Luka 9
9
Yesu a ləɓ mələɓ ŋga iyi wam a meɗek bək
(Matta 10:5-15; Markus 6:7-13)
1Yesu a kwas mələɓ ŋga iyi wam a meɗek bək, a vəlaŋta fagay abə mazla ley gam mimiɗ madawar iyi, baha, abə ley mbəl hedi mə dal iyi. 2Abə dawaŋ ta, a ləɓta ley giz ma tə Bay tə Bizlaf abə ley mbəl hedi mə dal iyi. 3Ɓa, a zlapaŋta, a zla: «Hi mba i ɓət kwa məsəkəŋ a ndəra səku əŋ lay heni mə nda i nda fuk, kwa zlambay, kwa gabal, kwa peŋ, kwa dala. Kwa viyey mə mba i ɓət rukut bək səku. 4Kwa əŋ ge vitikey i mə kuwaheni, hi nja a ge ta ha əŋ pis heni mə nda i garaha tə a namba. 5Ama əŋgah əŋ lay hedi iyi i kəkuwaheni halla seh, hi yakaŋta berne tata ta, hi mbic luguda tə a ŋgas təheni iyi, amba ley gizeŋta tata abə hem.» 6Ɓa, mələɓ ŋga iyi sey, i nda tata əŋ wuta iyi par par, i kəgiz Labara Səntaŋ Lawayaŋ, i kəmbəl hedi iyi əŋ məc kwa a tikey a tikey fuk.
Talaŋ tə Bay Hirudus kəwuzlaɗ za
(Matta 14:1-12; Markus 6:14-29)
7Hirudus, hedi mə sla tə a talaŋ hayak tə Galili, a zlim hedi iyi i kəzlap a talaŋ məsəkəŋ mə taŋ iyi ta fuk. Ma ta, kəwuzlaɗaŋ talaŋ za, məŋgəvday hedi dakayta iyi i kəzlap a Yesu, i zla: «Ar Yahwana mə ɗal batem mə garaha mar tə əŋ faŋw tə hedi maməc iyi.» 8Hedi dakayta iyi i kəzlap, i zla: «Ar Eliya mə ziŋgehe əŋ məŋhayak.» Hedi dakayta iyi baha, i kəzlap, i zla: «Ar hedi ntaɗ tə əŋ faŋw tə hedi mə giz ma abə miya tə Bizlaf iyi zlezle mə garaha a jiɓ.» 9Ama Hirudus, a zla: «Yahwana mə ɗal batem seh, sa kərəslaŋ talaŋ cuza. Ar hedi vitikey, sa kəzlim ma tə a talaŋ ŋga wa?» Əŋ mbamba, a kəpələk ley gəru.
Yesu a vəlaŋta məsəkəŋ kə zəm əŋ hedi iyi mbeh səku
(Matta 14:13-21; Markus 6:30-44; Yahwana 6:1-14)
10Əŋ mələɓ iyi i mə ziŋgehe, i gizeŋ məsəkəŋ tata i mə ɗal iyi fuk əŋ Yesu. Ɓa, a ŋgaslta, i nda taataɗ tata mbehmbeh abə berne, i mə ɗafaŋ ma Baytisayda. 11Ama hedi iyi mbeh səku i zlim, i cu tata seh, i ziberʉ. Yesu a kuwta, a gizeŋta ma tə Bay tə Bizlaf, baha, a mbəl hedi mə mba ley mbəl iyi. 12Əŋ pis a kənda i ndəv, gula ŋga iyi wam a meɗek bək sey, i kərəɗaha əŋ kelek ŋga, i zlapaŋgu, i zla: «Zlapaŋta əŋ hedi iyi wa, i mə nda tata əŋ wuta iyi, aka səku əŋ faŋw tə ge iyi, amba i mə lim məsəkəŋ kə zəm abə lay kə waŋ, məŋgəvday nakwa mbə əŋ təp damu.» 13Ama Yesu a zlapaŋta, a zla: «Heni abə talaŋ təheni, hi vəlaŋta məsəkəŋ kə zəm!» Ama gula ŋga iyi i ziŋgeŋ zlap, i zla: «A ndəra tini seh, sey peŋ juɓum abə kəlif iyi bək dap. Kəganah nini abə talaŋ tini, nini nda i səkəmaha məsəkəŋ kə zəm əŋ hedi iyi ta wa fuk kəvah?» 14Muwul iyi ta a ɗal mbeh kwata gabal juɓum. Yesu a zlapaŋta əŋ gula ŋga iyi, a zla: «Hi ɗiy hedi iyi njakw njakw ndəra juɓum ndəra juɓum.» 15I ɗal mənaŋ mba, i njata fuk. 16Abə dawaŋ ta, Yesu a ɓət peŋ juɓum abə kəlif iyi bək sey, ɓa, a gər nje əŋ wuzlaf. A ɗalaŋ sʉse əŋ Bizlaf məŋgəvday məsəkəŋ kə zəm ta, a ŋgata, a vəlaŋta əŋ gula ŋga iyi ley ɓizekeŋta əŋ hedi makwas iyi. 17Tata fuk, i zəm ha i gwaɗ. Ɓa, gula ŋga iyi i cakal mayak ta, gadakar wam a meɗek bək mahaf.
