Luka 17
17
Zlap a talaŋ ley yak hem
(Matta 18:6-7, 21-22; Markus 9:42)
1Yesu a zlapaŋta əŋ gula ŋga iyi, a zla: «Məndiwiŋ məsəkəŋ ley bim hedi iyi hwayhway ley təɗ əŋ hem seh aka. Ama tuwah a ndaha za a talaŋ hedi mə bim hedi iyi ley ɗal hem. 2Gelɓe əŋ mbiŋ i mə jawaŋ nvəŋ səndawl əŋ wula, ɓa, i nahaw əŋ talafay a talaŋ mbiŋ mə nda i bim hedi mekedek ntaɗ əŋ faŋw tə hedi mə kuw ma na iyi. 3Hi sla wucum a talaŋ təheni lawlaw! Əŋgah zliŋgeh kəɗal hem za seh, hemʉ. Əŋgah kəsəŋ hem ŋga za seh, yakaŋ hem ŋga ta. 4Əŋgah kəɗalah hem za ŋgas dʉsəlʉɗ əŋ waŋ ntaɗ, kəziŋgehe əŋ kelek təkwa bahayim ha ŋgas dʉsəlʉɗ ta, a zlapah, a zla: “A mbuh, sa kəsəŋ hem na za, yakaŋ hem ŋga ta.”»
Kuw ma
5Mələɓ iyi i zlapaŋ əŋ Bay Bayta, i zla: «Fəfəlanini kuw ma tini.» 6Bay Bayta a ziŋgeŋta zlap, a zla: «Əŋgah kuw ma təheni mbizek mənaŋ mbu tə veŋcehew#17:6 Matta 17:20. aka seh, heni gula i zlapaŋ əŋ mpay wa: “Dəɗ təkwa za a lay wa, nda i dar təkwa əŋ talafay”, a kuwaheni ma za.»
Kəzəɗ tə hedi mə ɗal kəzəɗ
7«Ar viyey əŋ faŋw təheni abə gula ŋga, a kəɗəsaŋgu əŋ lay, aka səku a kəjaŋgaŋ ŋhwa iyi. Əŋ mbiŋ mə limʉ, a kəziŋgehe a damu, bay ŋga, a zlapaŋgu: “Ndaha viyu, nja ley zəm wuda za vaw”? 8Mənaŋ mba səku, ɗəba a nda i zlapaŋ seh: “Buw rukut təkwa, ndaha ley vəlaka məsəkəŋ kə zəm ha əŋ sa mə cukwaɗ ley zəm wuda abə ley sa məsəkəŋ. Abə dawaŋ ta, hwa bahayim, hwa zəm wuda, hwa sa məsəkəŋ izey.” 9Bay ta, a ɗalaŋ sʉse za əŋ gula ta, məŋgəvday kəɗalaŋ kəzəɗ za mənaŋ mbiŋ mə ɗəpu ley ɗal wa za vaw? 10Mənaŋ mba bahayim abə heni, əŋ heni kəɗal kəzəɗ tə Bizlaf mə vəlaheni fuk za seh, hi zlap: “Nini seh, hedi mә ɗal kәzәɗ iyi haya, mәŋgәvday nini kəɗal kәzәɗ i mә vәlanini ley ɗal dap.”»
Yesu a mbəl hedi kwalkwala iyi wam
11Əŋ Yesu a kənda əŋ Urusalima, a taŋ kəɗi əŋ hayak tə Samariya abə tə Galili. 12A təɗ əŋ wuta məzəwindi aka, hedi kwalkwala iyi wam i ndaha ley gbamaŋ talaŋ. I gar abə guduk ta#17:12 Matta 8:2., 13ɓa, i ja varay, i zla: «Yesu, Bay səndawl, səŋganini nje həhər!#17:13 Matta 9:27; 15:22; Luka 18:38.» 14Əŋ Yesu mə gərta seh, ɓa, a zlapaŋta, a zla: «Hi nda i gizeŋta wucum təheni iyi əŋ hedi mə ɗal kukus əŋ Bizlaf iyi.» Əŋ tata i kənda əŋ namba ta seh, i gər wucum tata i kəsəraɓ cuza. 15Hedi ntaɗ əŋ faŋw tata əŋ mbiŋ mə gər wucum ŋga kəsəraɓ cuza seh, ɓa, a ziŋgehe, a kəhəmən Bizlaf abə fagay. 16A dar malakw a ma tə Yesu, tik talaŋ əŋ teyek, a ɗalaŋ sʉse. Hedi ta seh, ar lə Samariya. 17Abə dawaŋ ta izey, Yesu a ɗəp, a zla: «Naa, wam tata iyi fuk i kəsəraɓ cuza? Kaa, cafaɗ dakayta iyi seh, i mbə a tikey? 18Əŋ faŋw tata fuk wa seh, hedi mə wulək ley ziŋgehe amba ley ɗalaŋ sʉse əŋ Bizlaf seh halla, sey hedi madaway wa dap vaw?» 19Ɓa, Yesu a zlapaŋ əŋ lə Samariya sey, a zla: «Gar, nda təkwa, kuw ma təkwa kəreheh za.»
