Markus 3
3
Yesu a ɗiyaŋ ndəra maməc tə hedi əŋ pis kə yip
(Matta 12:9-14; Luka 6:6-11)
1Abə dawaŋ ta, Yesu a ziŋ baha əŋ biŋ kə ɗal mbuh əŋ Bizlaf. Hedi ndəra maməc aka, mbə a namba. 2Farisa iyi i kəzlel Yesu abə dak wucum, i kəjəɗu a ɗiyaŋ ndəra tə hedi ta za əŋ pis kə yip kəvah, məŋgəvday i mba i hemʉ. 3Yesu a zlapaŋ əŋ hedi ndəra maməc sey, a zla: «Gar a lay wa, a ma tə hedi iyi fuk.» 4Abə dawaŋ ta, Yesu a ɗəp hedi iyi ta, a zla: «Ma majaw takwa a vəl kataf ley ɗal əŋ pis kə yip seh mey? Ley ɗal məsəkəŋ səntaŋ vaw, aka səku ley ɗal məsəkəŋ madawar vaw? Ley reh hedi vaw, aka səku ley ju vaw?» Ama i nja tete. 5Yesu a gərta fuk abə nje madawar, nəf ŋga kədəm za mbeh səku məŋgəvday nəf tata tawytawy. Abə dawaŋ ta, a zlapaŋ əŋ hedi ndəra maməc sey, a zla: «Jar ndəra təkwa.» A jar ndəra ŋga ta, ndəra ŋga ta ɗiy a ɗiy ŋga. 6Farisa iyi i təɗaha tata əŋ biŋ kə ɗal mbuh əŋ Bizlaf. Mbehmbeh mba, i kwas abə hedi tə Hirudus iyi i jaw ma ley ja Yesu.
Hedi iyi mbeh səku i ndaha əŋ kelek Yesu
(Matta 4:25; 12:15-16; Luka 6:17-19)
7Yesu a nda abə gula ŋga iyi a meɗek gaw tə Galili. Hedi makwas sə mbeh səku iyi i ziberʉ. I ndaha mar tə əŋ Galili, tə əŋ Yahudiya 8tə əŋ Urusalima, tə əŋ Idumaya, ha əŋ hayak kəɗi əŋ kəv məzəwindi tə lakwat Urdun, mar tə əŋ hayak tə a kelek Tirʉs abə Sidaŋw. Hedi makwas iyi ta i ndaha əŋ kelek Yesu, məŋgəvday i kəter za ley zlim labara tə kəzəɗ ŋga. 9Abə dawaŋ ta izey, Yesu a zlapaŋta əŋ gula ŋga iyi i mə pələkaŋ kambuwal amba hedi makwas iyi i mə mba i ŋgəcu səku. 10Məŋgəvday kəmbəl hedi iyi mbeh səku, hedi iyi mbeh səku i mə zləŋ takwaŋ tə əŋ məc iyi i kəvaz ley ges a mbiŋ. 11Əŋ hedi tə abə mimiɗ tə abə ndəra dəlay iyi i mə lim Yesu seh, i ndəv a ma ŋga, ɓa, i ja varay, i zla: «Hwa seh, Mbu tə Bizlaf!» 12Ama Yesu a zlapaŋta abə gwazlak, i mba i gizʉ səku.
Yesu a may mələɓ iyi wam a meɗek bək
(Matta 10:1-4; Luka 6:12-16)
13Abə dawaŋ ta, Yesu a tap əŋ wuzum, ɓa, a ɗafaŋta ma əŋ hedi mbiŋ mə mba iyi fuk. Ɓa, i ndaha əŋ kelek ŋga. 14Mənaŋ wa, a mayta tata wam a meɗek bək, a ɗiyta əŋ mələɓ iyi ley nja abə mbiŋ, ɓa, a ləɓta ley gizehe Labara Səntaŋ Lawayaŋ, 15a vəlaŋta fagay bahayim ley gam mimiɗ madawar iyi. 16Ehe, mələɓ iyi wam a meɗek bək, mbiŋ mə mayta: Simaŋw (Yesu mə ɗiyaŋ miya Piyer#3:16 Miya tə Piyer : Mənaŋ əŋ Matta 16:16-18; Yahwana 1:42.), 17Yakuba abə Yahwana tata bək tata wuziyi tə Zebede iyi (Yesu mə ɗiyaŋta miya Bawanerges, mənaŋ zlap ta: «Hedi mə ɗal pakwam iyi mənaŋ vaŋ mə rəv)». 18Andəre, Filip, Bartawlawme, Matta, Tawmas, Yakuba mbu tə Alfa, Tadde, Simaŋw, hedi mə mba hayak ŋga#3:18 Matta 10:4., 19liŋ Yahuda Iskariyawt hedi mə nda i ber Yesu əŋ ndəra məsəgər iyi.
