Luka 12
12
Hi sla wucum a hedi mə zlap ganaɗ sə bək bək iyi
(Matta 10:26-27)
1Əŋ waŋ ta mba, hedi iyi mbeh səku i kəkwas za, ha i kədak ŋgas a ŋgas tata iyi, kwa lay ley gar halla. Yesu a mar ley zlapaŋta əŋ gula ŋga iyi ndagwa, a zla: «Hi sla wucum a is#12:1 Markus 8:15; Matta 16:6. tə Farisa iyi, mənaŋ zlap ta seh, hedi mə zlap ganaɗ sə bək bək iyi. 2Məsəkəŋ maɓah iyi fuk i təɗaha za a palah, məsəkəŋ hedi iyi i mə səŋ səku fuk, i səŋta za. 3Məŋgəvday a ɗek, məsəkəŋ iyi mbeh səku heni mə giz tə abə njaɗu tə əŋ ləvəŋ mba, hedi iyi fuk i zlimta za abə pis. Ma iyi mbeh səku heni mə sisek əŋ zləm tə abə ɓah a biŋ sey, i gizta za abə fagay əŋ lay kə ɗaf ma iyi.»
Səntaŋ ley ləndəŋ seh, abə viyey?
(Matta 10:28-31)
4Yesu a zlapaŋta, a zla: «Sa kəzlapaheni maday na iyi, heni mba i ləndəŋ abə hedi mə gula i ja wucum iyi səku, abə dawaŋ ta mba, i gula i ɗal məsəkəŋ mə day mba səku ba. 5Sa nda i gizeheni hedi, heni mə nda i ləndəŋ tə abə mbiŋ, ar Bizlaf. Kwa abə dawaŋ tə məc təheni, mbiŋ abə mazla ley nahaheni əŋ kahaw mə cukwaɗ səku səlak. Ayaw, sa kəzlapaheni, a kəlim seh, hi ləndəŋ abə mbiŋ. 6I kəber vigem mekedek mekedek iyi juɓum, a dala bək səku vaw? Ama Bizlaf a ɗal talaŋ weseŋ abə kwa ntaɗ seh halla. 7Heni bahayim, kwa bujuguɗ tə a talaŋ təheni seh, mə ŋgiɗi ntaɗ ntaɗ fuk. Heni mba i ləndəŋ səku, heni Bizlaf a kəmbalaheni day a vigem mekedek mekedek iyi ta mba.»
Ley zlap a ma tə hedi iyi, sa seh, sa hedi tə Yesu Almasihu
(Matta 10:32-33; 12:32; 10:19-20)
8«Sa kəzlapaheni, hedi mə zlap a ma tə hedi iyi, a kəsəŋgaka seh, Mbu tə Hedi bahayim, a nda i zlap a ma tə mələɓ tə Bizlaf iyi tə wuzlaf sa kəsəŋgu. 9Ama hedi mə zlap a ma tə hedi iyi, a kəsəŋgaka#12:9 2 Timawte 2:12. səku seh, Mbu tə Hedi a nda i zlap a ma tə mələɓ tə Bizlaf iyi, sa kəsəŋza səku bahayim. 10Hedi mə zlap ma madawar a talaŋ Mbu tə Hedi seh, Bizlaf a yakaŋ hem ŋga za. Ama hedi mə ra Mimiɗ sə Kweɗek seh, Bizlaf a kənda i yakaŋ hem ŋga halla səlak.
11«Əŋgah i kədeɓeheni əŋ biŋ iyi kə ɗal mbuh əŋ Bizlaf, aka səku a ma tə talaŋ habay iyi abə a ma tə bay iyi seh, talaŋ təheni a mba i wuzlaɗ a ma ley reh seh viŋgey səku, aka səku hi nda i zlap seh viŋgey səku, 12məŋgəvday Mimiɗ sə Kweɗek a sərəkaheni ma heni mə nda i zlap za əŋ hala ta mba#12:12 Matta 10:19-20; Markus 13:11; Luka 21:14-15..»
Ma marərək a talaŋ hedi tə abə məsəkəŋ mə tak burŋguzl
13Hedi ntaɗ əŋ faŋw tə hedi makwas iyi, a zlapaŋ əŋ Yesu, a zla: «Metir, zlapaŋ əŋ zliŋmana ley ɓizekenini məsəkəŋ baba tini mə yakanini.» 14Yesu a ziŋgeŋ zlap, a zla: «Mə ɗiyaka ley mbəzl ma, aka səku ley ɓizekenini məsəkəŋ təheni seh, viyey?» 15Abə dawaŋ ta, a zlapaŋta, a zla: «Hi sla wucum! Hi jəɗ talaŋ təheni lawlaw a mba məsəkəŋ iyi kwa vitikey, məŋgəvday məsəkəŋ a kəvəl mədəŋcur əŋ hedi səku, kwa hedi tə abə məsəkəŋ ŋga iyi mbeh səku.»
16Ɓa, a zlapaŋta abə ma marərək wa, a zla: «Hedi tə abə məsəkəŋ məzəwindi aka, lay ŋga iyi i kəɗal məsəkəŋ za mbeh səku. 17A wulək əŋ nəf ŋga, a zla: “Sa nda i ɗal seh, viŋgey? Məŋgəvday lay ley ɗiy məsəkəŋ na iyi wa fuk seh halla.” 18Abə dawaŋ ta, a zlap, a zla: “Ehe! Məsəkəŋ sa nda i ɗal. Sa nda i ŋgwaf tebeŋ na iyi, sa ləm par iyi bayta bayta, ɓa, sa jam ndəri na abə məsəkəŋ na iyi fuk əŋ ɗəməŋ. 19Abə dawaŋ ta, sa nda i zlapaŋ əŋ talaŋ na: Hwa abə məsəkəŋ iyi mbeh səku, i mə ɓehi tə va mbeh səku. Yip təkwa, zəm məsəkəŋ, sa məsəkəŋ, ɗal bəzar.” 20Ama Bizlaf a zlapaŋgu, a zla: “Hedi mə tak burŋguzl, əŋ njaɗu tə eci wa, sa ɓət nəp təkwa za, məsəkəŋ təkwa macakal iyi wa, mə nda i sla a ɗek seh, viyey?”» 21Yesu a zlap baha, a zla: «Ehe, mənaŋ wa, a nda i ɗal abə hedi mə cakal məsəkəŋ əŋ talaŋ ŋga, kəmbaɗ əŋ hedi tə abə məsəkəŋ a ma tə Bizlaf seh halla#12:21 Matta 6:20..»
Hi ɗiy wulək təheni a Bizlaf
(Matta 6:25-34)
22Ɓa, Yesu a zlapaŋta əŋ gula ŋga iyi, a zla: «Ehe, sa kəzlapaheni: Hi mba i wulək a məsəkəŋ kə zəm, kwa a rukut ley ndək a wucum təheni səku. 23Məŋgəvday nəp pay day a məsəkəŋ kə zəm, wucum pay day a rukut. 24Hi gər məŋgərhak iyi, i kəzlək səku, i kəcakal məsəkəŋ səku, lay kə ɓah məsəkəŋ tata iyi halla, aka səku tebeŋ tata iyi halla, ama Bizlaf a kəvəlaŋta məsəkəŋ kə zəm, heni pay day a vigem iyi halla vaw? 25Əŋ faŋw təheni wa, hedi mə gula i fəfəl waŋ ŋga mbizek abə wulək ŋga seh, viyey? 26Əŋgah heni gula i ɗal məsəkəŋ kwa mbizek səku seh, kaa, hi wuzlaɗ talaŋ təheni a məsəkəŋ dakayta iyi seh, məŋgəvday a mey? 27Hi gər faŋwfaŋw tə damu iyi i ɗalaha seh, viŋgey? I kəɗal kəzəɗ səku, i kəja rukut səku, ama sa kəzlapaheni: kwa Sulaymanu abə səndawl ŋga fuk kəlim ley ndək rukut səntaŋ mənaŋ faŋwfaŋw ntaɗ əŋ faŋw tata seh halla. 28Bizlaf a kəɗalaŋta faŋwfaŋw əŋ ŋgusawf tə damu iyi eci, ama, mpat bahayim i kʉyta za əŋ kahaw. Əŋgah mənaŋ mba seh, a ndəkaheni rukut day mba seh halla vaw? Heni hedi mə kuw ma ɓəraŋ iyi. 29Hi mba i wulək ley pələk məsəkəŋ kə zəm abə məsəkəŋ kə sa səku, hi mba i wuzlaɗ talaŋ təheni səku. 30Hedi mə səŋ Bizlaf iyi səku tə əŋ məŋhayak wa, tata i mə nda i pələk məsəkəŋ iyi ta mba, a pis ta a pis ta. Ama Baba Bizlaf təheni a kəsəŋ məsəkəŋ heni mə mba. 31Ama hi pələk Bay ŋga ndagwa, abə dawaŋ ta, a vəlaheni məsəkəŋ dakayta iyi za mənaŋ fəfəl.»
