Luka 23
23
Yesu mbə a ma tə Pilatu
(Matta 27:1-2, 11-14; Markus 15:1-5; Yahwana 18:28-38)
1Hedi iyi fuk i gar, i deɓ Yesu a ma tə Pilatu. 2A namba, i mar ley bərəslaŋ ma, i zla: «Nini lim hedi wa, a kəgayanini hayak, a kətak hedi iyi ley min budu əŋ Kaysara, bay səndawl tə a talaŋ bay iyi tə Rawma, a kəzlap mbiŋ abə talaŋ ŋga seh, ar Almasihu, bay.» 3Pilatu a ɗəpu, a zla: «Hwa seh, bay tə Yahuda iyi məndiwiŋ vaw?» Yesu a ziŋgeŋ zlap, a zla: «Ar mənaŋ hwa mə zlap mba#23:3 Matta 27:11..» 4Abə dawaŋ ta izey, Pilatu a zlapaŋta əŋ hedi səndawl iyi tə a talaŋ hedi iyi i mə ɗal kukus əŋ Bizlaf liŋ əŋ hedi makwas tə a namba iyi fuk, a zla: «Sa kəlim hem a hedi wa, amba ley pekʉ seh halla.» 5Ama i kəceh ley zlap, i zla: «A kəcur hedi iyi abə sərək ŋga əŋ hayak tə Yahudiya fuk, mar tə əŋ hayak tə Galili, ha mənjawa, a gwaraha əŋ nawa.»
Yesu mbə a ma tə Hirudus
6Əŋ Pilatu mə zlim ma iyi ta wa seh, a ɗəp, a zla: «Hedi wa seh, ar lə Galili məndiwiŋ vaw?» 7Əŋ mbiŋ mə zlim Yesu a ndaha əŋ hayak tə bay Hirudus, ɓa, a ləɓaŋza əŋ Hirudus, məŋgəvday əŋ waŋ iyi ta mba, Hirudus mbə əŋ Urusalima. 8Əŋ Hirudus mə lim Yesu seh, kəsəsəm za mbeh səku, məŋgəvday mar zlezle, a kəmba i limʉ, məŋgəvday a kəzlim i kəzlap a talaŋ ŋga, a cek seh a lim Yesu a ɗal mazla par za. 9Kəɗəpza za abə ɗəp iyi mbeh səku, ama Yesu kəziŋgeŋ zlap halla səlak. 10Hedi səndawl iyi tə a talaŋ hedi iyi i mə ɗal kukus əŋ Bizlaf abə metir tə ma majaw iyi i mbə a namba. I kəvəlaŋ hem abə fagay. 11Hirudus abə sewje ŋga iyi i ɓasaŋ a talaŋ, i ru. Ɓa, i ndəkaŋ rukut səntaŋ mawaɗ a wucum, i ziŋgʉ əŋ kelek Pilatu. 12A pis mba, Hirudus abə Pilatu i kəɗal maday za, məŋgəvday zlezle seh, i kəzlar nje səku.
I mbəzlaŋ ma a talaŋ Yesu, mbəzl ma kə ja
(Matta 27:15-26; Markus 15:6-15; Yahwana 18:39; 19:16)
13Pilatu a kwas hedi səndawl iyi tə a talaŋ hedi iyi i mə ɗal kukus əŋ Bizlaf, talaŋ habay iyi abə hedi iyi fuk, 14a zlapaŋta, a zla: «Heni dahaka hedi wa seh, hi zla a kəgay hayak. Ehe, sa kəɗəpza za a ma təheni, sa kəlim hem ŋga, a talaŋ ma heni mə dahaza wa seh halla. 15Hirudus bahayim, kəlim hem ŋga seh halla, məŋgəvday a ɗek, kəziŋgehew za əŋ kelek takwa. Hedi wa, məndiwiŋ kəɗal hem tiɗe amba ley ja seh halla. 16Sa nda i kəlapu, ɓa, sa yaku». [17Məŋgəvday əŋ gugway tə Paska mə ɗal fuk, sey Pilatu a pəlaŋta#23:17 Matta 27:15; Markus 15:6. hedi ntaɗ tə əŋ daŋgay.#23:17 Daŋgay, aka səku, lay kə pek hedi iyi.]
