Markus Təɗ
Təɗ
Əŋ Labara Səntaŋ Lawayaŋ sə nfaɗ iyi wa tə Markus pay sə duk, pay zlezle.
Mar tə əŋ wuzlel titʉz iyi ta, a kəgiz Yesu seh mənaŋ «Mbu tə Bizlaf». Ama səndawl mə har hedi wa seh, ɗəba, kəgizehe za kə ŋgas mbeh səku əŋ Labara Səntaŋ Lawayaŋ ta fuk (fasuwal 1:11, 9:7 gər baha 3:11, 5:7), sey a nja əŋ ma maɓah mənaŋ mba tə Yesu (gər əŋ fasuwal 3:12, 5:43, 7:24, 8:30, 9:30). Məŋgəvday a mey? Məŋgəvday a gula i səŋ məsəkəŋ mə tak gər səku, mənaŋ səndawl tə sewje iyi tə Rawma, mə gər hedi mə məc tə a mpay mazlaŋgal.
Ɗəba, əŋ mələɓ mənaŋ wawa kəgwaraha za, a kəlim seh kwa viyey mə kuwu abə kataf ta. A namba, ley ɗiy hedi tə Bizlaf iyi mənaŋ wawa kəzəɗ tə Yahwana mə ɗal batem (fasuwal 1:2-8), ar a ndəra ŋga Yesu bahayim a lim batem (fasuwal 1:9-11).
Ɓa, abə dawaŋ tə hala tə təl ma tə əŋ nja ŋga sə taataɗ (fasuwal 1:12-13), mar tə nja tə Yesu tə əŋ faŋw tə hedi iyi. Mənaŋ wa izey, Markus a gər hwayhway mazla tə Yesu, əŋ mbiŋ a kəɗafaŋta ma əŋ hedi iyi ley ziberʉ, əŋ mbiŋ a kəsərək hedi makwas iyi, aka səku a kəmbəl hedi mə dal iyi (fasuwal 1:14–8:30).
Əŋ kəv məbək tə ŋgalaw ŋga seh, Markus a kəgiz Yesu əŋ cukwaɗ ŋga kəɗi zləŋ takwaŋ iyi, kəɗi məc abə kəɗi garaha ŋga tə əŋ faŋw tə hedi maməc iyi mə gəbaru tə əŋ Urusalima (fasuwal 8:31–10:52). Kə ŋgas maakaɗ, a kəsəŋgaŋta kenek əŋ gula ŋga iyi, ama kwa i kəsəŋ halla. A kəzlap hwayhway a talaŋ ŋga abə ley giz talaŋ ŋga mənaŋ «Mbu tə hedi», ama kəzəɗ mə zlap tə a talaŋ ŋga seh, mə nji bayta dap.
Əŋ Urusalima, əŋ lay mbiŋ mə təɗ wa, i kətawaŋ ndəra, a kəgam hedi mə ber məsəkəŋ iyi əŋ biŋ tə Bizlaf, a kəɗal micimbiɗim abə zlap tə talaŋ habay iyi tə hedi mə ɗal kukus tə Israyila iyi. Ar əŋ mbiŋ kataf ley ɗal sərək maɗ ma əŋ məsəgər ŋga iyi, əŋ hedi makwas iyi abə əŋ gula ŋga iyi (fasuwal 11–13).
Fasuwal iyi 14–15 i mə ɗiyi əŋ waŋ maɗ ma iyi tə Yesu. Ar a namba i nda i lim ŋgalaw tə a talaŋ wuda maɗ ma mbiŋ mə zəm tə abə gula ŋga iyi (abə ley wuɗak peŋ abə mavu abə tata), ɗal mbuh ŋga sə taataɗ tə əŋ jerne tə Gecemane, abə məl ŋga, pek ŋga, dar ŋga tə a mpay mazlaŋgal, ɗiy ŋga əŋ jiɓ. Garaha kaf tə məc ŋga mənaŋ wa izey, wala iyi i lim talaŋ jiɓ ŋga wucum a ɗəməŋ halla, i zlim seh, kətaŋ ŋga za kəɗi məc əŋ mədəŋcur (fasuwal 16:1-8). I hiy tata izey, talaŋ tata i kəwuzlaɗ za. (Ma mawuzlel dakayta iyi i kəfəfəl məsəkəŋ par baha, mə cukwaɗ zlap tə a talaŋ garaha tə Yesu tə əŋ faŋw tə hedi maməc iyi abə tap ŋga əŋ wuzlaf. Zlap iyi i limta wa seh, i mə gizi lawlaw əŋ Labara Səntaŋ Lawayaŋ dakayta iyi).
Abə dawaŋ ta, heni mə jenge Labara Səntaŋ Lawayaŋ Markus mə wuzlelʉ wa seh, heni səŋ baha, mənaŋ sewje tə Rawma, Yesu tə Nasaratu seh «ar Mbu tə Bizlaf məndiwiŋ» (15:39)?
ទើបបានជ្រើសរើសហើយ៖
Markus Təɗ: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល