Matta 4
4
Iblisa a mba i təl ley bim Yesu
(Markus 1:12-13; Luka 4:1-13)
1Abə dawaŋ ta izey, Mimiɗ tə Bizlaf a deɓ Yesu əŋ təp damu amba Iblisa a təlu. 2Yesu kəɗal dalyam pis ndəra nfaɗ, njaɗu ndəra nfaɗ, abə dawaŋ ta, mətis a ju. 3Iblisa seh, ar hedi mə təl ley bim hedi iyi, a kərəɗaha əŋ kelek ŋga, a zlapaŋgu, a zla: «Əŋgah hwa Mbu tə Bizlaf seh, zlapaŋta əŋ nvəŋ iyi wa i mə mbaɗ əŋ wuda mak.»
4Yesu a ziŋgeŋ zlap, a zla: «Ma mawuzlel tə əŋ Ɗerewel tə Bizlaf mə zlap, a zla: “Hedi dəgənak seh, a nda i nja abə məsəkəŋ kə zəm taataɗ dap səku, ama abə zlap mə təɗaha tə pakwam Bizlaf fuk.”»
5Abə dawaŋ ta izey, Iblisa a deɓʉ ha əŋ Urusalima, berne sə kweɗek#4:5 Berne sə kweɗek seh, ar berne tə Bizlaf tə Urusalima., a ɗiyu a talaŋ tə biŋ tə Bizlaf, 6a zlapaŋgu, a zla: «Əŋgah hwa Mbu tə Bizlaf seh, mbir mar tə a nawa ha əŋ teyek, məŋgəvday ma mawuzlel tə əŋ Ɗerewel tə Bizlaf mə zlap, a zla:
“Bizlaf a zlapaŋta za əŋ mələɓ ŋga iyi məŋgəvday hwa,
i slawah za əŋ ndəra tata,
amba ŋgas təkwa a mba i gurat a nvəŋ səku.”»
7Yesu a ziŋgeŋ zlap, a zla: «Ma mawuzlel tə əŋ Ɗerewel tə Bizlaf mə zlap baha, a zla: “Hwa mba i təl Bay Bayta Bizlaf təkwa səku.”»
8Baha, Iblisa a deɓʉ əŋ talaŋ tə wuzum sə jiŋ mbeh səku, a gizeŋ bay tə əŋ məŋhayak iyi abə məsəkəŋ səndawl tə ɗəməŋ iyi fuk, 9a zlapaŋgu, a zla: «Sa vəlah məsəkəŋ iyi ta wa fuk za, əŋgah hwa kədar malakw za a ma na ley waŋgaka talaŋ.»
10Abə dawaŋ ta izey, Yesu a zlapaŋgu, a zla: «Nda təkwa, Sayɗanu! Məŋgəvday ma mawuzlel tə əŋ Ɗerewel tə Bizlaf mə zlap, a zla: “Daraŋ malakw əŋ Bay Bayta Bizlaf təkwa taataɗ ŋga, ɗalaŋ kəzəɗ əŋ mbiŋ taataɗ ŋga dap.”» 11Əŋ hala ta mba, Iblisa yak a yak Yesu. Mələɓ tə Bizlaf iyi i ndaha əŋ kelek ŋga, ɓa, i ɗalaŋ kəzəɗ.
Yesu a mar kəzəɗ ŋga əŋ hayak tə Galili
(Markus 1:14-15; Luka 4:14-15)
12Əŋ Yesu mə zlim i kənah Yahwana za əŋ daŋgay, a nda əŋ hayak tə Galili. 13Ɓa, a yak Nasaratu, a nda, a nja əŋ Kafarnahum a meɗek gaw tə Galili, əŋ hayak iyi tə Zabulaŋw abə tə Neftali, 14mənaŋ wa, amba zlap tə hedi mə giz ma abə miya tə Bizlaf, Esaya mə zlap sey, mə ɗal, a zla:
15«Hayak tə Zabulaŋw, hayak tə Neftali,
kəɗi əŋ kataf kənda əŋ talafay,
kəɗi əŋ kəv məzəwindi tə lakwat tə Urdun,
Galili seh, hayak tə hedi Yahudiya iyi səku,
16Hedi manja tə əŋ ləvəŋ iyi,
i lim lay mawaɗ səndawl za.
Hedi manja tə əŋ hayak sə dəgənak tə hedi maməc iyi,
lay kə waɗaŋta za.»
17Mar tə pis mba, Yesu a mar ley giz ma tə Bizlaf. A zla: «Hi buw nja təheni iyi, məŋgəvday Bay tə wuzlaf kəkərəɗaha kwata!»
Yesu a ɗafaŋta ma əŋ gula iyi nfaɗ
(Markus 1:16-20; Luka 5:1-11)
18Əŋ Yesu a kəpik a meɗek gaw tə Galili, a lim Simaŋw, i mə ɗafaŋ ma Piyer, abə zliŋgeŋ Andəre. I kəkap kʉse əŋ gaw məŋgəvday tata seh, hedi mə məl kəlif iyi. 19Yesu a zlapaŋta, a zla: «Hi ziberekʉ, sa nda i mbaɗaheni əŋ hedi mə məlaha#4:19 Məl Ley ɗafaŋ ma əŋ hedi iyi ley ziber ma tə Bizlaf. hedi iyi.» 20Mbehmbeh mba, yak, i yak kʉse tata iyi, ɓa, i ziberʉ.
21A nda mbizek a ma baha, a lim hedi iyi bək abə zliŋgeŋ, ar Yakuba abə zliŋgeŋ Yahwana, wuziyi tə Zebede iyi. I mbə əŋ kambuwal tata abə baba tata Zebede, i kəɗiy kʉse tata iyi. Yesu ɗafaŋta ma. 22Mbehmbeh mba, yak, i yak kambuwal abə baba tata, i ziberʉ.
Yesu a kəsərək hedi iyi, a kəmbəl hedi mə dal iyi
(Luka 6:17-19)
23Yesu a kəpik əŋ hayak tə Galili, a kəsərək hedi iyi əŋ biŋ tata kə ɗal mbuh əŋ Bizlaf, a kəgiz Labara Səntaŋ Lawayaŋ tə Bay tə Bizlaf, a kəmbəl hedi iyi mar tə əŋ məc iyi par par abə hedi mahuluɓ iyi par par əŋ faŋw tə hedi iyi. 24I kəzlim labara ŋga əŋ hayak tə Siriya fuk. I kədahaŋ hedi mə zləŋ takwaŋ tə əŋ məc iyi par par: hedi tə abə mulula tə əŋ talaŋ iyi, hedi mə ɓərəzl i ɓərəzl iyi liŋ abə hedi mahuluɓ iyi. A kəmbəlta. 25Hedi iyi mbeh səku i kəziberʉ. I ndaha mar tə əŋ hayak tə Galili, əŋ hayak i mə ɗafaŋ ma berne iyi wam, əŋ berne tə Urusalima, əŋ hayak tə Yahudiya abə əŋ hayak kəɗi əŋ kəv məzəwindi tə lakwat tə Urdun.
ទើបបានជ្រើសរើសហើយ៖
Matta 4: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
