Matta 25
25
Ma marərək a talaŋ hazləma dalay iyi wam
1Yesu a zlap, a zla: «Əŋ pis ta mba, Bay tə wuzlaf a ɗal za mənaŋ hazləma dalay iyi wam. I ɓət lalam tata iyi, ɓa, i təɗ tata ley gbamaŋ talaŋ əŋ hedi mə nda i ɓət dəma. 2Juɓum əŋ faŋw tata, mə tak burŋguzl iyi, juɓum dakayta iyi bahayim tə abə burŋguzl iyi. 3Hazləma dalay mə tak burŋguzl iyi i ɓət lalam tata iyi, ama i kəməlaha mel par halla. 4Hazləma dalay tə abə burŋguzl iyi seh i ɓətaha lalam tata iyi, i kəməlaha mel par iyi za əŋ ŋgəfa. 5Əŋ hedi mə nda i ɓət dəma kəndaha viyu seh halla, hazləma dalay iyi sey, waŋ a jata, i waŋ tata fuk. 6Ŋgəlak njaɗu, i zlim varay, a zla: “Ehe, hedi mə nda i ɓət dəma kəgwaraha kwata, hi təɗaha, hi nda i gbamaŋ talaŋ.” 7Abə dawaŋ ta, hazləma dalay iyi wam sey fuk i fəɗaha, i mar ley ɗiy lalam tata iyi. 8Hazləma dalay mə tak burŋguzl iyi i zlapaŋta əŋ hazləma dalay tə abə burŋguzl iyi, i zla: “A mbuh, əŋ mel təheni iyi wa heni vəlanini mbizek, məŋgəvday lalam tini iyi i kəməc.” 9Hazləma dalay tə abə burŋguzl iyi i ziŋgeŋta zlap, i zla: “Kay! a ɗal səku, məŋgəvday mel tini iyi wa, a kənda i hwasanakwa fuk halla, hi nda i səkəmaha əŋ heni a ndəra hedi mə ber iyi.” 10Hazləma dalay mə tak burŋguzl iyi sey i cu tata ley səkəmaha mel seh, ama əŋ hala ta mba izey, muwul dəma a gwaraha. Hazləma dalay tə abə burŋguzl iyi, i təɗ lalaŋ abə mbiŋ əŋ biŋ kə ɗal gugway kə ɓət wala, aka səku kə ɓət muwul. Ɓa, i pek mebiŋ abə faɓuru. 11Nja mbizek, hazləma dalay dakayta iyi sey, i gwaraha, i ja varay abə fagay, i zla: “Bay Bayta, Bay Bayta, rəzanini mebiŋ!” 12Ama muwul dəma, a ziŋgeŋta zlap, a zla: “Sa kəzlapaheni məndiwiŋ: Sa kəsəŋgaheni səku.” 13Məŋgəvday a ɗek, hi mba i waŋ səku, məŋgəvday heni kəsəŋ kwa pis ta, kwa ler ta səku.»
Ma marərək a talaŋ hedi mə ɗal kəzəɗ iyi maakaɗ
(Luka 19:11-27)
14Yesu a zlapaŋta abə ma marərək baha, a zla: «Bay tə wuzlaf seh, mənaŋ hedi mə mba i nda i pikehe guduk. A ɗafaŋta ma əŋ hedi mə ɗal kəzəɗ ŋga iyi, a vəlaŋta məsəkəŋ ŋga iyi. 15A vəlaŋ əŋ hedi ntaɗ dala tə malaway mawaɗ gabal temere juɓum, a vəlaŋ əŋ hedi məzəwindi dala tə malaway mawaɗ gabal temere bək, a vəlaŋ əŋ hedi məmaakaɗ ta dala tə malaway mawaɗ gabal temere ntaɗ. A vəlaŋta kwa əŋ viyey fuk tiɗe abə fagay ŋga. Ɓa, a nda ŋga. 16Hedi mə lim dala tə malaway mawaɗ gabal temere juɓum sey, a nda viyu a ber məsəkəŋ abə dala ta. A limehe fəfəl a talaŋ dala tə malaway mawaɗ ta gabal temere juɓum. 17Hedi mə lim dala tə malaway mawaɗ gabal temere bək a nda ŋga, a ɗal mənaŋ mba bahayim. A limehe fəfəl a talaŋ dala tə malaway mawaɗ ta gabal temere bək. 18Ama hedi mə lim dala tə malaway mawaɗ gabal temere ntaɗ a nda ŋga, a ra jiɓ, a ɓah dala tə bay ŋga ta a ɗəməŋ.
19«Nja mbeh səku, abə dawaŋ ta, bay tə hedi mə ɗal kəzəɗ iyi ta a ziŋgehe, ɓa, a ɗəpta, i ɗal abə dala ta seh viŋgey. 20Hedi mə lim dala tə malaway mawaɗ gabal temere juɓum, a kərəɗaha, a zlapaŋgu, a zla: “Bay na, hwa kəvəlaka dala tə malaway mawaɗ gabal temere juɓum. Sa kəlimehe fəfəl a talaŋ dala tə malaway mawaɗ ta, gabal temere juɓum za baha, ehe mbə ceh.” 21Bay ŋga, a zlapaŋgu, a zla: “Ləlaw diya, hwa hedi mə ɗal kəzəɗ səntaŋ, sə delele. Hwa, hedi sə delele əŋ məsəkəŋ sə kʉsit, sa nda i vəlah məsəkəŋ səndawl. Ndaha, ley səsəm abə sa.” 22Hedi mə lim dala tə malaway mawaɗ gabal temere bək, a kərəɗaha, a zla: “Bay na, hwa kəvəlaka dala tə malaway mawaɗ gabal temere bək. Sa kəlimehe fəfəl a talaŋ dala malaway mawaɗ ta gabal temere bək za baha, ehe mbə ceh.” 23Bay ŋga, a zlapaŋgu, a zla: “Ləlaw diya, hwa hedi mə ɗal kəzəɗ səntaŋ, sə delele. Hwa, hedi sə delele əŋ məsəkəŋ sə kʉsit, sa nda i vəlah məsəkəŋ səndawl. Ndaha, ley səsəm abə sa.” 24Hedi mə lim dala tə malaway mawaɗ gabal temere ntaɗ bahayim, a kərəɗaha, a zla: “Bay na, sa kəsəŋgah, hwa hedi sə lem, hwa kəbəl ndəri əŋ lay hwa kəzlək halla, hwa kəcakalaha məsəkəŋ əŋ lay hwa kəŋgəɓ halla. 25Sa kələndəŋ za, ɓa, sa nda, sa ɓah dala təkwa ta ka əŋ jiɓ. Ehe, kuw dala təkwa.” 26Bay ŋga, a ziŋgeŋ zlap, a zla: “Hwa hedi mə ɗal kəzəɗ madawar, masalaɗ! Hwa kəsəŋ sa hedi mə bəl ndəri əŋ lay sa kəzlək halla, sa kəcakalaha məsəkəŋ əŋ lay sa kəŋgəɓ halla. 27Hwa gula i deɓ dala na ta əŋ bank, amba əŋ ziŋgehe na, i ziŋgeke dala na ta abə fəfəl səku vaw? 28Hi kuw dala tə malaway mawaɗ gabal temere tə ndəra ŋga ta, hi vəlaŋgu əŋ hedi tə abə dala tə malaway mawaɗ gabal temere wam. 29Məŋgəvday əŋ hedi tə abə məsəkəŋ seh, i vəlaŋ za baha, ɓa, a nda i nja abə məsəkəŋ mbeh səku. Ama hedi məsəkəŋ ŋga halla seh, i kuwaŋ sə betem ŋga mba za. 30Ama hedi mə ɗal kəzəɗ səntaŋ səku sey, hi kapu a palah əŋ ləvəŋ. A namba əŋ lay kə haŋ abə kə ɓam ndiŋ.”»
Mbəzl ma əŋ pis tə cukwaɗ tə məŋhayak
31Yesu a zlapaŋta əŋ gula ŋga iyi baha, a zla: «Əŋ Mbu tə Hedi mə nda i ziŋgehe tə abə səndawl ŋga, abə mələɓ tə Bizlaf iyi fuk seh, a nja za a lay kə nja tə bay ŋga. 32Hedi tə əŋ məŋhayak iyi fuk i kwas za a ma ŋga, a wuɗak hedi iyi za mənaŋ njʉwiŋ mə wuɗak ntek iyi abə ŋhwa iyi. 33A nda i ɗiy ntek iyi əŋ ndəra zəma ŋga, ŋhwa iyi bahayim əŋ ndəra gula ŋga. 34Abə dawaŋ ta izey, bay a nda i zlapaŋta əŋ hedi tə əŋ ndəra zəma ŋga iyi: “Hi ndaha, heni Baba na mə ɗiy ndəra bay ŋga tə a talaŋ təheni iyi, hi zəm ge tə əŋ Bay tə Bizlaf mə ɗiyaheni məŋgəvday heni mar tə əŋ ləmaha tə məŋhayak. 35Məŋgəvday mətis a kəjaka, heni kəvəlaka məsəkəŋ kə zəm za, yim kəjaka, heni kəvəlaka yim ley sa za, sa muluk, heni kəkuwaka za, 36sa rukut a wucum na halla, heni kəndəkaka rukut za a wucum, sa lawlaw halla, heni kəndaha za ley gəraka, sa mbə əŋ daŋgay, heni kəndaha za ley gəraka.” 37Abə dawaŋ ta, hedi sə delele iyi sey, i ziŋgeŋ zlap, i zla: “Bay Bayta, nini limeh mətis kəja, ɓa, nini vəlah məsəkəŋ kə zəm seh, a pipey? Nini limeh yim a kəja, ɓa, nini vəlah yim ley sa wa seh, a pipey? 38Nini limeh hwa muluk, ɓa, nini kuwah wa seh a pipey? Nini limeh rukut a wucum halla, ɓa, nini ndəkah rukut wa seh a pipey? 39Nini limeh wucum a kədəmah, aka səku hwa mbə əŋ daŋgay, ɓa, nini ndaha ley gərah wa seh a pipey?” 40Bay a ziŋgeŋta zlap, a zla: “Sa kəzlapaheni məndiwiŋ: Məsəkəŋ heni mə ɗalaŋ kwa əŋ hedi mekedek ntaɗ tə əŋ faŋw tə zliŋmana iyi wa, hi ɗalaŋ mba seh əŋ sa.”»
41«Abə dawaŋ ta, bay a nda i zlapaŋta əŋ hedi tə əŋ ndəra gula ŋga iyi, a zla: “Hi kərəɗ təheni za guduk abə sa, hedi magay iyi, hi nda təheni əŋ kahaw mə cukwaɗ səku, maɗiy məŋgəvday Iblisa abə mələɓ ŋga iyi. 42Məŋgəvday mətis a kəjaka, heni kəvəlaka məsəkəŋ kə zəm halla. Yim a kəjaka, heni kəvəlaka yim ley sa halla. 43Sa muluk, heni kəkuwaka halla, sa rukut a wucum na halla, heni kəndəkaka rukut halla, sa lawlaw halla, sa mbə əŋ daŋgay, heni kəndaha ley gəraka halla.” 44Abə dawaŋ ta izey, tata bahayim i nda i ziŋgeŋ zlap, i zla: “Bay Bayta, nini limeh mətis a kəjah wa seh a pipey, aka səku yim a kəjah, aka səku hwa muluk, aka səku hwa rukut a wucum halla, aka səku hwa lawlaw halla, aka səku hwa mbə əŋ daŋgay nini kənda i tərah halla wa seh a pipey?” 45Bay a ziŋgeŋta zlap za, a zla: “Sa kəzlapaheni məndiwiŋ: Məsəkəŋ heni mə kuw ley ɗalaŋ əŋ hedi mekedek ntaɗ tə əŋ faŋw tə hedi na iyi səku wa seh, hi kuw ley ɗalu səku seh əŋ sa.” 46Tata seh, i nda i nda əŋ tuwah mə cukwaɗ səku, ama hedi sə delele iyi i nda i lim mədəŋcur mə cukwaɗ səku.»
ទើបបានជ្រើសរើសហើយ៖
Matta 25: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
