Matta 16
16
Farisa iyi abə Saduki iyi i ɗəp Yesu mə ɗalaŋta mazla ntaɗ
(Markus 8:11-13; Luka 12:54-56)
1Farisa iyi abə Saduki iyi i kərəɗaha əŋ kelek Yesu, ley təlu. I ɗəpu amba mə gizeŋta mazla mandaha tə wuzlaf. 2Yesu a ziŋgeŋta zlap, a zla: «Əŋ məcukahw kəɗal kwata, heni kəzlap: “Lay lahlah, məŋgəvday lay tə wuzlaf pəpəreŋ.” 3Abə kafa vət, heni kəzlap, hi zla: “Eci, vaŋ a zah za, məŋgəvday lay tə wuzlaf kəɗal digizliɓ za.” Heni kəsəŋ ley giz məsəkəŋ mə ɗal tə wuzlaf wa, ama məsəkəŋ mə nda i taŋ tə eci, heni gula i səŋ ley gizʉ səku seh, məŋgəvday a mey? 4Hedi madawar mənjawa iyi, mə kuw mba tə Bizlaf iyi səku, i kəɗəp mazla, ama i lim halla, sey mazla ntaɗ tə hedi mə giz ma abə miya tə Bizlaf, Yawnas, tata i mə lim mba.» Ɓa, Yesu a yakta, a nda ŋga.
Is tə Farisa iyi abə tə Saduki iyi
(Markus 8:14-21)
5Əŋ gula iyi i kətaŋ tata cuza kəɗi əŋ kəv məzəwindi tə gaw seh, i kəɗal talaŋ weseŋ za ley ɓətaha peŋ. 6Yesu a zlapaŋta, a zla: «Hi sla wucum, hi jəɗ talaŋ təheni abə is tə Farisa iyi abə tə Saduki iyi.» 7Gula iyi ta i kəɗal yawa əŋ faŋw tata, i zla: «A zlap mənaŋ wa seh, məŋgəvday nakwa kəɓətaha peŋ halla.» 8Yesu a kəsəŋ əŋ tata i mə wulək. A ɗəpta, a zla: «Heni hedi mə kuw ma sə kʉsit iyi, heni kəwulək əŋ nəf təheni, a zlap mənaŋ wa seh, məŋgəvday nakwa kəɓətaha peŋ halla wa, vaw? 9Heni kəzlim halla ndagwa vaw? Hi kəsəŋ kenek a peŋ juɓum, sa mə wuɗakaŋta əŋ hedi iyi gabal juɓum, əŋ pis ta mba, heni kəcakal peŋ mayak iyi gadakar veney? 10Hi kəsəŋ kenek a peŋ dʉsəlʉɗ, sa mə wuɗakaŋta əŋ hedi iyi gabal nfaɗ, əŋ pis ta mba, heni kəcakal peŋ mayak iyi gadakar veney? 11Heni kəzlim halla seh, məŋgəvday a mey? Sa zlapaheni seh, a peŋ səku! Ama sa zlapaheni seh: “Hi sla wucum a is tə Farisa iyi abə tə Saduki iyi.”»
12Abə dawaŋ ta izey, gula iyi i zlimʉ, Yesu kəzlapaŋta ley sla wucum tata a is seh halla, ama a sərək tə Farisa iyi abə tə Saduki iyi.
Piyer a səŋ məndiwiŋ Yesu seh, ar Almasihu
(Markus 8:27-30; Luka 9:18-21)
13Yesu a gwar əŋ hayak tə Kaysariya Filippi. A namba, a ɗəp gula ŋga iyi, a zla: «Hedi iyi i kəzlap, Mbu tə Hedi seh, ar viyey?» 14I ziŋgeŋ zlap, i zla: «Hedi məzəwindi iyi i kəzlap, hwa seh, Yahwana mə ɗal batem, hedi dakayta iyi bahayim i kəzlap, hwa seh, Eliya, hedi dakayta iyi baha i kəzlap, hwa seh, Yeremiya, aka səku hedi ntaɗ əŋ faŋw tə hedi mə giz ma abə miya tə Bizlaf iyi.» 15Yesu a ɗəpta, a zla: «Heni bahayim, hi zlap sa seh, sa viyey?»