Yesu abə Belzebul
(Matta 12:22-32; Luka 11:14-23; 12:10)
20Abə dawaŋ ta, Yesu a ziŋgehe əŋ ge. Hedi iyi mbeh səku i kəkwas za baha, ha Yesu abə gula ŋga iyi i gula kwa ley zəm wuda səku. 21Əŋ hedi tə ge tata iyi i zlim ma ta, i ndaha amba ley ŋgaslu, məŋgəvday i kəzlap, i zla: «Yesu seh, mulula.»
22Metir tə ma majaw iyi i mə ndaha mar tə əŋ Urusalima, i zla: «Belzebul#3:22 Belzebul seh, ar bay tə mimiɗ madawar iyi. mbə abə mbiŋ!» Baha, «Ar kəɗi bay tə mimiɗ madawar iyi a kəgam mimiɗ madawar iyi.» 23Abə dawaŋ ta, Yesu a ɗafaŋta ma, ɓa, a zlapaŋta abə ma marərək, a zla: «Sayɗanu a gula i gam Sayɗanu seh viŋgey? 24Əŋgah hedi tə bay iyi ntaɗ i kəwuɗak za par par seh, bay ŋga ta a kənda i nja halla. 25Əŋgah hedi tə ge iyi i kəjəm əŋ faŋw tata, ge ta a kʉkweɗ ŋga za. 26Mənaŋ mba baha, əŋgah Sayɗanu a kəjəm abə hedi ŋga iyi, aka səku kəzlar nje abə hedi ŋga iyi səku seh, bay ŋga a kənda i nja halla, bay ŋga halla ba.»
27«Əŋgah hedi a kəmba i təɗ əŋ ge hedi tə abə fagay ley hilehe məsəkəŋ ŋga iyi seh, sey a jaw hedi ta za ndagwa, abə dawaŋ ta, a gula i təɗ ley hilehe məsəkəŋ ŋga iyi fuk.»
28Yesu a zlapaŋta baha, a zla: «Sa kəzlapaheni məndiwiŋ, hedi iyi fuk i lim ley baŋ hem tata iyi abə zlap tata madawar iyi i mə zlap tə a talaŋ Bizlaf wa za. 29Ama əŋgah hedi mə ra Mimiɗ sə Kweɗek seh, a lim ley baŋ hem ŋga halla səlak, hem ŋga ta a nda i nja kwa a pipi a pipi.»
30Yesu a zlapaŋta mənaŋ wa seh, məŋgəvday i kəzlap, i zla: «Mbə abə mimiɗ tə abə ndəra dəlay.»
Zliŋgeŋ tə Yesu iyi abə mama ŋga
(Matta 12:46-50; Luka 8:19-21)
31Abə dawaŋ ta izey, mama abə zliŋgeŋ tə Yesu iyi i gwaraha. I nja a palah, i ləɓ hedi ley ɗafaŋ ma. 32Hedi makwas iyi i mə nji a kelek ŋga. I kəzlapaŋgu, i zla: «Ehe, mama təkwa abə zliŋgeh iyi i mbə a palah, i kəpələkah.» 33Yesu a ziŋgeŋta zlap, a zla: «Mama na abə zliŋmana iyi seh, viyey?» 34Ɓa, a gər hedi makwas tə a kelek ŋga iyi, a zla: «Ehe, mama na abə zliŋmana iyi. 35Hedi mə ɗal məsəkəŋ Bizlaf mə mba, mbiŋ ar zliŋmana iyi muwul muwul, wala wala abə mama na.»
ទើបបានជ្រើសរើសហើយ៖
Markus 3: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល