Kəzəɗ tə Mələɓ iyi 24
24
Yahuda iyi i wile Pawl a ma tə guverner Felikus
1Waŋ juɓum abə dawaŋ ta, Ananiyas, hedi səndawl tə a talaŋ hedi iyi i mə ɗal kukus əŋ Bizlaf, a gwar əŋ Kaysariya. A ndaha abə hedi mə ɗal yawa dakayta iyi liŋ abə hedi mə səŋ ma majaw, miya ŋga Tertʉllʉs. I wile Pawl a ma tə guverner Felikus. 2Hedi ta, i ɗafaŋ ma Tertʉllʉs, a mar ley vəlaŋ hem, a zla: «Waa Felikus hedi səndawl, məŋgəvday hwa nini kəsəsəm əŋ zahay, ar məŋgəvday səŋ məsəkəŋ təkwa hayak fuk kəɗiy za. 3Kwa a pipey, kwa a tikey fuk, nini kəkuw ma təkwa, nini kəɗalah sʉse. 4Ama sa kəmba i kərəŋgah ha nja gaa səku, məŋgəvday a ɗek, sa kəɗalah mbuh amba hwa tehenini zləm tə nja mbizek. 5Nini gər hedi wa seh, ar hedi madawar tədayday, a kəɗal kurzlay əŋ faŋw tə Yahuda iyi əŋ məŋhayak fuk. Mbiŋ seh, ar talaŋ habay tə hedi mə ziber kataf ley kuɗəp lə Nasaratu iyi#24:5 Matta 2:23.. 6A kəmba i dakal biŋ tə Bizlaf sə kweɗek wa bahayim. Məŋgəvday a ɗek, nini kəməlahaw za. [Nini mba i mbəzlaŋ ma mənaŋ ma majaw tini mə zlap, 7ama Liziyas, hedi səndawl tə a talaŋ sewje iyi a ndaha, a kuwu a ndəra tini abə fagay. 8Abə dawaŋ ta, a zlapaŋta əŋ hedi mə wilʉ iyi i mə dahaw a ma təkwa.] Əŋgah hwa ɗəpza za hwa abə talaŋ təkwa seh, hwa gula i səŋ za, nini wilʉ wa seh, a hem ŋga məndiwiŋ.» 9Talaŋ habay tə Yahuda iyi fuk, i zla: «Tertʉllʉs mə zlap mba seh, ar məndiwiŋ.»
Pawl a kətəl ley zlap ma ŋga iyi a ma tə guverner Felikus
10Guverner a ɗef ndəra a Pawl amba mə zlap. Pawl, a mar ley zlap, a zla: «Sa kəsəŋ hwa kəmbəzl ma a talaŋ hedi tini iyi mar tə va mbeh səku. Ar mənaŋ wa, sa kəvəl talaŋ na za ley zlap ma na iyi a ma təkwa. 11Hwa gula i gər ma ta, hwa abə talaŋ təkwa, kəday waŋ wam a meɗek bək halla əŋ sa mə nda əŋ Urusalima ley dar malakw a ma tə Bizlaf. 12Hedi mə limeke əŋ biŋ tə Bizlaf sa kəɗal yawa abə kwa viyey seh halla, aka səku sa kəbim hedi makwas iyi ley ɗal pakwam seh halla, kwa əŋ biŋ iyi kə ɗal mbuh əŋ Bizlaf, aka səku əŋ berne seh halla. 13Hedi mə zlap ma madawar tə a talaŋ na mənjawa iyi wa fuk, i gula i giz ma ta məndiwiŋ səku. 14Ama sa gula i zlap ma ta mənaŋ wa a ma təkwa: Sa kəɗalaŋ kəzəɗ əŋ Bizlaf tə dide tə dide takwa iyi abə ley ziber kataf tə Bay Bayta. Əŋ tata seh, ar kataf madawar, ama sa seh, sa kəkuw ma mawuzlel tə əŋ Ɗerewel tə ma majaw abə tə hedi mə giz ma abə miya tə Bizlaf iyi za. 15Sa kəɗiy wulək na fuk a Bizlaf. Hedi mə wileke iyi, i kəwulək mənaŋ mba bahayim, ar Bizlaf mə nda i garaha hedi madawar iyi abə hedi səntaŋ iyi əŋ faŋw tə hedi maməc iyi#24:15 Daniyel 12:2.. 