Ndaha tə Bay tə Bizlaf
(Matta 24:23-28, 37-41)
20Farisa iyi i ɗəp Yesu, i zla: «Bay tə Bizlaf a nda i ndaha seh, a pipey?» A ziŋgeŋta zlap, a zla: «Bay tə Bizlaf a ndaha mənaŋ məsəkəŋ hedi mə nda i gəru seh halla. 21Hedi gula i zlap: “Ehe mbə ceh”, aka səku “Mbə cuwa” səku. Məŋgəvday Bay tə Bizlaf mbə əŋ faŋw təheni.»
22Ɓa, Yesu a zlapaŋta əŋ gula ŋga iyi, a zla: «Pis ta a ndaha za, hi kəmba i gər Mbu tə Hedi əŋ waŋ ntaɗ, ama heni limʉ halla. 23I zlapaheni za: “Ehe, mbә ceh!” Aka sәku: “Mbә cuwa!” Ama hi mba i nda әŋ namba sәku, hi mba i hiy əŋ namba səku. 24Mənaŋ vaŋ mə səsəm mə waɗ lay tə wuzlaf, mar tə əŋ kəv tə wuzlaf wa, ha əŋ kəv cuwa, mənaŋ mba, Mbu tə Hedi mə nda i ziŋgehe əŋ pis ŋga. 25Ama a zləŋ takwaŋ mbeh səku za ndagwa. Baha, hedi mənjawa iyi i yakza za. 26Məsəkəŋ mə ɗal tə əŋ pis tə Nuhu, a ɗal za mənaŋ mba, əŋ pis kə ziŋgehe tə Mbu tə Hedi. 27Hedi iyi i kəzəm məsəkəŋ, i kəsa məsəkəŋ, i kəɓət wala iyi, i kəɓət wala iyi əŋ wuziyi tata iyi, i kəvəl hazləma tata iyi əŋ ge muwul iyi, ha əŋ pis Nuhu mə təɗ əŋ kambuwal səndawl. Abə dawaŋ ta izey, vaŋ bayta a zah, a dənahta fuk. 28A nda i ɗal baha mənaŋ məsəkəŋ mə taŋ tə əŋ va tə Ludu: Hedi iyi i kəzəm məsəkəŋ, i kəsa məsəkəŋ, i kəsəkəm məsəkəŋ iyi, i kəber məsəkəŋ iyi, i kəŋgəɓ mpay iyi, i kələm ge iyi. 29Ama əŋ pis Ludu kətəɗaha ŋga cuza a Sawdawma seh, Bizlaf a zahaha kahaw mənaŋ vaŋ a wuzlaf abə məsəkəŋ mə kuw kahaw, kədənahta fuk. 30A ɗal za mənaŋ mba, əŋ pis Mbu tə Hedi mə nda i təɗaha.
31«A pis ta mba, hedi mba, mbə a mədigiɗ, a mba i ziŋgehe ley ɓət məsəkəŋ ŋga tə biŋ iyi səku ba, mənaŋ mba bahayim, hedi mba, mbə əŋ lay ŋga a damu, mə mba i ziŋgehe əŋ wuta səku ba. 32Hi səŋ kenek a məsəkəŋ mə taŋ tə abə wala tə Ludu#17:32 Gər əŋ Mar ta: 19:26.! 33Hedi mə pələk ley reh mədəŋcur ŋga, a kuɗəpza za, ama hedi mə nda i kuɗəp mədəŋcur ŋga seh, a limza za. 34Sa kəzlapaheni, əŋ njaɗu mba, hedi iyi bək i waŋ za a kwambum ntaɗ, i ɓət ntaɗ za, i yak hedi məzəwindi za. 35Wala iyi bək i haz za a lavar ntaɗ, i ɓət ntaɗ za, i yak wala məzəwindi za. [36Hedi iyi bək i mbə əŋ lay ntaɗ a damu, i ɓət ntaɗ za, i yak ntaɗ za#17:36 Matta 24:40..]»
37Gula ŋga iyi i ɗəpu, i zla: «Məsəkəŋ ta a nda i ɗal seh a tikey, Bay Bayta?» A ziŋgeŋta zlap, a zla: «Əŋ lay məsəkəŋ maməc seh, zləbay iyi i kwas za a namba.»
ទើបបានជ្រើសរើសហើយ៖
Luka 17: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