Piyer a giz Yesu, ar Almasihu
(Matta 16:13-19; Markus 8:27-29)
18Əŋ pis məzəwindi aka, Yesu a kəɗal mbuh taataɗ ŋga. Gula ŋga iyi i mbə abə mbiŋ. A ɗəpta, a zla: «Hedi makwas sə mbeh səku iyi i kəzlap sa seh, sa viyey?» 19Gula ŋga iyi i ziŋgeŋ zlap, i zla: «Hedi məzəwindi iyi i kəzlap hwa seh, Yahwana mə ɗal batem, hedi dakayta iyi i kəzlap, hwa seh, Eliya, hedi iyi par baha i kəzlap hwa seh, hedi ntaɗ əŋ faŋw tə hedi mə giz ma abə miya tə Bizlaf zlezle mə garaha a jiɓ.» 20Yesu a ɗəpta, a zla: «Kaa, heni bahayim, hi zlap sa seh, sa viyey?» Piyer a ziŋgeŋ zlap, a zla: «Hwa seh, Almasihu Mbu tə Bizlaf.»
Yesu a giz məc ŋga abə garaha ŋga əŋ faŋw tə hedi maməc iyi
(Matta 16:20-24; Markus 8:30-33)
21Yesu a ŋgəz gula ŋga iyi abə gwazlak, a zla: «Hi mba i giz ma wa əŋ kwa viyey səku.» 22A zlapaŋta baha, a zla: «Sey Mbu tə Hedi, a zləŋ takwaŋ za mbeh səku. Hedi mə ɗal yawa iyi, hedi səndawl iyi tə a talaŋ hedi iyi i mə ɗal kukus əŋ Bizlaf abə metir tə ma majaw iyi i kəkuw ma ŋga halla, i jaza za. Ama əŋ waŋ maakaɗ ta, a garaha ŋga za əŋ faŋw tə hedi maməc iyi.»
Ley ziber Yesu seh, viŋgey?
(Matta 16:24-28; Markus 8:34; 9:1)
23Ɓa, Yesu a zlapaŋta əŋ hedi iyi fuk, a zla: «Əŋgah hedi a kəmba i ziberekʉ, sey a yak ley mba talaŋ ŋga, a ɓət mpay mazlaŋgal#9:23 Ɓət mpay mazlaŋgal ŋga: Mənaŋ zlap ta, ley ɓəs tuwah ha əŋ cukwaɗ tə nja təkwa. ŋga əŋ waŋ iyi fuk, ɓa, a ziberekʉ. 24Məŋgəvday hedi mə mba i reh mədəŋcur ŋga seh, a kuɗəpza za. Ama hedi mə mba i kuɗəp mədəŋcur ŋga məŋgəvday sa, a rehza za. 25Əŋgah hedi a lim məsəkəŋ tə əŋ məŋhayak fuk, ama əŋgah a kuɗəp talaŋ ŋga, aka səku mədəŋcur ŋga seh, zay ta mey? 26Məŋgəvday a ɗek, əŋgah hedi mə ɗalaka hawa a ma tə hedi iyi, aka səku mə ɗal hawa ley kuw ma na, Mbu tə Hedi a ɗalaŋ hawa za əŋ mbiŋ mə nda i ziŋgehe əŋ səndawl ŋga, abə səndawl tə Baba Bizlaf liŋ abə səndawl tə mələɓ tə Bizlaf sə kweɗek iyi. 27Sa kəzlapaheni məndiwiŋ, hedi tə a nawa iyi tə əŋ faŋw təheni, dakayta iyi i məc halla, sey i mə lim Bay tə Bizlaf za ndagwa.»
