Kəzəɗ tə Mələɓ iyi 22
22
1«Waa zliŋmana iyi abə baba na iyi, hi zlim məsəkəŋ sa mə nda i zlapaheni mənjawa tə a talaŋ ma na iyi.» 2Əŋ tata i mə zlim a kəzlapaŋta abə ma Ibraniŋki seh, i kəfəfəl za ley nja tete baha. Abə dawaŋ ta izey, Pawl a zlap, a zla: 3«Sa seh, sa lə Yahuda, sa mambuwaha tə əŋ Tarsʉs abə tə əŋ Silikiya. Ama sa gəl seh a nawa, əŋ Urusalima, hedi mə sərəkaka ley səŋ ma majaw tə dide tə dide takwa iyi seh, ar metir Gamaliyel. Sa kətəl za mbeh səku ley ɗal kəzəɗ tə Bizlaf abə fagay na fuk, mənaŋ heni mə ɗal mənjawa. 4Sa kəzləŋgaŋta takwaŋ za mbeh səku əŋ hedi mə ziber kataf tə Bay Bayta iyi ha hedi iyi ta i məc. Sa kəməl muwul iyi abə wala iyi za, sa kənahta za əŋ daŋgay. 5Hedi səndawl tə a talaŋ hedi iyi i mə ɗal kukus əŋ Bizlaf abə jam talaŋ tə hedi mə ɗal yawa iyi, i gula i ɗal sedewe na a ma sa mə zlap wa məndiwiŋ. Sa kəkuw ɗerewel za a ndəra tata ley deɓeŋta əŋ zliŋgeŋ iyi tə əŋ Damas. Abə dawaŋ ta izey, sa cuza əŋ Damas, sa mba i məlaha hedi makuw ma tə a namba iyi, ɓa, sa dahata əŋ Urusalima amba ley zləŋgaŋta takwaŋ.»
Pawl a giz buw nja ŋga
(Kəzəɗ tə Mələɓ iyi 9:1-19; 26:12-18)
6«Sa mbə əŋ kataf ley nda əŋ Damas, sa kəkərəɗaha kwata mbehmbeh abə Damas, əŋ pis ɓarakɓarak, mbehmbeh mba, sa lim waɗ səndawl mə ndaha tə wuzlaf, kətuləkaka za abə waɗ ŋga. 7Sa ndəv əŋ teyek, ɓa, sa zlim wula mə zlapaka, a zla: “Sawl, Sawl, hwa təlaka ma seh məŋgəvday a mey?” 8Sa ɗəpu, sa zla: “Hwa viyey, Bay Bayta?” A ziŋgeke zlap, a zla: “Ar sa, Yesu lə Nasaratu, hedi, hwa mə təlaŋ ma wa.” 9Hedi mə ndaha tə abə sa iyi, i kəlim waɗ ta za, ama i kəzlim wula tə hedi mə zlapaka seh halla. 10Sa kəɗəp za, sa zla: “Sa nda i ɗal seh viŋgey, Bay Bayta?” Bay Bayta a ziŋgeke zlap, a zla: “Gar, nda əŋ Damas, a namba i gizeh məsəkəŋ hwa mə nda i ɗal za fuk.” 11Ama waɗ səndawl sey, kəwulufaka nje za, hedi mə ndaha tə abə sa iyi, i məlaka ndəra, i ŋgaslaka əŋ Damas.»
12«A namba, hedi məzəwindi aka, miya ŋga Ananiyas, ar hedi mə ləndəŋ Bizlaf, a kəziber ma majaw tə Musa. Yahuda tə əŋ Damas iyi fuk i kəzlap ma səntaŋ a mbiŋ. 13Kəndaha za ley limeke, a gar a kelek na, a zlapaku, a zla: “Sawl, zliŋmana, nje təkwa mə rəz!” Mbehmbeh mba, nje na a rəz, ɓa, sa kəlimʉ. 14Kəfəfəl za ley zlap baha, a zla: “Bizlaf tə dide tə dide takwa iyi i kəmayah za mar zlezle, amba hwa səŋ mba ŋga, hwa lim hedi ŋga mə ɗal məsəkəŋ tə abə kataf ta, hwa zlim wula ŋga. 15Məŋgəvday a ɗek, hwa mbaɗ za əŋ sedewe ŋga ley giz ma ŋga a ma tə hedi iyi fuk a talaŋ məsəkəŋ hwa mə zlim abə hwa mə gər. 16Mənjawa, hwa gəbar baha seh mey? Gar, kuw batem, baŋ hem təkwa iyi abə ley ɗafaŋ miya tə Bay Bayta.”»