18I mar ley ja varay abə fagay, tata fuk, i zla: «Ja hedi wa! Yakanini Barabbas!» 19Barabbas wa, i nahaw əŋ daŋgay#23:19 Daŋgay, aka səku, lay kə pek hedi iyi. məŋgəvday kəbim hedi iyi za ley ɗal pakwam əŋ berne, baha, kəja hedi za. 20Pilatu a zlapaŋta baha, məŋgəvday a mba i yakaha Yesu. 21Ama i ja varay abə fagay, i zla: «Daru a mpay mazlaŋgal! Daru a mpay mazlaŋgal!» 22Pilatu a zlapaŋta, əŋ ŋgas maakaɗ, a zla: «Hedi ta mə ɗal hem seh vitikey? Sa kəlim hem a mbiŋ ha kəhwas ley ju seh halla. Sa nda i kəlapu, ɓa, sa yaku.» 23Ama i ceh ley ja varay abə fagay, i ɗəpu mə daru a mpay mazlaŋgal ha varay tata ta, kədayaŋ fagay za. 24Abə dawaŋ ta, Pilatu a kuw ley ɗal mənaŋ tata mə ɗəp. 25A pəl hedi, tata i mə ɗəp sey. I nah hedi ta əŋ daŋgay seh, məŋgəvday mbiŋ mə bim hedi iyi ley ɗal pakwam liŋ mbiŋ mə ja hedi. Yesu izey, a vəlaŋta amba i ɗalaŋ məsəkəŋ mənaŋ tata mə mba.
Dar tə Yesu a mpay mazlaŋgal
(Matta 27:32-44; Markus 15:21-32; Yahwana 19:17-27)
26Əŋ tata i kədeɓ Yesu seh, i gbam talaŋ abə Simaŋw, hedi tə Sirene, a kəndaha a damu. I məlu, i ɗiyaŋ mpay mazlaŋgal sey a talaŋ ŋga, amba mə ɓətahaw kəɗi dawaŋ Yesu.
27Hedi makwas iyi i kəziber Yesu, wala iyi i kətaw nəf tata iyi, i kəhaŋ məŋgəvday mbiŋ. 28Yesu a buw nje kəɗi a tata, a zlapaŋta, a zla: «Wala tə Urusalima iyi, hi mba i haŋ məŋgəvday sa səku, ama i haŋ məŋgəvday talaŋ təheni abə məŋgəvday wuziyi təheni iyi. 29Məŋgəvday pis ta, a hwasaha za, i zlap za: “Səsəm aka əŋ wala ndəle iyi abə əŋ wala kəter ley mbuw halla iyi liŋ əŋ wala iyi i kəter ley vəl wa tata iyi əŋ wuziyi halla səlak.” 30Abə dawaŋ ta izey, hedi iyi i nda i zlapaŋta əŋ wuzum iyi, i zla: “Hi hurumaha a talaŋ tini!” Abə əŋ kwaɗahw iyi, “Hi dəpanini!” 31Əŋgah i kəɗalaŋ məsəkəŋ madawar za mənaŋ wa əŋ mpay sə ndeɓek seh, kaa, i nda i ɗalaŋ əŋ mpay mahwal seh viŋgey?» 32I kədaha hedi madawar iyi bək za bahayim, amba i jata abə Yesu a lay ta.
33I gwar a lay i mə ɗafaŋ ma Kirŋgisl tə Talaŋ seh, i daru a namba abə hedi madawar sə bək iyi sey fuk, ntaɗ kəɗi kəv tə ndəra zəma, ntaɗ kəɗi kəv tə ndəra gula, kwa viyey a mpay mazlaŋgal bahayim. 34Yesu a zlap izey, a zla: «Babay, yakaŋta hem tata, məŋgəvday i kəsəŋ məsəkəŋ tata i mə ɗal səku.» I ɓiz rukut ŋga iyi əŋ faŋw tata abə ley ɗal caca#23:34 Jabura 22:19.. 35Hedi makwas iyi i mə geri a namba, i kəgəru. Talaŋ habay tə Yahuda iyi i kəɓasaŋ a talaŋ#23:35 Jabura 22:8-9., i zla: «Kəreh hedi məzəwindi iyi za, mə reh talaŋ ŋga yimah, əŋgah mbiŋ Almasihu, hedi mamay tə Bizlaf seh!» 36Sewje iyi bahayim i ɓasaŋ a talaŋ, i kərəɗaha əŋ kelek ŋga, i vəlaŋ mavu sə kuyiŋ#23:36 Jabura 69:22., i zlapaŋgu, i zla: 37«Əŋgah hwa bay tə Yahuda iyi seh, reh talaŋ təkwa izey maa!» 38I kəwuzlel za a kwambum kə wuzlel i daru a mpay mazlaŋgal, i mə zlaŋgal Yesu tə a ɗek, i zla: «Hedi wa, ar bay tə Yahuda iyi.»