Musa abə Eliya i kəzlap abə Yesu
(Matta 17:1-8; Markus 9:2-8)
28A ɗal mbeh kwata waŋ jamaakaɗ abə dawaŋ tə mbiŋ mə zlap ma iyi wa seh, a ŋgasl Piyer, Yahwana liŋ Yakuba, a tap əŋ wuzum ley ɗalaha mbuh a namba. 29Əŋ mbamba, mbiŋ a kəɗal mbuh, nje ŋga a buw, rukut ŋga a buw kʉkweɗek ndeɗndeɗ. 30Mbehmbeh mba, hedi iyi bək i kəzlap abə mbiŋ, ar Musa abə Eliya. 31I təɗaha abə waɗ tə Bizlaf, i kəzlap a talaŋ nda ŋga tə əŋ məŋhayak mə nda i ɗal tə əŋ Urusalima. 32Piyer abə hedi tə a kelek iyi i kəwaŋ falalaŋ. Ama i fəɗaha, i gər waɗ tə Yesu abə hedi iyi bək magar tə abə mbiŋ iyi. 33Əŋ hedi sə bək iyi sey, i kənda i gar tata za a kelek Yesu seh, Piyer a zlapaŋgu, a zla: «Bay tini, səntaŋ seh, nakwa iyi nja a nawa. Mazukwa i ker biŋ iyi maakaɗ, ntaɗ əŋ hwa, ntaɗ əŋ Musa, ntaɗ əŋ Eliya.» Ama Piyer a kəsəŋ ma mbiŋ mə zlap səku. 34Əŋ Piyer a kəzlap mənaŋ wa seh, mekwetene a ndaha, a bərəɗta abə ŋgiseŋ ŋga. Ləndəŋ kəɗalaŋta za əŋ tata i mə təɗ əŋ mekwetene. 35Wula a zlimehe əŋ mekwetene sey, a zla: «Wawa, ar Mbu na, sa mə mayu, hi teheŋ zləm.» 36Əŋ wula mə zlimehe ta seh, i kəlim hedi par halla, sey Yesu taataɗ ŋga dap. Gula ŋga iyi i nja tete, əŋ hala ta mba, i kəgiz məsəkəŋ i mə lim iyi wa əŋ kwa viyey seh halla.
Yesu a mbəl mbu tə abə mimiɗ madawar tə əŋ talaŋ
(Matta 17:14-18; Markus 9:14-27)
37Garaha kafa ta, əŋ tata i mə bəreŋgehe tə a wuzum seh, hedi makwas iyi i ndaha, i gbamaŋ talaŋ əŋ Yesu. 38Əŋ faŋw tə hedi makwas iyi ta hedi məzəwindi aka, a mar ley ja varay, a zla: «Metir, sa kəɗalah mbuh, səŋgaka nje həhər a mbu na wa, ar mbu na ntaɗ wa dap malay. 39Əŋ pis par mimiɗ madawar ta, kəmaraŋ za seh, viyu a kəja varay, a huɓəlu abə fagay, a kəɗalaŋ məsləsləf a pakwam ŋga, a kəzləŋgaŋ takwaŋ mbeh səku, a nda i yaku ha tuwah tuwah. 40Sa kərək gula təkwa iyi za amba ley gam mimiɗ madawar ta, ama i gula i gamu səku.» 41Yesu a ziŋgeŋta zlap, a zla: «Heni hedi madawar iyi, mə kuw ma səku iyi, sa nda i nja abə heni waŋ baha veney? Sa nda i ɓəsaheni waŋ baha veney?» Ɓa, Yesu a zlapaŋ əŋ hedi ta, a zla: «Daha mbu təkwa ta əŋ nawa.» 42Əŋ mbu sey, a kəndaha seh, mimiɗ tə abə ndəra dəlay sey, dəɗək, a dəɗəku əŋ teyek, ɓa, a huɓəlu abə fagay. Ama Yesu a bəbəc mimiɗ tə abə ndəra dəlay ta, a mbəl mbu ta, ɓa, a vəlaŋgu əŋ baba ŋga. 43Tata fuk, i kəhar za məŋgəvday fagay tə Bizlaf.
