi#15:27 1 Kwarintʉ iyi 16:1-4; 9:11; 2 Kwarintʉ iyi 8-9.. 28Əŋ sa kəcukwaɗ kəzəɗ ta wa kwata, baha, sa kəvəlaŋta məsəkəŋ macakal wa kwata seh, sa taŋ za kəɗi əŋ kelek təheni, əŋ sa kənda na əŋ Espaniya. 29Sa kəsəŋ, əŋ sa mə nda i nda əŋ wuta təheni seh, sa gwar za abə pir ma tə Almasihu mbeh səku.
30Zliŋmana iyi, ehe, məsəkəŋ sa mə ɗəpaheni, abə miya tə Bay Bayta takwa Yesu Almasihu, abə mba wucum Mimiɗ sə Kweɗek mə vəlanakwa: mazukwa i ɗal fagay abə ley ɗal mbuh əŋ Bizlaf məŋgəvday sa. 31Hi ɗal mbuh əŋ Bizlaf amba sa reh a ndəra hedi mə tak kuw ma iyi tə əŋ Yahudiya, amba mətər sa daha tə əŋ Urusalima wa, hedi makuw ma tə a namba iyi i mə kuwu lawlaw. 32Mənaŋ mba, sa gwaraha za əŋ wuta təheni abə səsəm mbeh səku, əŋgah Bizlaf a kəmba, sa yip za mbizek əŋ faŋw təheni. 33Bizlaf seh, ar nje yim tə zahay, mə nja abə heni fuk. Amen!
ទើបបានជ្រើសរើសហើយ៖
Rawma iyi 15: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