Məsəkəŋ maɓah tə a wuzlaf
(Matta 6:19-21)
32«Hi mba i ləndəŋ səku, heni ŋgaɓa mekedek iyi, məŋgəvday kəŋgəmaŋ za əŋ Baba təheni ley vəlaheni Bay ŋga. 33Hi ber məsəkəŋ təheni iyi, hi vəlaŋta dala ta əŋ hedi məstakwaŋ iyi. Hi ɗal gabal tə dala mə cukwaɗ səku, hi cakal məsəkəŋ iyi əŋ lay mə nda i gay səku a wuzlaf. Məŋgəvday məhil iyi i nda əŋ namba halla, kwa guŋkuɗ iyi i gula i gayu səku. 34Məŋgəvday əŋ lay məsəkəŋ təheni iyi tə a namba seh, nəf təheni iyi bahayim i mbə a namba.»
Ma marərək a talaŋ sla wucum ley ɗal kəzəɗ tə Bizlaf
35Yesu a zlapaŋta, a zla: «Hi sla wucum lawlaw ley ɗal kəzəɗ abə lalam təheni iyi i mə besi#12:35 Matta 25:1-13.. 36Hi mbaɗ mənaŋ hedi mə ɗal kəzəɗ iyi, i kəgəbar bay tata mə nda i ziŋgehe əŋ gugway kə ɓət wala, aka səku kə ɓət muwul. Əŋgah kəgwaraha za, kəɗaf ma za a medigiɗ, i rəzaŋ lay za. 37Səsəm əŋ hedi mə ɗal kəzəɗ iyi, əŋgah bay tata a ndaha a limta i kəjəɗ. Sa kəzlapaheni məndiwiŋ, a sla wucum za ley ɗal kəzəɗ, a ɗafaŋta ma za, a ɗiyta za a lay kə zəm, a vəlaŋta məsəkəŋ kə zəm za. 38Səsəm aka əŋ hedi mə ɗal kəzəɗ iyi wa, əŋgah bay tata a ndaha ŋgəlak njaɗu, kwa lay mbeh kwata ley daŋ, a limta i kəjəɗ.
39«Hi zlim lawlaw: Əŋgah hedi lə ge, a kəsəŋ əŋ hala məhil mə nda i ndaha əŋ ge ŋga seh, a yaku ley təɗ əŋ ge ŋga seh halla. 40Heni bahayim, hi sla wucum məŋgəvday Mbu tə Hedi a nda i ndaha seh, əŋ hala heni kəsəŋ səku#12:40 Matta 24:43-44..»
Hedi mə ɗal kəzəɗ səntaŋ abə hedi mə ɗal kəzəɗ madawar
(Matta 24:45-51)
41Abə dawaŋ ta izey, Piyer a ɗəp Yesu, a zla: «Bay Bayta, hwa zlap abə ma marərək wa seh, əŋ nini dap vaw, aka səku əŋ hedi iyi fuk vaw?»