16Simaŋw Piyer a ziŋgeŋ zlap, a zla: «Hwa seh, Almasihu, Mbu tə Bizlaf tə abə nje.» 17Yesu a zlapaŋgu, a zla: «Nja səntaŋ əŋ hwa aka Simaŋw, mbu tə Yawnas#16:17 Yahwana 1:42., məŋgəvday ma hwa mə giz wa seh, ar hedi mə gizeh səku, ama, ar Baba na tə wuzlaf mə gizeh. 18Sa, sa kəzlapah, hwa seh, hwa Piyer, mənaŋ zlap ta “kefeɗ”. A talaŋ kefeɗ ta, sa nda i ɗiy jam talaŋ tə hedi makuw ma na iyi. Kwa fagay tə məc abə talaŋ ŋga a gula a ɗek halla. 19Sa vəlah lekile kə rəz Bay tə wuzlaf za. Məsəkəŋ hwa mə jaw tə əŋ məŋhayak wa, məsəkəŋ ta, mə jewi a wuzlaf bahayim, məsəkəŋ hwa mə nda i pəlu tə əŋ məŋhayak wa, məsəkəŋ ta, mə pili a wuzlaf bahayim#16:19 Matta 18:18; Yahwana 20:23..» 20Ɓa, Yesu a ŋgəz gula ŋga iyi, i mba i giz kwa əŋ viyey mbiŋ Almasihu səku.
Yesu a giz ndaha tə məc ŋga abə garaha ŋga tə əŋ faŋw tə hedi maməc iyi
(Markus 8:31-34; Luka 9:22)
21Mar əŋ pis ta mba, Yesu a mar ley gizeŋta əŋ gula ŋga iyi, a zla: «A kəlim seh, sey sa nda əŋ Urusalima, sa zləŋ takwaŋ za mbeh səku a ndəra hedi mə ɗal yawa tə Yahuda iyi, hedi səndawl iyi tə a talaŋ hedi iyi i mə ɗal kukus əŋ Bizlaf abə metir tə ma majaw iyi i jaka za, ama əŋ waŋ maakaɗ ta, sa garaha na za əŋ məc.» 22Piyer a ŋgaslu abə bəra, a mar ley vəlaŋ hem, a zla: «Kay, Bizlaf mə jəɗah, Bay Bayta! Məsəkəŋ ta, mə mba i gwaraha a hwa səku!» 23Ama Yesu a buw nje, ɓa, a zlapaŋ əŋ Piyer, a zla: «Nda guduk abə sa, Sayɗanu, hwa kəmbaɗ za əŋ micimbiɗim əŋ kataf na, məŋgəvday wulək təkwa mba, ar wulək tə Bizlaf səku, ama ar wulək tə hedi iyi.»
Ley ziber Yesu seh, viŋgey?
(Markus 8:34–9:1; Luka 9:23-27)
24Ɓa, Yesu a zlapaŋta əŋ gula ŋga iyi, a zla: «Əŋgah hedi a kəmba i ziberekʉ, sey mə yak ley wulək a talaŋ ŋga, mə ɓət mpay mazlaŋgal ŋga, mə ziberekʉ. 25Məŋgəvday hedi mə mba i reh mədəŋcur ŋga, a kuɗəpza za. Ama hedi mə nda i kuɗəp mədəŋcur ŋga məŋgəvday sa seh, a limza za. 26Əŋgah hedi a lim məŋhayak fuk, ama kəkuɗəp mədəŋcur ŋga za seh, zay ta mey? Aka səku, məsəkəŋ hedi mə gula i vəl ley zlambaɗ mədəŋcur ŋga abə mbiŋ seh aka vaw? 27Məŋgəvday Mbu tə Hedi a nda i ndaha əŋ səndawl tə Baba ŋga liŋ abə mələɓ ŋga iyi, əŋ mbamba izey, a nda i min muwurɓay kwa tə vitey fuk tiɗe abə kəzəɗ tə hedi ta mə ɗal#16:27 Jabura 62:13; Rawma iyi 2:6.. 28Sa kəzlapaheni məndiwiŋ, əŋ faŋw təheni wa, hedi dakayta iyi i məc halla, sey i mə lim ziŋgehe tə Mbu tə Hedi za ndagwa, a kəndaha mənaŋ bay.»
ទើបបានជ្រើសរើសហើយ៖
Matta 16: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