39Hedi ntaɗ əŋ faŋw tə hedi madawar iyi madar tə abə Yesu, a ra Yesu bahayim, a zla: «Hwa seh, Almasihu səku vaw? Reh talaŋ təkwa, ɓa, hwa rehenini bahayim!» 40Ama hedi məzəwindi a vəlaŋ hem, a zla: «Hwa mə deri mənaŋ mbiŋ bahayim. Hwa kələndəŋ Bizlaf səku vaw? 41Tə tamu seh, i mbəzlanamu ma tiɗe abə kəzəɗ tamu, ama mbiŋ seh, kəɗal məsəkəŋ madawar halla.» 42Ɓa, a zlapaŋgu, a zla: «Yesu, səŋ kenek ka abə sa, əŋ pis hwa mə nda i ndaha ley zəm bay təkwa.» 43Yesu a ziŋgeŋ zlap, a zla: «Sa kəzlapah məndiwiŋ, eci, hwa nja za abə sa əŋ lay sə ləleŋ tə wuzlaf.»
Məc tə Yesu
(Matta 27:45-56; Markus 15:33-41; Yahwana 19:28-30)
44A ɗal mbeh kwata pis cakacak, ləvəŋ a ɗal əŋ hayak ta fuk, ha a gwar njamndi maakaɗ tə məcukahw, 45pis kəbuw za. Abə dawaŋ ta, rukut meker lay tə əŋ biŋ kə ɗal kukus əŋ Bizlaf#23:45 Təɗaha tə hedi iyi 26:31-33., a ŋgwahak wuɗak bək. 46Yesu a ja varay abə fagay, a zla: «Waa Baba na, sa kəyakah nəp na əŋ ndəra təkwa#23:46 Jabura 31:6..» Abə dawaŋ tə zlap wa, məc a məc ŋga. 47Səndawl tə sewje iyi temere tə Rawma, a gər məsəkəŋ mə ɗal tə a namba ta seh, ɓa, a həmən Bizlaf, a zla: «Məndiwiŋ, hedi wa, ar hedi sə delele.» 48Hedi makwas tə a namba iyi, i gər məsəkəŋ mə ɗal ta, ɓa, i ziŋ tata əŋ wuta, nəf a dəmaŋta, i kətaw nəf tata. 49Maday tə Yesu iyi fuk, abə wala mə ziberehew iyi mar tə əŋ Galili, i gar abə guduk ta, i kəgər məsəkəŋ mə ɗal tə a namba#23:49 Jabura 38:12; Luka 8:2-3..
Kah tə Yesu
(Matta 27:57-61; Markus 15:42-47; Yahwana 19:38-42)
50Hedi məzəwindi aka, miya ŋga Yusufa, hedi ntaɗ tə əŋ faŋw tə hedi səndawl mə ɗal yawa kə mbəzl ma iyi, ar hedi səntaŋ, sə delele, 51kəɗiy wulək ŋga əŋ wereh tata abə əŋ kəzəɗ tata seh halla. Mbiŋ seh, ar hedi tə Arimatiya, berne tə Yahuda iyi#23:51 Matta 27:57., a kəgəbar Bay tə Bizlaf. 52Hedi ta a nda əŋ kelek Pilatu, a ɗəp wucum tə Yesu. 53A bəreŋgehew a mpay mazlaŋgal, a paɗu abə rukut lawayaŋ#23:53 Rukut lawayaŋ, mənaŋ zlap ta, rukut sə kweɗek kə paɗ məce., a ɗiyu əŋ jiɓ mara tə a kefeɗ. Ra ŋga, i kəkah hedi a ɗəməŋ halla. 54Ar əŋ pis tə luma Gazawa. Pis kə yip mbeh kwata i gwaraha. 55Wala iyi i mə laha Yesu mar tə əŋ Galili, i ziber Yusufa, i wuzeɗ nje əŋ talaŋ jiɓ ta ley gər i waŋ wucum tə Yesu a ɗəməŋ seh, viŋgey. 56Ɓa, i ziŋ tata əŋ wuta, i slaha wucum abə mel mə njif mənaŋ ɓurdi ley takwaɗaŋ a wucum tə Yesu. Abə dawaŋ ta, i yip əŋ pis kə yip mənaŋ ma majaw mə zlap.
ទើបបានជ្រើសរើសហើយ៖
Luka 23: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