16Məŋgəvday a ɗek, sa kətəl ley ɗal fagay hwayhway ley nja abə nəf sə kweɗek kwa hem halla a ma tə Bizlaf abə a ma tə hedi iyi bahayim. 17Abə dawaŋ tə pik tə va mbeh səku a palah, sa kəziŋgehe za əŋ Urusalima ley daha dala kə tər hedi na iyi abə ley vəl məsəkəŋ əŋ Bizlaf. 18Əŋ tata i mə limeke əŋ biŋ tə Bizlaf seh, ehe, kəzəɗ sa mə nja ka i ɗal: Sa kəɗal kukus kə baŋ hem, a namba kwa hedi makwas iyi ntaɗ a kelek na halla, kwa kurzlay halla. 19Ama Yahuda dakayta iyi tə əŋ hayak tə Aziya, i mbə a namba, ar tata i mə nda i ndaha a ma təkwa ley wileke, əŋgah tata abə ma a talaŋ na. 20Aka səku, sey hedi iyi wa, i mə giz a nawa ma madawar vitikey i mə səŋ sa mə ɗal, əŋ tata i mə garaka a ma tə hedi səndawl mə yawa kə mbəzl ma iyi wa. 21Sey ma ntaɗ sa mə zlap abə fagay əŋ sa mə geri a ma tata, sa zla: “Ar seh məŋgəvday sa kəkuw za garaha tə hedi əŋ faŋw tə hedi maməc iyi seh aka, eci, i kəgaraka za ley mbəzlaka ma a talaŋ, a ma təheni wa.”»
22Felikus, mbiŋ a kəsəŋ labara tə kataf tə Bay Bayta lawlaw, a gaɗ ma ta a ma, a zlapaŋta, a zla: «Əŋ hedi səndawl tə a talaŋ sewje iyi gabal Liziyas kəndaha za seh, sa cukwaɗ ma təheni wa za.» 23A zlapaŋ əŋ talaŋ habay tə sewje iyi ley jəɗ Pawl lawlaw əŋ daŋgay, ama mə yakza mbizek mə mba i zləŋgaŋ takwaŋ səku, mə yakaŋ kataf əŋ maday ŋga iyi ley təru.
Pawl mbə a ma tə Felikus abə Durusilla
24Abə dawaŋ ta waŋ mbizek, Felikus a ndaha abə wala ŋga Durusilla, ar lə Yahuda. A ləɓ ley ɗafaŋ ma əŋ Pawl, ɓa, a teheŋ zləm a talaŋ ma mbiŋ mə nda i zlap tə a ma kə kuw ma tə Yesu Almasihu. 25Ama əŋ Pawl a kəzlap a talaŋ ma sə delele, a talaŋ ma kə jaŋ talaŋ liŋ a talaŋ mbəzl ma mə nda i ndaha, Felikus kələndəŋ za, a zlapaŋgu, a zla: «Ga izey mənjawa, hwa gula i nda təkwa, əŋgah sa kəlim kataf za seh, sa ɗafah ma za.» 26A wulək seh Pawl a vəlaŋ dala za, məŋgəvday a ɗek, a kəɗafaŋ ma hwayhway amba i dəm ŋgalaw abə mbiŋ. 27Əŋ va bək mə taŋ mənaŋ wa, ɓa, Pawrkiyus Festus a zəm bay a lay tə Felikus. Ama Felikus ta, a yakaha Pawl əŋ daŋgay, məŋgəvday a mba i səsəm Yahuda iyi.
ទើបបានជ្រើសរើសហើយ៖
Kəzəɗ tə Mələɓ iyi 24: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