Yesu a giz məc ŋga əŋ ŋgas bək
(Matta 17:22-23; Markus 9:30-32)
Əŋ hedi fuk i mə har a məsəkəŋ Yesu mə ɗal wa, ɓa, a zlapaŋta əŋ gula ŋga iyi, a zla: 44«Hi teh zləm lawlaw a ma sa mə nda i gizeheni mənjawa: I ber Mbu tə Hedi za əŋ ndəra hedi iyi.» 45Ama gula ŋga iyi i kəzlim ma ta halla, məŋgəvday ma ta mə tak pəl, mə ɓehi a tata, amba i mba i zlimʉ səku. I kələndəŋ za ley ɗəpu a ma ta.
Pay səndawl seh, viyey?
(Matta 18:1-5; Markus 9:33-37)
46Gula tə Yesu iyi i ɗəp wucum əŋ faŋw tata, ley səŋ səndawl tə əŋ faŋw tata seh, viyey? 47Yesu a kəsəŋ wulək tata i mə zlap. Abə dawaŋ ta izey, a ɓət mbu mekedek, a ɗiyu a kelek ŋga, 48a zlapaŋta əŋ gula ŋga iyi, a zla: «Hedi mə kuw mbu wa məŋgəvday miya na, məŋgəvday a kəmbalaku, a kuw mba seh, sa. Hedi mə kuwaka, kəkuw hedi mə ləɓaka za bahayim. Mənaŋ wa izey, hedi mekedek tə əŋ faŋw təheni fuk, səndawl seh, mbiŋ.»
Hedi məsəgər təheni səku, ar hedi təheni
(Markus 9:38-40)
49Yahwana a ɓət zlap, a zlapaŋgu, a zla: «Bay tini, nini kəlim hedi mə gam mimiɗ madawar iyi za abə miya təkwa. Nini mba i taku məŋgəvday a kəzibereh səku, mbə abə nakwa halla.» 50Ama Yesu a ziŋgeŋta zlap, a zla: «Hi mba i takza səku, məŋgəvday hedi məsəgər təheni səku, ar hedi təheni.»
Hedi tə Samariya iyi i ŋgəm ley kuw Yesu səku
51Pis əŋ Yesu mbeh kwata i nda ŋga əŋ wuzlaf seh, a səɓ nəf ley nda ŋga əŋ Urusalima. 52A ləɓ mələɓ iyi a ma ŋga. Hedi iyi ta, ɓa, i nda i təɗ əŋ wuta tə əŋ Samariya ley ɗiyaŋ lay kə nja. 53Ama hedi tə wuta iyi ta i ŋgəm ley kuwu səku, məŋgəvday a kənda əŋ Urusalima. 54Gula ŋga iyi, Yakuba abə Yahwana əŋ tata i mə gər məsəkəŋ mə ɗal ta, i zla: «Bay Bayta, hwa mba nini zlapaŋ əŋ kahaw mə bəreŋgehe a wuzlaf ley var hedi iyi ta wa vaw?» 55Ama Yesu a gər nje kəɗi a tata, ɓa, a gwazlakta. 56I nda tata əŋ wuta məzəwindi.
Hedi mə mba i ziber Yesu iyi
(Matta 8:19-22)
57I mbə əŋ kataf, hedi məzəwindi a zlapaŋ əŋ Yesu, a zla: «Sa zibereh za kwa əŋ lay vitikey hwa mə nda i nda fuk.» 58Yesu a ziŋgeŋ zlap, a zla: «Bulway iyi abə jiɓ tata iyi, vigem tə wuzlaf iyi abə ge tata iyi. Ama Mbu tə Hedi seh, lay ley ɗiy talaŋ amba a yip seh halla.» 59A zlapaŋ əŋ hedi par, a zla: «Ziberekʉ.» Ama hedi ta a ziŋgeŋ zlap, a zla: «Bay Bayta, yakaka kataf, sa nda i kaha baba na za ndagwa.» 60Yesu a ziŋgeŋ zlap, a zla: «Yak hedi maməc iyi i mə kah hedi tata maməc iyi, ama hwa, nda i giz ma tə Bay tə Bizlaf.» 61Hedi məzəwindi baha, a zlapaŋgu, a zla: «Sa zibereh za, waa Bay Bayta. Ama yakaka kataf, sa nda i gizeŋta za əŋ hedi tə ge tini iyi ndagwa, sa cu na i zibereh.» 62Yesu a ziŋgeŋ zlap abə ma marərək, a zla: «Hedi kəɗəs abə zla iyi, ɓa, a gər nje əŋ dawaŋ seh, hedi ta mba a gula i ɗal kəzəɗ tə Bay tə Bizlaf halla.»
ទើបបានជ្រើសរើសហើយ៖
Luka 9: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