Kəzəɗ tə Pawl
17«Sa kəziŋ za əŋ Urusalima. Əŋ sa kəɗal mbuh əŋ biŋ tə Bizlaf seh, Bizlaf kəgizek məsəkəŋ za. 18Sa kəlim Bay Bayta mə zlapaka za, a zla: “Vaz viyu ley gar təkwa əŋ Urusalima, məŋgəvday hedi tə ɗəməŋ iyi i kənda i kuw sedewe hwa mə nda i ɗal tə a talaŋ na seh halla.” 19Sa ziŋgeŋ zlap, sa zla: “Bay Bayta, i kəsəŋ məndiwiŋ, ar sa mə nda əŋ biŋ kə ɗal mbuh əŋ Bizlaf ley nah hedi makuw ma təkwa iyi əŋ daŋgay, sa kətawta za. 20Əŋ pis i mə ja Etiyen sedewe təkwa seh, sa bahayim, sa mbə a namba. Sa kəɗiy hedi mə ju iyi wa za əŋ hedi səntaŋ iyi, sa kəjəɗ rukut tata iyi za.” 21Abə dawaŋ ta izey, Bay Bayta kəzlapaka za, a zla: “Nda, məŋgəvday sa nda i ləɓah guduk kəɗi əŋ kelek hedi Yahuda iyi səku!”»
Pawl mbə a ma tə talaŋ habay tə sewje iyi
22Hedi makwas iyi i kəteheŋ zlim əŋ Pawl ha əŋ cukwaɗ tə zlap ŋga iyi, ɓa, i mar ley ja varay tata fuk, i zla: «Hi ja ntaŋw tə hedi mənaŋ wa! Hi mba i yakza abə nje səku!» 23I kəja varay, i kəkap rukut tata iyi əŋ wuzlaf, i kətəbəz luguda əŋ wuzlaf. 24Hedi səndawl tə a talaŋ sewje tə Rawma iyi, a zlap ley təɗ Pawl əŋ biŋ tə sewje iyi, ley tawu abə laway amba a səŋgu hedi makwas iyi wa i ja varay a talaŋ ŋga mənaŋ wa seh məŋgəvday a mey. 25Ama əŋ tata i kəjawu ley taw seh, Pawl a zlapaŋ əŋ hedi səndawl tə a talaŋ sewje iyi temere tə a namba, a zla: «Hwa abə kataf ley taw lə Rawma mə tak mbəzl ma ndagwa vaw?» 26Əŋ mbiŋ mə zlim zlap wa seh, hedi səndawl tə sewje iyi ta a nda i gizeŋ əŋ hedi səndawl tə a talaŋ sewje iyi gabal, a zla: «Hwa kəsəŋ məsəkəŋ hwa mə nda i ɗal vaw? Hedi wa, ar lə Rawma!» 27Hedi səndawl tə a talaŋ sewje iyi gabal a ndaha əŋ kelek Pawl, ɓa, a ɗəpu, a zla: «Gizekʉ, hwa lə Rawma məndiwiŋ vaw?» Pawl a ziŋgeŋ zlap, a zla: «Ayaw, sa lə Rawma.» 28Hedi səndawl tə a talaŋ sewje iyi gabal sey, a zlapaŋgu, a zla: «Sa kəgay dala mbeh səku amba ley mbaɗ əŋ lə Rawma.» Pawl a ziŋgeŋ zlap, a zla: «Sa seh, sa lə Rawma, mar ley mbuwaha na.» 29Mbehmbeh mba, hedi mə nda i tawu iyi amba a zlap sey, i nda tata guduk abə mbiŋ. Hedi səndawl tə a talaŋ sewje iyi sey, mbiŋ abə talaŋ ŋga kələndəŋ za bahayim, əŋ mbiŋ mə səŋ Pawl seh, ar lə Rawma. Ama kəjawza cuza abə calalu.
Pawl mbə a ma tə hedi səndawl mə ɗal yawa kə mbəzl ma iyi
30Hedi səndawl tə a talaŋ sewje iyi gabal, a mba i səŋ məndiwiŋ, hedi səndawl tə Yahuda iyi i vəlaŋ hem əŋ Pawl seh a mey. Məŋgəvday a ɗek, garaha kafa ta, a pəl calalu tə Pawl iyi, ɓa, a kwas hedi səndawl tə a talaŋ hedi iyi i mə ɗal kukus əŋ Bizlaf liŋ hedi səndawl mə ɗal yawa kə mbəzl ma iyi fuk. Ɓa, a daha Pawl, a garu a ma tata.
ទើបបានជ្រើសរើសហើយ៖
Kəzəɗ tə Mələɓ iyi 22: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