42Bay Bayta a ziŋgeŋ zlap, a zla: «Ar viyey gula sə delele tə abə burŋguzl? Ar hedi, Bay ŋga mə nda i ɗiyu ley jəɗ hedi mə ɗal kəzəɗ iyi, a vəlaŋta məsəkəŋ kə zəm, əŋgah mətis a kəjata. 43Səsəm əŋ hedi mə ɗal kəzəɗ wa, əŋgah bay ŋga a ziŋgehe, a limʉ a kəɗal kəzəɗ ta. 44Sa kəzlapaheni məndiwiŋ, bay ŋga a nda i vəlaŋ məsəkəŋ ŋga iyi fuk əŋ ndəra ŋga. 45Ama əŋgah hedi mə ɗal kəzəɗ ta, a wulək əŋ nəf ŋga, a zla: “Bay na a kənda i ndaha viyu halla”, ɓa, a mar ley taw hedi mə ɗal kəzəɗ muwul abə wala iyi. A kəzəm məsəkəŋ, a kəsa mavu, a kəhuw. 46Abə dawaŋ ta, bay ŋga sey, a nda i ndaha əŋ waŋ vitikey, gula ta kəsla wucum halla, a kəsəŋ əŋ hala vitikey səku. Bay ŋga a nda i gamu, a nda i zləŋgaŋ takwaŋ mənaŋ hedi mə ɗal kəzəɗ madawar iyi. 47Hedi mə ɗal kəzəɗ a kəsəŋ məsəkəŋ bay ŋga mə mba, ama a kəsla wucum ley ɗalu səku, aka səku a kəɗal məsəkəŋ mənaŋ bay ŋga mə mba səku seh, a lim taw za mbeh səku. 48Ama hedi mə ɗal kəzəɗ, mə səŋ məsəkəŋ bay ŋga mə mba səku, a ɗal məsəkəŋ madawar tiɗe ley taw, a lim taw mbizek nawa za dap. Hedi, i mə vəlaŋ məsəkəŋ mbeh səku, i nda i ɗəpza mbeh səku bahayim. Hedi, i mə yakaŋ kəzəɗ mbeh səku ley ɗal, i ɗəpza za mbeh səku bahayim.»
Hedi iyi i wuɗak za məŋgəvday Yesu
(Matta 10:34-36)
49«Sa ndaha seh ley nah kahaw əŋ məŋhayak, sa mba kahaw ta mə bas mbehmbeh wa. 50Batem#12:50 Markus 10:38. tə tuwah sa mə nda i kuw wa, a kəŋgaka talaŋ ha əŋ məsəkəŋ ta mə nda i ɗal. 51Hi wulək seh sa daha zahay əŋ məŋhayak vaw? Mənaŋ mba səku, ama sa ndaha i ɓiz hedi iyi. 52Mar mənjawa, hedi iyi juɓum tə əŋ ge ntaɗ, i ɓiz za. Maakaɗ i zlar nje abə bək halla, bək i zlar nje abə maakaɗ halla. 53Baba, i zlar nje abə mbu ŋgaŋ halla, mbu, i zlar nje abə baba ŋga halla. Mama, i zlar nje abə hazləma ŋga halla, hazləma, i zlar nje abə mama ŋga halla. Mama tə mbu, i zlar nje abə wala tə mbu ŋgaŋ halla, wala tə mbu, i zlar nje abə mama tə muwul ŋga seh halla.»
Səŋ a talaŋ məsəkəŋ mə nda i ɗal
(Matta 16:1-3)
54Yesu a zlapaŋta əŋ hedi makwas iyi baha, a zla: «Əŋgah hi lim gazlavay a kəkafaha kəɗi pis mə ndəv seh, mbehmbeh mba, hi kəzlap, hi zla: “Vaŋ a zah za”, mənaŋ mba, məsəkəŋ ta a kəɗal. 55Əŋgah hi lim mimiɗ a kəɗal kəɗi əŋ teyek bahayim, hi kəzlap, hi zla: “Muwurɓay a ɗal za”, muwurɓay ta, a kəɗal məndiwiŋ. 56Heni, hedi mə zlap ganaɗ sə bək bək iyi, heni gula i səŋ məsəkəŋ mə nda i ɗal tə əŋ məŋhayak abə tə wuzlaf, məŋgəvday a mey, hi səŋ məsəkəŋ mə nda i ɗal sə mbehmbeh wa səku wa?»
Zlar ndəra abə hedi heni mə jəm bək ta
(Matta 5:25-26)
57«Heni abə talaŋ təheni, hi səŋ ley ɗal məsəkəŋ tə abə kataf ta səku seh, məŋgəvday a mey? 58Əŋgah hwa kənda abə hedi heni mə ɗal ma bək ta əŋ lay kə mbəzl ma seh, pələk ley ɗiy ma ta abə mbiŋ mar tə a kataf. Əŋgah halla seh, a nda i deɓeh a ma tə hedi mə mbəzl ma, hedi mə mbəzl ma ta, a nda i vəlah əŋ ndəra sewje iyi. Sewje iyi bahayim i nda i nahah əŋ daŋgay#12:58 Daŋgay, aka səku, lay kə pek hedi iyi.. 59Sa kəzlapah: Hwa təɗaha əŋ daŋgay ta mba seh halla, sey hwa mə min duwa, i mə zibereh ta mba fuk za.»
ទើបបានជ្រើសរើសហើយ៖
Luka 12: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
